’Āmuira’a rahi
Te itoito nō te poro i te parau mau
’Āmuira’a rahi nō ’Ātopa 2022
11:26

Te itoito nō te poro i te parau mau

Elder Denelson Silva

Nō te Hitu ’Ahuru

’Ia ’ite ana’e tātou i te parau mau, e hōro’a mai te Fatu ia tātou i te rāve’a ’ia rave i te ’ohipa tāna e rave ’āhiri ē, tei ’ōnei ’oia i teie mahana.

I te matahiti 1982, tē fa’aoti rā vau i tā’u parau tū’ite nō te tuatāpapara’a i te hōho’a o te fenua, i roto i te hō’ē fare ha’api’ira’a tōro’a.

I te hope’a o te matahiti, ’ua ani mai te hō’ē hoa ha’api’ira’a iā’u ’ia paraparau māua. Tē ha’amana’o ra vau ē, ’ua vaiiho atu māua i te tahi mau melo o te piha ha’api’ira’a, ’e ’ua haere atu māua i te hō’ē vāhi i pīha’i iho i te tahua tū’aro. I tō māua taera’a i reira, ’ua paraparau mai ’oia iā’u nō ni’a i tōna mau ti’aturira’a pae fa’aro’o, ’e ’aita ’oia i fa’a’ite noa mai iā’u i te hō’ē buka, ’ua hōro’a roa mai rā ’oia i te buka. E’ita vau e huna atu, ’aita vau e ha’amana’o nei i te mau parau ato’a tāna i fa’ahiti, tē ha’amana’o maita’i nei rā vau i te reira taime ’e i te mea tei puta mai i roto iā’u, ’a parau mai ai ’oia ē : « Tē hina’aro nei au e fa’a’ite pāpū atu ia ’oe ē, e parau mau teie buka, ’e ’ua fa’aho’i-fa’ahou-hia mai te ’evanelia a Iesu Mesia ».

I muri a’e i tā māua ’āparaura’a, ’ua ho’i au i te fare, ’ua hurihuri i te tahi mau ’api, ’e ’ua tu’u atu i te reira i ni’a i te pa’epa’e. Nō te mea ho’i tei te pae hope’a mātou o te matahiti ’e o te matahiti hope’a te reira nō tā’u tuatāpapara’a i te hōho’a fenua, ’aita vau i tau’a rahi roa i te buka ’e tae noa atu i tō’u hoa ha’api’ira’a tei hōro’a mai i te buka iā’u. ’Ua ta’a a’ena ia ’outou te i’oa o te buka. ’Oia ho’i, te Buka a Moromona.

Pae ’āva’e i muri mai, ’ua haere mai te mau misiōnare i tō’u fare ; tē ha’amata rā rāua i te ho’i ’a tae mai ai au i te fare nā te ’ohipa mai. ’Ua ani au ia rāua ’ia fa’aea mai. ’Ua pārahi mātou i roto i te hō’ē ’āua na’ina’i i mua i tō’u fare, ’e ’ua ha’api’i mai rāua iā’u.

I roto i tā’u ’imira’a i te parau mau, ’ua ani au ia rāua tei hea te ’Ēkālesia mau ’e e nāhea vau e ’ite ai i te reira. ’Ua ha’api’i mai te mau misiōnare iā’u ē, e nehenehe au e fāri’i i te reira pāhonora’a nō’u iho. Ma te tīa’i rahi ’e te hina’aro rahi, ’ua fāri’i au i tā rāua tītaura’a ’ia tai’o e rave rahi pene o te Buka a Moromona. ’Ua pure au ma te ’ā’au hina’aro mau ’e ma te mana’o pāpū (hi’o Moroni 10:4-5). E mea māramarama roa te pāhonora’a i tā’u uira’a ’e tau mahana i muri mai—’oia ho’i, i te 1 nō Mē 1983—’ua bāpetizohia vau ’e ’ua ha’amauhia ’ei melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei.

I teie mahana, ’ia feruri ana’e au i te terera’a o te mau ’ohipa i tupu, tē ’ite pāpū nei au i te faufa’a rahi o te itoito o tō’u hoa ha’api’ira’a i tōna fa’a’itera’a mai i tōna ’itera’a pāpū nō ni’a i te parau mau i fa’aho’i-fa’ahou-hia mai, ’e ma te hōro’a mai i te hō’ē tāpa’o fa’a’ite pāpū o te fa’aho’i-fa’ahou-ra’a-hia mai te ’evanelia a Iesu Mesia, ’oia ho’i, te Buka a Moromona. ’Ua fa’atupu taua ’ohipa ’ōhie ra, e aura’a hōhonu rā nō’u, i te hō’ē tū’atira’a i rotopū iā’u ’e te mau misiōnare i tō’u fārereira’a ia rāua.

’Ua vauvauhia mai te parau mau iā’u, ’e i muri a’e i tō’u bāpetizora’a, ’ua riro mai au ’ei pipi nā Iesu Mesia. I roto i te mau matahiti i muri mai, ’e ma te tauturu a te mau ta’ata ta’a ’ē mau, mai te mau ti’a fa’atere, te mau ’orometua ha’api’i ’e te mau hoa ’e nā roto ato’a i tā’u iho tuatāpapara’a, ’ua ha’api’i mai au ē, ’ia fa’aoti ana’e au ’ia riro ’ei pipi nā Iesu Mesia, ’ua fāri’i au i te hōpoi’a ’eiaha noa e pāruru i te parau mau i te poro ato’a ra.

’Ia fāri’i ana’e tātou e ti’aturi i te parau mau ’e e pe’e i te reira, ’e ’ia tūtava ana’e tātou ’ia riro ’ei mau pipi mau nā Iesu Mesia, ’aita tātou e fāri’i i te hō’ē parau ha’apāpūra’a ē, e’ita tātou e rave i te hape, ē e’ita tātou e fa’ahemahia ’ia fa’aātea ’ē i te parau mau, ’aore rā e’ita roa atu tātou e fāri’i i te ’ati. Terā rā, tē ha’api’i nei te ’itera’a i te parau mau ia tātou ē, ’ia tomo ana’e tātou i ni’a i te ’ē’a ’āfaro ’e te piriha’o ’o tē fa’aho’i ia tātou i mua i te aro o tō tātou Metua i te ao ra, tē vai ra iho ā te hō’ē rāve’a nō te ’ape i teie mau fifi (hi’o 1 Korinetia 10:13) ; tē vai ra iho ā te fē’a’a i tō tātou mau fē’a’ara’a hou ’a fē’a’a ai i tō tātou fa’aro’o (hi’o Dieter F. Uchtdorf, « Haere mai, ’apiti mai ia mātou », Liahona, Novema 2013, 21) ; ’e i te hope’a, e fāri’i tātou i te ha’apāpūra’a ē, e’ita tātou e vai ’ōtahi noa ’ia fārerei ana’e tātou i te ’ati, nō te mea e fārerei mai te Atua i tōna mau ta’ata i roto i tō rātou mau ’ati (hi’o Mosia 24:14).

’Ia ’ite ana’e tātou i te parau mau, e hōro’a mai te Fatu ia tātou i te rāve’a ’ia rave i te ’ohipa tāna e rave ’āhiri ē, tei ’ōnei ’oia i teie mahana. ’Oia mau, ’ua fa’a’ite mai ’oia ia tātou nā roto i tāna mau ha’api’ira’a i te mea tā tātou e ti’a ’ia rave : « ’E e haere atu ’outou nā roto i te mana o tō’u nei vārua, i te poro haerera’a i tā’u nei ’evanelia, tāta’ipiti i te haerera’a, i roto i tō’u nei i’oa, i te fa’ateiteira’a i tō ’outou mau reo mai te mea ra e mai te hāruru o te pū ra, i te fa’a’itera’a atu i tā’u parau mai tā te mau melahi a te Atua ra » (Te Ha’api’ira’a Tumu ’e te mau Fafaura’a 42:6). Te rāve’a nō te tāvinira’a misiōnare i roto i tō tātou feiā ’āpī e mea ta’a ’ē ïa !

E te feiā ’āpī tamāroa ē, ’eiaha e fa’ataime i tō ’outou fa’aineinera’a nō te tāvini i te Fatu ’ei mau misiōnare. ’A fa’aruru ai ’outou i te mau tupura’a ’o tē fa’ariro i te fa’aotira’a ’ia tāvini i te hō’ē misiōni ’ei ’ohipa fifi—mai te vaiihora’a i tā ’outou tau ha’api’ira’a nō te hō’ē taime, te arohara’a i tō ’outou hoa tamāhine ma te ’ore e ha’apāpū e arapae fa’ahou ānei iāna, ’aore rā i te fa’aru’era’a i te hō’ē ’ohipa—’a ha’amana’o i te hi’ora’a maita’i o te Fa’aora. I roto i tāna tāvinira’a, ’ua fa’aruru ato’a ’oia i te mau fifi, mai te fa’a’inora’a, te hāmani-’ino-ra’a ’e i te pae hope’a i te ’āu’a maramara o tōna fa’asātaurora’a. Noa atu ra te reira mau tupura’a, ’ua ’imi noa ’oia i te rave i te hina’aro a tōna Metua ’e i te fa’ahanahana iāna. (Hi’o Ioane 5:30 ; 6:38–39 ; 3 Nephi 11:11 ; Te Ha’api’ira’a Tumu ’e te mau Fafaura’a 19:18–19.)

E te feiā ’āpī tamāhine, e fāri’i poupouhia ’outou, mai te mea e hina’aro mau ’outou, ’ia rave i te ’ohipa i roto i te ’ōvine a te Fatu, ma te fa’aineinera’a ’ia ’outou iho nō te tāvini ’ei mau misiōnare rave tāmau, e’ita ïa ’outou e fa’a’erehia i te reira ato’a mau tītaura’a.

I te feiā ato’a e fa’aoti e tāvini iāna, tē fafau atu nei au ia ’outou ē, terā e 24 ’aore rā e 18 ’āva’e i te tāvinira’a i roto i te ’āua misiōnare, mai te ’ohipa ïa e tupu, mai te mea e fa’aea noa ’outou i te fare, te mau rāve’a rā e tīa’i mai ra i te feiā ’āpī tamāroa ’e te feiā ’āpī tamāhine ti’amā nō teie ’Ēkālesia i roto i te ’āua misiōni e mea ta’a ’ē ïa. E’ita e nehenehe e tāu’a ’ore i te ha’amaita’ira’a ’ia mono i te Fa’aora ia Iesu Mesia ’e tāna ’Ēkālesia. Te ’āmuira’a i roto i te mau rahira’a pure, te fa’ahotura’a ’e te fa’a’itera’a i tōna ’itera’a pāpū e rave rahi taime i roto hō’ē mahana, te tuatāpapara’a i te mau pāpa’ira’a mo’a e rave rahi hora ’e te fārereira’a i te mau ta’ata ’o tā ’outou e ’ore e fārerei atu ’āhiri tei te fare noa ’outou, e riro ’ei mau ’itera’a e’ita e nehenehe e parau. E fa’ata’a-ato’a-hia teie huru ’itera’a nō te feiā ’āpī tā te Fatu e pi’i nō te tāvini i roto i te misiōni piha ’ohipa. E fāri’i-poupou-hia ’outou ’e e mea hina’aro-ato’a-hia ’outou. ’Eiaha e fa’aiti i te faufa’a o te hō’ē misiōni piha ’ohipa, nō te mea e pūpū-ato’a-hia i te misiōni piha ’ohipa i te mau ’itera’a e’ita e nehenehe e parau. « E mea faufa’a rahi te mau vārua ta’ata i tō te Atua hi’ora’a mai » (Te Ha’api’ira’a Tumu ’e te mau Fafaura’a 18:10), ’oia ato’a te faufa’a o tō ’outou vaerua.

’Ia ho’i mai ’outou nā tā ’outou tāvinira’a, ’aita paha tō ’outou hoa tamāhine ’aore rā tamāroa e tīa’i fa’ahou mai ra ia ’outou, ’ua ha’api’i maita’i mai rā ’outou e nāhea ’ia tā’amu i te mau fārereira’a maita’i. E rahi atu te aura’a nō tā ’outou mau ha’api’ira’a teitei ma te mau ’itera’a tā ’outou i fāri’i nō ni’a i te fa’aineinera’a tano maita’i a’e i roto i te ’ohipa, ’e i te hope’a e ’ite pāpū hope roa ’outou ē, ’ua poro ’outou i te ’evanelia o te hau ma te itoito, ma te fa’a’ite pāpū i te parau mau i fa’aho’ihia mai.

Nō ’outou tei fa’aipoipohia ’e tei roto i te mau tuha’a ta’a ’ē o tō ’outou orara’a, e mea tītau-roa-hia ’outou i roto i te ’ohipa a te Fatu. ’A fa’aineine ia ’outou iho. ’A ora i te hō’ē orara’a mā, ma te ’imi i te fa’arava’ira’a iāna iho i te pae tino ’e i te pae vārua, nō te mea, te mau taime nō te rave i te mea tā te Fatu e rave nō tāna mau tamari’i, ’aita ïa i tā’ōti’ahia i ni’a i te hō’ē pupu matahiti. Te mau ’itera’a nehenehe roa tā tā’u vahine ’e ’o vau i fārerei i te mau matahiti i ma’iri iho nei, ’ua tupu mai te reira i te taime ’a tāvini ai māua i pīha’i iho i te mau ’āpiti ta’a ’ē, te tāvinira’a i roto i te mau vāhi ta’a ’ē ’e i te tāvinira’a i te mau ta’ata ta’a ’ē roa.

Te ’itera’a tā’u i fāri’i i te hope’a o tā’u parau tū’ite nō te tuatāpapara’a i te hōho’a o te fenua, ’ua ha’api’i mai te reira iā’u ē, i te mau taime ato’a e pāruru tātou i te parau mau ’ia poro ana’e tātou i te reira, ’e te pārurura’a i te parau mau, e ’ohipa itoito ïa. ’Eiaha roa atu e pāruru i te parau mau nā roto i te ha’avīra’a, nā roto rā i te hō’ē hina’aro pāpū ’ia here, ’ia hōro’a ’e ’ia ani manihini i te mau ta’ata tā tātou e fa’a’ite pāpū atu i te parau mau, ma te feruri hō’ē roa i te ’ora maita’i pae tino ’e pae vārua o te mau tamari’i a te hō’ē Metua here i te ao ra (hi’o Mosia 2:41).

I roto i te ’āmuira’a rahi nō ’Ātopa 2021, ’ua ha’api’i mai te peresideni Russell M. Nelson, tō tātou peropheta here ē, ta’a ’ē atu i tā te tahi mau ta’ata e feruri nei, tē vai mau rā te mea tā tātou e parau nei ē, te maita’i ’e te ’ino. Tē vai mau ra te parau mau hope roa—te parau mau mure ’ore. (Hi’o « Parau mau vi’ivi’i ’ore, ha’api’ira’a tumu vi’ivi’i ’ore, ’e heheura’a vi’ivi’i ’ore », Liahona, Noveme 2021, 6.)

Tē ha’api’i mai nei te mau pāpa’ira’a mo’a ia tātou ē, « o te parau mau ra o te ’ite ïa i te mau mea i tō rātou huru mau, mai te au i tei vai ’ē na, ’e mai te au ho’i i tē vai ’e a muri atu » (Te Ha’api’ira’a Tumu ’e te mau Fafaura’a 93:24).

E’ita te ’itera’a i te parau mau e fa’ariro ia tātou ’ei mea maita’i a’e i te tahi atu mau ta’ata, e ha’api’i rā te reira ia tātou e aha tā tātou e ti’a ’ia rave nō te ho’i i mua i te aro o te Atua.

’Ia haere ana’e ’outou i mua ma te pāpū i roto i te Mesia ’e ma te itoito ’eiaha nō te poro noa i te parau mau, nō te ora rā i te parau mau, e ’itehia ïa ia ’outou te tāmāhanahanara’a ’e te hau i roto i te mau ’ārepurepura’a tā ’outou e fa’aruru i roto i te reira mau mahana.

E nehenehe te mau tāmatara’a o te orara’a e fa’ata’ahuri ia tātou, ’ia ’ite mai rā ’outou ē, mai te mea e fa’a’ohipa tātou i te fa’aro’o ia Iesu Mesia, « e vai poto noa mai tō [tātou] mau ’ati »(Te Ha’api’ira’a Tumu ’e te mau Fafaura’a 121:7) i roto i te tuha’a rahi o te mure ’ore. E tenā nā, ’eiaha e fa’ata’a i te tai’o mahana ’ōti’a nō te hopera’a o tō ’outou mau fifi ’e mau tāmatara’a. ’A ti’aturi i tō tātou Metua i te ao ra ’e ’eiaha e fa’aru’e, mai te mea e fa’aru’e tātou, e’ita tātou e ’ite e aha te hope’ara’a o tō tātou tere i roto i te bāsileia o te Atua.

’A tāpe’a māite i ni’a i te parau mau, ’a ha’api’i mai nā roto mai i te mau puna o te parau mau.

Tē fa’a’ite nei au i tō’u ’itera’a pāpū nō Iesu Mesia ’e ’o teie tāna ’Ēkālesia. E peropheta ora tō tātou, ’e e vai ti’amā noa tātou ’ia poro ana’e tātou i te parau mau ma te itoito. I te i’oa o Iesu Mesia ra, ’āmene.