Te tauturura’a i te veve ’e tei māuiui
’Ua parau fafau te ’Ēkālesia a Iesu Mesia ’ia tāvini i te feiā nāva’i ’ore, ’e parau fafau ato’a ’ia ha’a ’āmui ’e vetahi ’ē i roto i teie ā tauto’ora’a.
Te mau taea’e ’e te mau tuahine, e a’o mai tō tātou peresideni here Russell M. Nelson ia tātou i muri mai i teie tuha’a purera’a. ’Ua ani mai ’oia iā’u ’ia riro ’ei ta’ata a’o mātāmua.
Tā’u tumu parau teie mahana nō ni’a ïa, e aha tā Te ’Ēkālesia a Iesu Mesia i te Feiā Mo’a i te mau Mahana Hope’a nei ’e tā tāna mau melo e hōro’a nei ’e e rave nei nō te veve ’e tei māuiui. E paraparau ato’a atu vau nō te mau hōro’a mai teie, a te tahi atu mau ta’ata ’ā’au maita’i. E parau tumu te hōro’ara’a i tei nāva’i ’ore, i roto i te mau ha’apa’ora’a fa’aro’o ato’a a Aberahama ’e i roto i tā tahi ato’a.
Te tahi nā ’āva’e i ma’iri iho nei, ’a tahi nei Te ’Ēkālesia a Iesu Mesia i te Feia Mo’a i te mau Mahana Hope’a nei e fa’a’ite ai i te huru o tāna tauturura’a nā te ao nei.1 Tā tātou ha’amāu’ara’a nō te matahiti 2021 nō te feiā nāva’i ’ore i roto i nā 188 fenua nā te ao nei, ’ia ’āmuihia e $906 mirioni––piri atu i te miria moni marite. ’Oia ato’a, ’ua hōro’a tā tātou mau melo hau atu e 6 mirioni hora ’ohipa tāmoni ’ore, nō teie ā tāvinira’a.
’Aita teie mau nūmera i tano roa, ’oia mau, e parau fa’ata’ara’a tano ri’i nō tā tātou hōro’ara’a ’e tauturura’a. ’Aita i tai’ohia te tāvinira’a tāta’itahi a te mau melo nā roto i te aupurura’a i fa’ata’ahia, nō te mau pi’ira’a ’e te mau tāvinira’a melo ’e te melo. ’E ’aita ato’a tā tātou fa’ata’ara’a nō 2021 e fa’a’ite nei, i te ’ohipa tā te mau melo e rave nei tāta’itahi nā roto i tā rātou mau tā’atira’a tāmoni ’ore, ta’a ’ē atu i tā te ’Ēkālesia. E ha’amata vau nā ni’a i teie mau tā’atira’a.
I te matahiti 1831, piri i te piti matahiti i muri noa i te fa’ati’ara’ahia te ’Ēkālesia tei fa’aho’ihia mai, ’ua hōro’a te Fatu i teie heheura’a nō te arata’i i tāna mau melo ’e ’ia mana’o vau, tāna mau tamari’i ato’a nā te ao nei :
« Inaha ho’i, e ’ere i te mea ti’a iā’u ’ia fa’aue atu i te mau mea ato’a ; nō te mea ’o ’oia ’o tē fa’ahepohia i roto i te mau mea ato’a, e tāvini fa’atau ïa ’oia, e ’ere ho’i i te mea pa’ari ; nō reira, ’aita ’oia e fāri’i i te utu’a maita’i.
« ’Oia mau tē parau atu nei au, e mea ti’a i te ta’ata nei ’ia rave ’ana’anatae i te ’ohipa maita’i, ’e ’ia rave ho’i i te mau ’ohipa e rave rahi nā roto i tō rātou iho hina’aro, ’e ’ia fa’atupu fa’arahi ho’i i te parauti’a ;
« Tei roto ho’i ia rātou te mana, i riro ai rātou ’ei ti’a’au ia rātou iho. ’E mai te mea e rave te ta’ata nei i te maita’i e ’ore roa rātou e ’ere i te utu’a maita’i ».2
’Ua hau i te 38 matahiti ’ei ’āposetolo ’e hau atu i te 30 matahiti i roto i te ’ohipa tōro’a, ’ua ’ite au e rave rahi tauto’ora’a hōro’a noa a te mau tā’atira’a ’e tā te mau ta’ata mai tā teie heheura’a e fa’a’ite nei ’ei « tauto’ora’a maita’i » ’e « ’ia fa’atupu fa’arahi ho’i i te parauti’a ». E rave rahi hi’ora’a o te tāvinira’a mai teie te huru nā te ao nei, i rāpae mai i tō tātou ’ōti’a ’e i’ō mai i tō tātou ’itera’a ’āmui. ’Ia hi’ohia te reira, tē mana’o nei au ia Beniamina te peropheta-ari’i o te Buka a Moromona, tei fa’ahiti i roto i tāna a’ora’a teie parau mau mure ’ore : « ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua ».3
E rave rahi mau ’ohipa tōtauturu ’e te tauturura’a nā te ao nei i tō tātou mau ta’ata tupu tei ha’api’ihia ’e tei fa’a’ohipahia e Te ’Ēkālesia a Iesu Mesia i te Feiā Mo’a i te mau Mahana Hope’a nei ’e tātou, ’ei mau melo. ’Ei hi’ora’a, e ha’apae tātou i te mā’a i te tai’o mātāmua o te mau ’āva’e ato’a ’e e pūpū i te tuha’a moni e tano nō te mā’a ’aita i ’amuhia, nō te tauturu i te feiā nāva’i ’ore i roto i tā tātou iho mau pāroita. Tē pūpū ato’a nei te ’Ēkālesia i tāna hōro’ara’a rahi nō te tauturura’a i te ta’ata ’e te tahi atu mau tāvinira’a nā te ao nei.
Nō atu te mau mea ato’a tā ’Ēkālesia e rave nei, te rahira’a o te mau tāvinira’a tauturu i te mau tamari’i a te Atua, ’ua ravehia te reira e te mau ta’ata ’e te mau tā’atira’a nā te ao nei, ’aita ho’i tō rātou tū’atira’a ’e tā tātou ’Ēkālesia. Mai tā te hō’ē o tā tātou ’āpōsetolo i hi’o : « Tē fa’a’ohipa nei te Atua hau atu i te hō’ē nuna’a nō te fa’aoti i teie ’ohipa maere ’e tē ’ūmerehia… E ʼohipa rahi roa, te fifi rahi ato’a, nō te hōʼē noa nuna’a ».4 ’Ei mau melo nō te ’Ēkālesia i fa’aho’ihia mai, e ti’a ia tātou ’ia vai araara ’e ’ia māuruuru rahi nō te tāvinira’a e vetahi ’ē.
’Ua parau fafau te ’Ēkālesia a Iesu Mesia ’ia tāvini i te feiā nāva’i ’ore, ’e parau fafau ato’a ’ia ha’a ’āmui ’e vetahi ’ē i roto i teie ā tauto’ora’a. Nō pūpū noa iho nei mātou i te hōro’a faufa’a rahi nā te Fa’anahora’a ’ohipa mā’a nā te ao nei a te Hau ’Āmui. I roto i nā ’ahuru matahiti e rave rahi o tā tātou ’ohipa tauturura’a i te ta’ata, e piti fa’anahora’a tei ti’a mai ’ei mau tā’atira’a pāpū : Te mau ’ōpuara’a ’e te mau pū a te Tatauro ’Ura ’e te ’Āva’e ’Ura i roto i nā ’ahuru fenua, tei hōro’a i te mau tamari’i a te Atua i te tauturu e hina’arohia, i te tupura’a te mau ’ati rahi pae natura ’e te mau tama’i. Hō’ē ā, e tā’amura’a maoro ato’a tō tātou e te Pū ’Ohipa Tōtauturu a te ha’apa’ora’a Katorika. ’Ua ha’api’i mai teie mau tā’atira’a nō ni’a i te tauturu i te mau pū ’ohipa nā te ao nei.
Tē vai ato’a ra ia mātou te tā’amura’a manuia mau ’e te tahi atu mau tā’atira’a, mai te Muslim Aid [Tauturu a te fa’aro’o Mahometa], Water for People [Pape nā te nūna’a], ’e IsraAID, te tahi noa teie. Noa atu e ’ohipa ta’a ’ē maita’i tā teie mau tā’atira’a, hō’ē ā tā mātou fā ’oia ho’i, te ha’amāmāra’a i te māuiui o te mau tamari’i a te Atua. E tuha’a ana’e teie mau mea ato’a nō te ’ohipa a te Atua nō tāna mau tamari’i.
Tē ha’api’i nei te heheura’a ’āpī ē, tō tātou Fa’aora ’o Iesu Mesia, ’o ’oia « te māramarama mau ’o tē ha’amāramarama nei i te mau ta’ata ato’a ’o tē tae mai i roto i te ao nei ».5 Nō te reira, e māramarama te mau tamari’i ato’a a te Atua nō te tāvini iāna ’e ia vetahi ’ē ma tō rātou ’ite ato’a ’e te ’aravihi.
Tē ha’api’i nei te Buka a Moromona, « tē tītau ra ïa ’e tē fa’aitoito ra ïa ’ia rave tāmau noa i te mea maita’i ; nō reira, te mau mea ato’a tē tītau mai ’e ’o tē fa’aitoito mai ’ia rave i te maita’i, ’e ’ia here i te Atua, ’e ’ia tāvini iāna, e mea fa’auruhia ïa e te Atua ».6
Tāmau ā :
« Inaha ho’i, ’ua hōro’ahia mai te Vārua o te Mesia i te ta’ata tāta’itahi ’ia ti’a iāna ’ia fa’ata’a ’ē i te maita’i ’e te ’ino ; nō reira tē fa’a’ite atu nei au ia ’outou i te rāve’a nō te fa’ata’a i te reira ; te mau mea ato’a ’o tē tītau ’ia rave i te maita’i, ’e ’o tē fa’aitoito ho’i ’ia ti’aturi i te Mesia, ’ua fa’ataehia mai ïa e te mana ’e te hōro’a a te Mesia …
« ’E i teienei, e tō’u mau taea’e, …tē ’ite nei ’outou i te māramarama, e ti’a ai ia ’outou ’ia ha’avā atu, ’oia ho’i te māramarama o te Mesia ».7
Teie te tahi mau hi’ora’a nō te tauturura’a a te mau tamari’i a te Atua i te tahi atu mau tamari’i a te Atua, nō te pāhono i tō rātou hina’aro mau i te pae nō te mā’a, te aupurura’a i te pae ea ’e te ha’api’ira’a.
’Ahuru matahiti i ma’iri a’e nei, te ’utuāfare Kanhdaris, te tāne ’e te vahine Sikh nō te fenua nō Arabia Emirats ’Āmui, ’ua ’ōpua i te tauto’ora’a fa’ahiahia e fa’atāmā’a i tei po’ia. Maoti te hiero nō Guru Nanak Darbar Sikh, tē hōro’a nei rātou hau atu e 30 000 merēti mā’a (’aita e ’i’o) i te mau hope’a hepetoma ato’a nā te mau ta’ata ato’a e tomo mai nā te ’ōpani, ma te ’ore e hi’o i te ha’apa’ora’a fa’aro’o ’e te hōho’a ta’ata. Tē fa’ata’a nei te taote Kanhdaris, « tē ti’aturi nei mātou ē, hō’ē ana’e tātou pauroa ; e tamari’i tātou nō te hō’ē Atua, ’e tei i’ō nei tātou nō te tāvini i te ta’ata nei ».8
Te tahi atu hi’ora’a, te tauiha’a nō te ea ’e te rapa’aura’a niho nō te feiā nava’i ’ore I Chicago, ’ua fārerei au i te hō’ē taote Siria-marite, rapa’au ma’i rahi, te Taote Zaher Sahloul. ’O ’oia te hō’ē o te mau ta’ata tei ha’amau te MedGlobal, tē ani nei i te mau rave ’ohipa tōro’a nō te ea ’ia hōro’a i tō rātou taime, te ’aravihi, te ’ite ’e te fa’aterera’a nō te tauturu ia vetahi ’ē i roto i te mau taime fifi, mai te tāma’i i Siria, i reira ho’i te Taote Sahloul i te fātatara’a i te pohe ’a tauturu ai ’oia i te huira’atira. Tē fa’a’ite nei MedGlobal ’e te tahi atu mau tā’atira’a, (’oia ho’i e rave rahi ta’ata tōro’a e melo nō te ’Ēkālesia) ē, tē fa’aitoito nei te Atua i te mau rave ’ohipa tōro’a nō te fa’aro’o, ’ia hōro’a i te feiā veve i te tāmārura’a ’o tā rātou e hina’aro nei, nā te ao nei.9
E rave rahi tamari’i hōro’a noa a te Atua tei roto i te mau tauto’ora’a nō te ha’api’ira’a, ’oia ato’a nā te ao nei. Hō’ē hi’ora’a maita’i, tā mātou i ’ite maoti tā mātou tauto’ora’a tauturu, ’o te ’ohipa ïa a te hō’ē ta’ata tei matauhia ’o Mr. Gabriel te i’oa, e tītīhoria ’oia nō e rave rau tāma’i e rave rahi taime. ’Ua hi’o iho nei ’oia ē, ’ua hānere tauatini tamari’i tītīhoria i ’Āfirita hitia’a o te ra tei hina’aro i te tauturu, ’ia vai ora noa tō rātou tīa’ira’a ’e ’ia vai itoito noa tō rātou ferurira’a. ’Ua fa’anaho ’oia i te tahi atu mau ’orometua ha’api’i nō roto mai i te nūna’a tītīhoria, mai tā rātou i pi’i te « ha’api’ira’a tumu rā’au », i reira te tamari’i e fāri’i ai i te ha’api’ira’a i raro a’e i te marumaru o te tumu rā’au. ’Aita ’oia i tīa’i ’ia fa’atupu vetahi ’aore rā ’ia fa’atere, ’ua arata’i ’oia iho i te mau tauto’ora’a tei hōro’a i te mau rāve’a nō te ha’api’ipi’ira’a i nā tauatini tamari’i nō te ha’api’ira’a tuatahi, i roto i te mau matahiti tāuiuira’a o te nohora’a.
’Oia ïa, ’aita teie nā toru hi’ora’a e fa’a’ite nei e mea maita’i ānei te mau mea ato’a i parauhia ’aore rā i ravehia e te mau tā’atira’a ’aore rā e te ta’ata hō’ē ’aore rā e te Atua, ’o terā iho ānei. Tē fa’a’ite nei rā teie mau hi’ora’a ē, e fa’auru te Atua i te rahira’a o te mau tā’atira’a ’e te ta’ata hō’ē ’ia rave rahi i te ’ohipa maita’i. Tē fa’a’ite ato’a nei te reira ē, e mea ti’a i te rahira’a o tātou ’ia ’ite i te maita’i e ravehia nei e vetahi ’ē ’e ’ia turu i te reira nō te mea e taime ’e e mau rāve’a tā tātou nō te rave.
Teie te tahi mau hi’ora’a nō te tāvinira’a tā te ’Ēkālesia e turu nei ’e ’o tā tātou mau melo ’e te tahi atu mau ta’ata maitata’i ’e mau tā’atira’a e turu ato’a nei, nā roto i te mau ō o te taime ’e te moni.
E ha’amata vau ma te ha’apa’ora’a fa’aro’o ti’amā. Ma te turura’a i te reira, tē tāvini nei tātou i tō tātou iho maita’i, ’oia ato’a te maita’i o te tahi atu mau ha’apa’ora’a fa’aro’o. Mai tā Iosepha Semita, tō tātou peresideni mātāmua i ha’api’i, « tē ti’aturi nei mātou i te ti’ara’a nō te ha’amori i te Atua Manahope mai te au i tō mātou iho mau hina’aro, ’e ’ia vaiiho noa ho’i i te mau ta’ata ato’a ’ia ha’amori rātou noa atu te huru, te vāhi, ’e te mea tā rātou i hina’aro ».10
Te tahi fa’ahou mau hi’ora’a ’o te tōtauturu a te ’Ēkālesia tei fa’aho’ihia mai ’e te tahi atu, ’o te turu ato’a nei ma te hina’aro mau e tō tātou mau melo ’oia ho’i tā tātou mau fare ha’api’ira’a, te ha’api’ira’a tuarua ’e te ha’api’ira’a teitei tei mātau-maita’i-hia, ’e tā tātou mau ō tei mātau-iti-hia tei piahia i teienei nō te ha’amāmā i te feiā e māuiui nei nā roto mai i te vāvahira’a ’e te ’āhuehuera’a nō te ahiripā o te nātura, mai te pūa’ahiohio ’e te ’āueuera’a fenua.
Tē vai atu ra te mau ’ohipa tāpa’o aroha ’o tā tātou mau melo e turu nei nā roto i tā rātou mau ō ’e mau tauto’ora’a ’aita e nehenehe e fa’ata’a atu, terā rā, teie noa ma’a fa’a’itera’a o te raura’a ’e te faufa’a ho’i : te ’arora’a i te tatira’a nūna’a ’ē ’e te tahi atu hāmani-’ino-ra’a, te mitora’a ’e te rapa’aura’a ma’i, te tauturura’a i te ruhiruhiā, te turura’a i te pehe ’e te mau fare manaha ’e te ha’amaita’ira’a i te morare ’e te arutaimāreva pae tino o te tā’āto’a.
Tē ’imi nei te mau tauto’ora’a ato’a nō te taututu i te ta’ata nā te ao nei a Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ia pe’e i te hi’ora’a a te hō’ē nūna’a ha’apa’o i roto i te Buka a Moromona : « E nō reira i roto i tō rātou manuiara’a rahi, ’aita rātou i tu’u ’ē atu i tei taha’a noa ’e tei po’ia, ’e tei po’ihā, ’e tei pohehia i te ma’i …’e …’ua hōro’a noa rātou nā te mau ta’ata ato’a, i te ta’ata pa’ari ’e te ta’ata ’āpī ato’a ho’i, i te tītī ’e te ti’amā, i te tāne ’e te vahine, i te feiā i roto i te ’ēkālesia ’e tei rāpae ho’i i te ’ēkālesia ».11
Tē fa’a’ite pāpū nei au nō Iesu Mesia, ’o tōna ho’i mōrī ’e tōna Vārua e arata’i nei ia tātou pā’āto’a i roto i te tauturura’a i te veve ’e tei māuiui nā te ao nei. I te i’oa o Iesu Mesia, āmene.