Liberty Jail [Fare tāpe’ara’a nō Liberty], nā Welden Andersen

20–26 nō ’Ātopa : « E te Atua, tei hea roa ’oe ? »

Te Ha’api’ira’a Tumu ’e te mau Fafaura’a 121–123

’Ua pi’ihia te tahua i raro a’e i te fare tāpe’ara’a nō Liberty, i Missouri, « te fare tāpe’ara’a ». E mea me’ume’u roa te mau papa’i, e mea to’eto’e ’e te repo te tahua ’ōfa’i, e mea varavara ’e e mea pē te mā’a, e nā ha’amāramarama oaoa e piti ma te te’a ’āuri i piha’i iho i te aroaro, e mea iti roa ïa te māramarama i te tomo mai. Teie te vahi te vaira’a ’o Iosepha Semita ’e te tahi pu’era’a e maha ava’e to’eto’e i te pu’e tau to’eto’e nō te matahiti 1838–39. I te roara’a o taua taime ra, ’ua fāri’i tāmau noa Iosepha i te mau parau ’āpī nō ni’a i te mamae o te feiā mo’a. Te hau ’e te mana’o maita’i i ’itehia i Far West, tau ’āva’e noa ïa te maoro te vaira’a, ’e i teienei, ’aita fa’ahou ā tō te feiā mo’a e nohora’a, a’ua’uhia rātou i roto i te medebara ’e ’ua ’imi fa’ahou ā i te tahi atu vāhi nō te ha’amata ’āpī—’e i teie taime, tei te fare tāpe’ara’a tō rātou peropheta.

Noa atu rā i te reira, i roto ato’a i taua fare tāpe’ara’a ’ati rahi ra, ’ua « nīni’i[hia] mai te ’ite, mai ni’a mai i te ra’i » (Te Ha’api’ira’a Tumu ’e te mau Fafaura’a 121:33). Te uira’a a Iosepha « E te Atua, tei hea roa ’oe ? », ’ua pāhono-pāpūhia mai ïa ’e ma te mana rahi : « ’Eiaha e mata’u […] nō te mea e vai noa te Atua i pīha’i iho ia ’oe na ē a muri ē a muri noa atu » (Te Ha’api’ira’a Tumu ’e te mau Fafaura’a 121:1 ; 122:9).

Hi’o Saints, 1:323–96 ; « Within the Walls of Liberty Jail », i roto Revelations in Context, 256–63.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 121:1–10, 23–33 ; 122

I te Atua, e nehenehe te ’ati e riro « ’ei maita’i [nō’u] ».

I te taime tei roto tātou ’aore rā te feiā tā tātou i here, i te mamae, e ’ohipa mātau iho ā ’ia uiui te mana’o ē, tē ’ite mai ra ānei te Atua ia tātou. ’A tai’o ai ’oe i Te Ha’api’ira’a Tumu ’e te mau Fafaura’a 121:1–6, ’a feruri i te mau taime ’ua tupu tā ’oe mau uira’a ’aore rā te mau mana’o mai tō Iosepha Semita. E aha tā ’oe e ’ite ra i roto i te pāhonora’a a te Fatu ’o tē nehenehe e tauturu ia ’oe ’ia tae ana’e mai terā mau uira’a ’e mau mana’o ? ’Ei hi’ora’a, i roto i te mau te mau ’īrava 7–10, 26–33, ’a hi’o i te mau ha’amaita’ira’a tāna i fafau mai. I tō ’outou mana’o, e aha te aura’a o te parau « fa’a’oroma’i māite » ? Nāhea te Fa’aora i te tauturu ia ’outou ’ia rave i te reira ?

’Ia tai’o ana’e ’outou i te tufa’a 122, ’a feruri nāhea te Fatu i te hina’aro ia ’outou ’ia hi’o i tō ’outou mau ’ati. E nehenehe ’outou e feruri i te mau ’ohipa i tupu nō roto mai i tō ’outou mau tāmatara’a ’e nāhea te reira i te « riro ho’i ïa ’ei maita’i nō [’outou] » (’īrava 7).

Hi’o ato’a Quentin L. Cook, « Te hau o te ta’ata iho i roto i te mau tau fifi », Liahona, Novema 2021, 89–92 ; « I hea vau e fāri’i ai i te hau ? », Te mau hīmene, N°62.

Te Ha’api’ira’a Tumu ’e te mau Fafaura’a 121:34–46

’Ua niuhia te mana mau ’e te fa’aurura’a i ni’a i « te mau parau tumu nō te parauti’a ra ».

Nā te mana o te ao nei i fa’ahepo i te feiā mo’a ’ia fa’aru’e ia Missouri ’e ’o Iosepha Semita ’ia tu’uhia i roto i te fare tāpe’ara’a. Terā rā, ’a vai Iosepha i reira, ’ua ha’api’i te Fatu iāna nō ni’a i te tahi atu huru mana : Tōna mana, « te mau mana nō te ra’i ra ». E nehenehe te tai’ora’a nō ni’a i te reira mana i roto i Te Ha’api’ira’a Tumu ’e te mau Fafaura’a 121:34–46 e tauturu ia ’outou ’ia ha’api’i mai nāhea ’ia fāri’i i te reira mana—’e nāhea ’ia fa’a’ohipa i te reira nō te ha’amaita’i ia vetahi ’ē. Pēnei a’e e nehenehe tā ’outou e pāpa’i i te mea tā ’outou i ha’api’i mai i roto i te hō’ē tāpura ’e te mau ’āna’ira’a e pi’ihia Te mau mana o te ra’i ’e te mau mana o te ao nei. E aha te ta’a-’ē-ra’a i roto i teie nā huru pūai e piti ? E aha tā teie mau fa’a’itera’a nō ni’a i te mana o te Fatu e ha’api’i nei ia ’outou nō ni’a iāna ?

E nehenehe ato’a ’outou e feruri i te ta’o ra fa’aurura’a i roto i te ’īrava 41. E aha te tahi mau tupura’a i reira ’outou e hina’aro ai ’ia riro ’outou ’ei fa’aurura’a nō te maita’i—i roto paha i te hō’ē aura’a ’utuāfare, i te fare ha’api’ira’a, i te ’ohipa, ’aore rā i roto i te hō’ē fa’auera’a ’ohipa a te ’Ēkālesia ? E aha tā ’oe e ’apo ra i roto i te mau ’īrava 41–46 nō ni’a i te huru te Atua ’ia fa’auru i tāna mau tamari’i ? E nehenehe ’outou e ha’apoto i te mea tā ’outou i ha’api’i mai nā roto i te fa’ahopera’a i te hō’ē pereota mai teie : « Nō te fa’auru i te maita’i, e  ».

Hi’o ato’a Jeffrey R. Holland, « E ’ere mai tā tō te ao nei hōro’a », Liahona, Mē 2021, 35–38 ; David A. Bednar, « Te mau pūai o te ra’i ra », Liahona, Mē 2012, 48–51 ; « Te mau pūai o te ra’i ra » (video), Vaira’a buka ’evanelia.

"The Powers of Heaven"

(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

’A mā’iti i te hō’ē pereota ’e ’a tuatāpapa hōhonū i te reira. Nō te ha’api’i rahi atu ā nō ni’a i te mau ha’amaita’ira’a fa’ahiahia tei fa’a’itehia i roto i te mau ’īrava 45–46, e nehenehe ’outou e mā’iti i te hō’ē pereota e tano nō ’outou ’e e tuatāpapa hōhonu i te reira. ’Ei hi’ora’a, e aha te aura’a o te ta’o fa’a’una’una ’e nāhea te tai’ata ’ore e nehenehe ai e fa’a’una’una i tō ’outou mau mana’o ? ’Aore rā e nehenehe e ’itehia mai ia ’outou te hō’ē hōho’a nō te hupe ’e ’ia ha’api’i mai e nāhea te hupe ’ia vai i ni’a i te mau rā’au tupu. Nāhea teie e tū ai i te huru te Fatu ’ia ha’api’i i tāna ha’api’ira’a tumu ? E fa’a’ite i te mea tā ’outou i ’ite i tō ’outou ’utuāfare ’aore rā, i tō ’outou mau hoa, ’e tae noa atu i tō ’outou mau hoa i te fare purera’a.

Te Ha’api’ira’a Tumu ’e te mau Fafaura’a 122:8

’Ua pou Iesu Mesia i raro a’e i te mau mea ato’a ’ia ti’a iāna ’ia fa’ateitei iā’u.

I tō ’outou mana’o, e aha te aura’a ’ia parau ē, ’ua « haere roa atu [Iesu Mesia] i raro a’e i [te] mau mea ato’a » ? Teie te tahi atu ā mau ’īrava e nehenehe e tauturu ia ’outou ’ia hāro’aro’a i teie pereota : Isaia 53:3–4 ; Hebera 2:17–18 ; 1 Nephi 11:16–33 ; Alama 7:11–13. Ma te niuhia i ni’a i te mea tā ’outou i ha’api’i mai, ’a feruri ’ia fa’ahiti fa’ahou i Te Ha’api’ira’a Tumu ’e te mau Fafaura’a 122:8 nā roto i tā ’outou iho mau parau. Nāhea ’outou e fa’a’ite ai i tō ’outou māuruuru ia Iesu Mesia nō te poura’a mai i raro a’e i te mau mea ato’a ?

E aha tā teie hi’ora’a a te peresideni Dallin H. Oaks e fa’atupu i ni’a i tō ’outou hāro’aro’ara’a ? « E nehenehe ato’a tātou e parau ē, nō te mea ho’i ē, ’ua pou ’Oia i raro a’e i te mau mea ato’a ra, tē ti’a nei ïa ’oia i te vahi tano maita’i nō te amo ia tātou ’e nō te hōro’a mai ia tātou i te pūai e tītauhia ia tātou nō te fa’a’oroma’i i tō tātou mau ’ati » (« Ha’apūaihia e te tāra’ehara a Iesu Mesia », Liahona, Novema 2015, 64).

Tuha’a nō te Not My Will But Thine [’Ia tupu rā tō ’oe hina’aro ’eiaha tō’u], nā Walter Rane

Te Ha’api’ira’a Tumu ’e te mau Fafaura’a 123

« ’Ia rave tātou i te mau mea ato’a i roto i tō tātou mana ’ia rave rā ma te ’oa’oa »

I roto i Te Ha’api’ira’a Tumu ’e te mau Fafaura’a 123:7–8, ’ua fa’ahiti ’o Iosepha Semita i te mau ti’aturira’a hape tei arata’i i te mamae, tae noa atu i te hāmani-’ino-ra’a o te feiā mo’a. I te ’āva’e Māti 1839, e au ē, ’aita e rāve’a rahi tā te feiā mo’a nō ni’a i te reira tumu parau. I roto rā i tāna mau rata tei pāpa’ihia mai roto mai i te fare tāpe’ara’a nō Liberty, tē parau ra Iosepha ia rātou e aha tā rātou e nehenehee rave : « ’Ia ha’aputuputu mai i te parau mau nō ni’a i te mau mea tei tupu » ’e « ’ia ti’a mai ma te ti’aturi pāpū roa, nō te ’ite i te fa’aorara’a a te Atua » (Te Ha’api’ira’a Tumu ’e te mau Fafaura’a 123:1, 17). ’A feruri ai ’outou i te mau fifi i roto i te ao nei i teie mahana, ’a feruri i te mau rāve’a nō te fa’atītī’aifaro i te reira ’o tē vai ra « i roto i tō [’outou] mana » (’īrava 12, 17). ’E ’eiaha e ha’afaufa’a ’ore i te mau « mea faufa’a iti » (’īrava 15). Nō te aha e mea faufa’a ’ia rave i te reira mau mea ma te « ’ana’anatae » ? (’īrava 17).

E rave rahi ’ā’amu tā Iosepha i ani i roto i teie rata tei hāponohia i te fa’aterera’a hau ’e tei ha’apararehia ’ei ha’apararera’a to’o-11 i roto i te hō’ē ve’a pāpa’i nō Nāvu, te Times and Seasons (hi’o « A History, of the Persecution, of the Church of Jesus Christ, of Latter Day Saints in Missouri, December 1839–October 1840, » [josephsmithpapers.org]).

Nō te tahi atu ā mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 121:1–9 ; 122:7–9

’Aua’a a’e te Atua, e nehenehe tō’u mau tāmatara’a e riro ’ei maita’i nō’u.

• Nō te tauturu i tā ’outou mau tamari’i ’ia feruri e aha te mau mea i orahia e Iosepha Semita ’e tōna mau hoa i roto i te fare tāpe’ara’a nō Liberty, e nehenehe ’outou e tai’o ’āmui i te « Pene 46 : Iosepha Semita i roto i te fare ’auri nō Liberty » (i roto i Te mau ’ā’amu nō roto mai i te Parau Ha’api’ira’a ’e te mau Parau Fafau, 172–74) ’aore rā « Mau reo nō te fa’aho’i-fa’ahou-ra’a mai : Te fare tāpe’ara’a nō Liberty » ’aore rā, e māta’ita’i i te tahi tuha’a o te video « Iosepha Semita : Peropheta nō te Fa’aho’i-fa’ahou-ra’a mai » (Vaira’a buka ’evanelia, ha’amata i te 41:30). I muri iho, ’a tai’o āmui ai ’outou i Te Ha’api’ira’a Tumu ’e te mau Fafaura’a 121:1–9, e nehenehe ’outou e paraparau e mea nāhea tō te Fa’aora tauturura’a ia Iosepha ’ia ’ite i te hau. Nāhea tātou i te ’ite i te hau i roto i te Fa’aora, noa atu ā e mau tau fifi ?

  Chapter 46: Joseph Smith in Liberty Jail: November 1838–April 1839

  Joseph Smith: The Prophet of the Restoration

  A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

• Nō te tauturu i tā ’outou mau tamari’i ’ia ’ite ē, tō tātou mau tāmatara’a « e riro ho’i ïa ’ei maita’i nō [tātou] » (Te Ha’api’ira’a Tumu ’e te mau Fafaura’a 122:7), e nehenehe ’outou e parau ia rātou nō ni’a i te huru nō te fa’ararahira’a i tō tātou mau uaua ’ia amo ana’e tātou i te hō’ē ’ohipa teiaha. E nehenehe ato’a ’outou e ani ia rātou ’ia amo i te hō’ē tauha’a teiaha. I muri iho e nehenehe ’outou e paraparau nāhea te fārereira’a i te mau taime fifi i te tauturu i tō tātou vārua ’ia tupu i te rahi—mai te mea e fāriu tātou i te Fatu nō te fāri’i i te tauturu. ’A fa’a’ite i te tahi mau hi’ora’a nō roto mai i tō ’outou orara’a.

Te Ha’api’ira’a Tumu ’e te mau Fafaura’a 121:34–46

E hōpoi mai te parauti’a i te « mau mana nō te ra’i ra ».

• E tauturu paha te hō’ē fa’ahōho’ara’a i tā ’outou mau tamari’i ’ia hāro’aro’a i « te mau mana nō te ra’i ra ». ’Ei hi’ora’a, e nehenehe ’outou e fa’aau i te mana o te Atua i tē uira. E aha te mea e nehenehe e tāpe’a i te hō’ē mātini uira ’ia fāri’i i te uira ? E aha te mea e fa’aiti i tō tātou mana pae vārua ? E aha tē fa’arahi i te reira ? (’A ’imi i te mau ta’o ’e te mau pereota i roto i Te Ha’api’ira’a Tumu ’e te mau Fafaura’a 121:34–46 ; hi’o ato’a Buka arata’i Buka arata’i rahi, 3.5, 3.6, Vaira’a buka ’evanelia.)

Te Ha’api’ira’a Tumu ’e te mau Fafaura’a 122:7–9

’Ua ’ite ’o Iesu Mesia i te mea ’o tā’u e fa’aruru nei.

• I muri iho i te tai’ora’a i Te Ha’api’ira’a Tumu ’e te mau Fafaura’a 122:7–9 e tā ’outou mau tamari’i, e nehenehe ’outou e fa’a’ite i te hō’ē itera’a ’a ite ai ’outou ē, tei pīha’i iho te Fa’aora ia ’outou i roto i te hō’ē tāmatara’a fifi. E nehenehe ato’a ’outou e hīmene ’āmui i te hō’ē hīmene mai te « Jésus enfant » (Chants pour les enfants, 34), ’e e fa’a’ite pāpū ē, e nehenehe Iesu Mesia e tauturu ia tātou nō te mea ’ua ’ite ’oia i tā tātou e fāri’i ra.

Te Ha’api’ira’a Tumu ’e te mau Fafaura’a 123:15–17

E nehenehe ato’a te mau mea iti ha’iha’i e fa’atupu i te hō’ē ta’a-ē-ra’a rahi i roto i te tāvinira’a a te Atua.

• Nō te tauturu i tā ’outou mau tamari’i ’ia hāro’aro’a i Te Ha’api’ira’a Tumu ’e te mau Fafaura’a 123:15–17, e nehenehe ’outou e fa’a’ite ia rātou i te hō’ē hōho’a nō te hō’ē pahī rahi e te hō’ē hoe na’ina’i, ’aore rā e fa’a’ite atu ia rātou i te tātarara’a a Elder David A. Bednar i roto i « Te mau parau tumu nō tā’u nei ’evanelia » (Liahona, Mē 2021, 125–26). I muri iho e nehenehe ’outou e paraparau nō ni’a i te mau rāve’a ha’iha’i e nehenehe ia tātou ’ia tāvini ma te ’ana’anatae i tō tātou ’utuāfare ’e te mau hoa.

“The Principles of My Gospel”

Elder Bednar teaches that correct gospel principles help us make wise choices and stay on the covenant path.

Mai te hoe na’ina’i o te hō’ē pahī rahi, e nehenehe tā tātou mau tauto’ora’a iti e fa’atupu i te hō’ē ta’a-’ē-ra’a rahi.

Nō te tahi atu ā mau mana’o, ’a hi’o i te ve’a Hoa nō teie ’āva’e.

Joseph Smith in Liberty Jail [Iosepha Semita i roto i te fare tāpe’ara’a nō Liberty], nā Greg Olsen