A Glorious Light—Kirtland Temple [Hō’ē māramarama hanahana—Hiero nō Kirtland], nā Glen S. Hopkinson

29 nō Tetepa-5 nō ’Ātopa « ’O tō ’oe iho ïa fare, ’oia te vāhi nō tō ’oe mo’ara’a »

Te Ha’api’ira’a Tumu ’e te mau Fafaura’a 109–110

’Aita i mana’ohia ē e ’īriti te mau ’uputa nō te hiero nō Kirtland e tae roa atu i te hora 8:00 i te po’ipo’i nō te 27 nō Māti 1836. Terā rā, te feiā mo’a i ti’aturi e haere i te ’ōro’a ha’amo’ara’a ’ua ha’amata i te ’āna’i i te hora 7:00. ’Ua hina’arohia te hō’ē vāhi rahi roa a’e ’e i muri iho i te piti o te tuha’a purera’a nō te ha’afāna’o i te mau ta’ata ato’a. ’E e ’ere noa te feiā ora o tei hina’aro rahi ’ia ’āmui mai. ’Ua fa’a’ite pāpū e rave rahi mau ’ite ē ’ua ’ite rātou i te mau melahi, i roto i te hiero, ’e tae noa atu i ni’a i te tāpo’i fare, i te taime ’e i muri a’e i te ha’amo’ara’a. E au rā ē, ’ua haere mai « te mau nu’u o te ra’i » e « hīmene ’e [e] pi’i » ’e te feiā mo’a i te mau mahana hope’a nei (« ’Auē te Vārua o te Atua », Te mau hīmene, N°2).

Nō te aha te ’ārepurepura’a rahi—i nā pae e piti o te pāruru ? I muri a’e e rave rahi mau tenetere, ’ua tupu fa’ahou te hō’ē fare o te Fatu i ni’a i te fenua nei. Tē fa’atupu ra te Fatu i tāna parau fafau nō te hōro’a i tōna feiā mo’a i « te mana nō ni’a mai ra » (Te Ha’api’ira’a Tumu ’e te mau Fafaura’a 38:32). ’E ’ua parau ’oia ē, teie, « te ha’amatara’a [noa] nō te ha’amaita’ira’a » (Te Ha’api’ira’a Tumu ’e te mau Fafaura’a 110:10). Te tau e orahia nei e tātou—’e te tupu vitivitira’a te ’ohipa hiero ’e te mau ’ōro’a e vai ra nō nā mirioni feiā ora ’e tei pohe—’ua ha’amata ïa i Kirtland, « te pāruru i ni’a i te fenua nei [’ua] ha’amata i te mahae » (« ’Auē te Vārua o te Atua »).

’A hi’o Te Feiā Mo’a, 1:232-41 ; « A House for Our God », i roto i Te mau heheura’a i roto i te mau parau tāpiri, 169-72.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 109

Tē hōro’a mai nei te Fatu iā’u i te mau ha’amaita’ira’a rahi nā roto i te mau fafaura’a o te hiero.

I roto i te tahi mau hi’ora’a, e mea ta’a ’ē te hiero nō Kirtland i te mau hiero tā tātou e ’ite nei i teie mahana. ’Ei hi’ora’a, ’aita e fata ’e ’aita e ’āpo’o bāpetizora’a. Terā rā, te mau ha’amaita’ira’a i parauhia i roto i te tufa’a 109, te pure ha’amo’ara’a nō te hiero nō Kirtland, e fāri’i-ato’a-hia te reira i roto i te fare o te Fatu i teie mahana. ’A hi’o fa’ahou i teie mau ’īrava i muri nei nō te ’imi i te tahi o teie mau ha’amaita’ira’a, ’e ’a feruri e nāhea e nehenehe ai i te reira ’ia tauturu i te ha’apūai i tō ’outou aura’a ’e te Metua i te ao ra ’e Ia Iesu Mesia.

Mau ’īrava 5, 12–13 (hi’o ato’a Te Ha’api’ira’a Tumu ’e te mau Fafaura’a 110:6–8) : I roto i te fare o te Fatu, e nehenehe ’oia e fa’a’ite mai iāna iho ia tātou, ’e e nehenehe au e fāri’i i tōna mana.

Mau ’īrava 9, 15–19, 26, 78–79 :

Mau ’īrava 21–23 :

Mau ’īrava 24–33, 42–46 :

Mau ’īrava 35–39 :

Te tahi atu mau ha’amaita’ira’a :

Mai te mea ē, ’ua haere ’outou i te fare o te Fatu, ’a feruri nāhea teie mau fafaura’a i te tupura’a i roto i tō ’outou orara’a.

’Ua pāpa’ihia te hīmene ra « ’Auē te Vārua o te Atua » (Te mau hīmene, N°2) nō te ha’amo’ara’a o te hiero nō Kirtland—’e i reira ’ua hīmenehia i te mau ’ōro’a ha’amo’ara’a nō te mau hiero ato’a mai te reira mai taime. E nehenehe e hīmene ’aore rā e fa’aro’o i te reira i roto i tā ’outou tuatāpapara’a ’e te ha’amorira’a. E aha te mau ha’amaita’ira’a o te hiero tā ’outou e ’ite ra tei fa’ata’ahia i roto i teie hīmene ?

Te Ha’api’ira’a Tumu ’e te mau Fafaura’a 109

Te pure ’o te paraparaura’a ïa i te Metua i te ao ra.

Te tufa’a 109, e pure ha’amo’ara’a ïa tei hōro’ahia i te peropheta Iosepha Semita nā roto i te heheura’a (hi’o i te upo’o tufa’a). E aha tā ’outou e ha’api’i mai nei nō ni’a i te pure i roto i teie tufa’a ? ’Ei hi’ora’a, e nehenehe tā ’outou e tāpa’o i te mea tā te peropheta i ha’amāuruuru ’e e aha te mau ha’amaita’ira’a tāna i ani. E aha atu ā tāna i parau i roto i teie pure ? ’A tuatāpapa ai ’outou, e nehenehe ’outou e hi’opo’a i tā ’outou iho ’āparaura’a i te Metua i te ao ra. E aha tā ’outou i ha’api’i mai nō ni’a iāna ’e tāna Tamaiti nā roto mai i teie pure ?

Mai te mea e hina’aro ’outou e tai’o i te mau pure ha’amo’ara’a o te tahi atu mau hiero, mai te hiero fātata roa a’e ia ’outou, ’a haere i ni’a i te ’api o te hiero i ni’a i te temples.ChurchofJesusChrist.org.

Te Ha’api’ira’a Tumu ’e te mau Fafaura’a 110:1–10

E nehenehe te Fatu e fa’a’ite mai iāna iho iā’u i roto i te hiero.

’Ia tai’o ’outou i te mau fa’ata’ara’a a te Fa’aora i roto i Te Ha’api’ira’a Tumu ’e te mau Fafaura’a 110:1–10, ’e tae noa atu i te upo’o tufa’a, ’a feruri e aha tā teie mau ’īrava e parau nei nō ni’a iāna.

Nāhea Iesu Mesia i te fa’a’ite iāna iho—’aore rā nāhea ’oia i te fa’a’ite iāna ia ’outou—i roto i tōna fare ? Nāhea ’oia i te tauturu ia ’outou ’ia ’ite ē, tē fāri’i nei ’oia i tā ’outou mau tusia ?

I roto i te hiero nō Kirtland.

Te Ha’api’ira’a Tumu ’e te mau Fafaura’a 110:10–16

Tē fa’atere nei te Fa’aora i tāna ’ohipa nā roto i te mau tāviri o te autahu’ara’a.

Nā mua noa a’e i tō Mose, Elia ’e tō Elia fāra’a mai i roto i te hiero nō te fa’aho’i mai i te mau tāviri o te autahu’ara’a, ’ua parau Iesu Mesia, « Teie te ha’amatara’a o te ha’ama’ita’ira’a ’o tē nini’ihia mai i ni’a i te upo’o o tō’u mau ta’ata » (Te Ha’api’ira’a Tumu ’e te mau Fafaura’a 110:10). ’A tai’o ai ’outou i te mau ’īrava 11–16, ’a feruri i te mau ha’amaita’ira’a tā te Fa’aora e nini’i mai nei i ni’a ia ’outou nā roto i te ’ohipa i arata’ihia e teie mau tāviri. ’Ei hi’ora’a :

• ’Īrava 11 : Mose ’e te mau tāviri nō te ha’aputuputura’a o ’Īserā’ela (’aore rā te ’ohipa misiōnare). Nāhea tō te Fatu ha’amaita’ira’a ia ’outou ’e tō ’outou ’utuāfare nā roto i te mau tauto’ora’a misiōnare a tāna ’Ēkālesia ?

• ’Īrava 12 : Elia ’e te mau tāviri o te ’evanelia a Aberahama, tae noa atu i te fafaura’a a Aberahama. Nāhea te Fatu i te ha’amaita’i ia ’outou ’e i te « mau u’i i muri mai ia [’outou] » nō tā ’outou mau fafaura’a ? (Hi’o Russell M. Nelson, « Te fafaura’a mure ’ore », Liahona, ’Ātopa 2022, 4–11 ; Arata’i nō te mau pāpa’ira’a mo’a, « Elias », Vaira’a buka ’evanelia).

• Mau ’īrava 13–16 : Elia ’e te mana tā’atira’a, tei fa’a’itehia nā roto i te ’ohipa hiero ’e te ’ā’amu ’utuāfare. I tō ’outou mana’ora’a nō te aha te Metua i te ao ra e hina’aro ai ’ia tu’atihia ’outou i tō ’outou mau tupuna nā roto i te mau ’ōro’a o te hiero ? (Hi’o Gerrit W. Gong, « ’Oa’oa ē a mure noa atu », Liahona, Novema 2022, 83–86.)

E aha te tū’atira’a tā ’outou e ’ite ra i rotopū i teie mau tāviri ’e tā tātou mau hōpoi’a i roto i te ’ohipa nō te fa’aorara’a ’e te fa’ateiteira’a a te Atua (te orara’a i te ’evanelia, te aupurura’a i te ta’ata nava’i ’ore, te anira’a i te mau ta’ata ato’a ’ia fāri’i i te ’evanelia, ’e te tā’amura’a i te mau ’utuāfare nō te tau a muri atu) ?

E aha te mau ’itera’a tā ’outou i fāri’i nō ni’a i te ’ohipa nō te fa’aorara’a ’e te fa’ateiteira’a a te Atua ? E aha tā teie mau ’itera’a e ha’api’i nei ia ’outou nō ni’a i te Fa’aora, tāna ’Ēkālesia, ’e tāna ’ohipa ?

’Imi i te mau rāve’a nō te fa’aō mai ia vetahi ’ē. Mai te mea tē ha’api’i ra ’outou nō ni’a i Te Ha’api’ira’a Tumu ’e te mau Fafaura’a 110:11–16, e nehenehe ’outou e fa’ata’a i te pīahi tāta’itahi ’ia tuatāpapa nō ni’a ia Mose, Elia, ’aore rā ia Eliaha ’e te mau tāviri tāna i fa’aho’i mai. ’Ei reira e ti’a ai i te mau pīahi ’ia fa’a’ite i te tahi ’e te tahi e aha tā rātou i ’apo mai. Te hō’ē rāterera’a mai teie te huru, e fa’a’ohipa te reira i te mau ta’ata ato’a i roto i te ’apora’a mai ’e te ha’api’ira’a. (Hi’o Ha’api’ira’a mai tā te Fa’aora, 24–27).

Nō te tahi atu ā mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 109:12–13 ; 110:1–7

Te hiero ’o te fare ïa o te Fatu.

• E nehenehe ’outou ’e tā ’outou mau tamari’i e paraparau nō ni’a i te hō’ē mea tā ’outou e au nō ni’a i tō ’outou ’utuāfare. I muri iho, e nehenehe ’outou e hi’o i te hō’ē hōho’a nō te hiero nō Kirtland, ’e e fa’a’ohipa i Te Ha’api’ira’a Tumu ’e te mau Fafaura’a 109:12–13 ; 110:1–7 nō te parau nō ni’a i te huru te haamoaraahia te reira hiero, ’e te rirora’a mai ’ei fare nō te Fatu (hi’o ato’a « Pene 39 : ’Ua ha’amo’ahia te hiero i Kirtland », i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 154, ’aore rā te hōho’a video nō ni’a i te reira i roto i te Vaira’a buka ’evanelia). ’A fa’a’ite i te tahi ’e te tahi i te tahi mea tā ’outou i au nō ni’a i te fare o te Fatu.

  Chapter 39: The Kirtland Temple Is Dedicated: January–March 1836

• Pēnei a’e e nehenehe tā ’outou ’e tā ’outou mau tamari’i e feruri ē, tē tāmata nei te hō’ē hoa i te ’imi i tō ’outou fare. Nāhea tātou i te tauturu i tō tātou hoa ’ia ’ite mai teihea tō tātou fare ? Nāhea tātou i te ’ite ē, te hiero ’o te fare ïa o te Fatu ? (hi’o Te Ha’api’ira’a Tumu ’e te mau Fafaura’a 109:12–13).

Te Ha’api’ira’a Tumu ’e te mau Fafaura’a 110

Tē ha’amaita’i nei te Fa’aora i tōna mau ta’ata nā roto i te mau tāviri o te autahu’ara’a.

• E nehenehe ’outou e fa’a’ohipa i te ’api fa’a’ana’anataera’a nō teie hepetoma ’aore rā, i te « Pene 40 : Te mau ’ōrama i roto i te hiero nō Ketelani » (i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 155–57, ’aore rā te hōho’a video nō ni’a i te reira i roto i te Vaira’a buka ’evanelia) nō te fa’a’ite i te mau tamari’i nō ni’a i te mau ta’ata i te ao ra ’o tei haere mai i te hiero. E nehenehe ato’a ’outou e fa’a’ohipa i te hōho’a i te hope’a o teie arata’i ha’api’ira’a.

  The Kirtland Temple

• Nō te ha’api’i mai nō ni’a i te faufa’a rahi o te ’ohipa i tupu i roto i te hiero nō Ketelani, e nehenehe ’outou ’e tā ’outou mau tamari’i e paraparau nō ni’a e aha tā te mau tāviri e rave. Pēnei a’e e nehenehe tā ’outou mau tamari’i e tāpe’a te tahi i muri i te tahi i te mau tāviri ’e e fa’ahua i te īriti i te hō’ē ōpani pōnaohia. ’A tauturu ia rātou ’ia ’imi i te ta’o tāviri i roto i Te Ha’api’ira’a Tumu ’e te mau Fafaura’a 110:11–16, ’e e ’āparau nō ni’a i te mau ha’amaita’ira’a tā teie mau tāviri e ’īriti. E nehenehe ’outou e fa’ata’a ē, te mau tāviri o te autahu’ara’a, o te parau fa’ati’a ïa a te Atua nō te arata’i i tāna ’Ēkālesia. ’A fa’a’ite i tō ’outou māuruuru ē, ’ua hōro’a mai te Fatu ia tātou i te mau tāviri o te autahu’ara’a.

Te Ha’api’ira’a Tumu ’e te mau Fafaura’a 110:15

Tē hina’aro nei te Fa’aora ’ia fa’afāriu vau i tō’u ’ā’au i tō’u mau tupunra.

• I muri a’e i te tai’o-’āmui-ra’a i Te Ha’api’ira’a Tumu ’e te mau Fafaura’a 110:15 ’a parau i tā ’outou mau tamari’i nō ni’a i te hō’ē ’itera’a tei tauturu i te fa’afāriura’a i tō ’outou ’ā’au i tō ’outou mau tupuna. E nehenehe ato’a ’outou e hīmene āmui i te hō’ē hīmene mai te « Ma généalogie » (Chants pour les enfants, 100).

• E aha tē tauturu i te « fa’afāriura’a i te ’ā’au » ’o tā ’outou mau tamari’i i tō rātou mau tupuna ? E nehenehe e ’itehia ia ’outou tē tahi mau mana’o ’ārearea i ni’a i te FamilySearch.org/discovery. E nehenehe ’outou e ’ohipa ’āmui nō te ’imi i te mau tupuna e hina’aro i te mau ’ōro’a o te hiero. Nō te aha Iesu e hina’aro ai ’ia rave tātou i teie ’ohipa ?

Nō te tahi atu ā mau mana’o, ’a hi’o i te ve’a Hoa nō teie ’āva’e.

Vision in the Kirtland Temple [Te ’ōrama i roto i te hiero nō Ketelani], nā Gary E. Smith