Wɔyɛɛ Nkɔmhyɛfoɔ Sukuu no wɔ saa dan yi mu.

Ɔsanaa 11–17: “Mokyekyere Onyankopɔn Fie”

Nkyerɛkyerɛ ne Apam 88

Ɛwɔ mu a, Awurade nam adiyisɛm a ɛyɛ ahodwiri so ma yɛhunu Ne “kɛseyɛ ne tumi” (Nkyerɛkyerɛ ne Apam 88:47) a ɛnni ano no kakra bi. Nkyerɛkyerɛ ne Apam 88 yɛ saa adiyisɛm no bi—deɛ ɛfa hann ne animuonyam ne ahemman ho a sɛ wode toto ho a ɛbɛtumi ama yɛn asase so haw yɛ ketewa. Mpo sɛ yɛntumi nte aseɛ koraa a, anyɛ koraa yɛbɛtumi ate nka sɛ pii wɔ daapem mu kyɛn deɛ yɛtumi hunu. Deɛ ɛteɛ ne sɛ, Awurade nkyɛ saa nokorɛ kɛseɛ yi mfa nhunahuna yɛn anaasɛ mmu yɛn abomfiaa. Nokorɛ mu, Ɔhyɛɛ bɔ sɛ, “Da no bɛba a mo bɛte Onyankopɔn mpo ase” (nkyekyɛmu 49; wɔasi so dua). Ebia na ɛyɛ saa animuonyam awieeɛ no nti na Awurade hyɛɛ N’Ahotefoɔ a na wɔwɔ Kirtland sɛ wɔnte Nkɔmhyɛfoɔ Sukuu no. Ɔkaa sɛ, “Monhyehyɛ mo ho mo ho.” “Monsiesie adehiadeɛ biara; na monkyekyere Onyankopɔn fie.” (nkyekyɛmu 119). Kyɛn baabi foforɔ biara, ɛyɛ Onyankopɔn fie—ne yɛn afie mu—na Ɔbɛtumi apagya yɛn anisoadehunu atra wiase a ɛwuo, “ayi n’anim akyerɛ [yɛn],” na wasiesie yɛn sɛ “yɛbɛtena sɛlɛtia animuonyam mu” (nkyekyɛmu 68, 22).

Hwɛ Ahotefoɔ, 1:164–66.

Nsusuiɛ de ma Adesua wɔ Efie ne Asɔre

Nkyerɛkyerɛ ne Apam 88

Yesu Kristo ma me asomdwoeɛ.

Nna kakra bi akyi a ɔbɔɔ kɔkɔ sɛ ɔko “bɛhwie agu aman nyinaa so” (Nkyerɛkyerɛ ne Apam 87:2), Awurade maa adiyisɛm a Joseph Smith frɛɛ no “ngodua ahahan,” a ɛyɛ asomdwoeɛ sɛnkyerɛnneɛ (Nkyerɛkyerɛ ne Apam 88, ɔfa atifiasɛm; san hwɛ Gyenesis 8:11). Wɔ w’adesua wɔ ɔfa 88 ho nyinaa nnawɔtwe yi, hwehwɛ Awurade asomdwoeɛ nkransɛm a ɔde ma wo.

Nkyerɛkyerɛ ne Apam 88:6–67

Hann ne mmara firi Yesu Kristo nkyɛn na ɛbaeɛ.

Wɔti nsɛmfua hann ne mmara mu mprɛ pii wɔ ɔfa 88. Hyɛ nkyekyɛmu a wohunu saa nsɛmfua yinom nso wɔ nkyekyɛmu 6–67, na twerɛ deɛ wosua fa hann ne mmara—ne Yesu Kristo ho. Deɛn na wote nka sɛ yɛ na woanya hann na wode “Kristo mmara” no abɔ bra? (verse 21).

San hwɛ Yesaia 60:19; Yohane 1:1–9; 3 Nephi 15:9; Timothy J. Dyches, “Light Cleaveth unto Light,” Liahona, Kɔtɔnimma 2021, 112–15; Sharon Eubank, “Christ: The Light That Shines in Darkness,” Liahona, Kɔtɔnimma 2019, 73–76.

Twerɛnsɛm no kuta Kristo mmara.

Nkyerɛkyerɛ ne Apam 88:62–64

“Montwe mmɛn me.”

Suahunu bɛn na akyerɛ wo sɛ bɔhyɛ a ɛwowɔ saa nkyekyɛmu yinom mu yɛ nokorɛ? Deɛn ne w’anammɔntuo a ɛdi hɔ a wode “bɛtwe abɛn” Krist? Dwene ho sɛ wode dwom “Nearer, My God, to Thee” (Nnwom, ɛtɔ so 100) bɛka w’adesua ne sɔreɛ ho.

Nkyerɛkyerɛ ne Apam 88:67–76

Ɛnam Yesu Kristo Mpata no so me ho bɛtumi ate.

Awurade ahyɛdeɛ sɛ “monte mo ho” pue mprenu wɔ ɔfa 88 (nkyekyɛmu 68, 74). Wodwene sɛ saa kasasin yi aseɛ kyerɛ sɛn? Mobɛtumi asan ahwɛ akenkansɛm no binom a ɛwɔ “Nteho” wɔ Twerɛnsɛm no mu Akwankyerɛ (Asɛmpa nwoma Akoraeɛ). Sɛn na yɛn ho teɛ? Ma saa asɛmmisa yi nyɛ akwankyerɛ mma w’adesua wɔ Nkyerɛkyerɛ ne Apam 88:67–76, na twerɛ honhom mu nhunumu a wonya.

Nkyerɛkyerɛ ne Apam 88:77–80, 118–26

“Monhwehwɛ nimdeɛ, mpo momfa adesua ne gyedie nhwehwɛ.”

Awurade ka kyerɛɛ Ahotefoɔ no sɛ wɔnsi “nkɔmhyɛfoɔ no sukuu” wɔ Kirtland (Nkyerɛkyerɛ ne Apam 88:137). Nkyerɛkyerɛ a ɛwɔ ɔfa 88 mu pii kyerɛkyerɛɛ wɔn sɛdeɛ wɔyɛ no. Nkyerɛkyerɛ no bɛtumi nso aboa ma “woakyekyere adesua fie” (nkyekyɛmu 119) wɔ w’ankasa abrabɔ mu. Nokorɛ mu, wobɛtumi ahwɛ nkyekyɛmu 77–80 ne 118–26 sɛ nhyehyɛeɛ de “ayɛ wo fie [anaasɛ w’abrabɔ] asɛmpa sua nnyinasoɔ” ne “gyedie banbɔbea” (Russell M. Nelson, “Becoming Exemplary Latter-day Saints,” Liahona, Obubuo 2018, 113). Ɛbɛyɛ anika sɛ wobɛyɛ sɛdeɛ wo “nhyehyɛeɛ” bɛyɛ ho mfonin, a kasasin ahodoɔ a ɛfiri saa nkyekyɛmu yi mu a wote nka sɛ wode yɛ adwuma ka ho.

Ɛbɛtumi nso aboa ahwehwɛ saa nsɛmmisa yi: Adɛn nti na adesua ne nwomasua ho hia Awurade? Deɛn na Ɔpɛ sɛ mesua? Sɛn na Ɔpɛ sɛ mesua no? Hwehwɛ mmuaeɛ ma saa nsɛmmisa yi wɔ nkyekyɛmu 77–80 ɛne “Truth will make you free” (De ma Mmabunu Ahoɔden: Woreyi Ɔpɛ ho Akwankyerɛ, 30–33).

Wogye di sɛ “fa adesua ne gyedie” sua asekyerɛ ne sɛn? (nkyekyɛmu 118). Deɛn nhunumu na wonya firi Elder Mathias Held nkrasɛm “Wode Honhom no Rehwehwɛ Nimdeɛ” mu? (Liahona, Kɔtɔnimma 2019, 31–33).

San hwɛ Tinsɛm ne Nsɛmmisa, “Worehwehwɛ Nokorɛ na Worekwati Nnaadaa,” Asɛmpa nwoma Akoraeɛ; “Sukuu ne Akyɛdeɛ kronkron,” wɔ Adiyisɛm Nteaseɛ mu, 174–82.

Sɛ wopɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ de ma Nkwadaa Adekyerɛ

Nkyerɛkyerɛ ne Apam 88:33

Ɔsoro Agya ma akyɛdeɛ a ɛyɛ papa.

• Wobɛtumi ahyɛ nkɔmmɔ twetweɛ ase afa Nkyerɛkyerɛ ne Apam 88:33 berɛ a woma wo nkwadaa kasa fa akyɛdeɛ a wɔde ama wɔn ho—deɛ wɔgyee no anigyeɛ mu ne deɛ ɛnyɛ anigyeɛ mu nyinaa. Ebia wɔbɛtumi ayɛ deɛ wɔgyee no anigyeɛ mu ho yɛkyerɛ. Afei mobɛtumi akasa afa akyɛdeɛ a Ɔsoro Agya de ma yɛ ho (te sɛ Sunsum Kronkron akyɛdeɛ no). Sɛn na yɛde anigyeɛ gye saa akyɛdeɛ yi?

Nkyerɛkyerɛ ne Apam 88:63

Sɛ mehwehwɛ Agyenkwa no a, mɛhunu No.

• Nkyerɛkyerɛ ne Apam 88:63 wɔ nneyɛɛ nsɛmfua a ɛbɛtumi akanyan anika dwumadie bi a ɛbɛhyɛ wo nkwadaa nkuran ma wɔahwehwɛ Awurade anim wɔ wɔn abrabɔ mu. Sɛ ebia, wo ne wo nkwadaa bɛtumi adwene agorɔ bi a mode bɛkasa afa “monhwehwɛ me nsiyɛ mu na mobɛhunu me” (wɔasi so dua) anaasɛ “mommɔ mu, na wɔbɛbue” ho?

Nkwadaa hia nsesamu. “Nkwadaa pii sua adeɛ yie berɛ a nneɛma nsonoeɛ ka ho. Hwehwɛ akwan a wode bɛboa nkwadaa ma wɔde wɔn adehunu, asɛm teɛ, ne nsɔmu atenka yɛ adwuma berɛ a wɔsua adeɛ. Wɔ tebea bi mu no, wobɛtumi mpo ahwehwɛ akwan a wode wɔn adehwia ne ɛdɛ teɛ atenka bɛka ho!” (Rekyerɛkyerɛ wɔ Agyenkwa no Kwan so, 32).

• Sɛdeɛ wobɛsi Agyenkwa no frɛ sɛ “montwe mmɛn me” so dua no, wobɛtumi ama akwadaa baako akuta Yesu mfonin (te sɛ mfonin a ɛwɔ saa nhyehyɛeɛ yi awieeɛ no) wɔ ɔfa baako wɔ dan no mu berɛ nkwadaa nkaeɛ no gyina ɔfa foforɔ. Ma wo nkwadaa nnwene nneɛma a wɔbɛtumi ayɛ a wɔbɛbɛn Agyenkwa no ho, wɔbɛtumi atu anammɔn baako akɔ mfonin no ho, na akwadaa a ɔkuta mfonin no bɛtumi atu anammɔn baako akɔ nkwadaa nkaeɛ no nkyɛn. Wo ne wo nkwadaa nkasa mfa sɛdeɛ motwe bɛn Agyenkwa no ne sɛdeɛ Ɔtwe bɛn mo ho. Wobɛtumi nso ne wɔn ato dwom afa saa tiasɛm yi ho, te sɛ “I Feel My Savior’s Love” (Nkwadaa Nnwomnwoma, 74–75).

Nkyerɛkyerɛ ne Apam 88:77–80, 118

Ɔsoro Agya pɛ sɛ mesua adeɛ.

• Ma wo nkwadaa nka deɛ wɔresua wɔ sukuu anaasɛ Primary nkyerɛ wo. Wo nso wobɛtumi akyɛ nneɛma bi a woresua. Afei wobɛtumi de nsɛmfua yi akyerɛ wo nkwadaa deɛn/deɛ, adɛn/deɛ nti, ne sɛn/sɛdeɛ. Boa ma wɔnhwehwɛ Nkyerɛkyerɛ ne Apam 88:77–79 mu nhunu deɛ Awurade pɛ sɛ yɛsua. Afei mommɔ mu nhwɛ nkyekyɛmu 80 nhunu deɛ nti a Ɔpɛ sɛ yɛsua ne nkyekyɛmu 118 nhunu sɛdeɛ yɛbɛsua.

“Monhwehwɛ nimdeɛ momfa adesua ne gyedie.”

Nkyerɛkyerɛ ne Apam 88:119

Yɛn fie bɛtumi ayɛ te sɛ tɛmpol.

• Berɛ a wokenkan Nkyerɛkyerɛ ne Apam 88:119 kyerɛ wo nkwadaa no, wɔbɛtumi de wɔn nsa ayɛ adeɛ a ɛsi tɛmpol so berɛ biara a wɔte asɛmfua “efie.” Kyerɛ mu sɛ na Ɔsoro Agya pɛ sɛ Joseph Smith ne Ahotefoɔ no si tɛmpol, anaasɛ “Onyankopɔn fie.”

• Wobɛtumi ama wo nkwadaa ayi nsɛmfua nson a ɛkyerɛ wɔn fie. Afei boa ma wɔnhunu, wɔ Nkyerɛkyerɛ ne Apam 88:11, nsɛmfua nson a Awurade de kyerɛ ne fie. Sɛn na yɛbɛtumi ayɛ yɛn fie “Onyankopɔn fie”?

Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu.

Be Not Afraid, ɛfiri Michael Malm hɔ