Pe’e ia Iesu Mesia ma te ta’ahira’a ’āvae nō te fa’aro’o
E ti’a i te Mesia ’ia amo ia tātou i teie mahana i roto i tō tātou mau taime fifi. ’Ua nā reira ’oia nō te mau pionie mātāmua, ’e tē nā reira nei ’oia i teienei nō tātou tāta’itahi.
Māuruuru e te pupu hīmene nō te hīmenera’a « Faith in Every Footstep [Te fa’aro’o i te ta’ahira’a ’āvae tāta’itahi]. » ’Ua pāpa’ihia te pehe ’e te mau parau o terā hīmene i te matahiti 1996, nā te taea’e Newell Dayley1 nō te fa’aineinera’a i te ’ōro’a nō te 150ra’a o te matahiti te tāpaera’a te mau pionie mātāmua i te ’āfa’a nō Roto Miti, i te matahiti 1847.
Noa atu ā ’ua pāpa’ihia terā hīmene nō terā ’ōro’a fa’ahanahanara’a, ’ua tano tāna poro’i i te ao tā’āto’a nei.
E mea au roa nā’u te fa’aho’ira’a :
Ma te fa’aro’o i te ta’ahira’a ’āvae tāta’itahi, ’ua pe’e tātou i te Mesia, te Fatu ;
’E ma te tīa’ira’a i tōna here mau, e hīmene tātou ma te reo hō’ē.2
Te mau taea’e ’e te mau tuahine, tē parau pāpū nei au ē, ’ia pe’e tātou ia Iesu Mesia ma te ta’ahira’a ’āvae nō te fa’aro’o, tē vai nei te tīa’ira’a. E tīa’ira’a i roto i te Fatu Iesu Mesia. E tīa’ira’a nō te tā’āto’ara’a i roto i teie orara’a. E tīa’ira’a nō te upo’oti’a i tā tātou mau hape, tō tātou ’oto ’e te mau tāfifira’a, ’e tō tātou mau fifi ’e tō tātou mau pe’ape’a. E tīa’ira’a i roto i te tātarahapara’a ’e te fa’a’orera’a hara, ’e i roto i te fa’a’orera’a i tā te ta’ata hapa. Tē parau pāpū nei au ē, e tīa’ira’a ’e e hau ho’i i te Mesia. E ti’a iāna ’ia amo ia tātou i teie mahana i roto i tō tātou mau taime fifi. ’Ua nā reira ’oia nō te mau pionie mātāmua, ’e e nā reira ’oia i teienei nō tātou tāta’itahi.
I teie matahiti, ’o te 175ra’a ïa o te matahiti nō te tāpaera’a te mau pionie mātāmua i te ’āfa’a nō Roto Miti, ’e ’ua feruri atu ra vau i tō’u mau tupuna, vetahi o rātou tei haere mai nā raro, nā Nāuvoo mai i Roto Miti nei. E hina vau nō te tahi o rātou tei haere mai nā raro i tō rātou ’āpīra’a. ’O Henry Ballard, e 20 matahiti ;3 ’o Margaret McNeil, e 13 matahiti4 ’e ’o Joseph F. Smith, tei riro mai i te ono o te peresideni o te ’Ēkālesia, e 9 noa tōna matahiti i te tāpaera’a i te ’āfa’a nō Roto Miti.5
’Ua ’ere rātou i te mau mea e rave rahi i roto i te tere, e tau to’eto’e mau ’e te ma’i, ’e ’aita e mā’a tano ’e e ’ahu tano nō te reira. ’Ei hi’ora’a, i te tomora’a ’o Henry Ballard i roto i te ’āfa’a nō Roto Miti, ’ua ’oa’oa ’oia i te ’itera’a i te « Fenua i parauhia ra », i roto rā ’oia i te mata’u ’ia hi’o mai te ta’ata iāna, ’ua pē roa ho’i tōna ’ahu, ’aita fa’ahou e tāpo’i pauroa ra i tōna tino. ’Ua tāpuni ’oia iāna i roto i te ’aihere ē pō noa atu. Haere atu ra i te hō’ē fare nō te tāparu i te tahi ’ahu, ’ia ti’a iāna ’ia fa’aoti i tōna tere ’e ’ia ’ite mai i te vāhi tei reira tōna nā metua. ’Ua māuruuru roa ’oia i te Atua ’ua tāpae ’oia i tōna ’utuāfare nō a muri a’e ma te pāruru.6
’Ua pe’e tō’u nā tupuna ia Iesu Mesia ma te ta’ahira’a ’āvae nō te fa’aro’o, i roto i tō rātou mau fifi tāta’itahi. ’Ua māuruuru roa vau ia rātou nō te ’ore-roa-ra’a e fa’aru’e. E ha’amaita’ira’a tō rātou ta’ahira’a ’āvae nō te fa’aro’o nō’u nei, ’e nō te mau u’i nō muri mai, mai tō ’outou mau ta’ahira’a ’āvae nō te fa’aro’o e ha’amaita’i i tō ’outou hua’ai.
Te ta’o ra pionie e i’oa ïa ’e e ihoparau (verbe) ato’a ho’i. Te aura’a nō te i’oa, e ta’ata ïa i roto i te mau ta’ata mātāmua tei haere e hi’o, ’aore rā tei noho mātāmua i te hō’ē vāhi ’āpī. Te aura’a nō te ihoparau, ’o te ha’amatarara’a ïa, te fa’aineinera’a i te ’ē’a nō te mau ta’ata e ’āpe’e mai.7
’Ia feruri au i te mau pionie tei fa’aineine i te ’ē’a nō vetahi ’ē, e mana’o mātāmua ïa vau i te peropheta Iosepha Semita. E pionie ’o Iosepha i te mea ē, ’ua arata’i tōna mau ta’ahira’a ’āvae nō te fa’aro’o iāna i te hō’ē uru rā’au, i reira ’oia i te tūturira’a nō te pure, ’e ’ua fa’atoro i te ’ē’a nō tātou ’ia noa’a te ’īra’a o te ’evanelia a Iesu Mesia. Nā te fa’aro’o o Iosepha e « ani i te Atua »8 i terā po’ipo’i nō te tau fa’atupura’a rā’au nō te matahiti 1820, i fa’atoro i te ’ē’a nō te Fa’aho’i-fa’ahou-ra’a mai i te ’īra’a o te ’evanelia a Iesu Mesia, mai te pi’i-fa’ahou-ra’a-hia te mau peropheta ’e te mau ’āpōsetolo ’ia tāvini i ni’a i te fenua nei.9 ’Ua ’ite au ē, e peropheta nā te Atua ’o Iosepha Semita. ’Ua ’ite au ē, nā tōna mau ta’ahira’a ’āvae nō te fa’aro’o rahi i arata’i iāna ’e ’ua tūturi ’oia i mua i te aro o te Atua te Metua ’e tāna Tamaiti here ia Iesu Mesia.
Maoti te mau ta’ahira’a ’āvae nō te fa’aro’o o te peropheta Iosepha i ti’a ai iāna ’ia riro ’ei mauiha’a nā te Fatu nō te fa’atae mai i te Buka a Moromona, ’o te tahi fa’ahou ho’i ’ite nō Iesu Mesia, ’e i tōna maita’i rahi ’e tāna tāra’ehara.
Nā roto i te fa’aro’o o Iosepha Semita ’e tōna ononora’a i mua i te fifi rahi ’e te pāto’ira’a, ’ua ti’a iāna ’ia riro ’ei mauiha’a i roto i te rima o te Fatu nō te ha’amau fa’ahou i te ’Ēkālesia a Iesu Mesia i ni’a i te fenua nei.
I te ’āmuira’a rahi i ma’iri, ’ua paraparau vau nō ni’a i te ha’amaita’ira’a tā’u tāvinira’a misiōnare rave tāmau iā’u. ’Ua ha’amaita’ihia vau i te ha’api’ira’a i te ta’ata nō ni’a i te fa’anahora’a hanahana nō te fa’aorara’a a tō tātou Metua i te ao ra, nō ni’a i te ’Ōrama Mātāmua a Iosepha Semita ’e tōna ’īritira’a i te Buka a Moromona. Nā teie mau ha’api’ira’a i fa’aho’ihia mai ’e teie ha’api’ira’a tumu i arata’i i tō’u mau ta’ahira’a ’āvae nō te fa’aro’o, i te ha’api’ira’a ia rātou tei ineine i te fa’aro’o i te poro’i nō te Fa’aho’i-fa’ahou-ra’a o te ’evanelia.
E mau pionie nō te tau ’āpī tā tātou mau misiōnare i teie mahana, nō te mea tē fa’a’ite nei rātou i teie poro’i hanahana i te mau ta’ata ’ati a’e te ao nei, ma te fa’atoro i te ’ē’a i te mau tamari’i a te Metua i te ao ra, nō te ’ite iāna ’e tāna Tamaiti ia Iesu Mesia. Nā te fāri’ira’a i te ’evanelia a Iesu Mesia e fa’atoro i te ’ē’a nō te mau ta’ata ato’a ’ia fa’aineine ’e ’ia fāri’i i te mau ’ōro’a ’e te mau ha’amaita’ira’a a te ’Ēkālesia ’e o te hiero.
I te ’āmuira’a rahi i ma’iri, ’ua ha’apāpū fa’ahou ā te peresideni Russell M. Nelson « ’ua ani mai te Fatu i te feiā ’āpī tāne ti’amā ato’a ’e te itoito, ’ia fa’aineine nō te tāvini i te hō’ē misiōni » ’e « te misiōni e rāve’a pūai ato’a, e ’ere rā i te mea fa’ahepohia » nō « te mau tuahine ’āpī itoito. »10
E te feiā ’āpī tamāroa, e te feiā ’āpī tamāhine, nā tō ’outou mau ta’ahira’a ’āvae nō te fa’aro’o e tauturu ia ’outou ’ia pe’e i te anira’a a te Fatu ’ia tāvini i te misiōni—’ia riro ’ei pionie nō te ’anotau ’āpī—i te fa’atorora’a i te ’ē’a nō te mau tamari’i a te Atua, nō te ’ite mai ’e nō te fa’aea i ni’a i te ’ē’a nō te fafaura’a e fa’aho’i ia rātou i mua i tōna aro hanahana.
E pionie te peresideni Nelson i roto i te ’Ēkālesia. ’Ei ’āpōsetolo ’ua rātere ’oia nā te mau fenua e rave rahi ’e ’ua ha’amatara i te reira i te porora’a ’evanelia. I muri noa iho i te rirora’a ’ei peropheta ’e ’ei Peresideni o te ’Ēkālesia, ’ua tāparu ’oia ia tātou ’ia « fa’arahi atu ā i tō [tātou] ’aravihi pae vārua e fāri’i i te heheura’a. »11 Tē tāmau nei ’oia i te ha’api’i ia tātou ’ia ha’apūai i tō tātou ’itera’a pāpū. I roto i te hō’ē purera’a nō te feiā ’āpī pa’ari, ’ua nā ’ō ’oia :
« Tē tāparu nei au ia ’outou ’ia amo i te hōpoi’a nō tō ’outou ’itera’a pāpū. ’A ha’a nō te reira. ’A fatu i te reira. ’A ha’apa’o i te reira. ’A aupuru i te reira ’ia tupu i te rahi […]
« [’Ei reira] e hi’o i te mau semeio e tupu i roto i tō ’outou orara’a. »12
Tē ha’api’i nei ’oia ia tātou e nāhea i te fa’arahi atu ā i tō tātou fa’arava’ira’a ia tātou iho i te pae vārua. I parau ’oia ē « i te mau mahana rā i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i. »3
Tē parau pāpū nei au ē ’o te peresideni Russell M. Nelson te peropheta a te Atua i ni’a i te fenua nei.
’O tō tātou Fa’aora Iesu Mesia te pionie rahi roa a’e i te fa’aineinera’a i te ’ē’a. ’Oia mau, ’o ’oia « te ’ē’a »14 ’ia tupu te fa’anahora’a nō te fa’aorara’a, ’ia ti’a ia tātou ’ia tātarahapa ’e, nā roto i te fa’aro’o iāna, ’ia ho’i tātou i tō tātou Metua i te ao ra.
’Ua parau Iesu : « ’O vau te ’ē’a, ’e te parau mau, ’e te ora, ’aore roa e ta’ata e tae i te Metua ra, maori rā ’ei iā’u. »11 I parau fafau ’oia ē e’ita ’oia e vaiiho ia tātou ma te tāmāhanahana ’ore ; e haere mai ’oia ia tātou i roto i tō tātou mau fifi.16 I ani ’oia ia tātou ’ia « haere mai [iāna] ma te ’ā’au hina’aro mau, ’e [nāna] e fa’aora ia [tātou]. »17
Tē parau pāpū nei au ē ’o Iesu Mesia tō tātou Fa’aora ’e tō tātou tāra’ehara, tō tātou Ārai mua i te Metua. ’Ua fa’atoro tō tātou Metua i te ao ra i te ’ē’a nō tātou nō te ho’i iāna ra, nā roto i te pe’era’a i tāna Tamaiti here, ia Iesu Mesia, ma te fa’aro’o i te ta’ahira’a ’āvae tāta’itahi.
’Ua fa’aruru tō’u mau tupuna ’e te mau pionie mātāmua i te mau ārai’ē’a e rave rahi, ’a haere mai rātou nā ni’a i te pere’o’o tāvere, te pere’o’o pūtō ’e nā raro ato’a, i te ’āfa’a nō Roto Miti. E fa’aruru ato’a tātou i te mau fifi i roto i tō tātou iho tere o te orara’a. ’Aita tātou e tūra’i nei i te pere’o’o pūtō, ’aore rā te pere’o’o tāvere nā ni’a i te mou’a ’e nā roto i te hiona me’ume’u ; tē tāmata nei tātou mai ia rātou ato’a, ’ia upo’oti’a i te pae vārua i ni’a i te mau fa’ahemara’a ’e te mau fifi o tō tātou ’anotau. E ’ē’ati’a tā tātou e haere ; e ’āivi tā tātou e ta’uma—’e i te tahi taime e mou’a. Noa atu ā te ta’a ’ē o te mau fifi i teie mahana i tō te mau pionie mātāmua, e ’ere i te mea ’ōhie a’e nō tātou.
E mea faufa’a ’ia pe’e i te peropheta ’e ’ia ha’amau pāpū i tō tātou ’āvae i ni’a i te ’ē’a nō te fafaura’a, te ’ē’a nō te ha’apa’o maita’i, mai te mau pionie mātāmua.
Pe’e ana’e ia Iesu Mesia ma te fa’aro’o i roto i te ta’ahira’a tāta’itahi. Tītauhia ’ia tāvini i te Fatu ’e ’ia tāvini i te tahi ’e te tahi. Tītauhia ’ia ha’apūai ia tātou i te pae vārua nā roto i te ha’apa’ora’a ’e te fa’aturara’a i tā tātou mau fafaura’a. ’Eiaha na ’ia mo’e ia tātou te mana’o rū ’ia ha’apa’o i te mau fa’auera’a. Tē tāmata nei Sātane i te fa’aiti i tā tātou parau fafau ’e tō tātou here i te Atua ’e i te Fatu Iesu Mesia. E ha’amana’o na ē, mo’e noa atu i te hō’ē ta’ata tōna ’ē’a, e’ita roa atu tātou e mo’ehia e tō tātou Fa’aora. Nā roto i te ha’amaita’ira’a nō te tātarahapara’a, e ti’a ia tātou ’ia fāriu i ni’a iāna. Nāna e tauturu ia tātou ’ia ha’api’i, ’ia tupu i te rahi ’e ’ia taui ’a tūtava noa ai i ni’a i te ’ē’a nō te fafaura’a.
’Ia pe’e tātou i te mau ta’ahira’a ’āvae o Iesu Mesia, ’e ma te fa’aro’o i te ta’ahira’a tāta’itahi, ’ia rōtahi tātou i ni’a iāna, ma te ha’amau pāpū i tō tātou ’āvae i ni’a i te ’ē’a nō te fafaura’a, ’o tā’u ïa pure ha’eha’a, i te i’oa o Iesu Mesia, ’āmene.