E nehenehe tātou e rave i te mau ’ohipa teimaha nā roto iāna
E tupu atu tātou i te rahi i roto i tō tātou orara’a ’ei pipi mai te mea e fa’a’ohipa tātou i te fa’aro’o i te Fatu i te mau taime fifi.
I tō te Fa’aora orara’a i ni’a i te fenua nei, ’ua ’ite ’oia i te hō’ē ta’ata matapō. ’Ua ui te mau pipi a Iesu, « E rabi, nā vai te hara, nāna iho ānei, e nā nā metua ānei, i fānau matapō mai ai ’oia ? »
Nā te pāhonora’a pāpū, te here ’e te ’ā’au tae a te Fa’aora e ha’apāpū mai nei ia tātou ē, tē māna’ona’o nei ’oia i tā tātou mau ’arora’a : « E ’ere i tō te hara a teie nei ta’ata ’e te hara a nā metua ra, nō te mea rā ’ia ’itea te ’ohipa a te Atua iāna nei ».1
Noa atu e tae mai te tahi mau tāmatara’a nō te ha’apa’o-’ore-ra’a ma te hina’aro mau, ’ua ’ite rā tātou ē e rave rahi mau tāmatara’a o te orara’a e tae mai nō te tahi atu mau tumu. Noa atu ’e aha te tumu o tā tātou mau tāmatara’a, e nehenehe te reira e riro ’ei rāve’a maita’i nō te tupura’a i te rahi.
’Aita tō mātou ’utuāfare i pāruruhia i te mau ’ati o te orara’a. ’A pa’ari mai ai au, ’ua fa’ahiahia vau i te mau ’utuāfare rarahi. E mea au roa nā’u teie mau huru ’utuāfare, i te taime ihoa rā a ’ite ai au i te ’Ēkālesia i tō’u ’āpīra’a nā roto i tō’u metua tane fēti’i, ’o Sarfo, ’e tāna vahine i Takoradi, Ghana.
I tō māua Hana fa’aipoipora’a, ’ua hina’aro māua ’ia tupu tō māua ha’amaita’ira’a pātereāreha, e fa’a’itera’a te reira ē, e ha’amaita’ihia māua i te mau tamari’i e rave rahi. Teie rā, hou te fānaura’a o te toru o tā māua tamāroa, ’ua ha’apāpū-maita’i-hia ia māua ē e’ita tā Hana e nehenehe fa’ahou e fānau i te tahi atu ’aiū. Aua’a a’e rā, noa atu ē ’ua fānauhia ’o Kenneth i roto i te hō’ē orara’a fifi roa nōna ’e nō tōna metua vahine, ’ua tae maita’i mai ’oia, ’e ’ua ora mai tōna metua vahine. ’Ua ti’a iāna ’ia ha’amata i te ’āmui hope roa i roto i tō mātou orara’a ’utuāfare, mai te haerera’a i te purera’a, te mau pure ’utuāfare i te mau mahana ato’a, te tai’ora’a i te mau pāpa’ira’a mo’a, te pō ’utuāfare, ’e te mau fa’a’oa’oara’a maita’i.
Noa atu ē, ’ua tītauhia ia mātou ’ia fa’atano i tā mātou mau tīa’ira’a i ni’a i te ’utuāfare rahi, ’ua riro rā ’ei ’oa’oara’a ’ia fa’a’ohipa i te mau ha’api’ira’a o « Te ’Utuāfare : E Poro’i i tō te Ao nei » ’e tā māua nā tamari’i here e toru. Nā te pe’era’a i teie mau ha’api’ira’a i hōro’a mai i te aura’a rahi i roto i tō’u fa’aro’o.
Mai tā te poro’i e parau ra : « E mea faufa’a roa te fa’aipoipora’a i rotopū i te tāne ’e te vahine i roto i tāna ’ōpuara’a mure ’ore. E ti’ara’a tō te mau tamari’i ’ia fānauhia i roto i te mau tā’amura’a o te fa’aipoipora’a, ’e ’ia aupuruhia e te hō’ē metua tāne ’e te hō’ē metua vahine o tē fa’atura nei i te mau ’euhe o te fa’aipoipora’a ma te ha’apa’o maita’i roa.2 ’Ua ha’amaita’ihia māua nā roto i te fa’a’ohipara’a i teie mau parau tumu.
Terā rā, i te hō’ē hope’a hepetoma ’a tāvini ai au ’ei peresideni titi, ’ua fārerei mātou i te mau tāmatara’a ’ino roa a’e tā te mau metua e nehenehe e fa’aruru. ’Ua ho’i mai tō mātou ’utuāfare nā te hō’ē ’ātivite a te ’Ēkālesia ’e ’ua putuputu nō te tāmā’a. ’Ua haere tā māua nā tamāroa e toru e ha’uti i roto i tō mātou ’āua.
’Ua fāri’i tā’u vahine i te mau mana’o e rave rahi ē tē vai ra te hō’ē fifi. ’Ua ani mai ’oia iā’u ’ia hi’opo’a i te mau tamari’i ’a horoi noa ai māua i te ’āu’a. ’Ua mana’o vau ē, ’ua pāruruhia rātou i te mea ē, ’ua ti’a ia māua ’ia fa’aro’o i tō rātou reo ’oa’oa i roto i tā rātou ha’utira’a.
I tō māua haerera’a e hi’o i tā māua mau tamāroa, ma te māere rahi, ’ua ’ite māua ia Kenneth, 18 ’āva’e, ’aita e ha’uti fa’ahou ra i roto i te hō’ē pātete pape, ’aita e ’itehia e tōna mau tu’āne. ’Ua uta rū māua iāna i te fare ma’i, terā rā ’aita te mau tāmatara’a ato’a nō te fa’aora mai iāna i manuia.
’Ua ’oto roa māua i te mea ē ’aita i ti’a ia māua ’ia aupuru i tā māua ’āiū here i roto i teie orara’a tāhuti. Noa atu ē ’ua ’ite māua ē e riro mai ihoa o Kenneth ’ei melo nō tō mātou ’utuāfare e a muri noa atu, ’ua ui au nō te aha te Atua i vaiiho ai ’ia tupu teie ’ati i ni’a iā’u inaha ho’i tē rave nei au i te mau mea ato’a e ti’a nō te fa’a’ohipa i tō’u pi’ira’a. Nō tae noa maira vau i te fare i muri a’e i tō’u ravera’a i te hō’ē o tā’u mau hōpoi’a nō te tāvini i te feiā mo’a. Nō te aha ’aita te Atua e ti’a ’ia hi’o mai i tā’u tāvinira’a ’e ’ia fa’aora i tā māua tamaiti ’ē tō mātou ’utuāfare i teie ’ati ? Rahi noa atu tō’u ferurira’a i te reira, rahi noa ato’a atu tō’u ’ino’inora’a.
’Aita tā’u vahine i fa’ahapa noa a’e iā’u i te ’ore-ra’a vau e pāhono i tāna mau fa’aurura’a, terā rā ’ua ha’api’i mai au i te ha’api’ira’a ’o tei taui i tō’u orara’a ’e ’ua ha’amau vau e piti ture, ’eiaha roa atu e ’ōfati :
Ture 1 : E fa’aro’o ’e e ha’apa’o i te mau muhumuhu a tā ’outou vahine.
Ture 2 : Mai te mea ē ’aita ’outou i pāpū nō te hō’ē noa a’e tumu, ’a hi’o i te ture nūmera hō’ē.
Noa atu ē e mea teimaha teie ha’api’ira’a ’e ’ua tāmau noa mātou i te ’oto, i te pae hope’a, ’ua ha’amāmāhia tā mātou zugo teimaha mau.3 ’Ua ha’api’i mai māua tā’u vahine i te mau ha’api’ira’a ta’a-’ē nō teie mo’era’a. ’Ua tae mai te mana’o tāhō’ē ’e ’ua ru’uru’uhia mātou nā roto i tā mātou mau fafaura’a o te hiero ; ’ua ’ite mātou ē e nehenehe tā mātou e tītau ’ia ’āmui mai ’o Kenneth ia mātou i roto i te tahi atu ao nō te mea ’ua fānauhia ’oia i roto i te fafaura’a. ’Ua roa’a ato’a ia mātou te ’itera’a nō te tāvini ia vetahi ’ē ’e nō te fa’aora i tō rātou māuiui. Tē fa’a’ite pāpū nei au ē mai te reira taime, ’ua ’ore tō māua ’ino’ino ’a fa’a’ohipa ai māua i tō māua fa’aro’o i roto i te Fatu. Tē tāmau noa nei ā tō mātou ’itera’a i te riro ’ei ’ohipa fifi, terā rā, ’ua ha’api’i mai mātou nā roto i te ’āpōsetolo Paulo ē, « e ti’a ia mātou te mau mea ato’a nei i te Mesia, tei [tauturu mai ia mātou] » mai te mea ē, e fa’atumu mātou i ni’a iāna.4
’Ua ha’api’i mai te peresideni Russell M. Nelson : « ’Ia fa’atumu tātou i tō tātou orara’a i ni’a i te ’ōpuara’a fa’aorara’a a te Atua […] ’e Iesu Mesia ’e tāna ’evanelia, ’e nehenehe tātou e fāri’i i te ’oa’oa ta’a ’ē noa atu te mau mea e tupu mai—’aore rā o te ’ore e tupu mai—i roto i tō tātou orara’a ». ’Ua nā ’ō ā ’oia ē : « Nō ’ō iāna ra te ’oa’oa ’e nōna ho’i te ’oa’oa ».5
E nehenehe tātou e fa’a’ite i te mata ’oa’oa ’e e fa’a’īhia i te hau i roto i tō tātou mau taime fifi. E riro mai te here tā tātou e fāri’i maoti te Fa’aora ’e tāna tāra’ehara ’ei rāve’a pūai nō tātou i roto i tō tātou mau taime fifi. « E nehenehe te mau mea ti’a-’ore ato’a [’e te fifi] e fa’arirohia ’ei mea ti’a maoti te tāra’ehara a Iesu Mesia ».6 ’Ua parau ato’a ’oia, « e pohe tō ’outou i teie nei ao : E fa’aitoito rā ; ’ua riro te rē o teie nei ao iā’u ».7 E nehenehe tāna e tauturu ia tātou ’ia fa’a’oroma’i i te mau māuiui ato’a, te mau ma’i ’e te mau tāmatara’a tā tātou e fa’aruru i roto i te tāhuti nei.
E ’ite tātou e rave rahi mau ’ā’amu o te mau pāpa’ira’a mo’a nō te feiā fa’atere rahi ’e te maita’i, mai ia Ieremia, Ioba, Iosepha Semita ’e Nephi, o tei ’ore i fa’a’erehia i te mau ’arora’a ’e te mau tāmatara’a o te tāhuti nei. E feiā tāhuti rātou o tei ha’api’i mai ’ia auraro i te Fatu i roto ato’a i te mau taime fifi.8
I roto i te mau mahana pe’ape’a i roto i te fare tāpe’ara’a nō Liberty, ’ua tuō te peropheta Iosepha Semita : « E te Atua, tei hea ra ’oe ? ’E tei hea rā te ti’ahapa o tē tāpo’i nei i tō ’oe nā vāhi tāpunira’a ? »9 ’Ua ha’api’i te Fatu ia Iosepha ’ia « fa’a’oroma’i maīte »10 ’e ’ua fafau mai ē, mai te mea e nā reira ’oia, e hōro’a te mau mea ato’a i te ’itera’a iāna ’e e riro ïa ’ei maita’i nōna.11
’Ia feruri au i tō’u iho mau ’itera’a, e ’ite au ē, ’ua ’apo mai au i te tahi o tā’u mau ha’api’ira’a maita’i roa a’e i roto i te mau taime fifi roa a’e o tō’u orara’a, ’aita roa atu vau i mātau. Te mau fifi tā’u i fārerei i roto i tō’u ’āpīra’a, nā roto i te ha’amātaura’a i te ’Ēkālesia nā roto i te séminaire, ’ei melo fa’afāriu ’āpī ’e ’ei misiōnare rave tāmau ’e te mau ’arora’a tā’u i fārerei i roto i tā’u ha’api’ira’a, ’a fa’aitoito ai au i te amo i tō’u mau pi’ira’a ’e ’a patu ai au i te hō’ē ’utuāfare, ’ua fa’aineine te reira iā’u nō te tau a muri atu. ’A pāhono noa atu ā vau ma te ’oa’oa i te mau huru fifi nā roto i te fa’aro’o i te Fatu, e tupu noa atu ā vau i te rahi ’ei pipi.
’Eiaha te mau mea fifi o tō tātou orara’a ’ia fa’ahitimahuta ’ia tomo ana’e tātou i roto i te ’ē’a tītī’āifaro ’e te piriha’o.12 ’Ua ha’api’i mai Iesu Mesia i te « auraro i tōna ra mau pohe ».13 Nā roto i te pe’era’a iāna, i roto ihoa rā i te mau taime fifi, e nehenehe tātou e tupu i te rahi nō te riro atu ā mai iāna te huru.
Te hō’ē o te mau fafaura’a tā tātou e rave nei ’e te Fatu i roto i te hiero, ’o te orara’a ïa i te ture nō te tusia. ’Ua riro noa te tusia ’ei tuha’a nō te ’evanelia a Iesu Mesia. E fa’aha’amana’ora’a te reira nō te tusia tāra’ehara rahi a Iesu Mesia nō te feiā ato’a o tei ora ’aore rā o tē ora i ni’a i te fenua nei.
’Ua ’ite au ē e ha’amaita’i ihoa te Fatu ia tātou mai te mea e mau hina’aro tano tō tātou. Tē ha’amana’o ra ’outou nō te mau tamari’i e rave rahi o tei fafauhia mai iā’u i roto i tō’u ha’amaita’ira’a pātereāreha ? Tē ha’amata ra teie ha’amaita’ira’a i te tupu. ’Ua tāvini māua tā’u vahine ē e rave rahi hānere misiōnare, nō e 25 fenua, i roto i te misiōni nō Cap Coast i Ghana. E mea faufa’a roa rātou mai te mea rā ē e mau tamari’i iho rātou nā māua.
Tē fa’a’ite pāpū nei au ē, e tupu atu tātou i te rahi i roto i tō tātou orara’a ’ei pipi mai te mea e fa’a’ohipa tātou i te fa’aro’o i te Fatu i te mau taime fifi. ’Ia nā reira ana’e tātou, e fa’aitoito ’oia ia tātou ma te aroha ’e e tauturu ’oia ia tātou nō te amo i tā tātou mau zugo.s I te i’oa o Iesu Mesia ra, āmene.