Fa’atumu i ni’a i te hiero

Nā te peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

Tē fafau atu nei au ē, e ha’amaita’i te taime i fa’ata’ahia nō te haere i roto i te hiero i tō ’outou orara’a i te fāito ’aore roa e mea ’ē atu e nehenehe ’ia nā reira.

E te mau taea’e e te mau tuahine here, i roto i teie nā tuha’a nehenehe e pae o te ’amuira’a rahi, ’ua fāri’i fa’ahou ā tātou i te ’itera’a ē, ’ua matara te mau ra’i ! Te pure nei au ē, ’ua tāpa’o ’outou i tō ’outou mau mana’o ’e e fa’a’ohipa ’outou i te reira. ’Ua ineine tō tātou Metua i te ao ra ’e tāna tamaiti here, ’o Iesu Mesia, ’ia tauturu ia ’outou. Tē fa’aitoito atu nei au ia ’outou ’ia fa’arahi atu i tā ’outou mau tūtavarara’a nō te ’imi i tā rāua tauturu.

’Aita i maoro a’e nei, ’ua māta’ita’i māua te tuahine Nelson, nō te taime mātāmua, i te tau ’āpī 4 o te mau ’apapara’a videos o te Buka a Moromona.¹ ’Ua fa’auru te reira ia māua ! Tē hina’aro nei au e fa’a’ite atu ia ’outou i te tahi tuha’a poto nō ni’a i te fāra’a mai te Fa’aora i te ’āti Nephi.

E mea faufa’a rahi i te mea ē, ’ua mā’iti te Fa’aora ’ia fā mai i mua i te nuna’a i te hiero. Nōna teie fare. ’Ua ’ī te reira i tōna mana. ’Eiaha ’ia mo’ehia ia tātou te ’ohipa tā te Fatu e rave nei nō tatou i teienei. Tē fa’ariro nei ’oia i tōna mau hiero ’ei mau vāhi ’ōhie ’ia haere. Tē fa’a’oi’oi nei ’oia i te terera’a o te patura’a i te mau hiero. Tē fa’ananea nei ’oia i tō tātou ’aravihi ’ia tauturu i te ha’aputuputura’a ia ’Īserā’ela. Tē fa’a’ōhie ato’a nei ’oia i te tāmāra’a pae vārua nō tātou tāta’itahi. Tē fafau atu nei au ē, e ha’amaita’i te taime i fa’ata’ahia nō te haere i roto i te hiero i tō ’outou orara’a i te fāito ’aore roa e mea ’ē atu e nehenehe ’ia nā reira.

168 hiero tā tātou e tere ra i teie taime, ’e e 53 hiero ’āpī e patuhia hei, ’e e 54 tei roto noa ā i te ’opuara’a nō te patura’a !² Tē ’oa’oa nei au i te fa’aara atu i tā mātou fa’anahora’a nō te patu i te hō’ē hiero ’āpī i te mau vāhi i muri nei : Busan (Kōrea) ; Naga (Firipino) ; Santiago (Firipino) ; Eket (Nītēria) ; Chiclayo (Pērū) ; Buenos Aires City Center (Rāparata) ; Londrina (Peretīria) ; Ribeirão Prêto (Peretīria) ; Huehuetenango (Tuatemala) ; Jacksonville (Floride) ; Grand Rapids (Michigan) ; Prosper (Texas) ; Lone Mountain (Nevada) ; ’e Tacoma (Washington).

Tē ’ōpua ato’a nei mātou e patu e rave rahi hiero i roto i te tahi mau ’oire pū rarahi mā’itihia, e mea fifi roa ho’i te parau nō te taime rāterera’a i te hō’ē hiero e vai ra. Nō reira, tē ’oa’oa nei au ’ia fa’a’ite atu e maha tuha’a fenua hau atu tāpiri i te ’oire nō Mehiko, i reira e patuhia ai te tahi mau hiero ’āpī i Cuernavaca, Pachuca, Toluca, ’e Tula.

E au mau taea’e ’e mau tuahine here, e mata na ’outou i te fa’atumu i ni’a i te hiero nā roto i te ravera’a ’aita ā ’outou i rave a’e nei. Tē ha’amaita’i nei au ia ’outou ’ia fātata hau atu ’outou i te Atua ’e ’ia Iesu Mesia i te mau mahana ato’a. ’Ua here au ia ’outou. ’Ia vai mai te Atua i pīha’i iho ia ’outou ē tae atu i te taime e fārerei fa’ahou ai tātou, ’o tā’u ïa pure nā roto i te i’oa o Iesu Mesia, ’āmene.