Mau pāhonoraʼa i te pure
’Ua ’ite te Metua ia tātou, ’ua ’ite ’oia i tō tātou mau hina’aro, ’e e tauturu pāpū mai ’oia ia tātou.
Hō’ē parau ha’api’ira’a faufa’a roa ’e te māhanahana o te ’evanelia a Iesu Mesia ’oia ho’i, e here pāpū tō te Metua i te ao ra i tāna mau tamari’i. Nō taua here pāpū ra, tē ha’amaita’i nei ’oia ia tātou ’eiaha noa mai te au i tō tātou mau hina’aro, mai te au ato’a rā i tōna pa’ari hope ’ore. Mai tei fa’ahiti-’ōhie-hia e te peropheta Nephi, « ’ua ’ite au ē, ’ua here te [Atua] i tāna mau tamari’i ».1
Hō’ē hi’ora’a nō taua here pāpū ra, o te ’ohipa ïa tā te Metua i te ao ra e rave i roto i te mau tuha’a o tō tātou orara’a, noa atu ē, ’aita tātou i ’ite i te reira ’aore rā, i māramarama i te reira. Tē ’imi nei tātou i te arata’ira’a ’e te tauturu hanahana a te Metua nā roto i te pure ’ā’au tae ’e te tu’utu’u ’ore. Mai te mea ē, e fa’atura tātou i tā tātou mau fafaura’a ’e e tūtava ’ia riro hau atu mai tō tātou Fa’aora, e fāri’i tātou i te nini’ira’a tāmau2 o te arata’ira’a hanahana nā roto i te fa’aurura’a a te Vārua Maita’i.
Tē ha’api’i mai nei te mau pāpa’ira’a mo’a ia tātou ē : « ’Ua ’ite ho’i tō ’outou Metua i te mau mea e au ia ’outou, hou ’outou e ani atu ai iāna »,3 ’e « o ’oia ho’i o tei ’ite i te mau mea ato’a ra, nō te mea tē vai nei te mau mea ato’a i mua i [tōna] mata ».4
’Ua riro te peropheta Moromona ’ei hi’ora’a nō te reira. ’Aita ’oia i ora nō te ’ite i te mau hope’ara’a o tāna ’ohipa. ’Ua ta’a rā iāna ē, tē arata’i pāpū ra te Fatu iāna. I te taime ’a fāri’i ai ’oia i te fa’aurura’a ’ia tu’u i te mau pāpa’a parau na’ina’i a Nephi i roto i tāna pāpa’a parau, ’ua pāpa’i o Moromona : « ’E tē nā reira nei au nō te hō’ē ’ōpuara’a pa’ari ; tē nā reira nei ho’i ïa te Vārua i te parau ri’iri’i iā’u, mai te au i te ’ohipa a te Vārua o te Fatu tei roto iā’u. ’E teienei, ’aita roa vau i ’ite i te mau mea ato’a, ’ua ’ite rā te Fatu i te mau mea ato’a e tupu a muri nei ; e teie nei, tē rave nei ’oia i roto iā’u, ’e e rave au mai te au i tōna hina’aro ».5 Noa atu ē, ’aita o Moromona i ’ite ātea i te mo’era’a o nā 116 ’api pāpa’ihia, ’ua ’ite rā te Fatu ’e ’ua fa’aineine ’oia i te hō’ē rāve’a nō te upo’oti’a i ni’a i taua fifi ra nā mua roa ’a tupu ai te reira.
’Ua ’ite te Metua ia tātou, ’ua ’ite ’oia i tō tātou mau hina’aro, ’e e tauturu pāpū ’oia ia tātou. I te tahi taime e hōro’ahia mai te reira tauturu i te taime iho ’aore rā, i te tahi ma’a taime iti i muri iho i tō tātou anira’a i te tauturu nō te ra’i. I te tahi taime, ’aita tō tātou mau hina’aro tu’utu’u ’ore ’e te ti’amā e pāhonohia mai te au i tā tātou i ti’aturi, e ’ite rā tātou ē, e mau ha’amaita’ira’a rahi a’e tā te Atua i fa’ata’a. ’E i te tahi taime, e’ita tō tātou mau hina’aro ti’a e fāri’ihia i roto i teie orara’a. E fa’ahōho’a atu vau nā roto e toru ’ā’amu ta’a ’ē i te mau huru pāhonora’a a tō tātou Metua i te ao ra i tā tātou mau anira’a tu’utu’u ’ore iāna.
’Ua pi’ihia tā māua tamaiti ’āpī a’e ’ia tāvini ’ei misiōnare i roto i te misioni nō Paris i Farani. I roto i te fa’aineinera’a ; ’ua haere māua nā muri iho iāna e ho’o mai i te mau ’ahu i mātarohia, te mau pereue, te mau tā’amu ’arapo’a, te mau tōtini ’e hō’ē pereue māhanahana. Tē fifi rā, ’aita e vai ra te pereue māhanahana i terā taime i roto i te fāito tāna e hina’aro ra. ’Ua fa’a’ite mai rā te ho’o tao’a ē, e tae mai te pereue i roto i nā hepetoma i muri a’e, ’e e hāponohia atu te reira i te pū ha’api’ipi’ira’a misiōnare i Provo nā mua a’e i te revara’a o tā māua tamaiti i Farani. ’Ua aufau mātou i te pereue ’e ’aita mātou i feruri fa’ahou i te reira.
’Ua tomo tā māua tamaiti i roto i te pū ha’api’ipi’ira’a misiōnare i te ’āva’e tiunu, ’e ’ua tae mai te pereue i te tahi noa nau mahana hou tōna revara’a i te ’āva’e ’ātete. ’Aita ’oia i tāmata i te pereue ’ua tu’u ’oi’oi rā ’oia i te reira i roto i tōna mau tauiha’a ’e tōna mau ’ahu ’e te tahi atu mau mea.
’A fātata mai ai te pu’e tau to’eto’e i Paris, tei reira tā māua tamaiti i te tāvinira’a, ’ua pāpa’i mai ’oia ē, ’ua ’īriti ’oia i te pereue, ’ua tāmata, terā rā, e mea na’ina’i roa. Nō reira, ’ua tu’u māua i te tahi moni i roto i te fare moni ’ia nehenehe iāna ’ia ho’o i te tahi atu pereue i Paris, e ’ua nā reira ’oia. Mā te ’ino’ino ri’i, ’ua pāpa’i atu vau iāna ’e ’ua parau atu ’ia hōro’a i te pereue mai te mea e’ita tāna e nehenehe e fa’a’ohipa.
’Ua fāri’i māua i muri a’e i teie rata uira nāna : « E mea to’eto’e roa i’ō nei… E au ē, e ō roa te mata’i i roto ia mātou, noa atu ē, e mea maita’i roa tō’u pereue ’āpī ’e e mea teiaha. ’Ua hōro’a vau i tō’u pereue tahito i [te tahi atu misiōnare i roto i tō mātou piha] tei parau mai ē, ’ua pure noa ’oia nō te ani i te hō’ē rāve’a ’ia noa’a mai te hō’ē pereue maita’i a’e. E ta’ata fa’afāriuhia ’oia e rave rahi matahiti ’e ’o tōna ana’e mama… ’e te misiōnare tei bāpetizo iāna teie e pāturu nei iāna i roto i tāna misiōni ; ’e nō reira, ’ua riro te pereue ’ei pāhonora’a i te hō’ē pure, nō reira, tē ’oa’oa nei au nō te reira ».6
’Ua ’ite te Metua i te ao ra ē teie misiōnare, e tāvini ra i Farani e 10 000 kirometera te ātea i tōna fenua, e hina’aro rū ’oia i te hō’ē pereue ’āpī nō te hō’ē pu’e tau to’eto’e i Paris, terā rā, ’aita tā teie misiōnare e rāve’a nō te ho’o mai i te hō’ē pereue. ’Ua ’ite ato’a te Metua i te ao ra ē, e fāri’i tā māua tamaiti nā roto mai i te fare ho’ora’a ’ahu i Provo Utaha, i te hō’ē pereue na’ina’i roa. ’Ua ’ite ’oia ē, e tāvini teie nā misiōnare i Paris ’e e riro te pereue ’ei pāhonora’a i te pure ha’eha’a ’e te ’ā’au tae a te hō’ē misiōnare e hina’aro ’oi’oi ra i te reira.
’Ua ha’api’i te Fa’aora :
« E ’ere ānei ta’i piti manu ri’i ’ia ho’o i te osario hō’ē nei ? ’E ’ore rā te hō’ē о taua nā manu ri’i ra e mo’e i tō ’outou Metua.
« ’Ua hope ato’a rā te rouru o tō ’outou upo’o na i te tai’ohia.
« ’Eiaha maori ’outou e mata’u, e maita’i rahi ho’i tō ’outou i tō te manu ’e ’ia rahi noa atu ».7
I roto i te tahi atu mau tupura’a, mai te mea ’aita tō tātou mau hina’aro ti’a e hōro’ahia mai mai tā tātou i hina’aro, e nehenehe e riro i te hope’ara’a ’ei maita’i nō tātou. ’Ei hi’ora’a, ’ua riro o Iosepha te tamaiti a Iakoba ’ei nounoura’a ’e ’ei ririra’a nā tōna mau tua’ana ’e ’ua tae roa i te ’ōpua e taparahi pohe ia Iosepha. ’Aita rātou i nā reira, ’ua ho’o rā rātou iāna ’ei tītī i Aiphiti.8 Mai te mea ē, tē vai ra hō’ē ta’ata tei feruri ē, ’aita tāna mau pure i pāhonohia mai te au i tāna i ti’aturi, o Iosepha mau ïa. Te ti’ara’a mau, ’ua hōro’a mai tōna ’ati i te mau ha’amaita’ira’a rahi nōna ’e ’ua fa’aora i tōna ’utuāfare i te pohe po’ia. I muri a’e, i te rirora’a ’oia ’ei ta’ata fa’atere ti’aturihia i Aiphiti, ma te fa’aro’o ’e te pa’ari rahi nā ō atura ’oia i tōna mau tua’ana :
« E tena na, ’eiaha e ’oto, ’eiaha ho’i e riri ia ’outou iho, o ’outou i ho’o mai iā’u i’ō nei : nā te Atua ho’i i tono mai iā’u i’ō nei nā mua ia ’outou, ’ia ora te ta’ata.
« A piti a’e nei matahiti o’e i te fenua nei, e pae ho’i matahiti e toe nei, e ’ore e ueue, e ’ore e ’ō’oti.
« I tono mai ai te Atua iā’u nā mua ia ’outou, ’ia toe tō ’outou hua’ai i te ao nei, ’ia ora ’outou i te orara’a rahi.
« E teie nei, e ’ere nā ’outou ana’e i tae mai ai au i’ō nei, nā te Atua rā ».9
I te fare ha’api’ira’a tuarua, ’ua tihēpuhia tā māua tamaiti matahiapo ’ei pīahi i roto i te hō’ē ’ohipa tau poto maita’i roa, ’o te nehenehe e fa’atae atu iāna i roto i te hō’ē ’ohipa maita’i roa ’e te tāmau i muri a’e i te fāri’ira’a i te parau tū’ite. ’Ua rave itoito ’oia i teie ’ohipa pīahi nō te roara’a e maha matahiti, ’ua roa’a te parau tū’ite, ’e e mea fa’aturahia ’oia e tōna mau hoa ’ohipa ’e te mau ra’atira. I te hope’a o tāna matahiti senior, fātata mai te huru ē, nā te ra’i i fa’anaho (te mana’o ïa o nā tamaiti e piti tā māua),’ua matara te ti’ara’a ’ohipa tāmau, ’e o ’oia te ta’ata ani i mua roa, ’e te mau fa’a’itera’a ato’a ē, e roa’a iāna terā ’ohipa.
’Aita rā ’oia i tihēpuhia. ’Aore hō’ē o mātou i ta’a noa a’e i te reira. ’Ua fa’aineine maita’i ’oia iāna, ’ua uiui-maita’i-hia, ’oia te ta’ata ani ’aravihi roa a’e, ’e ’ua pure ma te ti’aturi ’e te tīa’i rahi ! ’Ua pe’ape’a roa ’oia ’e te teimaha, ’ua māere ato’a mātou. Nō te aha te Atua i fa’aru’e ai iāna i roto i tōna hina’aro ti’a ?
E rave rahi roa matahiti i muri mai i māramarama ai te pāhonora’a. ’Āhiri ’oia i fāna’o i te ’ohipa i moemoeāhia i muri a’e i te parau tū’ite, ’ua ’ere ïa ’oia i te hō’ē rāve’a faufa’a roa nō te taui i te orara’a, ’o tē ha’apāpū nei i teienei ē, nō tōna maita’i ’e te ha’amaita’ira’a mure ’ore. ’Ua ’ite te Atua i te hope’ara’a mai te ha’amatara’a mai hoa (mai te reira noa ’oia ) ’e i roto i teie huru, te pāhonora’a i te mau pure parau-ti’a e rave rahi, e ’aita ïa, nō te tahi rā hope’ara’a maita’i roa atu.
’E i te tahi taime, te pāhonora’a i te pure tā tātou e ’imi nei ma te parau-ti’a, ’e te ti’aturi pāpū ’e te ’ā’au tae, ’aita ïa e hōro’ahia mai i roto i teie orara’a.
’Ua fānauhia te tuahine Patricia Parkinson ma te mata maita’i, i te hitura’a rā o te matahiti ’ua ha’amata tōna nā mata i te pō. I te iva o te matahiti, ’ua ha’amata o Pat i te haere i te mau fare ha’api’ira’a i Utaha nō te turi ’e te mata pō i Ogden Utaha, tei te ’area e 145 km i te ātea i tōna nohora’a, nō reira, tītauhia iāna ’ia noho i te fare ha’api’ira’a—teie ato’a mai ïa te parau nō te mihi i te ’utuāfare nō te hō’ē tamāhine e iva matahiti te pa’ari.
I te 11ra’a o te matahiti, ’ua pō roa tōna mata. I te 15ra’a tōna matahiti, ’ua ho’i o Pat i tōna fenua nō te haere i te ha’api’ira’a tuarua i reira. ’Ua tāmau noa ’oia i te haere i te ha’api’ira’a ’e ’ua roa’a tāna parau tū’ite nō te tuha’a mātāmua nō ni’a i te mau taupupura’a nō te tūreiara’a ’e nō ni’a i te « psychologie ».I muri a’e i te hō’ē ’arora’a itoito i te mau ti’a fa’atere nō te mau fāri’ira’a i roto i te fare ha’api’ira’a teitei, ’ua ō ’oia i roto i te ha’api’ira’a teitei ’e ’ua noa’a tāna parau tū’ite master nō te taote ha’api’i paraparau. Tē ha’a nei o Pat i pīha’i iho e 53 pīahi nō te ha’api’ira’a tuatahi ’e nāna e fa’atere nei e maha ’orometua nō te reo i roto i tōna mata’eina’a ha’api’ira’a. ’Ua roa’a tōna iho fare ’e tōna iho pere’o’o uira, ’e nā te mau hoa ’e te mau melo o te ’utuāfare e fa’ahoro ’ia hina’aro o Pat e tere i te hō’ē vāhi.
I te 10ra’a o te matahiti, ’ua fa’ata’ahia ē, e rave fa’ahou Pat i te hō’ē rapa’aura’a i tōna mata ’o te pō noa atura. ’Ua tāmau noa tōna nā metua i te fa’a’ite iāna i te mau mea e tupu mai nō ni’a i te rapa’aura’a i tōna ma’i, terā rā, nō te tahi mau tumu, ’aita rāua i fa’a’ite iāna nō ni’a i teie rapa’aura’a ta’a ’ē. I te fa’a’itera’a tōna nā metua iāna ē, ’ua tārena-’ē-hia na teie rapa’aura’a, i te parau a tōna metua vahine, « ’ua ’ati roa » o Pat. ’Ua horo atu o Pat i te tahi piha, ’ua ho’i mai rā i muri a’e ’e nā ō mai ra i tōna nā metua ma te riri, « e fa’a’ite atu vau ia ’ōrua. ’Ua ’ite au, ’ua ’ite te Atua, ’e ’ua ’ite ato’a ’ōrua. E riro vau ’ei matapō nō te toe’a o tō’u orara’a ! »
E rave rahi matahiti i ma’iri a’e nei, ’ua tere atu o Pat i Karifonia nō te fārerei i te mau melo o te ’utuāfare e ora ra i reira. ’A pārahi noa ai ’oia i rāpae ’e te tamaiti a tōna tu’ane e toru matahiti, nā ō mai ra teie tamari’i i iāna, « tati Pat, nō te aha ’aita ’oe e ani i te Metua i te ao ra ’ia hōro’a mai i te mata ’āpī nō ’oe ? Nō te mea, ’ia ani ’oe i te Atua, e hōro’a mai ’oia i te mea tā ’oe e hina’aro. Tei ia ’oe noa te anira’a iāna ».
’Ua parau o Pat ē, ’ua hitimahuta ’oia i taua uira’a ra, terā rā, ’ua pāhono atura ’oia, « Ā, i te tahi taime, e’ita te Metua i te ao ra e rave mai te reira te huru. I te tahi taime, e hina’aro ’oia ’ia ha’api’i mai ’oe i te hō’ē mea, ’e nō reira e’ita ’oia e hōro’a mai i te mau mea ato’a tā ’oe e hina’aro. I te tahi taime tītauhia ia ’oe ’ia tīa’i. ’Ua ’ite maita’i te Metua i te ao ra ’e te Fa’aora e aha te mea maita’i nō tātou ’e e aha tā tātou e hina’aro. Nō reira, ’aita rāua e hōro’a mai ia ’oe i te mau mea ato’a tā ’oe e hina’aro i te taime iho e hina’aro ai ’oe ».
E rave rahi matahiti tō’u mātaura’a ia Pat, ’e ’aita i maoro a’e nei ’ua parau atu vau iāna ē, tē fa’ahiahia nei au i tōna huru maita’i ’e te ’oa’oa i te mau taime ato’a. ’Ua pāhono mai ’oia, « ā, ’aita ’oe tō te fare i pīhai iho iā’u, e ’ere ānei ? Tē vai ra ihoa tō’u mau taime fifi. ’Ua fa’aruru vau i te mau hepohepo ’ū’ana, ’e ’ua ta’i rahi au ». Terā rā, ’ua parau fa’ahou mai ’oia, « mai te taime ’a ha’amata ai tō’u mata i te pō, ’ua huru ’ē roa, ’ua ’ite rā vau ē, tei pīha’i iho te Metua i te ao ra ’e te Fa’aora i tō’u ’utuāfare ’e iā’u. ’Ua arai mātou i te reira ma te maita’i roa, ’e i tō’u mana’o, ’ua arai mātou i te reira ma te tano. ’Ua ti’a iā’u ’ia riro mai ’ei ta’ata huru manuia, ’e ’ua riro vau ’ei ta’ata ’oa’oa. Tē ha’amana’o nei au i tōna rima i roto i te mau mea ato’a. I te feiā e ui mai iā’u ē, e riri ānei au i te mea ē, e mata pō tō’u, tē pāhono nei au : « O vai tā’u e riri ? Tei pīha’i iho te Metua i te ao ra iā’u i roto i teie ’ohipa ; ’aita vau i vai ’ōtahi noa. Tei pīha’i iho ’oia iā’u i te mau taime ato’a ».
I roto i teie ’ohipa, e’ita te hina’aro o Pat ’ia roa’a fa’ahou mai tōna mata hi’o e hōro’ahia mai i roto i teie orara’a. Tāna rā parau rahi, i ’apohia mai nā roto mai i tōna metua tāne, teie ïa, « e mure ato’a teie ».10
Teie te parau a te peresideni Henry B. Eyring, « i teie taime, tē ’ite mai ra te Metua ia ’outou, i tō ’outou mau mana’o, ’e i te mau hina’aro pae vārua ’e te pae tino o te mau ta’ata ato’a ’ati a’e ia ’outou ».11 E nehenehe e ’itehia teie parau mau rahi ’e te māhanahana i roto i nā ’itera’a e toru tā’u i fa’ati’a atu.
E te mau taea’e ’e te mau tuahine, i te tahi taime e pāhono-’oi’oi-hia tā tātou mau pure mai te au i tā tātou e hina’aro. I te tahi taime, ’aita tā tātou mau pure e pāhonohia mai te au i tā tātou e ti’aturi ra, terā rā, i roto i te roara’a o te tau, e ’ite tātou ē, ’ua fa’aineine te Atua i te mau ha’amaita’ira’a rahi a’e i tā tātou i feruri i te mātāmua ra. ’E i te tahi taime, e’ita tā tātou mau anira’a ti’a i te Atua e fāri’ihia i roto i teie orara’a.12 Mai tā Elder Neal A. Maxwell i parau, « te fa’aro’o o te ti’aturi-ato’a-ra’a ïa i te tārena a te Atua ».13
’Ua pāpū maita’i ia tātou ē, ’ia au i tāna fa’anahora’a ’e i tōna ra taime, e ha’amaita’i mai te Metua i te ao ra ia tātou ’e e fa’a’āfaro ho’i i tō tātou mau māna’ona’ora’a ato’a, te mau ’ohipa tano ’ore, ’e te mau ’ino’inora’a.
« ’Ua hina’aro ho’i au ’ia ha’amana’o ato’a ’outou i te maita’i e te ’oa’oa o te ta’ata e ha’apa’o i te mau fa’aue a te Atua. Inaha ho’i, e ha’amaita’ihia rātou i te mau mea ato’a, o te tino nei ’e o te Vārua ato’a ho’i ; ’e ’ia ha’apa’o maita’i rātou e tae noa atu i te hōpe’a ra, e fāri’ihia ïa rātou i te ra’i ra, ’ia pārahi rātou ’e te Atua ato’a i roto i te ’oa’oa hope ’ore ra. E ha’amana’o ē, e ha’amana’o ē, e parau mau ïa teie mau parau nei ; e nā te Fatu ra nā te Atua i parau mai ra ».14
’Ua ’ite au ē, tē fa’aro’o nei te Atua i tā tātou mau pure.15 ’Ua ’ite au ē, ’ei Metua tei ’ite i te mau mea ato’a, tei here, e pāhono pāpū ’oia i tā tātou mau pure, ’ia au i tōna ra pa’ari ’ōti’a ’ore, ’e ’ia au i te mau huru e riro ai ’ei maita’i ’e ’ei ha’amaita’ira’a nō tātou. Tē fa’a’ite pāpū nei au i te reira nā roto i te i’oa o Iesu Mesia ra, ’āmene.