Tā ’outou buka ha’uti nō te autahu’ara’a
’A hāmani i tā ’outou iho buka ha’uti e nāhea ’outou i te ha’amaita’i ia ’outou ’ei pipi nā te Mesia.
I te ’āva’e Titema ra, ’ua tu’u mai te Peresidenira’a Mātāmua i te hō’ē parau e fa’aara ē, e riro te mau tamāroa 11 matahiti i te « ha’amata… i te pupu autahu’ara’a a Aarona… i te ha’amatara’a iho ā nō Tēnuare o te matahiti e ra’ehia tō rātou 12 matahiti ».1
’E nō reira, i te ’ōmuara’a o teie matahiti, e mau tamāroa 11 matahiti tei hitimahuta, i mana’o ho’i rātou ē e fa’aea rātou i te Paraimere ē tae noa atu tō rātou mahana fānaura’a, terā rā ’o rātou terā e ’ōpere nei i te ’ōro’a i te mau sābati, ’o rātou te mau diakono ’āpī roa a’e tei fa’atōro’ahia.
Tē uiui nei tō’u mana’o, ’o vai tei hitimahuta a’e i teie tauira’a—’o te mau diakono ’aore rā ’o tō rātou mau metua. I roto i terā 80 000 diakono ’āpī, e rave rahi tei rotopū ia tātou i teie pō i teie nei pū ’āmuira’a rahi ’aore rā tē ’āmui mai nei rātou nā roto i te rāve’a ’āpī. Maeva ia ’outou i teie autaea’era’a rahi nō te autahu’ara’a !
Nō teie tauira’a, e rurura’a rahi ïa teie tā tātou—e nehenehe e parau ē, ’o te pupu rahi roa a’e nō te Autahu’ara’a a Aarona i tae a’enei i te hō’ē tuha’a purera’a rahi a te Autahu’ara’a o te ’āmuira’a rahi. Nō teie taime ta’a ’ē, e paraparau ta’a ’ē atu vau i te feiā ’āpī tamāroa o te Autahu’ara’a a Aarona.
Mau ha’api’ira’a nō roto mai i te tū’aro
’Ei pīahi, e rave rahi o ’outou e fa’arahi nei i tā ’outou mau tārēni, te ’ite ’e te mau ’aravihi nā roto i te mau ’ohipa ta’a ’ē i te fare ha’api’ira’a ’aore rā nā roto i te mau ha’api’ira’a ta’a ’ē, te mau pupu ha’uti ’e te mau pupu nā rāpae i te ha’api’ira’a, mai te tū’aro.
Nō tō’u ravera’a i te tū’aro i roto i tō’u orara’a, ’ua fa’ahiahia vau i te feiā tei fa’arahi i tō rātou ’aravihi ē ’ua tae roa i te hō’ē fāito teitei. Nō te ha’amaita’i mau i roto i te hō’ē ’ohipa, ta’a ’ē noa atu te ’aravihi iho o terā ta’ata, tītauhia te tītī’aifaro rahi, te tusia ’e te mau hora rahi roa nō te ha’api’ipi’ira’a ’e te raveravera’a. Nō teie mau huru mā’ona, e mea pinepine rātou i te tahi taime i te fa’aro’o i te mau fa’ahapara’a ’eta’eta a te mau ta’ata fa’aineine ’e e ha’apae rātou iho i te mea ’ua hina’aro rātou i teienei nō te hō’ē mea rahi a’e ananahi.
’Ua mātau tātou i te mau melo o te ’Ēkālesia ’e te mau taea’e tei mau i te autahu’ara’a tei manuia i te fāito teitei roa i roto i te tōro’a mā’ona. E rave rahi hi’ora’a maita’i, e fa’ahiti noa atu rā vau i te tahi nō te poto o te taime. ’Ua mātau paha ’outou ia vetahi o rātou : i te baseball—’o Jeremy Guthrie ’e ’o Bryce Harper ; i te basket—’o Jabari Parker ’e ’o Jimmer Fredette ; i te tu’era’a pōpō—’o Ricardo Rojas ; i te fa’ahoro pōpō rugby—’o William Hopoate ; ’e i te fa’ahorora’a pōpō marite—’o Taysom Hill ’e ’o Daniel Sorensen. ’Ua tūra’i rahi rātou tāta’itahi i tā rātou tū’aro.
Noa atu tō rātou manuia rahi roa i roto i tā rātou tū’aro, e parau mai rātou ē, ’aita rātou i tae i te fāito mā’ona maita’i roa, ’aore rā i te fāito ta’ata maita’i roa. Tē ’ohipa rahi nei rātou nō te ha’amaita’i roa ia rātou i roto i tā rātou tū’aro—’e tae noa atu nō te ora i te ’evanelia. E ti’a fa’ahou mai rātou ’ia marua ana’e, ’e e tūtava rātou ē tae noa atu i te hope’a.
Tuatāpapa i te buka ha’uti
I roto i te mau pupu tū’aro, e ferurihia te mau ha’uti nō terā taime ’e terā taime o te ha’utira’a ’e e ha’aputuhia te reira i roto i te hō’ē buka ha’uti. E ha’api’i te mau mā’ona i tā rātou tuha’a ta’a ’ē nō te ha’uti tāta’itahi. Te ta’ata ha’uti manuia roa, e tuatāpapa pāpū ïa ’oia i te buka ha’uti, ’e ’ia parauhia te hō’ē ha’uti, e ’ite pāpū ’oia, fātata e haere noa mai mai te reira, i hea e haere ’e e aha tē rave.
Hōho’a nā Dave Kaup/REUTERS/stock.adobe.com
Tātou tei mau i te autahu’ara’a, e pupu ato’a tā tātou mai te reira (te pupu autahu’ara’a), ’e te hō’ē buka ha’uti (te mau pāpa’ira’a mo’a ’e te mau parau a te mau peropheta nō teie anotau).
Tē ha’apūai ānei ’outou i tō ’outou mau hoa nō te pupu ?
E aha tā ’outou fāito tuatāpapara’a i te buka ha’uti ?
’Ua ta’a pāpū ānei ia ’outou i tā ’outou ’ohipa ?
Fa’aruru i te pāto’ira’a
Nō te tūra’i atu ā i te fa’ahōho’ara’a, e mea mātau te feiā fa’aineine rahi i te mau pūai ’e te mau paruparu o tō rātou pupu ’e tō te pupu ’enemi ato’a. E hāmani rātou i te hō’ē fa’anahora’a ha’uti e nehenehe ai e noa’a ia rātou te rē. ’E ’ia ’outou ?
’Ua ’ite ’outou e aha te mau ’umera’a hara e mea pāruru-’ore-hia ’outou, ’e e nehenehe tā ’outou e ’ite nāhea te ’enemi e fa’ahape ia ’outou ’e e ha’aparuparu i tō ’outou mana’o. ’Ua hāmani ānei ’outou i tā ’outou iho fa’anahora’a ha’uti ’e te buka ha’uti, ’ia ’ite ’outou nāhea i te pāhono atu i mua i te pāto’ira’a ?
’Ia fa’aruru ’outou i te mau ’umera’a rau ’ia hara i te pae mōrare—i roto ānei i te hō’ē pupu ’aore rā ’o ’outou ana’e i mua i tā ’outou paruai—’ua ’ite ’outou e aha te fa’anahora’a ha’uti. Mai te mea e parau te hō’ē hoa e inu i te ’ava ’aore rā e rave i te rā’au ta’ero, ’ua ’ite ’outou i te ha’uti. ’Ua ha’api’ipi’i ’outou ’e ’ua ’ite a’ena ’outou e aha tē rave.
Maoti te fa’anahora’a ha’uti ’e te buka ha’uti, ’e tae noa atu te fafaura’a pāpū e rave i tā ’outou ’ohipa, e ’ite mai ’outou ē, e mea iti a’e tā te ’umera’a hara i ni’a ia ’outou. ’Ua rave a’ena ’outou i te fa’aotira’a e nāhea ’outou ’e e aha tē rave. ’Aita e faufa’a ’ia feruri i te hō’ē fa’aotira’a i te mau taime tei mua ’outou i te ’umera’a ’ia hara.
’Ua fa’ati’a mai hō’ē nō te Tino Ahuru Ma Piti i te hō’ē ’ā’amu e fa’ahōho’a i te reira parau tumu. ’Ei tahu’a i te Lycée, tē ori haere ra rātou tōna mau hoa. ’Ua tāmā’a rātou ’e ’ia ’oti, ’ua ori haere atura nā ni’a i te pere’o’o ’e tu’u mai nei te tahi hoa i te mana’o e haere e māta’ita’i i te hō’ē hōho’a. Te fifi rā, ’ua ’ite ’oia e ’ere i te hōho’a maita’i. Noa atu ā ’ua tae mai te mana’o ’ume’umera’a ’e te hepohepo nō ni’a i te reira, ’ua fa’anaho a’ena ’oia i te reira. E ’api teie nō roto mai i tāna buka ha’uti nō te autahu’ara’a.
’Ua huti ’oia i te aho ’e ’ua fa’aitoito ’e ’ua parau a’era : « ’Aita vau i ’ana’anatae i terā hōho’a. E fa’aho’i iā’u i tō’u fare », ’o tā rātou ïa i rave. E ha’uti ’ōhie tei fa’anoa’a i te rē ! E rave rahi matahiti i muri mai, ’ua fa’a’ite mai hō’ē o tōna hoa i reira ato’a i terā pō, nāhea tōna hi’ora’a i riro ’ei pūai rahi nōna nō te fa’aitoito i te fa’aruru i taua huru ’ohipa ra i roto i tōna iho orara’a.
Mau ’api i roto i te buka ha’uti
’Ua ui au i te tahi o te mau taea’e ’ia parau mai i te tahi mau ha’uti e tu’u i roto i tā ’outou buka ha’uti. Teie te tahi o te mau mana’o fa’auru :
-
Pure i te mau mahana ato’a nō te māramarama rahi a’e ’e te ’itera’a pāpū nō Iesu Mesia.
-
Fa’aro’o maita’i i te ha’api’ira’a a tō ’outou mau metua, tō ’outou ’episekōpo ’e te mau feiā fa’atere nō te Feiā ’Āpī Tamāroa ’e te pupu autahu’ara’a.
-
’Ape i te hōho’a faufau ’e te mau mea vi’ivi’i i ni’a i te rāve’a tūreiara’a sōtiare.
-
Ha’amana’o i te mau parau fafau tā ’outou i rave i mua i te Atua, ’e ’a ’ohipa nō te ha’apa’o i te reira.
-
Tuatāpapa i te mau ’ā’amu nō ni’a i te mau peropheta rahi i roto i te mau pāpa’ira’a mo’a, ’e pe’e i tā rātou mau ’ohipa maita’i.
-
Ha’amaita’i i te mau tamari’i a te Atua nā roto i te tāvinira’a.
-
’Imi i te mau hoa maita’i ’o tē tauturu ia ’outou ’ia riro mai ’ei ta’ata e au i tō ’outou hina’aro.
-
Riro ’ei ta’ata ’aravihi roa nō ni’a i te fa’anahora’a FamilySearch ’e te mā’imira’a i tō ’outou ’ā’amu ’utuāfare.
-
Fa’anaho i te mau vāhi ha’apa’i nō te horo ’ē atu i te mau mana ’ino.
-
Here ’e tauturu i te tahi atu mau melo nō tō ’outou pupu autahu’ara’a.
’Ua paraparau ato’a vau i te mau mā’ona tā tātou i ’ite i te hōho’a. ’Ua tāpe’a mai au i te mana’o ē, ’aita rātou e parau noa nei ia rātou nā ni’a i te mea tā rātou e rave, ’ei tōro’a mā’ona, ’ua nā ni’a ato’a rā rātou i tō rātou hīro’a, ’ei tamaiti nā te hō’ē Metua here i te Ao ra tei mau i te autahu’ara’a a te Atua.
Fa’aro’o ana’e i tō rātou mau mana’o :
-
Nō Jimmer Fredette, i’ō nei ’ei diakono e ha’api’i ra ’ia tā’amu i tōna tā’amu ’arapo’a, ’ua nā ’ō ’oia : « ’Ua ha’api’i au i te tūru’i rahi roa i ni’a i tō’u ’ite ’e tō’u fa’aro’o i te parau mau o te ’evanelia. Nā te reira i arata’i iā’u nō te riro mai… ’ei taea’e ti’amā nō te autahu’araa ’e hau roa atu—’ei hi’ora’a maita’i. »
-
Nō Bryce Harper, i’ō nei ’ei tāne fa’aipoipo, ’ua pāpa’i ’oia : « ’Ua mana’o vau e ’oa’oa vau i te ro’o, i te moni ’e i te fēti’a ’aito nūmera hō’ē. E mea rā terā e toe noa rā. Nō reira, ’ua… faaineine au [nō te tomo] i roto i te hiero. I teienei, tei ni’a vau i te ’ē’a [nō te ho’i] i tō’u Metua i te Ao ra ’e e ’utuāfare mure ’ore tō’u—’o te ’oa’oa rahi roa a’e ho’i i roto i teie nei ao ! »
-
Nō Daniel Sorensen, i’ō nei ’ei misiōnare, ’ua nā ’ō ’oia : « Te hō’ē buka ha’uti maita’i, ’o te hō’ē ïa fa’anahora’a e fa’a’ohipa i te mau tārēni ’e te pūai o te melo tāta’itahi o te pupu… ’Ia tuatāpapa vau ’e ’ia fa’a’ohipa ho’i i te mau ha’api’ira’a o te ’evanelia a Iesu Mesia, e ti’a iā’u ’ia ’ite nāhea i te fa’a’ohipa i tō’u mau pūai nō te tāvini i roto i te autahu’ara’a. »
-
Nō Jeremy Guthrie, e tāvini ra i’ō nei ’ei peresideni misiōni, ’ua nā ’ō mai ’oia : « ’Ei diakono 12 matahiti… [’Ua putapū vau] i te Vārua i te fa’a’itera’a iā’u [ē] ‘tei teie nei oraraa te taime ’ia fa’aineine… ’ia fārerei i te Atua’.2 Te fa’anahora’a ha’uti, ’o te fa’aro’o ïa i te Atua e fa’atupu i te ’ohipa [’e] te tātarahapara’a nā roto i te Fa’aora… E ’itehia te buka ha’uti i roto i te mau pāpa’ira’a mo’a ’e nā roto i te mau peropheta ora ».
-
Nō Jabari Parker, i te fa’atōro’ara’ahia ’oia ’ei peresibutero, ’ua nā ’ō ’oia ē : « E’ita e nehenehe e parau i hea vau ’āhani ’aita vau i rave i te fa’aotira’a ’ia bāpetizo iā’u… ’Ua māuruuru roa ho’i au tei ’ō nei te Atua i roto tō’u orara’a nō te arata’i iā’u i te mau mahana ato’a ».
-
Nō Ricardo Rojas, tē tāvini ra ’ei peresideni ’āma’a, ’ua nā ’ō ’oia : « Nā roto i te autahu’ara’a [a te Atua] e ti’a ia tātou ’ia tauturu i roto i tāna ’ohipa. ’Ua pi’ihia tātou ’ia ‘fa’a’eta’eta, ’e ’ia itoito roa’3 nō te pāruru i te parau mau. » ’Ua tauturu te reira iāna ’ia manuia i ni’a i te tahua tu’era’a pōpō ’e ’ei taea’e nō te autahu’ara’a.
-
Nō Taysom Hill, i’ō nei ’ei misiōnare, ’ua tupu tōna mana’o ē, ’ua riro te ’evanelia a Iesu Mesia ’ei buka ha’uti nōna i roto i teie orara’a. ’Ua nā ’ō ’oia ē : « Nā te ti’aturira’a i te fa’anahora’a [a te Atua] ’e te ravera’a i te maita’i a’e e noa’a iā’u nō te rave i tā’u tuha’a i roto, i hōro’a iā’u i te mana’o rahi nō te hau ’e te poupou i roto i te orara’a, nō te ’itera’a ē, ’ua māuruuru te Atua i tā’u mau tauto’ora’a. »
-
Nō William Hopoate, i’ō nei i te ha’amaita’ira’a o tāna mo’otua, e maha u’i, ’ua nā ’ō ’oia ē tē tauturu nei te ’evanelia iāna « ’ia māramarama i te fa’anahora’a a te ’enemi ’e ’ia fāna’o i te faufa’a pae vārua nō te pāto’i i te mau ihe auahi ’e nō te tāvini maita’i a’e ia vetahi ’ē. »
’E ia ’outou ? Tē ’ite ra ānei ’outou i tō ’outou hīro’a teitei a’e ’e te mo’a a’e ’ei tamaiti nā te Atua, ’ei taea’e tei mau i tāna autahu’ara’a mo’a ? Ma teie hīro’a mure ’ore i te ferurira’a, ’a hāmani i tā ’outou fa’anahora’a ha’uti ’e te buka ha’uti nō te autahu’ara’a ’o tē arata’i ia ’outou i te mau taime ’umera’a hara ’e i mua i te ’ati. ’A feruri i te pae nō te ’arora’a ’e nō te pārurura’a.
E tauturu te pae nō te ’arora’a i te ha’apūai i te ’itera’a pāpū ’e i te fa’arahi i te fa’aotira’a e fa’aea noa i ni’a i te ’ē’a piriha’o ’e te oaoa. ’Ei hi’ora’a, ’o te pure tāmau ïa, te tuatāpapara’a pāpa’ira’a mo’a, te haerera’a i te purera’a ’e te hiero, te ’aufaura’a i te tuha’a ’ahuru ’e te pe’era’a i te parau e ’itehia i roto i te buka iti Nō te Pūai o te Feiā ’Āpī
Tei roto i te tuha’a nō te pārurura’a te fa’anahora’a ātea nō te huru e fa’aruru atu i te ’umera’a ’ia hara. ’Ia tae mai te ’umera’a ’ia huna i tā ’outou iho mau fa’aturera’a, ’ua ’ite a’ena ’outou e aha tē rave.
Tītauhia te hō’ē buka ha’uti nō te reira.
’Aita te mana’o i tae roa nō te pure i teie mahana ? ’Ua tae ïa te taime nō te rave i te ha’uti tā ’outou i fa’anaho a’ena.
Tē topatopa ra tō ’outou ’itera’a pāpū ? E ha’uti tā ’outou nō te reira. ’Ua ’ite ’outou e aha tē rave.
E mau ’aito mau i te mata o te Atua
E mau taea’e ’outou tei mau i te autahu’ara’a mo’a a te Atua. E riro tā ’outou pūpūra’a ia ’outou i te tāpe’a-pāpū-ra’a i te ’āuri i te taui ia ’outou ’ei ta’ata mure ’ore i hāmanihia ai ’outou.
’Ua ’ite ’e ’ua here te Atua ia ’outou. E ha’amaita’i ’oia ia ’outou ma te arata’i i tā ’outou haere’a.
E mana’o paha ’outou ē, e ’ere ’outou i te mea ta’a ’ē, e ’ere ’outou i terā fāito ’aito mau. E ’ere rā i te parau mau. ’Aita ānei ’outou i ’ite ē, ’ua fa’a’ite te Atua ē : « E haere mai te mau mea paruparu o te ao nei ’e e ha’aparari i te mau ta’ata ’aravihi ’e te pūai » ?4
Nō reira, tē mana’o ra ānei ’outou e mea paruparu ’outou ? e mea faufa’a ’ore ? E mea maita’i, tei ni’a ’outou i te tāpura !
Tē mana’o ra ānei ’outou ’aita tō ’outou faufa’a ? tei raro mai ’outou ? ’O ’outou mau paha tā te Atua i hina’aro.
E hi’ora’a ānei tei hau atu ia Davida tei haere i ni’a i te tahua ’arora’a i mua i terā ’enemi ri’ari’a mau ra, ’o Golia ? Ma te tūru’i i ni’a i te Fatu ’e ma te hō’ē fa’anahora’a, ’aita ’o Davida i fa’aora noa iāna iho, ’o te nu’u tā’āto’a rā nō ’Īserā’ela !5 ’Ia ’ite ’outou ē, ’ei ia ’outou na te Fatu ’ia fa’aitoito ’outou i te ti’a i tōna pae. « Nō tātou te Atua ra, e ti’a ïa ia vai ’ia mārō mai ? »6
E ti’a iāna ’ia ’īriti i te mau ’ōpani ma te tauturu ia tātou ’ia ’ite mai i te pūai ’e te ’aravihi ’aita tātou i ’ite a’e tē vai ra.7
’A fa’aro’o i tō ’outou feiā fa’aineine maita’i, mai tō ’outou metua, te ’episekōpo ’e te feiā fa’atere Feiā ’Āpī Tamāroa. ’A ha’api’i i te buka ha’uti. ’A tai’o i te mau pāpa’ira’a mo’a. ’A tuatāpapa i te mau parau a te mau peropheta nō teie tau. ’A hāmani i tā ’outou iho fa’anahora’a ha’uti e nāhea ’outou i te ha’amaita’i ia ’outou ’ei pipi nā te Mesia.
’A tāmau i teienei i te mau ha’uti tā ’outou e fa’a’ohipa nō te ha’apūai i tō ’outou vārua ’e nō te ’ape i te mārei a te ’enemi.
’A rave i te reira ’e e mea pāpū e fa’a’ohipa te Atua ia ’outou.
I teienei, tē vai ra paha e tāpū nei i te taura o te ’evanelia nō te ’ōvere atu i te ātea ’ē. Tē vai ra paha e pārahi māta’ita’i ra i te ha’uti nā te ātea. Tē vai ra paha e mā’iti i te fa’aea noa i ni’a i te pārahira’a, noa atu ā te tāmatara’a a te ta’ata fa’aineine ’ia fa’aha’uti ia rātou.Tē ani manihini nei au ia ’outou ’ia fa’aora mai, ’ia turu ’e ’ia here ia rātou ’ei melo nō te pupu ha’uti !
Tē vai ra vetahi tei hina’aro i te ha’uti—’e tē nā reira nei rātou. Te mea faufa’a roa a’e, e ’ere ïa tō rātou ’aravihi rahi, ’o tō rātou ra ineine nō te haere mai i ni’a i te tahua. ’Aita rātou e tīa’i ra ’ia pi’ihia mai tō rātou nūmera inaha ’ua mātau rātou i te ’īrava e nā ’ō ra : « Mai te mea e hina’aro tō ’oe i te tāvini i te Atua, ’ua [pi’ihia] ïa ’oe i te ’ohipa ».8
E ti’a ia ’outou ’ia tāpura i tō ’outou i’oa nō te ha’uti.
E nā reira ’outou ’ia tuatāpapa ’outou ’e ’ia pe’e ’outou i tā ’outou buka ha’uti nō te autahu’ara’a.
I ni’a i te tere, e turori iho ā ’outou ’e e topa ’outou—penei a’e e rave rahi roa taime. ’Aita ’outou i tae i te maita’i roa ; e tuha’a te topara’a nō te ’ohipa tau maoro e ti’a ai ia ’outou ’ia ha’amaita’i i tō ’outou huru ’e ’ia tāvini ma te aumihi rahi atu ā. Nā te Fa’aora ’e tāna tāra’ehara fāito ’ore e hōro’a mai i te rāve’a nō te upo’oti’a i ni’a i tā tātou mau hape nā roto i te tātarahapara’a ateate.
Nō te mau mā’ona tu’iro’o, e rave rahi hānere hora tā rātou e tu’u nō te ha’amaita’i i te hō’ē tuha’a o tā rātou ha’uti. Nō ’outou tei mau i te autahu’ara’a, tītauhia hō’ē ā ferurira’a. ’Ia manuia ’ore ’outou, ’a tātarahapa ’e ’a ’apo i te ha’api’ira’a o te reira. ’A raverave i tō ’outou pae ’ia ha’amaita’i atu ā ’outou i muri mai. I te hope’a, tei ia ’outou ra te fa’aotira’a. E ha’api’i ānei ’outou i te buka ha’uti ?
Tē a’o nei au ia ’outou : ’A ti’aturi i te Fatu. ’A ’ō’omo i te ha’ana tama’i a te Atua,9 ’e ’a haere i ni’a i te tahua.
’Aita i rahi te ta’ata tōro’a tū’aro e ha’uti nei i te fāito teitei roa, ’āre’a rā nō te ti’ara’a pipi, e rave rahi ïa tē mā’iti nei e pe’e i te Mesia.
Te parau mau, ’o te reira tā ’outou misiōni i roto i teie orara’a—ha’api’i i te mau haere’a a te Fatu, tomo i ni’a i te ’ē’a nō te ti’ara’a pipi ’e tūtava atu ai ’ia ora mai te au i te fa’anahora’a a te Atua. E mau te Atua ia ’outou i tōna rima ma te ha’amaita’i ia ’outou ’a fāriu ai ’outou i ni’a iāna. E haere ia ’outou nō te mea e ’aito mau ’outou i tāna hi’ora’a.
Tē pure nei au ’ia rave ’outou i te fa’aotira’a ’ia ora ti’amā nō te autahu’ara’a mo’a tā ’outou e mau nei ma te tūtava i te rave i tā ’outou hōpoi’a mo’a i te mau mahana ato’a. Tē ha’amaita’i nei au ia ’outou ma te ’aravihi ’e te hina’aro ’ia nā reira. Tē hōro’a nei au i tō’u ’itera’a pāpū nō te mana o te autahu’ara’a tā ’outou e mau nei, nō te mau peropheta ora, ’e nō Iesu Mesia ’e tōna ti’ara’a ’ei Fa’aora ’e ’ei Tāra’ehara nō tātou. I te i’oa o Iesu Mesia, ’āmene.