Phatwe 18–24: “Molawana o o nang le Tsholofetso”

Dithuto le Dikgolagano 89–92

Mo sekolong sa Baperofeti, Moperofeti Joseph Smith o rutile bagolwane ba Iseraele ka go aga bogosi jwa Modimo mo lefatsheng. Ba ne ba buisana ka boammaaruri ba semowa, ba rapela mmogo, ba ikitsa dijo, le go ipaakanyetsa go rera efangele. Mme go ne go na le sengwe ka matlhasedi a a ka lebegang a sa tlwaelega gompieno, mme go ne go sa lebege go siame mo go Emma Smith le ene. Ka nako ya dikopano, banna ba ne ba goga le go tshotlha motsokwe, mo go neng go tlwaelesegile ka nako eo, mme e ne e kgamathetsa bodilo jwa legong ka bontsho mme go tlogela monko o tseneletseng mo phefong. Emma o ne a abelana matshwenyego a gagwe le Joseph, mme Joseph a botsa Morena. Karabo ya Gagwe e ne e le tshenolo eo e neng ya feta le matshwao a mosi le motsokwe. E ne ya naya Baitshepi, ba ditshika tse di tla tlang, “Molawana o o nang le tsholofetso”—ditsholofetso tsa botsogo jwa nama, “tlhalefo” le mahumo a magolo a kitso” (Dithuto le Dikgolagano 89:3, 19).

Bona gape Saints, 1:166–68.

Megopolo ya go ithuta kwa Gae le kwa Kerekeng

Dithuto le Dikgolagano 89.

Morena o nneetse Lefoko la Tlhalefo go nthusa go tsoga mo mmeleng le mowa.

Fa bagolwane mo sekolong sa Baperofeti ba utlwa lantlha Joseph Smith a bala Lefoko la Tlhalefo, ba ne ka bofefo ba latlhela dipeipi tsa bone le dithibo tsa motsokwe o o tlhafuniwang mo molelong” (Saints, 1:168). Ba ne ba batla go supa go rata ga bone go obamela Morena. Gongwe o setse o latlhile mo botshelong jwa gago dilo tse Lefoko la Tlhagiso le re tlhagisang kgatlhanong le tsone, mme ke eng se sengwe se o ka se ithutang mo tshenolong e? Elatlhoko megopolo ena:

• Akanya tshenolo e le “molawana o o nang le tsholofetso” (temana 3)—boammaaruri jo bo nnelang ruri jo bo kaelang go dira ditshwetso. Ke melawana efe e o e bonang e e ka kaelang ditshwetso tsa gago? Ke ditshegofatso dife tse Mmoloki a di solofetsang? (bona ditemana 18–21). O diragaditse ditsholofetso tseo jang mo botshelong jwa gago?

• Ke dikai dife tse o di boneng tsa “bosula le ditogamaano … mo dipelong tsa batho ba ba logang bogwenegwene” tse di amanang le Lefoko la Tlhalefo? (temana 4). Mo tlaleletsong ya tshenolo ena, ke eng se Morena a se neetseng go go thusa go tila kgotsa go fenya bosula jo?

• Tshenolo ena e go ruta eng ka Morena? Lefoko la Tlhalefo le amana jang le Dithuto le Dikgolagano 29:34–35?

• O tlhotlholediwa go dira eng go tlhokomela mmele wa gago botoka?

O ka ne o nnile le menyetla go tlhalosetsa ba bangwe gore ke eng o tshela ka Lefoko la Tlhalefo—mme o ka nna wa nna le menyetla e mentsi mo isagong. Akanya ka fa o ka dirisang menyetla ena go paka ka Mmoloki, boitshepo jwa mebele, le boammaaruri jo bongwe jwa semowa. Ka megopolo, bona “Mmele wa gago o boitshepo,” Ya Nonofo ya Banana: Kaelo ya go Dira Boitshenkelo, 22–29.

Bona gape 1 Bakorintha 6:19–20; Thomas S. Monson, “Principles and Promises,” Liahona, Ngwanatsele. 2016, 78–79; Ditlhogo le Dipotso, “Word of Wisdom,” Gospel Library; “The Word of Wisdom,” mo go Revelations in Context, 183–91; “Addiction,” “Physical Health,” Life Help, Gospel Library.

Principles and Promises

President Monson testifies of the blessings that come as we obey the Word of Wisdom.

Ithute le go ruta ka melawana. Go na le go re o dire dinankolo tsa tse lo di dirang le tse lo ka sekeng lwa di dira, re ka tshela ka melawana go dirisa boikgethelo le tumelo mo go Keresete. Sekai, akanya ka dipotso tse di remeletseng melawaneng jaaka tsena mabapi le Lefoko la Tlhalefo: Ke melawana efe e e ka neelang kgothatso mo mongweng yo o sokolang ka go obamela Lefoko la Tlhalefo? Ke melawana efe e e ka nkgomotsang fa ke na le mathata a botsogo le fa ke tshela ka Lefoko la Tlhalefo?

Rara wa Legodimo o batla re tlhokomela mebele ya rona.

Dithuto le Dikgolagano 90:1–7

Boporesidente jwa ntlha bo tshegeditse “dilotlele tsa bogosi.”

Mo tsetlana 90, Morena o neetse ditaelo ka “tirelo le boporesidente” (temana 12) ya Joseph Smith le Sidney Rigdon, le Frederick G. Williams—maloko a se jaanong re se bitsang Boporesidente jwa Ntlha. O ithuta eng ka Boporesidente jwa Ntlha go tswa mo ditemaneng 1–17? Akanya ka go sekaseka melaetsa ya bosheng go tswa mo malokong a Boporesidente jwa Ntlha. Ba dira eng go “rulaganya merero yotlhe ya kereke e le bogosi”? (temana 16). O ka dira eng go supa gore ga se “dilo tse di motlhofo” mo go wena? (temana 5).

Akanya ka go opela kgotsa ka go bala mafoko a “Come, Listen to a Prophet’s Voice” (Hymns, no. 21) kgotsa pina e nngwe ka baperofeti e e amanang le dithuto tse di mo ditemaneng tsena. Tirelo ya Boporesidente jwa Ntlha e go thusitse jang go itse Rara wa Legodimo le Jeso Keresete?

Dithuto le Dikgolagano 90:24

“Dilo tsotlhe di tlaa dirisanya mmogo go ntirela molemo.”

Tlhatlhanya ka maitemogelo mangwe le mangwe a o nnileng le one a a pakang ka tsholofetso ya Morena mo Dithuto le Dikgolagano 90:24. Akanya go kwala maitemogelo a gago le go a abelana le maloko a lelwapa la gago kgotsa ba o ba ratang—gongwe mongwe yo o tlhokang tshepiso kgotsa kgothatso. Fa o santse o emetse ditshegofatso dingwe, tlhatlhanya gore o ka dira eng go nna o le boikanyego fa o ntse o emetse go bona ka fa “dilo tsotlhe di tla dirisanang go go direla molemo.”

Dithuto le Dikgolagano 90:28–31

Vienna Jaques e ne e le mang?

Vienna Jaques o tshotswe ka Seetebosigo 10, 1787, mo Massachusetts. Mosadi wa tumelo yo o neng a na le madi a mantsi, Vienna o ne a kopana la ntlha le baanamisa efangele ka 1831. Fa a sena go amogela bopaki jwa semowa gore molaetsa wa bone o boammaaruri, o ne a tsamaya go ya go kopana le Moperofeti mo Kirtland, Ohio, kwa a neng a kolobediwa teng.

Vienna o ne a obamela kgakololo ya Morena mo go ene mo Dithuto le Dikgologano 90:28–31. Tshwaelo ya gagwe mo Moreneng, e e neng e akaretsa dikabelo tse a neng a di dirile pele mo Kirtland, di tlile ka nako e e botlhokwa mo Kerekeng, fa baeteledipele ba ne ba leka go reka lefatshe kwa Tempele ya Kirtland e neng e tlaa agiwa teng. Vienna o ne a le “boikanyego, mme e se … setshwakga” botshelo jwa gagwe jotlhe mme o ne kwa bofelong a kgona go “nna ka kagiso” (temana 31) mo Salt Lake Valley, kwa a swetseng teng a le dingwaga di le 96.

Dithuto le Dikgolagano 91

“Mowa o bonatsha boammaaruri”

Rotlhe re kopana le melaetsa e e nang le “dilo di le dintsi … tse di boammaaruri” le “dilo di le dintsi … tse e seng boammaaruri” (Dithuto le Dikgolagano 91:1–2). Ke kgakololo efe e o e bonang mo tsetlaneng 91 e e ka go thusang go lemoga boammaaruri mo melaetseng e o kopanang le yone? Mowa o go thusitse jang go lemoga boammaruri le phosong?

Ka megopolo thata, bona dikgatiso tsa kgwedi ena tsa Liahona le Ya Nonofo ya Banana dimakasine.

Megopolo ya go Ruta Bana

Dithuto le Dikgolagano 89.

Lefoko la Tlhalefo le nthusa go itekanela mo mmeleng le mo moweng.

• Go itsise tsetlana 89, gongwe wena le bana ba gago le ka leba setshwantsho sa tempele kgotsa la opela pina ka botsogo jwa nama, sekai “The Lord Gave Me a Temple” (Children’s Songbook, 153), go ruta gore mebele ya rona e tshwana le ditempele tsa mewa ya rona. Thusa bana ba gago go bontsha ditsela tse ba ka tlhokomelang mebele ya bone ka tsone.

• Go ithuta ka ditaelo tsa Morena mo Dithuto le Dikgolagano 89:10–17, wena le bana ba gago le ka tshwantsha kgotsa la leba ditshwantsho tsa dilo tse di molemo tse re ka di jang kgotsa go di dira go tshegetsa mebele ya rona e itekanetse (bona setshwantsho le tsebe ya tiragatso kwa bofelong jwa tshoboko ena). Morena o re tlhagisitse gore re seka ra dirisa eng? Ke eng a batla gore re tlhokomele mebele ya rona?

• Mogolwane Gary E. Stevenson o gakolotse banana go dira lenaneo kwa pele ga nako ka se ba tla se dirang fa ba raelwa ka bojalwa le diritibatsi. O ne a ruta gore: “Lo tla bona gore thaelo e na le taolo e nnyennyane mo go lona. O tla bo o setse o dirile tshwetso ya ka fa o tla tsibogang le se o tla se dirang. Ga o tlhoke go tsaya tshwetso nako e nngwe le e nngwe” (“Your Priesthood Playbook,” Liahona, Motsheganong 2019, 48). Morago ga le sena go bala mmogo Dithuto le Dikgologano 89:4 le polelo ya ga Mogolwane Stevenson, gakololana le bana ba gago mabapi le ka fa ba ka tsayang tshwetso jaanong—ya botshelo jotlhe jwa bone—go tshela ka Lefoko la Tlhalefo. Mme le gone lo ka dira motshameko wa ka fa ba ka tsibogang fa mongwe, le tsala tota, a ba neela sengwe se se kgatlhanong le Lefoko la Tlhalefo. Morena o re segofatsa jang fa re obamela Lefoko la Tlhalefo? (bona ditemana 18–21).

Mebele ya rona ke dimpho tse di tswang kwa Modimong.

Dithuto le Dikgologano 90:5

Modimo o nneela baperofeti go nkaela le go ntshireletsa.

• Le ka leba ditshwantsho tsa baperofeti ba bogologolo kgotsa la opela pina jaaka “Follow the Prophet” (Children’s Songbook, 110–11). Modimo o segofaditse bana ba Gagwe jang ka baperofeti ba Gagwe? Ke eng re tshwanetse go reetsa baperofeti ba Modimo? (bona Dithuto le Dikgolagano 90:5). Ke gone wena le bana ba gago le ka leba setshwantsho sa moperofeti yo o tshelang mme la abelana dilo dingwe tse Morena a di rutileng kgotsa a re tlhagisitseng ka tsone ka ene. Re ka sala moperofeti morago jang?

Dithuto le Dikgolagano 91

Mowa o ka nthusa go itse boammaaruri.

• O ka soboka setlhogo sa tsetlana sa Dithuto le Dikgolagano 91 go thusa bana ba gago go tlhaloganya gore ke eng tshenolo ena e neetswe. Ba ka akanya ka mafelo, jaaka mo bobega dikganyeng, kwa re bonang “dilo di le dintsi … tse di boammaaruri” le “dilo di le dintsi … tse di seng boammaaruri” (ditemana 1–2). Di re ruta eng Ditemana 4–6 ka Mowa o o Boitshepo? Mowa o o Boitshepo o re thusa jang go itse se se siameng?

Ka megopolo thata, bona kgatiso ya kgwedi e ya Friend makasine.

“Tlhaka tsa mabele tsotlhe di siametse dijo tsa motho; fela jalo le lone leungo la mofine.”