’O Iesu Mesia te pūai o te feiā ’āpī

Nā Elder Dieter F. Uchtdorf

Nō te pupu nō Te Tino ’Ahuru ma Piti ’āpōsetolo

’A tu’u i tō ’outou ti’aturira’a i ni’a ia Iesu Mesia. E arata’i ’oia ia ’outou i ni’a i te ’ē’a mau. ’O ’oia tō ’outou pūai.

’A fa’aineine ai au i teie parau poro’i i teie mahana, ’ua fāri’i au i te mana’o pūai ’ia paraparau i te feiā ’āpī tamāroa ’e te feiā ’āpī tamāhine.

Tē paraparau ato’a nei au i te feiā i riro nā ’ei feiā ’āpī ’e tae noa atu ia rātou ’aita e ha’amana’o fa’ahou nei.

’E tē parau nei au i te feiā ato’a e here nei i tā tātou feiā ’āpī ’e ’o tē hina’aro nei ’ia manuia rātou i roto i te orara’a.

Nō te u’i ’āpī, e parau poro’i ta’a ’ē tā’u nā ’outou nō ’ō mai i tō tātou Fa’aora, ’o Iesu Mesia.

Te parau poro’i a te Fa’aora nō ’outou

E a’u mau hoa here ē, ’āhiri tei ’ō nei te Fa’aora i teie taime, e aha ïa tāna e parau mai ia ’outou ?

Tē ti’aturi nei au ē, e ha’amata ’oia nā roto i te fa’a’itera’a i tōna here rahi nō ’outou. E nehenehe tāna e fa’a’ite i te reira nā roto i tāna mau parau, e tahe pūai ato’a mai rā te reira—nā roto noa i tōna ti’ara’a mai i pīha’i iho ia ’outou—e’ita e hape, e tae roa te reira i roto i tō ’outou ’ā’au, ma te fa’a’ī i tō ’outou vairua tā’āto’a !

Teie rā, nō te mea e mea paruparu tātou pā’āto’a ’e te parauti’a ’ore, e puta mai paha te tahi mau māna’ona’ora’a i roto i tō ’outou ferurira’a. E ha’amana’o paha ’outou i te mau hape tā ’outou i rave, te mau taime ’i fati ai ’outou i raro a’e i te fa’ahemara’a, te tahi mau mea ’aita ’outou i hina’aro e rave, ’aore rā ’ua hina’aro ’outou e rave maita’i a’e.

E ’ite te Fa’aora i te reira ’e tē ti’aturi nei au ē, e tāmarū mai ’oia ia ’outou nā roto i te mau parau tāna i fa’ahiti i roto i te mau pāpa’ira’a mo’a :

« ’Eiaha e mata’u ».¹

« ’Eiaha e fē’a’a ».²

« ’A ’oa’oa na ».³

« ’Eiaha e horuhoru tō ’outou ’ā’au ».⁴

’Aita vau e mana’o nei e ’imi ’oia i te mau ’ōtohera’a nō tā ’outou mau hape. E’ita ’oia e fa’aiti i te reira. ’Aita, e ani ’oia ia ’outou ’ia tātarahapa, ’ia vaiiho i tā ’outou mau hara i muri, ’ia taui, ’ia ti’a iāna ’ia fa’a’ore i tā ’outou hara. E fa’aha’amana’o mai ’oia ia ’outou ē, ’a 2 000 matahiti i teienei, ’ua rave ’oia i te reira mau hara i ni’a iāna iho, ’ia nehenehe ’outou ’ia tātarahapa. E tuha’a te reira nō te fa’anahora’a nō te ’oa’oa i pūpūhia mai ia tātou nā roto mai i tō tātou Metua here i te ao ra.

E nehenehe Iesu e parau mai ē, tā ’outou mau fafaura’a ’e ’ōna tei ravehia i te taime ’a bāpetizohia ai ’outou, ’e ’o tē fa’a’āpīhia i te mau taime ato’a ’a rave ai ’outou i te ’ōro’a mo’a, e hōro’a mai ïa te reira i te hō’ē tū’atira’a ta’a ’ē ’e ’ōna. Te huru tū’atira’a tā te mau pāpa’ira’a mo’a e tātara nei ē, e nati-’āmui-hia ’ia ti’a ho’i ia ’outou ’ia amo ’outou i te mau huru hōpoi’a ato’a nā roto i tāna tauturu.⁵

Tē ti’aturi nei au ē, e hina’aro te Fa’aora Iesu Mesia ’ia hi’o ’outou, ’ia fāri’i ’e ’ia ’ite ē ’o ’oia tō ’outou pūai. Nā roto i tāna tauturu, ’aita e ’ōti’a nō te mau mea tā ’outou e nehenehe e fa’aoti. ’Aita ho’i e ’ōti’a nō tō ’outou pūai. E hina’aro ’oia ’ia hi’o ’outou ia ’outou iho mai te huru tāna e hi’o ra ia ’outou. ’E e mea ta’a ’ē roa te reira i te huru tā tō te ao e hi’o nei ia ’outou.

E parau te Fa’aora, ma te pāpū ē, e tamāhine ’aore rā e tamāiti ’outou nā te Atua manahope. Tō ’outou Metua i te ao ra, ’o te ta’ata hanahana roa a’e i roto i te ra’i nui ātea, tei ’ī i te here, te ’oa’oa, te vi’ivi’i ’ore, te mo’a, te māramarama, te aroha ’e te parau mau. ’E i te hō’ē mahana, e hina’aro ’oia ia ’outou ’ia fatu i te mau mea ato’a nāna ra.⁶

Te reira te tumu i tae mai ai ’outou i te fenua nei—nō te ha’api’i, nō te tupu i te rahi, ’e nō te haere i mua ’e ’ia riro mai, mai te mea i poiete ai tō ’outou Metua i te ao ra ia ’outou.

Nō te fa’atupu i te reira, ’ua tono mai ’oia ia Iesu Mesia ’ei Fa’aora nō ’outou. Te ’ōpuara’a te reira i muri mai i tāna fa’anahora’a rahi nō te ’oa’oa, tāna ’Ēkālesia, tōna autahu’ara’a, te mau pāpa’ira’a mo’a—terā mau mea tā’āto’a.

Terā tō ’outou haere’a. Terā tō ’outou ’ananahi. Terā tā ’outou i mā’iti !

Parau mau ’e te mā’itira’a

I rōpu i te fa’anahora’a a te Atua nō tō ’outou ’oa’oa, tē vai ra tō ’outou mana nō te mā’iti.⁷ ’Oia mau, tē hina’aro nei tō ’outou Metua i te ao ra ’ia mā’iti ’outou i te ’oa’oa mure ’ore i pīha’i iho iāna, ’e e tauturu ’oia ia ’outou ’ia fa’aoti i te reira, terā rā e’ita roa atu ’oia e fa’ahepo ia ’outou.

Nō reira, e fa’ati’a ’oia ia ’outou ’ia mā’iti : Te māramarama ’aore rā te pōiri ? Te maita’i ’aore rā te ’ino ? Te ’oa’oa ’aore rā te ahoaho ? Te ora mure ’ore ’aore rā te pohe pae vārua ?⁸

E au ē, e mā’itira’a ’ōhie, e ’ere ānei ? ’Are’a rā i’ō nei i te fenua nei, mai te mea ra e mea fifi a’e i tei mana’ohia.

Te fifi, ’oia ho’i ’aita tātou e ’ite tāmau ma te māramarama maita’i i te mau mea, mai tā tātou e hina’aro nei. ’Ua fa’aau te ’āpōsetolo Paulo i te reira i te hi’ora’a « nā roto i te hō’ē hāpaina i roto i te pōiri ».⁹ ’Ua rau te mau ’āhuehuera’a i roto i te ao nei nō ni’a i te mea maita’i ’e te mea ’ino. ’Ua tāvirihia te parau mau nō te fa’ariro i te ’ino ’ei maita’i ’e te maita’i ’ei ’ino.¹⁰

’Ia ’imi pāpū ana’e rā ’outou i te parau mau—e’ita te parau mau mure ’ore e taui—e riro mai tā ’outou mau mā’itira’a ’ei mea māramarama roa. ’Oia ïa, tē vai noa ra ā tō ’outou mau fa’ahemara’a ’e te mau tāmatara’a. E tupu noa ā te mau ’ohipa ’ī’ino. Te mau mea e fa’atapitapi. Te mau ’ati pe’ape’a. E nehenehe rā tā ’outou e arai ’ia ’ite ana’e ’outou ē ’o vai ’outou, nō te aha tei i’ō nei ’outou, ’e ’ia ti’aturi ana’e ’outou i te Atua.

Nō reira, i hea ’outou e ’imi ai i te parau mau ?

Tei roto te reira i te ’evanelia a Iesu Mesia. ’E tē ha’api’ihia nei te ’īra’a o teie nei ’evanelia i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei.

’Ua parau Iesu Mesia, « ʼo vau te ’e’ā, te parau mau, ʼe te ora : ʼaore roa e ta’ata e tae i te Metua ra, maori rā ’ei iāʼu ».¹¹

’Ia rave ana’e ’outou i te mau mā’itira’a faufa’a mau, ’o Iesu Mesia ’e tāna ’evanelia tei fa’aho’ihia mai, te mā’itira’a maita’i roa a’e. E uira’a ana’e tā ’outou, ’o Iesu Mesia ’e tāna ’evanelia tei fa’aho’ihia mai, te pāhonora’a maita’i roa a’e. ’Ia paruparu ana’e ’outou, ’o Iesu Mesia tō ’outou pūai.

E hōro’a mai ’oia i te mana i tei rohirohi ; ’e i te feiā ’aita e pūai e fa’arahi ’oia i te pūai.

Te feiā e tīa’i ra i te Fatu, e fa’a’āpīhia rātou e tōna pūai.¹²

Nō te pūai o te feiā ’āpī

Nō te tauturu ia ’outou ’ia ’ite mai i te ’ē’a ’e nō te tauturu ia ’outou ’ia rave i te ha’api’ira’a tumu a te Mesia ’ei fa’aurura’a arata’i i roto i tō ’outou orara’a, ’ua fa’aineine Te ’Ēkālesia a Iesu Mesia i te Feiā Mo’a i te mau Mahana Hope’a nei i te hō’ē rāve’a tauturu ’āpī, hō’ē buka tei hi’opo’a-fa’ahou-hia o te Nō te pūai o te feiā ’āpī.

Hau i te 50 matahiti i teienei, ’ua riro te Nō te pūai o te feiā ’āpī ’ei arata’i nō te mau u’i feiā ’āpī nō te mau mahana hope’a nei. E tāpe’a noa vau i te hō’ē buka iti i roto i tō’u pute ’e e fa’a’ite au i te reira i te mau ta’ata ’ānoenoe nō ni’a i tā tātou mau ture. ’Ua fa’atanohia ’e ’ua fa’a’āpīhia te reira, nō te pāhono maita’i a’e i te mau tāmatara’a ’e i te mau fa’ahemara’a o tō tātou ’anotau. E roa’a te buka iti ’āpī Nō te pūai o te feiā ’āpī nā ni’a i te nātira’a nā roto e 50 reo, ’e e roa’a ato’a te nene’ira’a. E riro te reira ’ei tauturu mau nō te rave i te mau mā’itira’a i roto i tō ’outou orara’a. ’A rave mai i tā ’outou iho ’e ’a fa’a’ite i te reira i tō ’outou mau hoa.

Te ’īritira’a ’āpī o te Nō te pūai o te feiā ’āpī ’ua tu’uhia te piti o te upo’o parau E arata’i nō te rave i te mau mā’itira’a.

Nō te ha’apāpū maita’i, te arata’i maita’i roa a’e nō ’outou nō te rave i te mau mā’itira’a, ’o Iesu Mesia ïa. ’O Iesu Mesia te pūai o te feiā ’āpī.

Nō reira, te ’ōpuara’a o te Nō te pūai o te feiā ’āpī ’o te arata’i atu ia ’outou iāna ra. E ha’api’i te reira ia ’outou i te mau parau mau mure ’ore o tāna ’evanelia tei fa’aho’ihia mai, te mau parau mau nō ni’a i te mau uira’a ’o vai ’outou, ’o vai ’oia, ’e e aha tā ’outou e nehenehe e rave fa’aoti ma tōna pūai. E ha’api’i te reira ia ’outou e nāhea ’ia rave i te mau mā’itira’a ti’a tei niuhia i ni’a i teie mau parau mau mure ’ore.¹³

E mea faufa’a ato’a ’ia ’ite e aha te mea tā te Nō te pūai o te feiā ’āpī e ’ore e rave. E’ita te reira e rave i te mau fa’aotira’a nō ’outou. E’ita te reira e hōro’a mai te « ’ē » ’aore rā te « ’aita » nō ni’a i te mā’itira’a tāta’itahi tā ’outou e fārerei atu. E fa’atumu te Nō te pūai o te feiā ’āpī i ni’a i te niu o tā ’outou mau mā’itira’a. E fa’atumu te reira i ni’a i te mau faufa’ara’a, te mau parau tumu ’e te ha’api’ira’a tumu, ’eiaha rā i ni’a i te peu tāta’itahi.

Nā roto i tāna mau peropheta, ’ua arata’i te Fatu ia tātou i te mau taime ato’a i ni’a i te reira ’avei’a. Tē tāparu nei ’oia ia tātou ’ia « fa’arahi i tō [tātou] ’aravihi pae vārua nō te fāri’i i te heheura’a ».¹⁴ Tē ani mai nei ’oia ia tātou « ’ia fa’aro’o iāna ».¹⁵ Tē pi’i mai nei ’oia ia tātou ’ia pe’e iāna i ni’a i te mau haere’a teitei roa ’e te mo’a roa.¹⁶ ’E tē ha’api’i nei tātou mai te reira te huru i te mau hepetoma ato’a i roto i te Mai, pe’e mai.

Tē mana’o nei au ē, e nehenehe te arata’i e hōro’a mai i te hō’ē tāpura roa o te mau ’ahu e’ita e tano ’ia ’ō’omo, te mau ta’o e’ita e tano ’ia parau ’e te mau hōho’a teata e’ita e tano ’ia māta’ita’i. Terā rā e mea faufa’a ānei te reira i roto i te hō’ē ’Ēkālesia nā te ao ato’a nei ? E fa’aineine mau ānei teie huru ravera’a ia ’outou nō te hō’ē orara’a fa’aro’o ?

’Ua parau Iosepha Semita, « E ha’api’i au ia rātou i te mau parau tumu ti’a, ’e nā rātou iho e fa’atere ia rātou ».¹⁷

’E ’ua parau te ari’i Beniamina i tōna mau ta’ata i roto i te Buka a Moromona, « ’aita e ti’a iā’u ’ia fa’a’ite atu i te mau mea e hope roa a’e e hapa ai ’outou ; ’ua rau te huru o te ’ē’a ’e te rāve’a, e tae atu ho’i i te rahi e ’ore ïa e ti’a iā’u ’ia tai’o ».¹⁸

’Ua parau fa’ahou ā te ari’i Beniamina, « ’o teie parau iti ra e ti’a iā’u ’ia parau atu ia ’outou na […] ’ia hi’opo’a ia ’outou iho ’e tō ’outou mau mana’o, ’e tā ’outou mau parau, ’e tā ’outou mau ’ohipa e rave ra, ’e e ha’apa’o ho’i i te mau fa’aue a te Atua ra, ’e e mau pāpū i te fa’aro’o […] o tō tātou Fatu ra, e tae noa atu i te hope’a o tō ’outou ora nei ».¹⁹

E mea ’ino ānei ’ia roa’a te mau ture ? ’Aita roa atu. E hina’aro tātou pā’āto’a i te reira i te mau mahana ato’a. Terā rā e mea hape ’ia fa’atumu noa i ni’a i te mau ture, ’eiaha ra i ni’a i te Fa’aora. Tītauhia ia ’outou ’ia ’ite, te nō te aha ’e te nāhea, ’e i muri iho ’ia feruri i te mau hope’ara’a o tā ’outou mau mā’itira’a. Tītauhia ia ’outou ’ia tu’u i tō ’outou ti’aturira’a i ni’a ia Iesu Mesia. E arata’i ’oia ia ’outou i ni’a i te ’ē’a mau. ’O ’oia tō ’outou pūai.²⁰

Te mana o te ha’api’ira’a tumu mau

E mea taiā ’ore te Nō te pūai o te feiā ’āpī i te fa’a’itera’a i te ha’api’ira’a tumu a Iesu Mesia. E mea taiā ’ore i te anira’a ia ’outou ’ia rave i te mau mā’itira’a niuhia i ni’a i te ha’api’ira’a tumu a te Mesia. ’E e mea taiā ’ore i te fa’ata’ara’a i te mau ha’amaita’ira’a tā Iesu Mesia i fafau i te feiā e pe’e i tōna haere’a.²¹

’Ua ha’api’i te peresideni Russell M. Nelson : « ’Ia riro ana’e tō ’outou hina’aro rahi a’e ’ia vaiiho i te Atua ’ia upo’oti’a [i roto i tō ’outou orara’a]… e rave rahi mau fa’aotira’a e riro mai ’ei mea ’ōhie roa… E rave rahi mau fifi ’o tē riro mai ’ei mau fifi ’ore ! E ’ite ’outou nāhea ’ia fa’anehenehe maita’i roa a’e ia ’outou. E ’ite ’outou e aha te hi’o ’e te tai’o, i hea e hōro’a ai i tō ’outou taime, ’e e ’āpiti ’outou ’ia vai. E ’ite ’outou e aha tā ’outou e hina’aro e rave fa’aoti. E ’ite ’outou i te huru ta’ata tā ’outou e hina’aro mau ’ia riro ».²²

Hō’ē fa’aturera’a teitei roa

E fa’aturera’a teitei roa tā Iesu Mesia nō tāna mau pipi. ’E te anira’a ’ia ’imi ma te ’ā’au tae mau i tōna hina’aro ’e ’ia ora mai te au i tāna mau parau mau, ’o te fa’aturera’a teitei roa a’e ïa !

’E’ita e ti’a i te mau mā’itira’a faufa’a i te pae tino ’e i te pae vārua ’ia niu-noa-hia i ni’a i te mau mea auhia e te ta’ata iho, ’aore rā i ni’a i te mea ’ōhie ’e te mātarohia e te ta’ata.²³ ’Aita te Fatu e parau nei ē, « ’a rave i te mea tā ’oe e hina’aro ».

Tē parau nei ’oia, « e vaiiho i te Atua ’ia upo’oti’a ».

Tē parau nei ’oia, « mai, ’a pe’e mai iā’u ».²⁴

Tē parau nei ’oia, « ’a ora i roto i te hō’ē huru mo’a, te teitei ’e te pa’ari roa a’e ».

Tē parau nei ’oia, « ’a ha’apa’o i tā’u mau fa’auera’a ».

’O Iesu Mesia tō tātou hi’ora’a maita’i roa a’e, ’e e tūtava tātou ma te pūai ato’a o tō tātou vairua ’ia pe’e iāna.

E a’u mau hoa here, e fa’ahiti fa’ahou atu vau, ’āhiri tē ti’a nei te Fa’aora i’ō nei i teie mahana, e fa’a’ite mai ’oia i tōna here hope ’ore nō ’outou, tōna ti’aturi hope nō ’outou. E parau mai ’oia ia ’outou e nehenehe ’outou e rave i te reira. E nehenehe ’outou e fa’ati’a i te hō’ē orara’a ’oa’oa ’e te poupou nō te mea, ’o Iesu Mesia tō ’outou pūai. E ’itehia ia ’outou te ti’aturira’a, te hau, te pārurura’a, te ’oa’oa ’e te rirora’a i teienei ’e a muri noa atu, nō te mea e ’itehia te reira mau mea ato’a i roto ia Iesu Mesia, i roto i tāna ’evanelia, i roto i tāna ’Ēkālesia.

Tē fa’a’ite pāpū nei au i te reira ma te hanahana, ’ei ’āpōsetolo nā te Fatu Iesu Mesia, ’e tē vaiiho atu nei au ia ’outou i tā’u ha’amaita’ira’a ma tō’u ’ā’au ato’a, e ma te māuruuru rahi ’e tō’u here ia ’outou, nā roto i te i’oa o Iesu Mesia ’āmene.

Fa’ata’ara’a

1. Luka 5:10 ; 8:50 ; 12:7 ; Te Ha’api’ira’a Tumu ’e te mau Fafaura’a 38:15 ; 50:41 ; 98:1.

2. Te Ha’api’ira’a Tumu ’e te mau Fafaura’a 6:36

3. Mataio 14:27 ; Ioane 16:33 ; Te Ha’api’ira’a Tumu ’e te mau Fafaura’a 61:36 ; 68:6 ; 78:18.

4. Ioane 14:1, 27.

5. Hi’o Mataio 11:28–30.

6. Hi’o Te Ha’api’ira’a Tumu ’e te mau Fafaura’a 84:38.

7. E parau mai paha ’outou ē, ’ua hāmanihia te fa’anahora’a a te Metua nō te tauturu ia ’outou ’ia fa’a’ite i tō ’outou mau hina’aro nā roto i tā ’outou mau mā’itira’a, ’ia ti’a ia ’outou ’ia fāri’i i te hope’ara’a ti’a o te mau mea tā ’outou e hina’aro. Mai tā Elder Dale G. Renlund i ha’api’i, « te fā a tō tātou Metua i te ao ra e ’ere i te fa’aravera’a i tāna mau tamari’i i te ’ohipa ti’a, ’o te tītaura’a rā i tāna mau tamari’i ’ia mā’iti ’ia rave i te ’ohipa ti’a ’e i te pae hope’a, ’ia riro mai mai iāna te huru » (« E mata nā ’outou i te mā’iti i teie mahana », Liahona, Novema 2018, 104).

8. Hi’o 2 Nephi 2:26–27.

9. 1 Korinetia 13:12.

10. Hi’o Isaia 5:20.

11. Ioane 14:6.

12. Hi’o Isaia 40:29–31.

13. ’Ei feiā mo’a i te mau mahana hope’a nei, e mea pinepine tātou i te ’itehia nō te ’ohipa tā tātou e rave ’e ’aita e rave—tā tātou mau peu. E nehenehe te reira e riro ’ei mea maita’i, terā rā e mea maita’i a’e ’ia ’itehia tātou nō te ’ohipa tā tātou i ’ite (te mau parau mau e fa’atere ra i tō tātou mau haere’a) ’e nō te ta’ata tā tātou i ’ite (te Fa’aora—’e e mea nāhea tō tātou here iāna i te fa’auru i tō tātou mau haere’a).

14. Russell M. Nelson, « Heheura’a nō te ’Ēkālesia, heheura’a nō tō tātou orara’a », Liahona, Mē 2018, 96.

15. Hi’o Russell M. Nelson, « Fa’aro’o iāna », Liahona, Mē 2020, 88–92.

16. Te ravera’a i tei niuhia i ni’a i te mau parau tumu o te arata’i ’āpī Nō te pūai o te feiā ’āpī ’ua tū’ati te reira i te tahi atu mau mana’o ’āpī i tu’uhia mai e te ’Ēkālesia a te Fa’aora, mai te ’A poro haere i tā’u nei ’evanelia, te aupurura’a, te fa’anahora’a fa’atumura’a i ni’a i te fare Mai, pe’e mai te fa’anahora’a a te mau tamari’i ’e te feiā ’āpī, Te ha’api’ira’a mai tā te Fa’aora, ’e te Buka arata’i rahi ’āpī. E mea pāpū maita’i ē, tē ha’apa’ari nei te Fatu i tō tātou ’aravihi pae vārua. Tē fa’a’ite mai nei ’oia i te tāpa’o nō te ti’aturi i roto i tōna nuna’a fafauhia i te mau mahana hope’a nei.

17. Te mau Ha’api’ira’a a te mau Peresideni o te ’Ēkālesia : Iosepha Semita (2007), 284.

18. Mosia 4:29 E nehenehe e parau ē, terā te mea tā te mau pharisea i te ’anotau o Iesu i te tāmata i te rave. I roto i tō rātou hina’aro rahi ’ia tāpe’a i te ta’ata ’eiaha ’ia ’ōfati i te ture, ’ua ha’aputu rātou e rave rahi hānere ture niuhia i ni’a i tō rātou hāro’aro’ara’a i te mau pāpa’ira’a mo’a. Te hape o te mau pharisea, ’o te mana’ora’a ïa ē, e fa’aora tā rātou mau ture ia rātou. I muri iho, i te fāra’a mai te Fa’aora ’aita rātou i ’ite atu iāna.

19. Mosia 4:30 ; ’āpitihia atu te ha’apāpūra’a.

20. Te tahi atu tumu e mea faufa’a te fa’anahora’a tei niuhia i ni’a i te mau parau tumu i teie mahana, maori rā, te tupu-rahi-ra’a te iho tumu rau o te ’Ēkālesia a te Fatu. E mea mure ’ore ’e nō te ao tā’āto’a nei te mau parau tumu. E mea tere maita’i te mau ture ’aore rā te mau fa’a’ohipara’a ta’a ’ē o teie mau parau tumu i te tahi mau vāhi, ’eiaha rā i te tahi atu mau vāhi. Te mea e tāhō’ē nei ia tātou, ’o Iesu Mesia ïa ’e te mau parau mau mure ’ore tāna i ha’api’i, noa atu e mea ta’a ’ē ri’i te mau fa’a’ohipara’a i roto i te tau ’e i roto i te mau ta’ere tumu. Nō reira, te fifi o te tāpura o te mau mea ato’a e rave ’e ’eiaha e rave, e ’ere noa ïa i te mea tano, e ’ere i te mea ’ōhie, ’e ’e’ita e vai maoro. Te fifi ’oia ho’i, e fa’afāriu ’ē te reira i tō tātou mana’o i te puna mau o tō tātou pūai, ’oia ho’i tō tātou Fa’aora, ’o Iesu Mesia.

21. E rave rahi matahiti i ma’iri a’e nei, ’ua fa’ahiti ’o Boyd K. Packer i teie mau parau pūai : « Te ha’api’ira’a tumu mau tei hāro’aro’ahia, e taui roa te reira i te huru ’e te haere’a. E ha’amaita’i te tuatāpapara’a i te mau ha’api’ira’a o te ’evanelia i te haere’a, hau atu i te vitiviti i te hō’ē tuatāpapara’a i te haere’a ’o tē ha’amaita’i i te haere’a » (« ’Eiaha e mata’u », Liahona, Mē 2004, 79).

    ’Ua ha’api’i te peresideni Ezra Taft Benson i te hō’ē parau mau mai te reira te huru :« E ’ohipa te Fatu mai roto atu haere ti’a atu i rāpae. E ’ohipa tō te ao nei mai rāpae haere atu i roto.… E hāmani tō te ao nei i te haere’a a te ta’ata, ’āre’a te Mesia, e nehenehe tāna e taui i te nātura o te ta’ata » (« Born of God », Ensign, Nov. 1985, 6).

    I te ’itera’a Alama, te peropheta nō te Buka a Moromona, i te ’ino i roto i te ao ati a’e iāna, ’ua fāriu atu ’oia i ni’a i te parau a te Atua nō te mea ’ua ’ite ’oia « ’ua hau tō te reira mana i ni’a i te ’ā’au o te ta’ata i tō te ’o’e, ’e tō te tahi mau mea ato’a tē tae ia rātou ra ; nō reira i mana’o ai Alama ē, e mea maita’i ïa ’ia tāmata i te mana o te parau a te Atua » (Alama 31:5).

22. Russell M. Nelson, « A vaiiho i te Atua ’ia upo’oti’aLiahonaNovema 2020, 94. ’Ua fa’ahōho’a te peresideni Nelson i teie parau ’a ha’api’i mai ai ’oia ia tātou nō ni’a i te fa’aturara’a i te mahana sābati : « I roto i tō’u mau matahiti ’āpīra’a ra, ’ua tuātapapa vau i te ’ohipa a vetahi ’ē tei hāmani i te mau tāpura o te mau mea e rave ’e te mau mea ’eiaha e rave i te sābati. I muri roa iho tō’u ha’api’ira’a mai i roto i te mau pāpa’ira’a mo’a ē, ’ua riro tā’u mau haere’a ’e tō’u huru i te sābati ’ei tāpa’o i rotopū iā’u ’e tō’u Metua i te ao ra. Nā roto i taua ’itera’a ra, ’aita vau i hina’aro fa’ahou i te tāpura i te mau mea e rave ’e ’eiaha e rave. ’Ia tītau-ana’e-hia iā’u ’ia rave i te hō’ē fa’aotira’a e mea tano ānei te hō’ē ’ātivite nō te sābati ’aore rā ’aita, e ui noa vau iā’u iho, ’E aha te tāpa’o tā’u e hina’aro e hōro’a i te Atua ?’ Nā taua uira’a ra i fa’ariro i tā’u mau fa’aotira’a nō ni’a i te mahana sābati ’ei mau fa’aotira’a māramarama maita’i » (« Te sābati ’e mahana hina’arohia », Liahona, Mē 2015, 130).

23. ’Ua ha’api’i mai David A. Bednar ē, « e tauturu ato’a mai te mau parau tumu nō te parauti’a ia tātou ’ia hi’o i ’ō atu i tō tātou iho mau hina’aro ’e te hia’ai ha’apa’o noa ia tātou iho maoti te hi’ora’a faufa’a rahi nō te parau mau mure ’ore ’a fa’aruru ai tātou i te mau vaira’a rau, te mau ha’afifira’a, te mau fa’aotira’a, ’e te mau ’ohipa o te tāhuti nei ».(« Te mau parau tumu o tā’u ’evanelia », Liahona, Mē 2021, 123–24).

24. Luka 18:22.