Sekolo sa Baperofeti se ne se tshwarelwa mo ntlwaneng ena.

Phatwe 11–17: “Tlhomamisa … Ntlo ya Modimo”

Dithuto le Dikgolagano 88

Gangwe le gape, Morena o re neela kgabodiso ya “borena jwa Gagwe le thata tse di senang selekanyo” (Dithuto le Dikgolagano 88:47) ka ditshenolo tse di makatsang. Dithuto le Dikgolagano 88 ke mofuta oo wa tshenolo—e e buang ka lesedi le kgalalelo le magosi e e ka dirang gore matshwenyego a rona a lefatshe a lebege a le mannye ka tshwantshanyo. Le fa re sa kake ra e tlhaloganya yotlhe, re ka bona gore go na le mo gontsi ka bosakhutleng go feta jaaka re kileng ra lemoga ka teng. Gone, Morena ga a abelane boammaaruri jo bogolo jo go re tshosa kgotsa go dira gore re ikutlwe re le bannye. Le gale, O solofeditse, “Letsatsi le tlaa tla leo lo tlaa tlhaloganyang ebong Modimo” (temana 49; kgatelelo e tsentswe). Gongwe e ne e le ya bokhutlo joo jo bo galalelang jo Morena a laetseng Baitshepi ba Gagwe mo Kirtland go dira Sekolo sa Baperofeti. “Ithulaganyeng,” A rialo, “Baakanyang sengwe le sengwe se se tlhokegang; mme lo tlhomamiseng … ntlo ya Modimo” (temana 119). Go feta gope fela, ke mo teng ga ntlo e e boitshepo ya Modimo—le mo magaeng a rona—koo A ka tsholetsang ponatshegelo ya rona go feta lefatshe le re leng mo go lone, “gonne o tla bonatsa sefatlhogo sa gagwe mo go [rona],” le go re baakanyetsa go “itshokela kgalalelo ya selesetiale” (ditemana 68, 22).

Bona Saints, 1:164–66.

Megopolo ya go ithuta kwa Gae le kwa Kerekeng

Dithuto le Dikgolagano 88

Jeso Keresete o nneela kagiso.

Malatsi fela morago ga tlhagiso gore “ntwa e ne e tlaa tshololelwa mo ditšhabeng tsotlhe” (Dithuto le Dikgolagano 87:2), Morena o ne a neela tshenolo e Joseph Smith a e biditseng “letlhare la motlhware,” se e leng sekao sa ngwao sa kagiso (Dithuto le Dikgolagano 88, setlhogo sa tsetlana; bona gape Genesise 8:11). Mo ithutuntshong ya gago yotlhe ya tsetlana 88 beke ena, batla melaetsa ya Morena ya kagiso mo go wena.

Dithuto le Dikgolagano 88:6–67

Lesedi le molao di tswa mo go Jeso Keresete.

Mafoko lesedi le molao a boelediwa makgetlho a mantsi mo tsetlana 88. Tshwaya kgotsa kwala ditemana fa o bonang mafoko ana teng mo ditemaneng 6–67, mme o kwale se o se ithutang ka lesedi le molao—le ka Jeso Keresete. O ikutlwa o tlhotlhelediwa go dira eng go amogela lesedi le go tshela “molao wa ga Keresete”? (temana 21).

Bona gape Isaia 60:19; Johane 1:1–9; 3 Nefi 15:9; Timothy J. Dyches, “Light Cleaveth unto Light,” Liahona, Motsheganong 2021, 112–15; Sharon Eubank, “Christ: The Light That Shines in Darkness,” Liahona, Motsheganong 2019, 73–76.

Dikwalo tse di boitshepo di na le molao wa ga Keresete.

Dithuto le Dikgolagano 88:62–64

“Atamelang kwa go nna.”

Ke maitemogelo afe a a go supeditseng gore ditsholofetso tse di mo ditemaneng tse di boammaaruri? Kgato ya gago e e latelang go “atamela kwa go” Keresete ke efe? Akanya go dira sefela “Nearer, My God, to Thee” (Hymns, no. 100) karolo ya go ithutuntsha ga gago le kobamelo.

Dithuto le Dikgolagano 88:67–76

Nka ntlafala ka Tetlanyo ya ga Jeso Keresete.

Taolo ya Morena go “itshepisa” e bonala gabedi mo tsetlana 88 (ditemana 68,74). O akanya gore polelwana ena e raya eng? O ka sekaseka tse dingwe tsa dipolelo ka fa tlase ga “Sanctification” mo Kaelong ya Dikwalo tse di Boitshepo (Motlobo wa Efangele). Re itshepisiwa jang? A potso ena e kaele ithutuntsho ya gago ya Dithuto le Dikgolagano 88:67–76, mme o kwale ditshedimosetso dingwe le dingwe tsa semowa tse o di bonang.

Dithuto le Dikgolagano 88:77–80, 118–26

“Batlang go ithuta, e bong ka go ithuta mme le gone ka tumelo.”

Morena o ne a bolelela Baitshepi go tlhomamisa “sekolo sa baperofeti” mo Kirtland (Dithuto le Dikgolagano 88:137). Bontsi jwa ditaelo tse di mo tsetlana 67 di ba rutile ka fa ba ka go dirang. Taelo ena e ka go thusa gape go “tlhomamisa … ntlo ya thuto” (temana 119) mo botshelong jwa gago. Tota e bile, o ka leba ditemana 77–80 le 118–26 e le sekao sa go “ntšhafatsa legae la gago [kgotsa botshelo jwa gago] gore e nne boremelelo jwa go ithuta efangele” le “ lefelo la boitshepo la tumelo” (Russell M. Nelson, “Becoming Exemplary Latter-day Saints,” Liahona, Ngwanatsele. 2018, 113). Go ka nna monate go tshwantsha gore “ntšhafatso” ya gago e ka lebega jaang, go akaretsa le dipolelwana tse di tswang mo ditemaneng tsena tseo o utlwang o tlhoka go di dirisa.

Go ka thusa go sekaseka dipotso tsena: Ke ka goreng go ithuta le thuto di le botlhokwa mo Moreneng? Ke eng se a batlang ke se ithutuntsha? O batla ke ithuta jang? Batla dikarobo tsa dipotso tsena mo ditemaneng 77–80 le mo “Truth will make you free” (Ya Nonofo ya Banana: Kaelo ya go Dira Ditshwetso, 30–33).

O akanya gore go raya eng go ithuta “ka go ithutuntsha mme le gone ka tumelo”? (temana 4). Ke ditshedimosetso dife tse o di bonang mo molaetseng wa ga Mogolwane Mathias Held “Seeking Knowledge by the Spirit”? (Liahona, Motsheganong 2019, 31–33).

Bona gape Ditlhogo le Dipotso, “Seeking Truth and Avoiding Deception,” Gospel Library; “A School and an Endowment,” mo Revelations in Context, 174–82.

Ka megopolo thata, bona dikgatiso tsa kgwedi ena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 88:33

Rara wa Legodimo o naya dineo tse di molemo.

• O ka simolola puisano ka Dithuto le Dikgolagano 88:33 ka go kopa bana ba gago go bua ka dineo tse ba di neetsweng—tsotlhe tse ba di amogetseng ka boitumelo le tse dingwe tse ba sa di amogelang ka boitumelo. Gongwe ba ka diragatsa ba amogela neo ka boitumelo. Ke gone lo ka bua ka dineo tse Rara wa Legodimo a re di neelang (jaaka neo ya Mowa o o Boitshepo). Re amogela dineo tse tsa boitumelo jang?

Dithuto le Dikgolagano 88:63

Ke batla Mmoloki, ke tlaa Mmona.

• Dithuto le Dikgolagano 88:63 e na le mafoko a madiri a a ka tlhotlheletsang dingwe tsa ditiragatso tsa boitumelo go rotloetsa bana ba gago go batla boleng teng jwa Morena mo matshelong a bone. Sekai, a wena le bana ba gago le ka akanya ka motshameko go buisana ka polelwana “mpatleng ka tlhwaafalo mme le tla bona nna” (kgatelelo e tsentswe) kgotsa “kokota, mme o tla bulelwa”?

Bana ba tlhoka pharologanyo. “Bana ba le bantsi ba ithuta botoka fa ditlhaloganyo tse dintsi di dirisiwa. Batla ditsela go thusa bana go dirisa tlhaloganyo ya bone ya go bona, go utlwa, le go tshwara fa ntse ba ithuta. Mo diemong dingwe, o ka bona le gone ditsela tsa go akaretsa ditlhaloganyo tsa bone tsa go nkga le go utlwa tatso!” (Teaching in the Savior’s Way, 32).

• Go gatelela taletso ya Mmoloki go “atamela kwa go nna,” o ka kopa ngwana a le mongwe go tshwara setshwantsho sa ga Jeso (jaaka setshwantsho kwa bofelong jwa tshoboko ena) mo letlhakoreng le le lengwe la ntlwana fa bana ba bangwe ba eme mo letlhakoreng le lengwe. Fa bana ba gago ba ntse ba akanya ka dilo tse ba ka di dirang go atamela Mmoloki, ba ka tsaya kgato go ya kwa setshwantshong, mme ngwana yo o tshwereng setshwantsho o ka tsaya kgato go ya kwa baneng ba bangwe. Buisana le bana ba gago mabapi le ka fa o atamelang Mmoloki ka teng le ka fa a go atamelang. O ka opela gape le bone pina mabapi le setlhogo se, jaaka “I Feel My Savior’s Love” (Children’s Songbook, 74–75).

Dithuto le Dikgolagano 88:77–80, 118

Rara wa Legodimo o batla ke ithuta.

• Kopa bana ba gago go go bolelela ka se ba ithutang sone mo sekolong kgotsa Poraemari. O ka abelana gape dilo tse dingwe tse o di ithutang. Ke gone o ka supetsa bana ba gago mafoko eng, ka goreng, le jang. Ba thuse go hokutsa Dithuto le Dikgolagano 88:77–79 go batla se Morena a batlang re ithuta ka sone. Ke gone lebang mmogo mo temaneng 80 go bona gore ke eng A batla re ithuta mme mo temaneng 118 batlang ka fa re tshwanetseng go ithuta ka teng.

“Batlang go ithuta … ka go ithuta mme le gone ka tumelo.”

Dithuto le Dikgolagano 88:119

Legae la rona le ka nna boitshepo jaaka tempele.

• Fa o ntse o balela Dithuto le Dikgolagano 88:119 bana ba gago, ba ka dira motsu wa tempele ka diatla tsa bone nako le nako fa ba utlwa lefoko “ntlo.” Tlhalosa gore Rara wa Legodimo o ne a batla gore Joseph Smith le Baitshepi ba age tempele, kgotsa “ntlo ya Modimo.”

• O ka kopa bana ba gago go tlhopha mafoko a supa a a tlhalosang legae la bone. Ke gone ba thuse go bona, mo Dithuto le Dikgolagano 88:119, mafoko a supa a Morena a a dirisang go tlhalosa ntlo ya Gagwe. Re ka dira legae la rona “ntlo ya Modimo” jang?

Ka megopolo thata, bona kgatiso ya kgwedi e ya Friend makasine.

Be Not Afraid [Se Boifeng], ka Michael Malm