18–24 nō ’Ātete : « ’Ei parau tumu ma te fafaura’a »

Te Ha’api’ira’a Tumu ʼe te mau Fafaura’a 89–92

I roto i te fare ha’api’ira’a a te mau peropheta, ’ua ha’api’i te peropheta Iosepha Semita i te mau peresibutero nō ’Īsera’ela nō ni’a i te patura’a i te bāsileia o te Atua i ni’a i te fenua nei. ’Ua ’āparau rātou i te mau parau mau pae vārua, ’ua pure ’āmui, ’ua ha’apae i te mā’a, ’e ’ua fa’aineine nō te poro i te ’evanelia. Terā rā, tē vai ra te tahi mea i roto i te reva i te riro ’ei mea huru ’ē ri’i nō tātou i teie mahana, ’e e mea huru ’ē ato’a nō Emma Semita. I roto i te mau putuputura’a, e puhipuhi ’e e ’amu’amu te mau tāne i te ’ava’ava, e ’ohipa mātarohia te reira i terā tau, terā rā e fa’a’ere’ere te reira i te mau tahua rā’au ’e e vaiiho ato’a i te hō’ē hau’a pūai nā roto te piha. ’Ua fa’a’ite atu Emma i tōna mau mana’o pe’ape’a ia Iosepha, ’e ’ua ani Iosepha i te Fatu. ’Ua riro tāna pāhonora’a ’ei hō’ē heheura’a ’o tei hau atu i te parau nō te auauahi ’e te mau tāfetafeta ’ava’ava. ’Ua hōro’a mai te reira i te feiā mo’a, nō te mau u’i i muri iho, ’ei « parau tumu ma te fafaura’a »—te mau fafaura’a o te ea i te pae tino, te « pa’ari » ’e te « mau tao’a rahi nō te ’ite » (Te Ha’api’ira’a Tumu ’e te mau Fafaura’a 89:3, 19).

Hi’o ato’a Te feiā mo’a, 1:166–68.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 89

’Ua hōro’a mai te Fatu iā’u i te Parau Pa’ari nō te tauturu iā’u ’ia vai maita’i noa i te pae tino ’e i te pae vārua.

’A fa’aro’o mātāmua ai te mau peresibutero nō te fare ha’api’ira’a a te mau peropheta ia Iosepha Semita i te tai’ora’a i te Parau Pa’ari, ’oi’oi roa rātou i te « tā’ue i tā rātou paipu ’e te mau fāri’i ’ava’ava i roto i te auahi » (Te feiā mo’a, 1:168). ’Ua hina’aro rātou e fa’a’ite i tō rātou hina’aro e ha’apa’o i te parau a te Fatu. Penei a’e ’ua « tā’ue » a’e nā paha ’outou i rāpae i tō ’outou orara’a i te mau mea tā te Parau Pa’ari e fa’aara nei, e aha rā te tahi atu mau mea tā ’outou e nehenehe e ’apo mai i roto i teie heheura’a ? ’A feruri i teie mau mana’o :

• ’A feruri i te heheura’a ’ei « parau tumu ma te fafaura’a » (’īrava 3)—te mau parau mau tāmau ’o te arata’i i te ravera’a i te fa’aotira’a. I tō ’outou mana’o, e aha te mau parau tumu e arata’i i tā ’outou mau fa’aotira’a ? E aha te mau ha’amaita’ira’a tā te Fatu i fafau mai ? (hi’o mau ’īrava 18–21). Nāhea ’oia i te ha’apa’ora’a i teie mau fafaura’a i roto i tō ’outou orara’a ?

• E aha te mau hi’ora’a tā ’outou i ’ite nō « te mau ’ino ’e te mau ’ōpuara’a ’ī’ino […] i roto i te ’ā’au o te mau ta’ata ’ōpuara’a ’ino » e tū’ati i te Parau Pa’ari ? (’īrava 4). Ta’a ’ē noa atu teie heheura’a, e aha tā te Fatu i hōro’a mai nō te tauturu ia ’outou ’ia ’ape ’aore rā ’ia fa’a’oroma’i i teie mau ’ino ?

• E aha tā teie heheura’a e ha’api’i nei ia ’outou nō ni’a i te Fatu ? Nāhea te Parau Pa’ari i te tū’ati i Te Ha’api’ira’a Tumu ’e te mau Fafaura’a 29:34–35 ?

• E aha te mea e tūra’i nei ia ’outou ’ia rave nō te ha’apa’o maita’i a’e i tō ’outou tino ?

’Ua fa’ari’i paha ’outou i te rāve’a nō te fa’ata’a ia vetahi ’ē nō te aha ’outou e ha’apa’o ai i te Parau Pa’ari—’e penei a’e tē vai ra te tahi atu ā taime i muri nei. ’A feruri i te huru e nehenehe ai ’outou e fa’a’ohipa i teie mau taime nō te fa’a’ite pāpū nō te Fa’aora, nō te mo’ara’a o tō tātou tino ’e te tahi atu mau parau mau pae vārua. Nō te mau mana’o, ’a hi’o « E mea mo’a tō ’outou tino », Nō te pūai o te feiā ’āpī : E arata’i nō te rave i te mau mā’itira’a, 22–29.

Hi’o ato’a 1 Korinetia 6:19–20 ; Thomas S. Monson, « Te mau parau tumu ’e te mau parau fafau » Liahona, Novema 2016, 78–79 ; Topics and Questions, « Word of Wisdom », Vaira’a buka ’evanelia ; « Word of Wisdom » i roto Revelations in Context, 183–91 ; « Addiction », « Physical Health », Life Help, Vaira’a buka ’evanelia.

Principles and Promises

President Monson testifies of the blessings that come as we obey the Word of Wisdom.

’Apo mai ’e ’a ha’api’i i te ta’ata nā roto i te mau parau tumu. ’Āhani i te hāmanira’a i te mau tāpura nō te mau mea e rave ’e ’eiaha e rave, e nehenehe tātou e ora nā roto i te mau parau tumu nō te fa’a’ohipa i tō tātou ti’amāra’a ’e tō tātou fa’aro’o i te Mesia. ’Ei hi’ora’a, ’a feruri na i te mau uira’a niuhia nō ni’a i te mau parau tumu mai teie nō ni’a i te Parau Pa’ari : E aha te mau parau tumu e nehenehe e fa’aitoito i te hō’ē ta’ata e fifi nei i te ha’apa’o i te Parau Pa’ari ? E aha te mau parau tumu e tāmāhanahana iā’u mai te mea tē fifi nei au i te pae o te ea, noa atu te ha’apa’o nei au i te ture nō te Parau Pa’ari ?

Tē hina’aro nei tō tātou Metua i te ao ra ’ia ’atu’atu tātou i tō tātou tino.

Te Ha’api’ira’a Tumu ’e te mau Fafaura’a 90:1–17

Tē mau nei te Peresidenira’a Mātāmua i te « mau tāviri o te bāsileia ».

I roto te tufa’a 90, ’ua hōro’a mai te Fatu i te mau arata’ira’a nō « te mau ’ohipa mo’a ’e nō te peresidenira’a » (’īrava 12) ia Iosepha Semita, Sidney Rigdon ’e ia Frederick G. Williams—e mau melo ’o tā tātou e pi’i nei i teienei te Peresidenira’a Mātāmua. E aha tā ’outou i ha’api’i mai nō ni’a i te Peresidenira’a Mātāmua i roto te mau ’īrava 1–17 ? ’A feruri e hi’o fa’ahou i te mau parau poro’i ’āpī a te mau melo o te Peresidenira’a Mātāmua. E aha tā rātou e rave nō te « fa’a’āfaro noa i te mau ’ohipa ato’a nō teie nei ’ēkālesia ’e te bāsileia » ? (’īrava 16). Nāhea e ti’a ai ia ’outou ’ia fa’a’ite ē e ’ere te reira i te « mea faufa’a ’ore » nō tātou ? (’īrava 5).

’A feruri i te hīmene ’aore rā i te tai’o i te mau parau o te hīmene « Mai fa’aro’o i te reo o te peropheta » (Te mau hīmene, N°11) ’aore rā te tahi atu hīmene nō ni’a i te mau peropheta e tū’ati nei i te mau ha’api’ira’a i roto i teie mau ’īrava. Nāhea te tāvinira’a a te Peresidenira’a Mātāmua i te tauturu ia ’outou ’ia ’ite maita’i i te Metua i te ao ra ’e ia Iesu Mesia ?

Te Ha’api’ira’a Tumu ’e te mau Fafaura’a 90:24

« E ’āmuihia mai te mau mea ato’a ’ei maita’i [nō’u] ».

’A feruri i te mau ’itera’a ato’a tā ’outou i ora mai e fa’a’ite pāpū nei i te parau fafau a te Fatu e vai ra i roto Te Ha’api’ira’a Tumu ’e te mau Fafaura’a 90:24. ’A feruri i te pāpa’i i tō ’outou mau ’itera’a ’e ’ia fa’a’ite atu i te reira i te hō’ē melo o te ’utuāfare ’aore rā, i te hō’ē ta’ata tei herehia—penei a’e hō’ē ta’ata tei hina’aro i te ha’apāpūra’a ’aore rā i te fa’aitoitora’a. Mai te peu tē tīa’i nei ’outou i te tahi mau ha’amaita’ira’a, ’a feruri i te ’ohipa tā ’outou e nehenehe e rave nō te vai ha’apa’o noa, ’a tīa’i ai ’outou ’ia ’ite nāhea te « mau mea ato’a e ’ohipa ’āmui ai ’ei maita’i nō ’outou ».

Te Ha’api’ira’a Tumu ’e te mau Fafaura’a 90:28–31

’O vai ’o Vienna Jaques ?

’Ua fānauhia ’o Vienna Jaques i te 10 nō Tiunu 1787, i Massachusetts. E vahine fa’aro’o ’e te tao’a rahi i te pae moni, ’ua fārerei mātāmua Vienna i te mau misiōnare i te matahiti 1831. I muri a’e i te fa’ari’ira’a i te hō’ē ’itera’a pāpū pae vārua e fa’a’ite nei ē, e parau mau tā rāua parau poro’i, ’ua rātere ’oia nō te fārerei atu i te peropheta i Kirtland, Ohio, i reira ’oia i te bāpetizora’ahia.

’Ua ha’apa’o Vienna i te a’ora’a a te Fatu iāna i roto Te Ha’api’ira’a Tumu ’e te mau Fafaura’a 90:28–31. Tāna ha’amo’ara’a i te Fatu, ’oia ho’i te mau ō ’o tāna i hōro’a nā mua atu i Kirtland, ’ua tae mai i te hō’ē taime faufa’a roa nō te ’Ēkālesia, ’a tāmata ai te feiā fa’atere i te ho’o mai i te fenua i reira e patuhia ai te hiero nō Kirtland. ’Ua « ha’apa’o maita’i noa [Vienna], ’e ’ia ’ore ho’i […] ’ia fa’aea noa ma te ’ohipa ’ore » i te roara’a ’o tōna orara’a, ’e ’ua ti’a iāna « ’ia fa’aea ma te hau » (’īrava 31) i roto i te peho nō Roto Miti, i reira ’oia i pohe i te 96ra’a o tōna matahiti.

Te Ha’api’ira’a Tumu ’e te mau Fafaura’a 91

« E fa’a’ite mai te Vārua i te parau mau ».

Tē fārerei nei tātou pā’āto’a i te mau parau poro’i tei roto « te mau mea e rave rahi […] ’o tei riro ’ei parau mau » ’e « te mau mea e rave rahi […] e ’ere i te parau mau » (Te Ha’api’ira’a Tumu ’e te mau Fafaura’a 91:1–2). E aha te a’o tā ’outou i ’ite mai i roto te tufa’a 91 ’o tē nehenehe e tauturu ia ’outou ’ia hāro’aro’a i te parau mau i roto i te mau parau poro’i tā ’outou e fārerei nei ? Nāhea tō te Vārua tauturura’a ia ’outou ’ia hāro’aro’a te parau mau i te hape ?

Nō te tahi atu mau mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 89

E tauturu te Parau Pa’ari iā’u ’ia vai maita’i noa tō’u ea i te pae tino ’e i te pae vārua.

• Nō te vauvau atu i te tufa’a 89, e nehenehe paha ’outou e tā ’outou mau tamari’i e hi’o i te hō’ē hōho’a nō te hō’ē hiero ’aore rā e hīmene i te hō’ē hīmene nō ni’a i te ea i te pae tino, mai te « Hō mai te Fatu i te hō’ē hiero » (Buka hīmene nā te mau tamari’i, N°73), nō te ha’api’i ē ’ua riro tō tātou tino mai te mau hiero nō tō tātou vārua. ’A tauturu i tā ’outou mau tamari’i ’ia fa’a’ite mai i te mau rāve’a e nehenehe ai rātou e ’atu’atu i tō rātou tino.

• Nō te ha’api’i mai nō ni’a i te mau fa’auera’a a te Fatu i roto Te Ha’api’ira’a Tumu ʼe te mau Fafaura’a 89:10–17, e nehenehe ’outou ’e tā ’outou mau tamari’i e pāpa’i hōho’a ’aore rā e hi’o i te mau hōho’a nō te mau mea maita’i ’o tā tātou e nehenehe e ’amu ’aore rā e rave, ’ia vai maita’i noa te ea o tō tātou tino (hi’o te hōho’a ’e te ’api fa’a’ana’anataera’a i te hope’a o teie arata’i). E aha tā te Fatu i fa’aara mai ia tātou ’eiaha e fa’a’ohipa ? Nō te aha ’oia e hina’aro ai ’ia ’atu’atu tātou i tō tātou tino ?

• Tē a’o nei Elder Gary E. Stevenson i te feiā ’āpī ’ia fa’anaho ātea i te mea tā rātou e rave, ’ia fa’ahema-ana’e-hia rātou e te ’ava ’aore rā e rā’au taero. ’Ua ha’api’i ’oia : « E ’ite ’outou ē e iti mai te fa’ahemara’a i ni’a ia ’outou. ’Ua rave a’ena ’outou i te fa’aotira’a e nāhea ’outou ’ia pāto’i atu ’e e aha tā ’outou e rave. ’Aita e tītauhia ia ’outou ’ia rave i te fa’aotira’a i te mau taime ato’a » (« Tā ’outou buka ha’uti nō te Autahu’ara’a », Liahona, Mē 2019, 48). I muri a’e i te tai’o-’āmui-ra’a Te Ha’api’ira’a Tumu ’e te mau Fafaura’a 89:4 ’e te fa’ahitira’a parau a Elder Stevenson, ’a ’āparau ’e tā ’outou mau tamari’i e nāhea rātou e ti’a ai e fa’aoti i teienei—nō te toe’a o tō rātou orara’a—’ia ora i te Parau Pa’ari. E nehenehe ato’a ’outou e ha’uti teata ta’ata ora e nāhea rātou ’ia pāhono atu, mai te mea e hōro’a mai te hō’ē ta’ata, te hō’ē hoa ato’a, i te hō’ē mea e pāto’i i te Parau Pa’ari. Nāhea te Fatu i te ha’amaita’i ia tātou ’a ha’apa’o ai tātou i te Parau Pa’ari ? (hi’o te mau ’īrava 18–21).

E ō tō tātou tino nō ’ō mai i te Atua ra.

Te Ha’api’ira’a Tumu ’e te mau Fafaura’a 90:5

E hōro’a mai te Atua iā’u i te mau peropheta nō te arata’i ’e nō te pāruru iā’u.

• E hi’o ’outou i te mau hōho’a o te mau peropheta tahito ’aore rā e hīmene i te hō’ē hīmene mai te « Pe’e i te peropheta » (Buka hīmene nā te mau tamari’i, 58–59). Nāhea te Atua i te ha’amaita’ira’a i tāna mau tamari’i nā roto mai i tāna mau peropheta ? Nō te aha e ti’a ia tātou ’ia fa’aro’o i te mau peropheta a te Atua ? (hi’o Te Ha’api’ira’a Tumu ’e te mau Fafaura’a 90:5). I muri iho, e hi’o atu ’outou ’e tā ’outou mau tamari’i i te hō’ē hōho’a nō te peropheta ora, ’e ’a fa’a’ite atu i te tahi mau mea tā te Fatu i ha’api’i ’aore rā te mau mea tāna i fa’aara mai ia tātou nā roto mai iāna. Nāhea e ti’a ai ia tātou ’ia pe’e i te peropheta ?

Te Ha’api’ira’a Tumu ’e te mau Fafaura’a 91

E tauturu mai te Vārua iā’u ’ia ’ite e aha te parau mau.

• E parau ha’apoto noa te upo’o parau o te tufa’a Te Ha’api’ira’a Tumu ’e te mau Fafaura’a 91, nō te tauturu i tā ’outou mau tamari’i ’ia māramarama nō te aha teie heheura’a i hōro’ahia mai ai. I muri iho, ’ia feruri i te mau vāhi, mai te rāve’a ha’apararera’a parau, i reira tātou e ’ite ai « te mau mea e rave rahi […] ’o tei riro ’ei parau mau » ’e « te mau mea e rave rahi […] e ’ere i te parau mau » (mau ’īrava 1–2). E aha tā te mau ’īrava 4–6 e ha’api’i nei ia tātou nō ni’a i te Vārua Maita’i ? Nāhea te Vārua Maita’i i te tauturu ia tātou ’ia ’ite e aha te mea tano ?

Nō te tahi atu mau mana’o, ’a hi’o i te ve’a Hoa nō teie ’āva’e.

« E mea maita’i te mau huru huero sītona ato’a ’ei mā’a nā te ta’ata nei ; ’e ’oia ato’a te hotu o te vine ».