I hea te reira e arata’i atu ?
E rave tātou i te mau mā’itira’a ’e te mau fa’aotira’a maita’i a’e mai te mea e hi’o tātou i te mau ’ē’a i mua ia tātou ma te feruri i hea rātou e arata’i atu.
Tē fa’aitoito nei te ’evanelia a Iesu Mesia tei fa’aho’ihia ’ia feruri tātou i te ananahi. E fa’ata’a te reira i te fā o te orara’a tāhuti nei ’e te pāpūra’a o te orara’a a muri mai. Tē ha’api’i nei te reira i te mau parau rahi nō ni’a i te ananahi, nō te arata’i i tā tātou mau ’ohipa i teienei.
I te tahi atu pae, ’ua ’ite pā’āto’a tātou i te mau ta’ata e feruri noa nei i te mau ’ohipa nō teienei : ha’amāu’a i teienei, ’oa’oa i teienei, ’e ’eiaha e feruri i tō ananahi.
E ’oa’oa a’e tātou i teienei ’e ananahi mai te mea e vai ara noa tātou i tō ananahi. ’Ia rave tātou i te mau fa’aotira’a i teienei, ’ia uiui tāmau tātou ē : « I hea te reira e arata’i atu ? »
I.
Tē vai ra te mau fa’aotira’a, e mau mā’itira’a ïa e rave ānei i te hō’ē mea ’aore rā ’aita. ’Ua fa’aro’o vau i te hō’ē hi’ora’a nō te reira huru mā’itira’a i te hō’ē ’āmuira’a titi i Marite nei e rave rahi matahi i ma’iri.
’Ua tupu te reira i te hō’ē fare ha’api’ira’a tuatoru. Tē pārahi ra te naho’a taure’are’a pīahi i ni’a i te matie. ’Ua nā ’ō te ta’ata i fa’ati’a mai i terā ’ohipa ē, tē māta’ita’i ra rātou i te hō’ē māunauna (écureuil) ’e tona ’āero me’ume’u maita’i, tē ha’uti ra i raro mai i te hō’ē tumu rā’au nehenehe. I te tahi taime tei raro, ē i ni’a, ē i raro, ē ’ua fa’a’ati i te tumu. Nō te aha rā ïa te reira ’ohipa mātau i fa’a’ana’anatae i te naho’a pīahi ?
I roto i te ’aihere tē vai ra te hō’ē ’ūrī Setter ’Irirane. ’O ’ōna tā te mau pīahi e hi’o ra, ’e ’o ’ōna terā e hi’o ra i te māunauna. I te mau taime ato’a e mo’e ri’i te māunauna i te fa’a’atira’a i te tumu, e fa’anu’u marū noa terā ’ūrī ma’a initi, ’ei reira e fa’aea ai mai te huru ē ’aita ’ōna e tāu’a ra. ’O te reira tā te mau pīahi i hi’o noa. Ma te muhu ’ore ’e te ha’uti ’ore, ’ua mau tō rātou mata i ni’a i terā ’ohipa ’ua ta’ahia te fa’ahope’ara’a.
Ē i te hope’a, ’ua piri maita’i te ’ūri nō te ’ōu’a atu i ni’a i te māunauna nō te haru mai iāna i roto i tōna vaha. ’Ua hōriri te mau pīahi ’e ’ua horo a’era e huti mai i te ’ānimara iti mai roto i te vaha o te ’ūrī, ’ua taere roa rā. ’Ua pohe te māunauna.
E nehenehe i teie naho’a ta’ata e fa’aara i te māunauna i te mau taime ato’a, nā roto i te tīahira’a i te rima ’aore rā te tuōra’a iāna, ’aita rā. ’Ua hi’o noa rātou i te fātata-noa-ra’a terā ’ati. ’Aita e ta’ata tei ui ē : « I hea te reira e arata’i atu ? » I te tupura’a taua ’ohipa nei i mana’ohia, ’ua tāpapa pā’āto’a rātou ’eiaha te ’ati ’ia tupu, ’ua taere roa rā. E roimata tātarahapa noa ïa tei noa’a mai.
Mai te huru teie ’ā’amu i tupu i te hō’ē parabole. E tano te reira nō te mau mea tā tātou e ’ite nei i roto i tō tātou orara’a ’e te orara’a o te ta’ata ’ati a’e ia tātou ’e tō rātou vaira’a. ’Ia ’ite tātou i te ataatara’a e ne’e ra i ni’a i te mau ta’ata ’e te mau mea tā tātou i here, tei ia tātou nei te mā’itira’a e parau atu i te hō’ē mea ’aore rā e rave i te hō’ē mea, ’aore rā e vai mū noa. E mea au ’ia ui tātou ia tātou iho ē : « I hea te reira e arata’i atu ? » I te mau vāhi e mau fa’ahope’ara’a teimaha, e’ita tā tātou e nehenehe e fa’aea noa. E mea tītau ’ia reo atu tātou i te mau fa’aarara’a ti’a, ’aore rā ’ia turu atu i te mau tauto’ora’a e ārai i te fifi, nā mua roa te reira ’ia tupu.
Te mau fa’aotira’a tā’u i fa’ahiti a’enei, e mā’itira’a ïa e rave ānei i te hō’ē mea ’aore rā ’aita roa atu. E mea mātau a’e tātou i te mau mā’itira’a e rave i te hō’ē mea ’aore rā i te tahi atu mea. E mau mā’itira’a teie i roto i te maita’i ’e te ’ino, te mea pinepine a’e rā, ’o te mau mā’itira’a ïa i roto e piti mea maita’i. I reira ato’a, e mea au ’ia ui i hea te reira e arata’i atu. E rave rahi mā’itira’a tā tātou e rave nei tei roto e piti mea maita’i, e mea pinepine te reira i te mā’itira’a nō ni’a i tō tātou taime. E ’ere i te mea ’ino ’ia ha’uti i te mau ha’uti video ’aore rā ’ia hāpono i te poro’i ’aore rā ’ia māta’ita’i i te ’āfata teata ’aore rā ’ia paraparau nā ni’a i te niuniu ’āfa’ifa’i. Tē vai nei rā te mea tei pi’ihia te « maita’i i pau », te aura’a ra, ’ia rave tātou i te hō’ē mea, e ’ere ïa tātou i te maita’i nō te ravera’a i te tahi atu mea. ’Ua pāpū iā’u ē tē ’ite nei ’outou ē, tītauhia ’ia fāito māite e aha tā tātou e ’ere ra nā roto i te paura’a te taime i ni’a i te hō’ē ’ohipa, noa atu ā e ’ohipa maita’i roa.
I te mātāmua ra, ’ua hōro’a vau i te hō’ē a’ora’a, te tumu parau ’oia ho’i « Maita’i, maita’i a’e, maita’i roa a’e. » I roto i terā a’ora’a ’ua nā ’ō vau ē : « ’Eiaha nō te mea e mea maita’i te hō’ē mea ra e tumu maita’i ïa nō te rave i te reira. E rave rahi ’ohipa maita’i e ti’a ia tātou ’ia rave, terā rā, ’aita e rava’i te taime nō te rave i te reira. Tē vai ra te tahi mau ’ohipa hau roa atu i te maita’i, ’e ’o te reira ïa te mau ’ohipa e rave nā mua roa i roto i tō tātou orara’a… E mea tītau ʼia haʼapae tātou i te tahi mau mea maitaʼi, ’ia ti’a ia tātou ʼia mā’iti i te tahi atu mea maitaʼi a’e, ’aore rā maitaʼi roa a’e ».1
’A hi’o ātea. E aha te fa’ahope’ara’a o te mau fa’aotira’a nā tātou i teienei i ni’a i tō tātou ananahi ? ’A ha’amana’o i te faufa’a rahi nō te noa’ara’a te ’ite, nō te tuatāpapara’a ’evanelia, nō te fa’a’āpīra’a i tā tātou mau fafaura’a nā roto i te ravera’a i te ’ōro’a ’e te haerera’a i te hiero.
II.
E mea faufa’a ato’a te « I hea te reira e arata’i atu ? » nō te mā’itira’a e aha tā tātou e parau ’aore rā e mana’o nō ni’a ia tātou iho. Te mea faufa’a roa, ’oia ho’i ïa, e tamari’i tātou tāta’itahi nā te Atua ma te ora mure ’ore ’ei hope’a tē nehenehe e tāpae. Te tahi atu mau parau mai te tōro’a, te nūna’a ta’ata, te huru o te tino, ’aore rā te tu’iro’o, nō te hō’ē tau poto noa ïa ’e e mea faufa’a ’ore i roto i te tau mure ’ore. ’Eiaha e parau ia ’outou ’aore rā e mana’o ia ’outou mai te huru e tā’ōti’a ’outou i te fā tā ’outou e nehenehe e tūtava atu.
Te mau taea’e, ’e te mau tuahine e hi’o mai ’aore rā e tai’o mai i te mea tā’u e parau nei, maita’i ē ’ua ’ite ’outou nō te aha tō ’outou feiā fa’atere e hōro’a nei i te mau ha’api’ira’a ’e te mau parau a’o tā mātou e hōro’a nei. ’Ua here mātou ia ’outou, ’e ’ua here tō tātou Metua i te Ao ra ’e tāna Tamaiti ia ’outou. Tā rāua fa’anahora’a nō tātou ’o te « rāve’a rahi ’oa’oa » ïa (Alama 42:8). E arata’i teie fa’anahora’a ’e tā rāua mau fa’auera’a ’e mau ’ōro’a ’e mau fafaura’a ia tātou i te ’oa’oa rahi roa a’e ’e te poupou i roto i teie orara’a ’e te orara’a a muri a’e. ’Ei mau tāvini nā te Metua ’e nā te Tamaiti, tē ha’api’i nei mātou ’e tē hōro’a nei ho’i i te parau a’o mai tā rāua e fa’atere mai nā roto i te Vārua Maita’i. ’Aita tō mātou hina’aro ’ē atu maori rā te paraura’a i te parau mau ’e te fa’aitoitora’a ia ’outou ’ia rave i tā rāua i fa’ata’a ’ei ’ē’a e tae atu i te ora mure ’ore, « te hōro’a rahi a’e i te mau hōro’a ato’a a te Atua » (Te Parau Ha’api’ira’a ’e te mau Parau Fafau 14:7).
III.
Teie te tahi atu ā hi’ora’a nō te fa’ahope’ara’a o te mau fa’aotira’a nō teienei, i ni’a i te ananahi. Nō ni’a teie hi’ora’a i te mā’itira’a e fa’atusia i teienei nō te hō’ē fā faufa’a rahi ananahi.
I te hō’ē ’āmuira’a titi i Cali, i Colombia, ’ua fa’a’ite mai te hō’ē tuahine i te hina’aro o rāua tāna tāne mōmo’a e fa’aipoipo i roto i te hiero, i terā ra tau, te hiero fātata roa a’e tei Peru ïa. Nō te hō’ē tau maoro, ’ua fa’aherehere rāua i tā rāua moni pere’o’o mata’eina’a. Ē ’ua ta’uma a’era i ni’a i te pere’o’o mata’eina’a e haere i Bogotá, i reira rā, ’ua fa’a’itehia mai ia rāua ē, ’aita e pārahira’a fa’ahou i ni’a i te pere’o’o mata’eina’a nō Lima, i Peru. E ho’i ïa rāua i te fare ma te fa’aipoipo-’ore-hia ’aore rā e fa’aipoipo rāua i rāpae i te hiero. ’Aua’a a’e rā, e rāve’a fa’ahou ā. E ti’a ia rāua ’ia haere nā ni’a i te pere’o’o mata’eina’a nō Lima mai te peu e pārahi rāua i ni’a i te tahua ē hope noa atu te pae mahana ’e te pae pō terera’a. ’Ua mā’iti rāua i te reira. ’Ua nā ’ō mai ’oia ē, e ’ere i te mea ’ōhie, noa atu pa’i ’ua vaiiho mai vetahi horopātete ia māua ’ia pārahi i ni’a i tō rātou pārahira’a, e tārava ïa rātou i raro.
Te mea tā’u i putapū i roto i tāna a’ora’a, ’o tā teie ïa tuahine i parau ē, ’ua māuruuru ’oia ’ua tae rāua tāna tāne fa’aiopoipo i roto i te hiero mai te reira, nō te mea ’ua taui te reira i tō rāua mana’o nō ni’a i te ’evanelia ’e nō ni’a i te fa’aipoipora’a i roto i te hiero. ’Ua fa’autu’a te Fatu ia rāua i te utu’a maita’i nō te tupura’a ’o tē tae mai nā roto i te fa’atusiara’a. ’Ua parau ato’a ’oia ē, ’ua fa’arahi tō rāua tere pae mahana i te hiero i tō rāua fāito pae vārua ’e e fāito rahi atu ā i tā te mau tere hiero e rave rahi i ravehia ma te fa’atusia ’ore.
Mai te matahiti mai ā ’ua fa’aro’o vau i tōna ’itera’a pāpū, ’ua uiui noa tō’u mana’o e aha pa’i te orara’a o taua ta’ata fa’aipoipo nei ’āhani ’ua rave rāua i te tahi atu mā’itira’a—te ha’apaera’a i terā tusia tītauhia nō te fa’aipoipo i roto i te hiero.
E te mau taea’e, e’ita e nehenehe e parau te rahira’a mā’itira’a nā tātou i roto i te orara’a, tē vai ra te mā’itira’a rahi ’e tē vai ra te mea huru iti. ’Ia hi’o tātou i muri, e ti’a ia tātou ’ia ’ite i te ta’a ’ē rahi i tupu i roto i tō tātou orara’a maoti te tahi o tā tātou mau mā’itira’a. E rave tātou i te mau mā’itira’a ’e te mau fa’aotira’a maita’i a’e mai te mea e hi’o tātou i te mau ’ē’a i mua ia tātou ma te feruri i hea rātou e arata’i atu. ’A nā reira ai tātou, e pe’e ïa tātou i te parau a’o a te peresideni Russell M. Nelson ’ia ha’amata ma te fā hope’a i roto i te ferurira’a.2 Nō tātou nei, tē fā hope’a, e vai noa ïa i ni’a i te ’ē’a nō te fafauraa nā roto i te hiero ē tae atu i te ora mure ’ore, te hōro’a rahi a’e i te mau hōro’a ato’a a te Atua.
Tē fa’a’ite pāpū nei au nō Iesu Mesia ’e nō te fa’ahope’ara’a o tāna tāra’ehara ’e te tahi atu mau parau mau o tāna ’evanelia mure ’ore, i te i’oa o Iesu Mesia, ’āmene.