Te parau tumu mure ’ore o te here

Nā Elder Hugo Montoya

Nō te Hitu ’Ahuru

E mea pāpū te here o tō tātou Metua i te ao ra nō tāna mau tamari’i tāta’itahi. Tei i’ō nei’oia nō te tahi ’e te tahi.

Tē parau tumu mure ’ore o te here, e ’itehia te reira ma te ora i nā fa’auera’a rahi e piti : E hina’aro ’oe i tō Atua ra ma tō ’ā’au ato’a, te vaerua, te mana’o, te pūai ’e ’ia here i tō ta’ata tupu mai ia ’oe iho na.¹

Tē ha’amana’o nei au i tā’u tau to’eto’e mātāmua i te orara’a i Utaha nei—hiona i te mau vāhi ato’a. Te taera’a mai nā Sodovan Medebara mai, te mau mahana mātamua mea ’oa’oa roa te reira, terā rā, tau mahana i muri mai, ’ua ’ite a’era vau ē, e ti’a iā’u ’ia ara i te po’ipo’i roa nō te fa’a’āteatea i te hiona i mua te aroā terera’a pereo’o.

I te hō’ē po’ipo’i, i rōpū i te hō’ē vero hiona, tē tahe nei au i te hou i te opera’a i te hiona, ’e ’ite atu ra vau i tō’u ta’ata tupu i te ’īritira’a i te ’ōpani o tōna vaira’a pereo’o i te tahi a’e pae o te purōmu. Mea huru pa’ari a’e ’oia iā’u, nō reira ’ua mana’o vau mai te mea e oti o’io’i tā’u, e tauturu atu ïa vau iāna. Nō reira ’ua tuō atu vau iāna, ’ua ui atu, « e te taea’e, e hina’aro ānei ’oe i te tauturu ? »

’Ua ’ata’ata mai ’oia ’e ’ua parau mai, « māuruuru e Elder Montoya ». I muri iho, ’ua tātara mai ’oia i te pupuhi hiona nā roto mai i tōna vaira’a pereo’o, ’ua fa’aharuru i te mātini ’e tau minuti noa, ’ua tāmāhia te tā’āto’ara’a o te hiona i mua i tōna fare. ’Ua haere mai ’oia i muri iho i te tahi a’e pae o te purōmu ’e tāna mātini ’e ’ua ui mai ’oia iā’u, « Elder e hina’aro ānei ’oe i te tauturu ? »

Ma te ’ata’ata, ’ua pāhono atu vau, « ’Ē, māuruuru ia ’oe ».

Tē hina’aro nei tātou e tauturu i te tahi ’e te tahi, nō te mea ’ua here tātou i te tahi ’e te tahi, ’e ’ua riro te mau hina’aro o tō’u taea’e ’ei mau hina’aro nō’u, ’e tō’u iho ’ua riro ïa nōna. Noa atu te reo e paraparauhia e tō’u taea’e ’aore rā nō tei hea fenua mai ’oia, ’ua here tātou i te tahi ’e te tahi nō te mea e taea’e tātou, e mau tāmari’i nā te hō’ē ā Metua.

I te fa’a’arara’ahia mai te aupurura’a, ’ua parau te peresideni Russell M. Nelson, « e fa’a’ohipa mātou i te hō’ē arata’ira’a ’āpī ’e te mo’a a’e nō te ha’apa’o ’e nō te aupuru ia vetahi ’ē ».² Nō’u nei, te mo’a a’e tōna aura’a, hau atu te ta’ata iho, hau atu te hōhonu, piri a’e atu i te huru o te Fa’aora : « ’Ia aroha ’outou ia ’outou iho »,³ te tahi ’e te tahi.

’Aita e rava’i i te ’apera’a ’ia riro ’ei ’ōfa’i fa’aturorira’a nō vētahi ’ē ; ’aita e rava’i i te ’itera’a te feiā nava’i ’ore i ni’a i te purōmu, ’e ’aita e ha’apa’o atu. ’A rave ana’e i te mau rāve’a ato’a nō te tauturu i tō tātou ta’ata tupu, noa atu ’o te taime mātāmua te reira ’e ’o te reira ana’e te taime tātou e fārerei ai iāna i roto i teie orara’a.

Nō te aha te here i te Atua ’o te fa’auera’a rahi mātāmua ?

I tō’u mana’o, nō tōna ïa aura’a nō tātou. E mau tāmari’i tātou nāna, tē hi’o mai nei ’oia i tō tātou au-maita’i-ra’a, tē turu’i nei tātou i ni’a iāna ’e tōna here pāruru ia tātou. I roto i tāna fa’anahora’a tē vai nei te ti’amāra’a ’ia mā’iti, nō reira e rave iho ā tātou i te hape.

E fa’ati’a ato’a ’oia ’ia tāmatahia ’e ’ia fa’ahemahia tātou. Terā rā, ’ia rave tātou i te hape ’aore rā ’ia topa i roto i te fa’ahemara’a, ’ua fa’anaho te ’ōpuara’a i te hō’ē Fa’aora ’ia ti’a ia tātou ’ia fa’aorahia ’e ’ia ho’i i mua i te aro o te Atua.

E nehenehe te ’ati i roto i tō tātou orara’a e fa’atupu mai te fē’a’a nō te tupura’a o te mau fafaura’a ’o tei ravehia ia tātou. ’A ti’aturi i tō tātou Metua. E tāpe’a noa ’oia i tāna mau fafaura’a ’e e nehenehe tātou e ’apo mai i te mea tāna e hina’aro e ha’api’i ia tātou.

Noa atu ’ia rave ana’e tātou i te mea maita’i, e nehenehe te mau tupura’a ’ohipa i roto i tō tātou orara’a e taui, mai te maita’i i te ’ino, mai te ’oa’oa i te ’oto. E pāhono mai te Atua i tā tātou mau pure, mai te au i tōna aroha ’e tōna here, ’e i tōna iho taime.

’Ua marō te atati’a pape i reira Elia i te inura’a.⁴
’Ua fati te fana auri maita’i roa a Nephi.⁵
’Ua fa’a’inohia te hō’ē tamaiti ’āpī ’e ’ua ti’avaruhia i rāpae i te fare ha’api’ira’a.
Te tīa’i-maoro-ra’a i te hō’ē ’aiū ’āpī tei pohe i te fānaura’ahia mai.

E taui te mau tupura’a ’ohipa.

’Ia taui ana’e te mau tupura’a ’ohipa mai te maita’i ’e e tae atu i te ’ino ’e te au ’ore, e nehenehe noa tātou e ’oa’oa, nō te mea e’ita te ’oa’oa e turu’i i ni’a i te mau tupura’a ’ohipa i ni’a rā i tō tātou huru i mua i te tupura’a ’ohipa. ’Ua parau te peresideni Nelson, « te ’oa’oa e tae mai ’aore re’a nō te mea e fa’aruruhia nei, pauroa rā nō te mea i ni’a iho e fa’atumuhia ai tō tātou orara’a ».⁶

E nehenehe tātou e pārahi noa ’e e tīa’i ’ia taui te mau tupura’a ’ohipa ia rātou iho, ’aore rā e nehenehe tātou e ’imi ’e e tu’u mai i te mau tupura’a ’ohipa ’āpī.

Tē haere ra Elia i Zarephate, i reira te hō’ē vahine ’īvi i te hōro’ara’a te mā’a ’e te inu nāna.⁷
’Ua hāmani Nephi i te hō’ē fana rā’au ’e ’ua haere e a’ua’u i te mau animara nō te tāmā’a.⁸
’Ua pārahi mai te tamaiti ’āpī nō te fa’aro’o ’e ’ua pāpa’i i te mau parau nā te māramarama, ’e i teie mahana e ’orometua ’oia nō te fare ha’api’ira’a tuatahi.
’Ua fa’ananea nā ta’ata fa’aipoipo i te hō’ē fa’aro’o rahi i te Fa’aora ia Iesu Mesia ’e ’ua ti’aturi i te ’ōpura’a nō te fa’aorara’a. Tō rāua here nō te ’aiū tei tīa’i-maoro-hia ē tei pohe tā’ue, ’ua hau ïa i tō rāua māuiui.

’Ia fa’aro’o ana’e au i te mau uira’a « e te Metua i te ao ra, tei i’ō nei mau ’oe ? ’E tē fa’aro’o ra ānei ’oe ’e tē pāhono ra ānei i te pure a te tamari’i [tāta’itahi] ? »,⁹ tē hina’aro nei au e pāhono, « i vai na ’oia, tē vai nei ’oia ’e e vai ā ’oia i te mau taime ato’a nō ’outou ’e nō’u. E tamaiti au nāna, ’o ’oia tō’u Metua ’e tē ha’api’i nei au ’ia riro ’ei metua tāne maita’i, mai iāna te huru.

Tā’u vahine ’e o vau nei, ’ua tāmata noa māua i te ’imi ’ia fa’aea i pīha’i iho i tā māua mau tamari’i i te mau taime ato’a, i roto i te huru fa’anahora’a ato’a, ’e nā roto i te mau rāve’a ato’a. E mea ta’a ’ē te tamari’i tāta’itahi ; tō rātou faufa’a nō te Atua e mea rahi ïa, ta’a noa atu tō rātou mau ha’afifira’a, te mau hara ’e te mau paruparu, ’ua here te Atua ia rātou ’e tātou ato’a.

I tō’u fāri’ira’a i teie pi’ira’a ’ei huimana fa’atere, te mahana hope’a hou ’a reva mai ai māua i Roto Miti nei, ’ua ’āmui mai tā māua mau tamari’i ’e tō rātou mau ’utūafare i tō māua fare, nō te hō’ē pō ’utūafare, i reira māua i te fa’a’itera’a i tō māua here ’e te māuruuru. I muri mai te ha’api’ira’a, ’ua hōro’a vau i te hō’ē ha’amaita’ira’a autahu’ara’a i tā māua mau tamari’i tāta’itahi. ’Ua tahe tō mātou roimata. I muri mai i te ha’amaita’ira’a, ’ua fa’a’ite mai tā’u tamāroa pa’ari roa a’e i te mau parau ha’amāuruuru nā ni’a i te ’ioa o te tā’āto’ara’a, nō te here rahi tā māua i hōro’a mai tō rātou fānaura’ahia mai e tae roa i terā taime.

’A ha’amaita’i i tā ’outou mau tamari’i, noa atu e 5 ’aore rā e 50 matahiti. ’A pārahi ’e o rātou ; ’ia fa’aea mai nō rātou. Noa atu ā te fa’arava’ira’a e hōpoi’a tei ha’amauhia e te fa’anahora’a hanahana, ’eiaha roa ’ia mo’ehia ia tātou i te hōro’a i te hō’ē taime ’oa’oa ’e tā tātou mau tamari’i.

E mea pāpū te here o tō tātou Metua i te ao ra nō tāna mau tamari’i tāta’itahi. Tei i’ō nei ’oia nō te tahi ’e te tahi. ’Aita vau i ’ite nāhea ’oia i te rave i te reira, tē nā reira nei rā ’oia. ’Ua hō’ē ’oia ’e tāna Fānau tahi i roto i te ’ohipara’a ’e te hanahana o te Metua « nō te fa’atupu i te tāhuti ’ore ’e te ora mure ’ore o te ta’ata nei ».¹⁰ ’Ua tono mai rāua i te Vārua Maita’i nō te arata’i ia tātou, nō te tāmahanahana ia tātou ’e nō te tāmaru ia tātou ’ia hina’arohia.

’Ua fa’aue ’oia i tāna Tamaiti here ’ia poiete i teie ao nehenehe mau. ’Ua ha’api’i ’oia ia Adamu ’e ia Eva ’e ’ua hōro’a ia rāua i te ti’amāra’a nō te mā’iti. ’Ua tono mai ’oia i te mau ve’a i te roara’a o te mau matahiti ’e te mau matahiti, ’ia nehenehe ia tātou e fāri’i i tōna here ’e tāna mau fa’auera’a.

Tei reira ’oia i roto i te uru rā’au mo’a i te pāhonora’a i tā Iosepha uira’a ateate ’e i te pi’ira’a iāna ma tōna ’ioa ’Ua parau atu ’oia, « ’o tā’u Tamaiti Here teie. ’A fa’aro’o iāna ! »¹¹

Tē ti’aturi nei au ē te fa’a’itera’a teitei roa a’e nō te here o te Atua nō tātou, ’ua tupu ïa i roto i te ō nō Getesemane, i te vāhi i pure ai te Tamaiti a te Atua Ora, « e tau Metua ē, ’ia ti’a ra, e hōpoi ’ē atu i teie nei ’āu’a, ’ia tupu rā tō ’oe hina’aro, ’eiaha tō’u ».¹²

’Ua ’ite mai au ē, te tuha’a iti ’o tā’u e nehenehe e hāro’aro’a nō te tāra’ehara a Iesu Mesia, e ha’amara’a i tō’u here nō te Metua ’e tāna Tāmaiti, e fa’aiti i tō’u hina’aro i te hara ’e e fa’aro’o ’ore, ’e e ha’amara’a i tō’u hina’aro ’ia maita’i a’e ’e ’ia rave maita’i a’e.

’Ua haere Iesu ma te mata’u ’ore ’e ma te fē’a’a ’ore i Getesemane, ma te ti’aturi i tōna Metua, te ’itera’a o ’oia ana’e te haere i te nene’ira’a vine. ’Ua fa’a’oroma’i ’oia i te mau māuiui ato’a ’e te mau hāmani-’ino-ra’a ato’a. ’Ua fa’ahapahia ’oia, ’ua ha’avahia ’e ’ua fa’asātaurohia. I te roara’a o tōna iho umunaro ’e tōna māuiui i ni’a i te sātauro, ’ua rōtahi Iesu i ni’a i te hina’aro o tōna metua vahine ’e o tāna pipi herehia. ’Ua pūpū ’oia i tōna ora.

I te toru o te mahana, ’ua ti’afa’ahou mai ’oia. ’Ua tūfarefare te menema ; tē ti’a nei ’oia i te pae ’atau o tōna ra Metua. Tē ti’aturi nei rāua ē, e mā’iti tātou i te ha’apa’o i tā tātou mau fafaura’a ’e e ho’i atu ia rāua ra. Teie tuha’a piti e ’ere ïa i tā tātou tuha’a hope’a, ’aita tātou i riro nō teie ’utūafare tino nei, maori rā e feiā mure ’ore tātou, e ora nei i te mau ’itera’a rau tau poto.

’O Iesu te Mesia, te Tamaiti a te Atua ora. Tē ora nei ’oia, ’e nō te mea tē ora nei ʼoia, e ora te mau tamari’i ato’a a te Atua e a muri noa atu. Maoti tāna tusia tāra’ehara, e nehenehe tātou pā’āto’a e ora ’āmui ’e o rāua. I te i’oa o Iesu Mesia, ’āmene.