22–28 nō Tetepa : « Te fa’anahora’a a te Tamaiti a te Atua »

Te Ha’api’ira’a Tumu ’e te mau Fafaura’a 106–108

I te hi’ora’a mātāmua, e au ra tē fa’atano ra Te Ha’api’ira’a Tumu ’e te mau Fafaura’a 107 i ni’a noa i te fa’anahora’a i te mau tōro’a o te autahu’ara’a mai te hō’ē tino fa’aterera’a nō te ’Ēkālesia a te Fatu. I te taime ’a nene’ihia ai teie heheura’a, te rahira’a o te mau melo o te ’Ēkālesia ’ua nā ni’a a’e i te aravihi o te tahi feiā fa’atere e fa’atere ra. Te fa’ata’ara’a i te ti’ara’a ’e te mau hōpoi’a a te Peresidenira’a Mātāmua, te pupu nō te Tino ’Ahuru ma Piti ’āpōsetolo, te mau Hitu ’Ahuru, te mau ’episekōpo ’e a te mau peresidenira’a pupu autahu’ara’a, pāpū roa ’ua riro ’ei mea faufa’a ’e te hina’arohia. Terā rā, te arata’ira’a hanahana i roto i te tufa’a 107 e mea ātea roa ïa i te rāve’a ’ōhie ’o tā te fa’aterera’a o te ’Ēkālesia e ti’a ’ia fa’anahohia. I’ōnei, tē ha’api’i nei te Fatu ia tātou nō ni’a i tōna mana ’e tāna ha’amanara’a, « te autahu’ara’a mo’a, mai te au i te fa’anahora’a a te Tamaiti a te Atua » (’īrava 3). Te fā o te autahu’ara’a o te ’īritira’a ïa i « te mau ha’amaita’ira’a pae vārua ato’a nō te ’ēkālesia » ’ia nehenehe i te mau tamari’i ato’a a te Atua ’ia fāna’o « te vēteara’a mai te mau ra’i ia rātou », ’e « ’ia ’oa’oa i te auhō’ēra’a i mua i te aro o te Atua te Metua, ’e ’o Iesu te ārai nō te fafaura’a ’āpī » (mau ’īrava 18–19). Ma te ha’api’ira’a ia tātou i tōna autahu’ara’a, tē ha’api’i nei te Fa’aora ia tātou nō ni’a iāna iho ’e e nāhea tātou ’ia haere iāna ra.

Hi’o « Restoring the Ancient Order », i roto Revelations in Contexta, 208–12.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 106 ;  108

E turu te Fatu iā’u ’ia pi’i ana’e ’oia iā’u ’ia tāvini.

I roto Te Ha’api’ira’a Tumu ’e te mau Fafaura’a 106 ’e  108, ’ua hōro’a te Fatu i te parau a’o ’e te mau parau fafau i e piti nā melo tei pi’ihia nō te tāvini i roto i tāna ’Ēkālesia. ’A tuatāpapa ai ’outou i tāna parau a’o, e nehenehe ’outou e feruri i tā ’outou iho mau rāve’a nō te tāvini i te Fatu—penei a’e te hō’ē tītaura’a nō te aupurura’a, hō’ē pi’ira’a i roto i te ’Ēkālesia, te mau hōpoi’a i roto i tō ’outou ’utuāfare, ’aore rā te mau muhumuhura’a pae vārua ’ia rave i te maita’i.

I tō ’outou mana’o, e aha te parau poro’i a te Fatu nō ’outou i roto i teie mau heheura’a ? E aha te mau pereota e mea faufa’a ta’a ’ē a’e nō ’outou ? Teie te tahi e ti’a ’ia ferurihia :

• E aha te taime ’a hōro’a ai te Fatu ia ’outou i te « aroha [’aore rā te tauturu hanahana] ’e te ha’apāpūra’a » ’ia ti’a e tāvini iāna ? (Te Ha’api’ira’a Tumu ’e te mau Fafaura’a 106:8).

• I tō ’outou mana’o, e aha te aura’a ’ia ha’apūai ia vetahi ’ē « i roto i tā ’outou mau ’ohipa ato’a » ? (Te Ha’api’ira’a Tumu ’e te mau Fafaura’a 108:7).

I tō Elder Carl B. Cook fa’ari’ira’a i te hō’ē tītaura’a fifi i roto i te ’Ēkālesia, ’ua tāipu mai ’oia i tōna pūai i roto i te ’ohipa i orahia mai e te hō’ē tupuna. ’A tai’o i te reira i roto i tāna a’ora’a « Tāvini » (Liahona, Novema 2016, 110–12). ’A feruri i te pāpa’i i te hō’ē rata nō te fa’aitoito i tō ’outou hua’ai—’aore rā nō tō ’outou iho ananahi—’ia fa’ari’i i te mau rāve’a nō te tāvini i te Fatu. ’A tu’u i roto i tā ’outou rata i te mau parau mau tā ’outou i ’apo mai i roto i te parau poro’i a Elder Cook, Te Ha’api’ira’a Tumu ’e te mau Fafaura’a 106 ’e 108, ’e tō ’outou iho mau ’itera’a.

Hi’o ato’a Henry B. Eyring, « Haere mai nā muri iā’u », Liahona, Mē 2017, 82–85 ; Topics and Questions, « Serving in Church Callings », Vaira’a buka ’evanelia ; « Warren Cowdery » ’e « ‘Wrought Upon’ to Seek a Revelation », i roto Revelations in Context, 219–23, 224–28.

Te Ha’api’ira’a Tumu ’e te mau Fafaura’a 107:1–4, 18–20

Te autahu’ara’a « mai te au i te fa’anahora’a a te Tamaiti a te Atua ».

E ha’amata te Fatu i tāna « heheura’a nō ni’a i te autahu’ara’a » (Te Ha’api’ira’a Tumu ’e te mau Fafaura’a 107, upo’o tufa’a) ma te ha’api’ira’a ia tātou i te i’oa tumu o te Autahu’ara’a a Melehizedeka (hi’o mau ’īrava 1–4). I tō ’outou mana’o nō te aha e mea faufa’a ’ia ’ite i te reira ? Nāhea teie i’oa i te fa’auru i huru ’outou e feruri ai i te autahu’ara’a ?

’A tāpe’a i teie mau mana’o i roto i tō ’outou ferurira’a, ’a tai’o ai ’outou nō ni’a i te autahu’ara’a, i roto iho ā rā i te mau ’īrava 18–20. E aha te auraʼa te parau « te vēteara’a mai te mau ra’i » ? E aha te aura’a « ’ia ’oa’oa i te auhō’ēra’a i mua i te aro o te Atua te Metua, ’e o Iesu » ? Nāhea te mana ’e te ha’amanara’a autahu’ara’a a te Fa’aora i te fa’afāna’o ia ’outou i teie mau mea ato’a ?

Hi’o ato’a Alama 13:2, 16 ; Te Ha’api’ira’a Tumu ’e te mau Fafaura’a 84:19–27.

Rōtahi i ni’a ia Iesu Mesia. « E rave rahi mea e ha’api’i nei i te ’evanelia a Iesu Mesia tei fa’aho’i-fa’ahou-hia mai—te mau parau tumu, te mau fa’auera’a, te mau parau tohu, ’e te mau ’ā’amu o te pāpa’ira’a mo’a. Terā rā ’o te mau ’āma’a tā’āto’a teie nō te hō’ē ā tumu rā’au, nō te mea hō’ē ana’e fā tō rātou pā’āto’a : te tauturura’a i te mau ta’ata ato’a ’ia haere mai i te Mesia ra ’e ’ia maita’i roa iāna (hi’o Iaroma 1:11 ; Moroni 10:32). Nō reira, noa atu te mea tā ’outou e ha’api’i ra, ’a ha’amana’o ē tē ha’api’i mau nei ’outou nō ni’a ia Iesu Mesia ’e nāhea ’ia riro mai iāna te huru » (Ha’api’ira’a mai tā te Fa’aora, 6). ’Ei hi’ora’a, ’a ha’api’i ai ’outou—’e ’a ha’api’i mai ai ’outou—nō ni’a i te autahu’ara’a i roto Te Ha’api’ira’a Tumu ’e te mau Fafaura’a 107, ’a ui pinepine : « E aha tā tātou e ha’api’i mai nō ni’a i te Fa’aora ? »

Te Ha’api’ira’a Tumu ’e te mau Fafaura’a 107:22

Te mau tāvini o te Fatu « tei turuhia ho’i e te ti’aturira’a, te fa’aro’o, ’e te pure ato’a a tō te ’Ēkālesia ».

I tō ’outou mana’o, e aha te aura’a te turura’a i te mau tāvini o te Fatu nā roto i tō ’outou ti’aturira’a ? nā roto i tō ’outou fa’aro’o ? nā roto i tā ’outou pure ?

Hi’o ato’a « Hīmene ’āmui tātou nō te hō’ē peropheta », Te mau hīmene, N°14.

Te Ha’api’ira’a Tumu ’e te mau Fafaura’a 107:23–24, 33–35, 38, 91–92

Tē faʼaʼite pāpū nei te mau peropheta ’e te mau ’āpōsetolo nō Iesu Mesia.

I te matahiti 1835, ’ua fa’a’ite Iosepha Semita i te tufa’a 107 i te pupu nō te Tino ’Ahuru ma Piti ’āpōsetolo tei pi’i-’āpī-hia (hi’o te upo’o tufa’a). E aha tā te Fatu i ha’api’i ia rātou nō ni’a i tō rātou pi’ira’a i roto te mau ’īrava 23–24, 33–35, 38 ? Nāhea tō ’outou ’itera’a pāpū nō Iesu Mesia i te ha’apūaihia nā roto mai i te ha’api’ira’a ’e te misiōni a tāna mau ’āpōsetolo ora ?

I roto te mau ’īrava 91–92, tē ha’api’i nei te Fatu nō tāna ’āpōsetolo pa’ari a’e, te peresideni o te ’Ēkālesia. Nāhea ’oia i te « riro ho’i mai ia Mose ra te huru » ? (hi’o Arata’i nō te mau pāpa’ira’a mo’a, « Mose », Vaira’a buka ’evanelia).

Hi’o ato’a David A. Bednar, « Mā’itihia nō te fa’a’ite i te ’itera’a pāpū o tō’u nei i’oa », Liahona, Novema 2015, 128–31.

Te Ha’api’ira’a Tumu ’e te mau Fafaura’a 107:27–31, 85–89

Tē fa’atupu nei te Fatu i tāna ’ohipa nā roto i te mau ’āpo’ora’a.

’A hi’o maita’i e aha tā te Fatu i ha’api’i nō te mau ’āpo’ora’a i roto Te Ha’api’ira’a Tumu ’e te mau Fafaura’a 107:27–31, 85–89. E aha te mea e fa’ariro i te hō’ē ’āpo’ora’a e mea manuia ? Nāhea ’outou i te fa’a’ohipa i teie mau parau tumu i roto i tō ’outou pi’ira’a i roto i te ’Ēkālesia, i tō ’outou ’utuāfare, ’aore rā i tā ’outou mau hōpoi’a ’ē atu ?

Hi’o ato’a M. Russell Ballard, « Te mau ’āpo’ora’a ’utuāfare », Liahona, Mē 2016, 63–65 ; Buka arata’i rahi, 4.3–4.4, Vaira’a buka ’evanelia.

Tē ani manihini nei te Fatu i te mau ’utuāfare ’ia ’āpo’o ’āmui.

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 107:18–20

E ha’amaita’i Iesu Mesia iā’u nā roto i tōna mana autahu’ara’a.

• ’A tai’o ’āmui ai ’outou ’e tā ’outou mau tamari’i Te Ha’api’ira’a Tumu ’e te mau Fafaura’a 107:18–19, ’a ha’apāpū maita’i i te pereota « te mau ha’amaita’ira’a pae vārua ato’a ». E nehenehe paha ’outou ’e tā ’outou mau tamari’i e tāpura i te mau ha’amaita’ira’a e tae mai nā roto mai i te autahu’ara’a. ’A rave i te reira mai te hō’ē ha’uti—hi’o ’o vai te nehenehe e hāmani i te tāpura roa a’e. E nehenehe ato’a tā ’outou mau tamari’i e pāpa’i hōho’a ’aore rā e ’imi mai i te mau hōho’a nō te fa’ahōho’a i teie mau ha’amaita’ira’a (hi’o ’api fa’a’ana’anataera’a nō teie hepetoma). I muri iho ’a fa’ata’a atu nāhea te mau ’ōro’a o te autahu’ara’a (mai te bāpetizora’a ’aore rā te ’ōro’a mo’a) i te tauturu ia tātou ’ia fa’ari’i i te mau ha’amaita’ira’a a te Atua.

Te Ha’api’ira’a Tumu ’e te mau Fafaura’a 107:21–26, 33–35, 91–92

E arata’i te mau tāvini tei mā’itihia e te Fatu i tāna ’Ēkālesia.

• I roto i te ve’a Liahona ato’a o te ’āmuira’a, tē vai nei hō’ē ’api nō te mau hōho’a o te mau Hui Mana Fa’atere Rahi. ’A feruri i te hi’o i teie mau hōho’a ’e tā ’outou mau tamari’i, ’a tai’o ai ’outou nō ni’a i tā rātou mau hōpoi’a i roto Te Ha’api’ira’a Tumu ’e te mau Fafaura’a 107:21–26, 33–35, 91–92. ’Ia fa’ata’a mai ’outou ’e tā ’outou mau tamari’i, nō te aha ’outou e māuruuru ai nō tō te Fatu hōro’ara’a i teie mau hōpoi’a ia rātou.

• E ha’api’i rahi mai ā tā ’outou mau tamari’i nō ni’a i te mau tāvini a te Fatu i te « General Church Leadership [Fa’aterera’a rahi o te ’Ēkālesia] » i ni’a ChurchofJesusChrist.org. E nehenehe paha tā ’outou mau tamari’i tāta’itahi e ha’api’i rahi mai nō ni’a i te hō’ē o teie mau ti’a fa’atere ’e e ha’api’i i te tahi ’e te tahi nō ni’a iāna. ’A fa’a’ite i te tahi ’e te tahi nāhea ’outou e ’ite ai ē, e mau tāvini mau teie feiā fa’atere nā Iesu Mesia.

• I muri iho i te tai’o-’āmui-ra’a i Te Ha’api’ira’a Tumu ’e te mau Fafaura’a 107:22, e nehenehe ’outou ’e tā ’outou mau tamari’i, te tahi i muri mai i te tahi, e tāpe’a i te hō’ē hōho’a nō te Peresidenira’a Mātāmua ’e e fa’ata’a mai nāhea ’outou i te pāturu ia rātou ’ei tāvini nā te Fatu.

Te Peresidenira’a Mātāmua

Te Ha’api’ira’a Tumu ’e te mau Fafaura’a 108:3

E nehenehe au e ara maita’i i te ha’apa’ora’a i tā’u mau fafaura’a.

• Nō te ha’amata i te hō’ē tāu’ara’a parau nō ni’a i teie ’īrava, ’a ani manihini i tā ’outou mau tamari’i ’ia rave i te hō’ē mea ’o te tītau i te ara maita’i, mai te fa’a’īra’a i te hō’ē ’āu’a ’eiaha ’ia mani’i i rāpae. E aha tē tupu ’ia ’ore ana’e tātou e ara maita’i ? I muri iho e tai’o Te Ha’api’ira’a Tumu ’e te mau Fafaura’a 108:3 nō te ’ite mai i te mea tā te Fatu e hina’aro ia tātou ’ia rave maita’i a’e. E aha « te mau tapura’a » (te parau fafau ’aore rā te mau fafaura’a) tā tātou e rave ’e te Atua ? Nāhea tātou i te ara maita’i a’e nō te ha’apa’ora’a i te reira ? ’A fa’a’ite atu i te tahi mau tuha’a nō te a’ora’a a te tuahine Becky Craven « Hi’o maita’i ’aore rā e tau’a ’ore » (Liahona, Mē 2019, 9–11) ’o tā ’outou e mana’o ra, e fa’aitoito i tā ’outou mau tamari’i ’ia ha’apa’o i tā rātou mau fafaura’a. ’A nehenehe ato’a ’outou e hīmene i te hō’ē hīmene nō ni’a i te ha’apa’ora’a i te mau fafaura’a, mai te hīmene « E tāvini itoito vau » (Buka hīmene nā te mau tamari’i, 85).

Te mani’ira’a i te pape ma te ara maita’i e nehenehe e fa’aauhia i te ha’apa’o-māite-ra’a i tā tātou mau fafaura’a.

Nō te tahi atu mau mana’o, ’a hi’o i te ve’a Hoa nō teie ’āva’e.

Melchizedek Blesses Abram [Ha’amaita’i Melehizedeka ia Aberama], nā Walter Rane