Mau reo nō te fa’aho’i-fa’ahou-ra’a mai

Fare tāpe’ara’a nō Liberty

I te tāpe’ara’ahia ’oia i Liberty, i Missouri, ’ua fāri’i Iosepha Semita i te tahi mau rata tei fa’aara iāna nō ni’a i te vaira’a fifi rahi o te feiā mo’a tei a’ua’uhia i rāpae i terā tuha’a fenua nā roto i te fa’auera’a a te tāvana rahi. E rata putapū tei tae mai nā roto mai ia Emma. Tē fa’a’ite nei tāna mau parau ’e tae noa atu i te rata pāhonora’a a Iosepha, i tō rāua mamae ’e tō rāua fa’aro’o i roto i teie taime fifi i roto i te ’ā’amu o te ’Ēkālesia.

’Ua tāpe’ahia ’o Iosepha Semita ’e te tahi atu mau ta’ata i roto i teie fare tape’araa i te tau to’eto’e nō 1838–39.

Rata nā Emma Semita ia Iosepha Semita, i te 7 nō Māti 1839

Tā’u tāne here ē

Nō te mea tē vai nei te tahi hoa e haere atu, tē pāpa’i nei au i teie rata, ’e’ita rā vau e pāpa’i pauroa atu i tō’u mau mana’o, inaha ho’i i tō ’oe vaira’a, te mau papa’i, te mau ’āuri ’e te mau pōnao, te mau ’ānāvai rahi e ’ohu nei, ’e te mau ’ānāvai iti e tahe nei, te mau ’āivi, te mau ’āfa’a poiri ’e te mau fenua pāpū e fa’ata’a ’ē nei ia tāua, nā reira ato’a te parauti’a ’ore ri’ari’a tei tu’u nā mua ia ’oe i roto i te fare tāpe’ara’a ’e ’o tē tāpe’a nei ā ia ’oe i reira, ’e te tahi atu mau ’ohipa rau, ’ua rahi roa ïa tō’u mau mana’o ’e’ita e nehenehe e parau.

’Āhani ’aita terā mana’o hara ’ore ’e te ārai pāpū o te aroha o te ra’i, pāpū ē, e’ita roa atu e noa’a iā’u ’ia fa’a’oroma’i i te mau ’ohipa ha’amāuiui tā’u i fa’aruru […] tē ora noa nei rā vau ’e ’ua ineine au ’ia māuiui rahi atu ā mai te mea ’o te hina’aro ïa o te Atua maita’i nō ’oe.

E mea maita’i pā’āto’a mātou i teienei, ’o Fredrick noa tei ma’ihia.

Tei roto Alexander iti i tō’u nei rima, e tama iti maita’i roa mai tā ’oe i ’ore i ’ite a’enei i roto i ’oe orara’a. E mea pāutuutu maita’i ’oia, ’e ma te turu i ni’a i te pārahira’a, e horo ’oia nā roto i te piha […]

’Aita e ta’ata maori rā te Atua tei ’ite i tō’u ferurira’a ’e te mana’o o tō’u ’ā’au ’a fa’aru’e ai au i tō tātou fare ’e te ’utuāfare, ’e fātata te tā’āto’ara’a o tā tātou mau faufa’a maori rā tā tāua mau tamari’i iti, ’e ’ua haere au i rāpae i te tuha’a fenua nō Missouri, ma te vaiiho ia ’oe i roto i terā fare tāpe’ara’a mo’emo’e. E mea teimaha rā ’ia ha’amana’o atu, hau atu i tē mara’a i te nātura ta’ata nei […]

[…] Maita’i ē e mau mahana maita’i a’e ananahi nō tātou […] Tō ’oe hoa iti here.

Emma Semita

Rata nā Iosepha Semita ia Emma Semita, i te 4 nō ’Ēperēra 1839

E tā’u vahine iti here.

I te pō mahana maha ra, ’ua pārahi au i raro ’e tē topa ato’a ra te mahana, ’a fā’ao ai mātou nā roto i te mau ’āuri o teie fare tāpe’ara’a mo’emo’e, nō te pāpa’i ia ’oe, nō te fa’a’ite ia ’oe i tō’u vaira’a. Tē ti’aturi nei au ē, fātata e pae ’āva’e i teienei ’e e ono mahana mai tō’u hi’opo’a-noa-ra’a-hia e te hō’ē ta’ata tīa’i, i te pō ’e te ao, ’e i roto i te mau papa’i ’e te mau ’āuri ’e te ’avī ’ūputa o teie fare tāpe’ara’a mo’emo’e, te pōiri ’e te repo. ’O te Atua noa tei ’ite i tō’u ’ā’au ’a pāpa’i ai au i teie rata. I teie vaira’a tō mātou, ’aita te pēnitara e nehenehe e fa’ahiti i te mea i roto i te ferurira’a, ’aita ato’a te reo ’e te mau melahi, ’aita e nehenehe e pēni atu nō te ta’ata tei ’ore i fa’aruru i te mea tā mātou e fa’aruru nei […] Tē tūru’i nei mātou i ni’a i te rima o Iehova, ’eiaha i ni’a i te tahi atu ta’ata, nō te fa’aora ia mātou, ’e mai te mea ’aita ’oia e rave i te reira, e’ita iho ā ïa e tupu, ’ia ’ite maita’i ’oe i te reira, inaha e po’ihā rahi tē vai ra nō tō mātou toto i roto i teie tuha’a fenua ; e ’ere nō te mea ’aita tā mātou hō’ē noa atu hara ia rātou […] Tā’u Emma iti here ē, tē mana’o tāmau nei au ia ’oe ’e i te mau tamari’i […] Hina’aro iti rahi tō’u ’ia ’ite ia Frederick, Joseph, Julia, Alexander, Joana ’e ia tāpena ato’a [te ’ūrī o te ’utuāfare] […] ’Āhani e nehenehe tā’u, e haere atu vau ma te tia’a ’ore, ma te tāupo’o ’ore ’e ma te tahi noa ’āfa ’ahu e hi’o ia ’outou ’e ’oa’oa iti rahi ïa, e ’ere roa atu i te ’ohipa rahi […] Tē amo nei au ma te pūai vārua i te fa’afao, nā reira ato’a ’o rātou i pīha’i iho iā’u nei ; ’aita ā hō’ē o mātou i ’ōtohe a’e. Tē hina’aro nei au, ’eiaha [tā tāua] mau tamari’i e ha’amo’e iā’u. ’A parau ia rātou ē ’ua here Pāpā ia rātou ma te here pāpū roa, ’e tē fa’aitoito roa nei ’oia ’ia horo ’ē mai teie feiā hāmani ’ino nō te ho’i ia rātou ra […] ’A parau ia rātou ē, ’ua parau Pāpā ē, ’ia riro rātou ’ei tamari’i maita’i, ’e ’ia ha’apa’o rātou i tō rātou metua vahine […]

Tō ’oe hoa,

Iosepha Semita, tamaiti

Fa’ata’ara’a

1. Letter from Emma Smith, 7 March 1839 », Letterbook 2, 37, josephsmithpapers.org ; ’ua fa’a’āpīhia te huru pāpa’ira’a, te tomara’a ’e te tarame.

2. « Letter to Emma Smith, 4 April 18391–3, josephsmithpapers.org ; ’ua fa’a’āpīhia te huru pāpa’ira’a, te tomara’a ’e te tarame.

3. ’Ua tāpe’ahia Iosepha ’e tōna mau hoa i te 31 nō ’Ātopa 1838, ’e ’ua tu’uhia te mau tīa’i ha’avī i ni’a ia rātou, i te ao ’e te pō. I muri a’e i te hō’ē ha’avāra’a mātāmua i Richmond, Missouri, ’ua ’āfa’ihia rātou i te fare tāpe’ara’a nō Liberty i te 1 nō Tītema.