Ɔsannaa 18–24: “Nnyinasosɛm a Bɔhyɛ ka ho”

Nkyerɛkyerɛ ne Apam 89–92

Wɔ Nkɔmhyɛfoɔ no Sukuu mu no, Nkɔmhyɛni Joseph Smith kyerɛkyerɛɛ elderfoɔ a wɔwɔ Israel faa Onyankopɔn ahemman kyekyere wɔ asase so ho. Wɔkasa faa honhom mu nokorɛ ho, bɔɔ mu bɔɔ mpaeɛ, kyenee kɔm, na wɔsiesiee wɔn ho sɛ wɔbɛka asɛmpa no. Nanso na biribi wɔ tebea no ho a ɛbɛtumi ayɛ yɛn nwanwa ɛnnɛ, na na ɛntɔ asom mma Emma Smith nso. Wɔ wɔn nhyiamu ase no, na mmarima no nom na wɔwe tawa, a na ɛnyɛ ade foforɔ wɔ saa berɛ no, nanso na ɛma ɛfam a na wɔde nnua na ayɛ no yɛ tuntum na ɛgya nka bɔne wɔ mframa no mu. Emma kaa ne haw kyerɛɛ Joseph, na Joseph bisaa Awurade. Ne mmuaeɛ no yɛɛ adiyisɛm a ɛkyɛnee wisie ne tawa nkekaeɛ koraa. Ɛmaa Ahotefoɔ no, ne awoɔntoatoasoɔ a ɛbɛba, “nnyinasosɛm a bɔhyɛ ka ho”—bɔhyɛ a ɛyɛ honam mu ahoɔden, “nyansa,” ne “nimdeɛ ademudeɛ kɛseɛ” (Nkyerɛkyerɛ ne Apam 89:3, 19).

San hwɛ Ahotefoɔ, 1:166–68.

Nsusuiɛ de ma Adesua wɔ Efie ne Asɔre

Nkyerɛkyerɛ ne Apam 89

Awurade maa me Nyansasɛm no sɛ ɛbɛboa na manya ahoɔden wɔ honam ne honhom mu.

Berɛ a ɛdi kan a elderfoɔ a na wɔwɔ Nkɔmhyɛfoɔ no Sukuu mu tee sɛ Joseph Smith kenkanee Nyansasɛm no, ntɛm ara “wɔtoo wɔn abua ne tawa a na wɔrewe guu ogya no mu” (Ahotefoɔ, 1:168). Na wɔpɛ sɛ wɔkyerɛ ɔpɛ a na wɔwɔ sɛ wɔbɛyɛ setie ama Awurade. Ebia woadi kan “ato” nneɛma a Nyansasɛm no bɔ ho kɔkɔ no afiri w’abrabɔ mu agu dada, nanso deɛn bio na wobɛtumi asua afiri saa adiyisɛm yi mu? Dwene saa nsusuiɛ yi ho:

• Dwene adiyisɛm no ho sɛ ɛyɛ “nnyinasosɛm a bɔhyɛ ka ho” (nkyekyɛmu 3)—nokorɛ a ɛnsesa a ɛma akwankyerɛ wɔ gyinaeɛsie ho. Nnyinasonsɛm bɛn na wohunu a ɛbɛtumi ayɛ akwankyerɛ wɔ wo gyinaeɛsie ho? Nhyira bɛn na Awurade hyɛ ho bɔ? (hwɛ nkyekyɛmu 18–21). Sɛn na Wama saa bɔhyɛ no aba mu wɔ w’abrabɔ mu?

• Deɛn nhwɛsoɔ na woahunu wɔ “nnebɔneyɛ ne atirimpɔ wɔ nnipa a wɔpam tiriso no akoma mu” a ɛfa Nyansasɛm no ho? (nkyekyɛmu 4). Deɛn na Awurade de ama ka saa adiyisɛm yi ho a ɛbɛboa ma woakwati anaasɛ woadi saa nnebɔneyɛ yeinom so?

• Deɛn na saa adiyisɛm yi kyerɛkyerɛ wo fa Awurade ho? Sɛn na Nyansasɛm no fa Nkyerɛkyerɛ ne Apam 29:34–35?

• Deɛn na wonya nkanyan sɛ yɛ na ama woatumi ahwɛ wo nipadua so yie?

Ebia woanya akwanya de akyerɛkyerɛ deɛ nti a wodi Nyansasɛm no so mu akyerɛ afoforɔ—na wobɛtumi anya akwanya bebree daakye. Dwene sɛdeɛ wobɛtumi de saa akwanya yeinom adi adanseɛ wɔ Agyenkwa no, yɛn nipadua kronkronyɛ, ne honhom mu nokorɛ afoforɔ ho. Sɛ wopɛ nsusuiɛ a, hwɛ “Wo nipadua yɛ kronkron,” De ma Mmabunu Ahoɔden: Woreyi Ɔpɛ ho Akwankyerɛ, 22–29.

San hwɛ 1 Korintofoɔ 6:19–20; Thomas S. Monson, “Nnyinasonsɛm ne Bɔhyɛ,” Liahona, Obubuo 2016, 78–79; Tinsɛm ne Nsɛmmisa, “Nyansasɛm,” Asɛmpa nwoma Akoraeɛ; “Nyansasɛm No,” wɔ Adiyisɛm Nteaseɛ mu, 183–91; “Suban a Aka,” “Honamdua Apɔmuden,” Nkwa Mmoa, Asɛmpa nwoma Akoraeɛ.

Principles and Promises

President Monson testifies of the blessings that come as we obey the Word of Wisdom.

Fa nnyinasonsɛm so sua na kyerɛkyerɛ Sɛ yɛbɛyɛ deɛ ɛwɔ sɛ yɛyɛ ne deɛ ɛnni sɛ yɛyɛ mmoano no, mmom ɛwɔ sɛ yɛde nnyinasonsɛm bɔ bra de yɛn pɛ ne gyedie wɔ Kristo mu yɛ adwuma. Nhwɛsoɔ, dwene nnyinasoɔ nsɛmmisa te sɛ yeinom fa Nyansasɛm no ho: Nnyinasonsɛm bɛn na ɛbɛtumi de nkuranhyɛ ama obi a ɔntumi nni Nyansasɛm no so? Deɛn nnyinasosɛm na ɛbɛtumi akyekye me werɛ berɛ a mewɔ apɔmuden ho haw ɛmfa ho sɛ medi Nyansasɛm no so?

Ɔsoro Agya pɛ sɛ yɛhwɛ yɛn nopadua so yie.

Nkyerɛkyerɛ ne Apam 90:1–17

Titenafoɔ a Wɔdi Kan no kuta “ahemman no nsafoa.”

Wɔ ɔfa 90, Awurade maa akwankyerɛ fa “ɔsom adwuma ne titena” (nkyekyɛmu 12) wɔ Joseph Smith, Sidney Rigdon, ne Frederick G. Williams—wɔn a wɔwɔ deɛ seesei wɔfrɛ no Titenafoɔ a Wɔdi Kan no ho. Deɛn na wosua fa Titenafoɔ a Wɔdi Kan no ho firi nkyekyɛmu 1–17? Dwene ho sɛ mobɛsan ahwɛ nnansa yi ara nkransɛm a ɛfiri Titenafoɔ a Wɔdi Kan no hɔ. Deɛn na wɔyɛ de “hyehyɛ saa asɔre yi ne ahemman no dwumadie nyinaa”? (nkyekyɛmu 16). Sɛn na wobɛtumi akyerɛ sɛ ɛnyɛ “ade ketewa bi” ma wo? (verse 5).

Dwene ho sɛ wobɛto anaasɛ wobɛkenkan nsɛm a ɛwɔ “Come, Listen to a Prophet’s Voice” (Nnwom, ɛtɔ so 21) anaasɛ dwom foforɔ a ɛfa nkɔmhyɛfoɔ ho na ɛfa nkyerɛkyerɛ a ɛwɔ saa nkyekyɛmu yeinom ho. Sɛn na Titenafoɔ a Wɔdi Kan no som aboa ma woahunu Ɔsoro Agya ne Yesu Kristo?

Nkyerɛkyerɛ ne Apam 90:24

“Nneɛma nyinaa bɔ mu yɛ adwuma ma [me] yieyɛ.”

Dwene suahunu bi a woanya a ɛdi adanseɛ wɔ Awurade bɔhyɛ a ɛwɔ Nkyerɛkyerɛ ne Apam 90:24. Dwene ho sɛ wobɛtwe wo suahunu ato hɔ na wo ne obusuani anaasɛ ɔdɔfoɔ bi akyɛ—ebia obi a ɔhia ahotosoɔ ne nkuranhyɛ. Sɛ wogu so retwɛn nhyira pɔtee bi a, dwene deɛ wobɛtumi ayɛ de akɔso ayɛ nokwafoɔ berɛ a wotwɛn sɛ wobɛhunu sɛdeɛ “nneɛma nyinaa bɛbɔ mu ayɛ adwuma ama wo yiedie.”

Nkyerɛkyerɛ ne Apam 90:28–31

Hwan ne Vienna Jaques?

Wɔwoo Vienna Jaques wɔ Ayɛwohomummɔ 10, 1787, wɔ Massachusetts. Vienna, ɔbaa gyedini a na ɔwɔ sika, hyiaa asɛmpatrɛfoɔ berɛ a ɛdi kan wɔ 1831. Ɔnyaa honhom mu adanseɛ sɛ wɔn nkrasɛm no yɛ nokorɛ akyi no, ɔtuu kwan kɔhyiaa Nkɔmhyɛni no wɔ Kirtland, Ohio, ɛhɔ na wɔbɔɔ no asu.

Venna yɛɛ setie maa Awurade afotuo a ɛkɔ ma no wɔ Nkyerɛkyerɛ ne Apam 90:28–31. Ne nhyirasoɔ ma Awurade, a ntoboa a na wadi kan ayɛ wɔ Kirtland ka ho, baa berɛ a na ɛho hia yie ma Asɔre no, berɛ a na akannifoɔ rebɔ mmɔden sɛ wɔbɛtɔ asase a wɔbɛsi Kirtland Tɛmpol no wɔ so. Na Vienna yɛ “nokwafoɔ, na ɔnyɛ aniha” wɔ n’abrabɔ mu nyinaa na awieeɛ no ɔtumi “tenaa ase wɔ asomdwoeɛ mu” (nkyekyɛmu 31) wɔ Salt Lake Valley, baabi a ɔwuui berɛ a na wanya mfeɛ 96.

Nkyerɛkyerɛ ne Apam 91

“Honhom no da nokorɛ adi.”

Yɛn nyinaa hyia nkransɛm a ɛkuta “nneɛma bebree … a ɛyɛ nokorɛ” ne “nneɛma bebree … a ɛnyɛ nokorɛ” (Nkyerɛkyerɛ ne Apam 91:1–2). Afotuo bɛn na wohunu wɔ ɔfa 91 a ɛbɛtumi aboa ma woahunu nokorɛ a ɛwɔ nkransɛm a wohyia mu? Sɛn na Honhom no aboa ma woahunu nokorɛ afiri mfomsoɔ ho?

Sɛ wopɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusuiɛ de ma Nkwadaa Adekyerɛ

Nkyerɛkyerɛ ne Apam 89

Nyansasɛm no boa ma menya apɔmuden wɔ nipadua ne honhom mu.

• Sɛ worekyerɛ ɔfa 89, ebia wo ne wo nkwadaa bɛtumi ahwɛ tɛmpol mfonin bi anaasɛ moato dwom afa honamdua apɔmuden ho, te sɛ “The Lord Gave Me a Temple” (Nkwadaa Nnwomnwoma, 153), de akyerɛkyerɛ sɛ yɛn nipadua te sɛ tɛmpol ma yɛn honhom. Boa wo nkwadaa ma wɔnyɛ yɛkyerɛ mfa akwan a wɔbɛtumi de ahwɛ wɔn nipadua so yie ho.

• Sɛdeɛ mobɛsua afa Awurade mmaransɛm ho wɔ Nkyerɛkyerɛ ne Apam 89:10–17, wo ne wo nkwadaa bɛtumi ayɛ anaasɛ ahwɛ mfonin a ɛfa nneɛma papa a yɛbɛtumi adi anaasɛ ayɛ ama yɛn nnipadua anya apɔmuden (hwɛ mfonin ne dwumadie krataafa a ɛwɔ saa nhyehyɛeɛ yi awieeɛ). Deɛn na Awurade abɔ yɛn kɔkɔ wɔ ho sɛ mma yɛmfa nyɛ adwuma? Adɛn nti na Ɔpɛ sɛ yɛhwɛ yɛ nnipadua so yie?

• Elder Gary E. Stevenson tuu mmɔfra fo sɛ wɔnni kan nyɛ nhyehyɛeɛ mfa deɛ wɔbɛyɛ ho berɛ a wɔde nsaden ne nnubɔne bɛsɔ wɔn ahwɛ. Ɔkyerɛkyerɛɛ sɛ: “Wobɛhunu sɛ nsɔhwɛ nni wo so tumi kɛse. Na woasi gyinaeɛ dada fa sɛdeɛ wobɛyi ano anaasɛ deɛ wobɛyɛ ho. Wonhia sɛ wobɛsi gyinaeɛ berɛ biara” (“Your Priesthood Playbook,” Liahona, Kɔtɔnimma 2019, 48). Sɛ mobɔ mu kenkan Nkyerɛkyerɛ ne Apam 89:4 ne Elder Stevenson asɛm no wie a, tu wo nkwadaa fo fa sɛdeɛ wɔbɛtumi asi gyinaeɛ seesei ho—de ama wɔn nna a aka—sɛ wɔbɛdi Nyansasɛm no so. Mobɛtumi mpo ayɛ yɛkyerɛ afa sɛdeɛ sɛ obi, adamfoɔ mpo, ma wɔn biribi a ɛtia Nyansasɛm no a, wɔbɛtumi ama mmuaeɛ. Sɛn na Awurade hyira yɛn berɛ a yɛyɛ setie ma Nyansasɛm no? (hwɛ nkyekyɛmu 18–21).

Yɛn nnipadua yɛ akyɛdeɛ a ɛfiri Onyankopɔn.

Nkyerɛkyerɛ ne Apam 90:5

Onyankopɔn ma me nkɔmhyɛfoɔ sɛ wɔbɛkyerɛ kwan na wɔabɔ me ho ban.

• Mobɛtumi ahwɛ tete nkɔmhyɛfoɔ mfonin anaasɛ moato dwom te sɛ “Follow the Prophet” (Nkwadaa Nnwomnwoma, 110–11). Sɛn na Onyankopɔn nam Ne Nkɔmhyɛfoɔ so ahyira Ne mma? Adɛn nti na ɛwɔ sɛ yɛtie Onyankopɔn nkɔmhyɛfoɔ? (hwɛ Nkyerɛkyerɛ ne Apam 90:5). Afei wo ne wo nkwadaa bɛtumi ahwɛ nkɔmhyɛni a ɔte aseɛ mfonin na moakyɛ nneɛma bi a Awurade nam ne so akyerɛkyerɛ anaasɛ abɔ yɛn kɔkɔ wɔ ho. Sɛn na yɛbɛtumi adi nkɔmhyɛni no akyi?

Nkyerɛkyerɛ ne Apam 91

Honhom no bɛtumi aboa ma mahunu deɛ ɛyɛ nokorɛ.

• Wobɛtumi abɔ ɔfa atifiasɛm de ma Nkyerɛkyerɛ ne Apam 91 no tɔfa na aboa ma wo nkwadaa ate deɛ nti a wɔde saa adiyisɛm yi maae ase. Afei wɔbɛtumi adwene mmea bi ho, te sɛ dawubɔ nnwuma, baabi a yɛhunu “nneɛma bebree a ɛyɛ nokorɛ” ne “nneɛma bebree a ɛnyɛ nokorɛ” (nkyekyɛmu 1–2). Deɛn na nkyekyɛmu 4–6 kyerɛkyerɛ yɛn fa Sunsum Kronkron ho? Sɛn na Sunsum Kronkron no boa ma yɛhunu deɛ ɛyɛ papa?

Sɛ wopɛ nsusuiɛ bebree a, hwɛ bosome yi Adamfoɔ nsɛmma nwoma mu

“Aburoo nyinaa yɛ papa ma onipa duane; sɛdeɛ bobe no aba nso teɛ.”