’Ia maita’i roa iāna
E noa’a tō tātou maita’i-roa-ra’a nā roto noa i te maita’i rahi o te Atua.
E mana tō te Metua i te ao ra ’e tō te Fa’aora Iesu Mesia e fa’aora ia tātou ’e e taui ia tātou. E nehenehe rāua e fa’ariro ia tātou mai ia rāua te huru.
Ma’a matahiti i ma’iri, ’ua ha’amata te mau fifi pae ea o te hō’ē mo’otua tamāroa tō māua, ’o Aaron. E rohirohi noa ’oia, ’ua hītoatoa ri’i tōna tino ’e e mea ’ino ’oia ’ia hi’ohia. I te hi’opo’ara’ahia ’oia e te taote, ’ua ’itehia tōna ma’i ’anemia mahemo, e ma’i e fa’aea te puo ivi i te hāmani i te toropuru ’ura (globule rouge), te toropuru tea ’e te mau tērura toto (plaquettes). Mai te mea ’aita e rapa’auhia ’e ’aita e ora mai i te hope’a, e’ita ïa tōna toto e pa’ari maita’i ’e e ’aro i te mau ma’i oreore, nō reira, ’ia marua ri’i noa ’oia, ’ia pēpē ’aore rā ’ia ma’ihia, e mea ataata ’oi’oi nōna.
Nō te hō’ē tau, ’ua pātia-pinepine-hia Aaron i te mau tērura toto ’e te toto ato’a, nō te pāruru iāna i te vaira’a ataata. ’Ua parau mai te mau taote ē, te rā’au noa nō terā ma’i, ’o te tāhitira’a puo ivi ïa, ’e te mea manuia roa a’e, nā te hō’ē ïa o tōna mau tuahine ’e taea’e tē hōro’a i te reira. Mai te mea e tū’ati maita’i hō’ē o rātou, e riro te tāhitira’a i te fa’aora iāna. E maha teina tōna tei hi’opo’ahia, ’e hō’ē, ’o Maxwell, tei mana’ohia e tano maita’i.
Noa atu ē e ta’ata hōro’a tano maita’i, e nehenehe te mau ha’afifira’a e tupu i muri iho i te tāhitira’a puo ivi . E tītauhia ’ia ha’apohehia te mau tērura i roto i te ivi ma’ima’i o Aaron, nā roto i te ’āno’ira’a i te hīmio (chimio) ’e te rarara’a (irradiation), hou ’a fāri’i ai i te mau tērura tumu o te puo ivi o tōna taea’e ia Maxwell. ’E nō te mea ’aita fa’ahou tōna ihoārai, e tītauhia ’ia tu’u iāna i te hō’ē vāhi ’āta’a i te fare ma’i e rave rahi hepetoma te maoro, ’e i te fare ato’a i muri iho, ma te tahi fa’anahora’a ta’a ’ē, ’e te mau ’ōpanira’a ’e te mau rā’au.
Tei tīa’i-roa-hia i teie tāhitira’a, ’eiaha pa’i te tino o Aaron ’ia pāto’i i te mau tērura o te ta’ata hōro’a, ’e ’ia hāmani māite te mau tērura o Maxwell i te mau tērura toto ’ura ’e te tea, ’e te mau tērura toto i roto i te tino o Aaron. E tauira’a mau tē tupu i roto i te tino mai te mea e manuia te tāhitira’a a te ta’ata hōro’a. ’Ua parau mai te taote ē, mai te peu noa atu e rave ’o Aaron i te hō’ē hara rahi ’e e ’itehia tōna toto i taua vāhi ra, e riro te mūto’i i te haeru ia Maxwell. Nō te mea te toto o Aaron, nō roto mai ïa i te tāhitira’a tērura a Maxwell, ’e tei roto te ADN o Maxwell, ’e mai te reira ē hope noa atu tōna orara’a.
I te fa’aorara’ahia Aaron e te toto o tōna taea’e, ’ua ’ume mai e rave rahi mana’o nō ni’a i te toto tāra’ehara o Iesu Mesia ’e te ’ohipa o tāna tāra’ehara i ni’a ia tātou. I teie mahana e rōtahi au i ni’a i te hō’ē tauira’a tāmau ’e te hō ora, ’o tē tupu ’ia fa’ati’a tātou i te Fatu ’ia fa’atupu i te mau semeio i roto ia tātou.1
’Aita e mana i roto ia Aaron nō te upo’oti’a i ni’a i terā ma’i. E’ita e nehenehe i tōna tino e hāmani i te mau tērura nō te turu i te ora. Rave noa atu ’oia i te tahi ’ohipa, e’ita iho ā tāna e nehenehe e fa’aora i tōna puo ivi. ’Aita tā Aaron e rāve’a nō te rapa’au iāna iho, ’aita ato’a tā tātou nō te fa’aora ia tātou iho. Noa atu ā tō tātou ’aravihi, te fāito ha’api’ira’a, te māramarama ’e te pūai, e’ita tā tātou e nehenehe e tāmā ia tātou i tā tātou mau hara, e’ita e nehenehe e taui i tō tātou tino ’ei tino tāhuti ’ore, e’ita e nehenehe e fa’ateitei ia tātou iho. E mea nā roto noa i te Fa’aora Iesu Mesia ’e tāna tāra’ehara tā’ōti’a ’ore e nehenehe ai. « ’Aita atu e ’ē’a ’e ’aita atu ho’i e i’oa i hōro’ahia mai i raro a’e i te ra’i, e ti’a ai i te ta’ata ’ia fa’aorahia i roto i te bāsileia o te Atua ra. »2 ’O tōna toto tāra’ehara tē tāmā ia tātou ’e ’o tē ha’amo’a ia tātou.3
Noa atu ā e’ita tā Aaron e nehenehe e fa’aora iāna iho, nō te ha’amanuia i te tāhitira’a, tītauhia ’ia ineine ’ i roto oia i te rave i te mea tā te mau taote i ani— noa atu e ’ohipa pa’ari roa ’e te tītau rahi. Noa atu ā e’ita tā tātou e nehenehe e fa’aora ia tātou, ’ia auraro rā tātou i te hina’aro o te Fatu, ’e ’ia ha’apa’o tātou i tā tātou mau fafaura’a, ’ua matara te ’ē’a i tō tātou fa’aorara’a.4 Mai te ’ohipa fa’ahiahia nō te tauira’a i te ADN o te toto o Aaron, e nehenehe tō tātou ’ā’au ’ia taui,5 ’ia fāri’i i tōna hōho’a i roto i tō tātou mata,6 ’e ’ia riro ’ei ta’ata fa’a’āpīhia i roto i te Mesia.7
’Ua fa’aha’amana’o Alama i te mau ta’ata nō Zarahemela i te parau nō te u’i nā mua atu tei fa’afāriuhia. Nō ni’a i tōna metua tāne, ’ua parau Alama ē « mai te au i tōna ra fa’aro’o ’ua tupu te hō’ē tauira’a rahi i roto i tōna ra ’ā’au. »8 ’Ui a’era ’oia ē : « ’Ua ’itea ānei ia ’outou teie tauira’a rahi i roto i tō ’outou na ’ā’au ? »9 E ’ere nā te ta’ata i taui i tō rātou ’ā’au. Nā te Fatu i rave i te reira. E mea pāpū maita’i te paraua a Alama nō ni’a i te reira. I parau ’oia ē : « Inaha, nāna ho’i tō rātou ’ā’au i fa’afāriu mai. »10 « ’Ua fa’aha’eha’a rātou ia rātou iho ’e ’ua tu’u i tō rātou ti’aturira’a i mua i te Atua ora mau ra […] e feiā ha’apa’o maita’i rātou ē tae roa atu i te hope’a ra [’e] ’ua fa’aorahia rātou. »11 ’Ua ineine te ta’ata i te ha’amāhorahora i tō rātou ’ā’au ’e i te fa’a’ohipa i te fa’aro’o, ’e ’ua taui atu ra te Fatu i tō rātou ’ā’au. ’E ’auē ïa tauira’a rahi i tupu ! ’A feruri nā i te ’ohipa ta’a ’ē i roto i te orara’a o teie nā Alama to’opiti, nā mua a’e ’e i muri iho i te tauira’a tō rāua ’ā’au.12
E tamari’i tātou nā te Atua ma te hope’a hanahana. E ti’a ia tātou ’ia tauihia nō te riro mai iāna ra te huru, ma te fāri’i i « te ’īra’a nō te ’oa’oa. »13 I te tahi atu pae, tē tītau nei Sātane ’ia mamae tātou mai iāna ra.14 Tei ia tātou nei te mā’iti ’o vai tē pe’e.15 ’Ia pe’e tātou ia Sātane, e hōro’a tātou i te mana iāna.16 ’Ia pe’e tātou i te Atua, e hōro’a mai ’oia i te mana ia tātou.
’Ua ha’api’i te Fa’aora ē, « ’ia maita’i roa » tātou.17 ’Ia hi’ohia e mea fa’ahō’ū’ū ri’i. Tē ’ite pāpū nei ho’i au i tō’u iho mau paruparu ’e tē māuiui nei au i te hi’ora’a i te ātea roa i roto i tō’u vaira’a ’e te maita’i-roa-ra’a. E riro tātou i te mana’o ē, tītauhia ’ia ha’amaita’i ia tātou iho, e’ita rā e nehenehe. E ’ere ato’a nā te pe’era’a i te mau mana’o ato’a o te mau buka nā te ao nei nō ni’a i te fa’ahotura’a iāna iho, e fa’atupu i te reira. Hō’ē noa rāve’a ’e hō’ē noa i’oa e tae mai ai te maita’i-roa-ra’a. E « fa’arirohia [tātou] ’ei mea maita’i roa nā roto ia Iesu te ārai nō te fafaura’a ’āpī, ’o tei fa’atupu i teie nei tāra’ehara ti’a roa nā roto i te ha’amani’ira’a i tōna iho toto. »18 E noa’a tō tātou maita’i-roa-ra’a nā roto noa i te maita’i rahi o te Atua.
E ti’a ānei ia ’outou ’ia feruri i te teimaha o teie ’ohipa, ’āhani pa’i nā tō māua iho mo’otua Aaron e māramarama ’e e rave i te mau ’ohipa ato’a tā te mau taote i rave nō tōna tāhitira’a ? ’Eiaha tātou e mana’o ē e tītauhia ia tātou ’ia rave i te mea tā te Fa’aora noa e nehenehe e rave, i roto i te ’ohipa tau maoro ’e te semeio nō tō tātou maita’i-roa-ra’a.
Mai ia Moroni i te hope’a o tāna pāpa’a parau, ’ua ha’api’i ’oia : « ’Oia ïa, ’a haere mai i te Mesia, ’e ’ia maita’i roa ’outou iāna […] ’e mai te mea e ha’apae ’outou i te mau mea paieti ’ore ra, ’e ’a here atu ai i te Atua ma tō ’outou mana ato’a, tō ’outou mana’o ato’a ’e te pūai ato’a, ’ei reira e nava’i ai tōna ra maita’i nō ’outou, ’e nā roto i tōna maita’i e riro ai ’outou ’ei mea maita’i roa i te Mesia ra. »19 Auē ïa parau mau tāmarū ’e te pūai ! ’Ua nava’i tōna maita’i rahi nō’u. ’Ua nava’i tōna maita’i rahi nō ’outou. ’Ua nava’i tōna maita’i rahi nō te feiā ato’a « i ha’a rahi ’e tei teiaha i te hōpoi’a. »20
I roto i te rapa’aura’a mai tō Aaron ra, e mau fa’ahope’ara’a pāpū ’ore iho ā. ’Oia mau, ’ua tītauhia te piti o te tāhitira’a i te ’inora’a te mātāmua. ’Aua’a a’e rā nō te tauira’a ’ā’au i te pae vārua, ’aita e faufa’a e uiui ē, e tupu ato’a ānei. ’Ia ora tātou mai te au i tōna hina’aro, ma « te ti’aturi-māite-ra’a i te mau maita’i rahi nōna, ’o tei pūai ’ia fa’aora »,21 pāpū 100 i ni’a i te hānere te tāmāra’a nā roto i te toto o te Fa’aora, ’e i te hope’a te maita’i-roa-ra’a i roto iāna. « E Atua [’oia] nō te parau mau, ’e [’aita e ti’a] iāna ’ia ha’avare. »22
E mea pāpū ē, tītauhia te tahi taime nō teie ’ohipa tauira’a, ’e e’ita te reira e oti ē tae noa atu te orara’a muri a’e, e mea pāpū rā te parau. ’Ia hi’o tātou ē, e mea ātea roa te tupura’a te mau parau fafau a te Atua, e fāri’i noa tātou i te reira nō te ’itera’a ē e tupu mau te reira.23
E ’oa’oa iti rahi tei tae mai i te tupura’a te tauira’a semeio i roto i te ma’i o Aaron. E feruri na i te ’oa’oa rahi i roto i te ra’i ’ia tupu ana’e te mau tauira’a rahi i roto i tō tātou vairua.
’Ua here tō tātou Metua i te ao ra ’e tō tātou Fa’aora Iesu Mesia ia tātou, ’e ’ua pūpū rāua ma te tāmoni ’ore ’ia taui ia tātou ’e ’ia ha’amaita’i ia tātou. ’Ua hina’aro rāua e rave i te reira. E ’ohipa pū ho’i nō tā rāua ’ohipa ’e nō tō rāua hanahana.24 Tē parau pāpū nei au ē, e mana tō rāua nō te rave i te reira ’ia haere tātou ia rāua ra ma te fa’aro’o. I te i’oa o Iesu Mesia ra, ’āmene.