« ថ្ងៃទី ១៥–២១ ខែ កញ្ញា ៖ ‹ បន្ទាប់ពីមានការវេទនាដ៏ច្រើន … នោះទើបបានព្រះពរ › ៖ គោលលទ្ធិ និងសេចក្តីសញ្ញា ១០២–១០៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ១០២–១០៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ស៊ី ស៊ី អេ គ្រីស្ទានសិន ( ឆ្នាំ ១៨៣១–១៩១២ ) ក្រុមជំរំស៊ីយ៉ូន ប្រហែលឆ្នាំ ១៨៧៨ គំនូរនៅលើផ្ទាំងក្រណាត់ ទំហំ ៧៨ × ១១៤ អ៊ិញ ។ សារមន្ទីរវិចិត្រសិល្បៈនៃសាកលវិទ្យាល័យព្រិកហាំ យ៉ង់ អំណោយពីចៅៗរបស់ ស៊ី ស៊ី អេ គ្រីស្ទានសិន ឆ្នាំ ១៩៧០ ។

ថ្ងៃទី ១៥–២១ ខែ កញ្ញា ៖ « បន្ទាប់ពីមានការវេទនាដ៏ច្រើន … នោះទើបបានព្រះពរ »

គោលលទ្ធិ និងសេចក្តីសញ្ញា ១០២–១០៥

ពួកបរិសុទ្ធនៅខឺតឡង់បានខូចចិត្ត នៅពេលដែលឮថាបងប្អូនប្រុសស្រីទាំងឡាយរបស់ពួកគេត្រូវបានបណ្តេញចេញពីស្រុកចាកសុន រដ្ឋមិសសួរី ។ វាប្រាកដជាការលើកទឹកចិត្តដល់ពួកគេនៅពេលនោះ ពេលដែលព្រះអម្ចាស់បានប្រកាសថា « ការប្រោសលោះស៊ីយ៉ូន » នឹងមក « ដោយអំណាច » ( គោលលទ្ធិ និងសេចក្តីសញ្ញា ១០៣:១៥ ) ។ ជាមួយនឹងការសន្យាទាំងនោះនៅក្នុងដួងចិត្តរបស់ពួកគេ បុរសជាង ២០០ នាក់ និងទាំងស្រ្តី និងកុមារប្រហែលជា ២៥នាក់ បានចូលរួមក្នុងកងទ័ពដែលត្រូវបានគេហៅថា ក្រុមជំរំអ៊ីស្រាអែល ក្រោយមកត្រូវបានគេស្គាល់ថា ក្រុមជំរំស៊ីយ៉ូន ។ បេសសកម្មរបស់គេត្រូវដើរជាក្បួនទៅកាន់រដ្ឋមិសសួរី និងប្រោសលោះស៊ីយ៉ូន ។

ចំពោះសមាជិកជំរំ ការប្រោសលោះស៊ីយ៉ូនមានន័យថាការស្ថាបនាពួកបរិសុទ្ធ និងដែនដីរបស់ពួកគេឡើងវិញ ។ ប៉ុន្តែមុនពេលពួកគេបានមកដល់ស្រុកចាកសុន ព្រះអម្ចាស់បានមានបន្ទូលទៅ យ៉ូសែប ស្ម៊ីធ ឲ្យឈប់ ហើយរំសាយក្រុមជំរំស៊ីយ៉ូន ។ សមាជិកក្រុមជំរំស៊ីយ៉ូនមួយចំនួនបានច្របូកច្របល់ ហើយមិនសប្បាយចិត្តទេ វាហាក់ដូចជាផែនការណ៍ត្រូវបរាជ័យ ហើយការសន្យារបស់ព្រះអម្ចាស់មិនត្រូវបានបំពេញ ។ ប៉ុន្តែ មនុស្សផ្សេងទៀតគិតខុសពីនេះ ។ ខណៈដែលពួកបរិសុទ្ធដែលនិរទេសខ្លួនទាំងនោះមិនបានទទួលដី និងផ្ទះរបស់ពួកគេត្រឡប់មកវិញ តែបទពិសាធន៍នោះបាននាំឲ្យស្គាល់ទំហំនៃ « ការប្រោសលោះ » ទៅកាន់ស៊ីយ៉ូន ហើយវាបាននាំមក « ដោយអំណាច » ។ ពួកបរិសុទ្ធដ៏ស្មោះត្រង់ទាំងឡាយនៃក្រុមជំរំស៊ីយ៉ូន ដែលក្រោយមកភាគច្រើនបានក្លាយជាថ្នាក់ដឹកនាំសាសនាចក្រ បានថ្លែងទីបន្ទាល់ថា បទពិសោធន៍ទាំងនោះបានធ្វើឲ្យសេចក្តីជំនឿរបស់ពួកគេលើព្រះចេស្តារបស់ព្រះ កាន់តែជ្រាលជ្រៅឡើងនៅក្នុងការហៅដ៏ទេវភាពរបស់ យ៉ូសែប ស្ម៊ីធ និងនៅក្នុងស៊ីយ៉ូន—ស៊ីយ៉ូនមិនមែនគ្រាន់តែជាទីកន្លែងប៉ុណ្ណោះទេ ប៉ុន្តែគឺជាស៊ីយ៉ូនដែលជារាស្រ្តនៃព្រះផងដែរ ។ ជាជាងការដេញដោលអំពីតម្លៃនៃភារៈកិច្ចដែលហាក់មើលទៅមិនបានជោគជ័យនេះ ពួកគេបានរៀនថា កិច្ចការពិតប្រាកដគឺការធ្វើតាមព្រះអង្គសង្គ្រោះ ទោះបីជាយើងមិនយល់អ្វីគ្រប់យ៉ាងក្តី ។ នៅទីបញ្ចប់ នេះគឺជារបៀបដែលស៊ីយ៉ូននឹងបានទទួលការប្រោសលោះ ។

សូមមើល ពួកបរិសុទ្ធ ១:១៩៤–២០៦; « The Acceptable Offering of Zion’s Camp » Revelations in Context ទំព័រ ២១៣–២១៨ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្ដីសញ្ញា ១០២:១២–១៣

តើអ្វីជាគោលបំណងនៃក្រុមប្រឹក្សាសមាជិកភាព ?

កណ្ឌទី ១០២ មានកត់ត្រាអំពីការប្រជុំនៅទីក្រុងខឺតឡង់ រដ្ឋអូហៃអូ ជាទីកន្លែងដែលក្រុមប្រឹក្សាជាន់ខ្ពស់ដំបូងនៃសាសនាចក្រត្រូវបានបង្កើតឡើង ។ នៅក្នុង ខទី ១២–២៣ ព្រះអម្ចាស់បានពិពណ៌នាពីនីតិវិធីដែលក្រុមប្រឹក្សាជាន់ខ្ពស់ធ្វើតាម នៅពេលធ្វើការប្រជុំក្រុមប្រឹក្សាសមាជិកភាពសម្រាប់អស់អ្នកដែលបានប្រព្រឹត្តអំពើរំលងដ៏ធ្ងន់ធ្ងរ ។

ប្រធាន អិម រ័សុល បាឡឺដ បានបង្រៀនថា « សមាជិកមួយចំនួនបានសួរថា ហេតុអ្វីសាសនាចក្រត្រូវមានក្រុមប្រឹក្សា [ សមាជិកភាព ] ។ គោលបំណងមានបីផ្នែក ៖ ដើម្បីសង្គ្រោះព្រលឹងអ្នកប្រព្រឹត្តអំពើរំលង ដើម្បីការពារមនុស្សគ្មានទោស និងការពារភាពបរិសុទ្ធ សុចរិតភាព និងកេរ្តិ៍ឈ្មោះសាសនាចក្រ » ( « A Chance to Start Over: Church Disciplinary Councils and the Restoration of Blessings » Ensign ខែ កញ្ញា ឆ្នាំ ១៩៩០ ទំព័រ ១៥ ) ។

សូមមើលផងដែរ Topics and Questions « Membership Councils » នៅលើបណ្ណាល័យដំណឹងល្អ ។

គោលលទ្ធិ និងសេចក្ដីសញ្ញា ១០៣:១–១២, ៣៦ ; ១០៥:១–១៩

ស៊ីយ៉ូនអាចត្រូវបានស្ថាបនាឡើងតែនៅលើគោលការណ៍នៃសេចក្ដីសុចរិតប៉ុណ្ណោះ ។

តើហេតុអ្វីពួកបរិសុទ្ធបាត់បង់ដែនដីសន្យារបស់ពួកគេនៅរដ្ឋមិសសួរី ? ប្រហែលជាមានហេតុផលជាច្រើន—យ៉ាងហោចមួយ ដែលព្រះអម្ចាស់មានព្រះបន្ទូលថា « ការរំលងទាំងឡាយនៃរាស្រ្តរបស់យើង » ។ បើមិនមែនសម្រាប់ការណ៍នោះទេ ស៊ីយ៉ូន « អាចបានប្រោសលោះ » ( គោលលទ្ធិ និងសេចក្ដីសញ្ញា ១០៥:២ ) ។ នៅពេលបងប្អូនអាន គោលលទ្ធិ និងសេចក្ដីសញ្ញា ១០៣:១–១២, ៣៦; ១០៥:១–១៩ បងប្អូនអាចសម្គាល់ឃើញអ្វីមួយដែលបានបង្អាក់ដល់ការស្ថាបនាស៊ីយ៉ូននៅរដ្ឋមិសសួរី និងអ្វីផ្សេងទៀតដែលអាចបានជួយស្ថាបនា ។ តើបងប្អូនរៀនអ្វីខ្លះដែលអាចជួយបងប្អូនឲ្យស្ថាបនាស៊ីយ៉ូននៅក្នុងដួងចិត្ត និងគេហដ្ឋាន និងសហគមរបស់បងប្អូន ?

គោលលទ្ធិ និងសេចក្ដីសញ្ញា ១០៣:១២–១៣, ៣៦ ; ១០៥:១–៦, ៩–១៩

ពរជ័យកើតមានបន្ទាប់ពីការសាកល្បងនៃសេចក្តីជំនឿ ។

ការចូលរួមនៅក្នុងក្រុមជំរំស៊ីយ៉ូន គឺជាការសាកល្បងនៃសេចក្តីជំនឿតាមរបៀបជាច្រើន ។ ការធ្វើដំណើរវែងឆ្ងាយ អាកាសធាតុក្តៅ ហើយពេលខ្លះខ្វះខាតអាហារ និងទឹក ។ បន្ទាប់ពីពួកគេបានស៊ូទ្រាំទាំងអស់ហើយ ក្រុមជំរំស៊ីយ៉ូននៅតែមិនបានជោគជ័យក្នុងបញ្ជូនពួកបរិសុទ្ធទៅដែនដីរបស់ពួកគេវិញ ។ សូមស្រមៃថា បងប្អូនមានឱកាសសរសេរសំបុត្រទៅសមាជិកម្នាក់នៃក្រុមជំរំស៊ីយ៉ូន ដែលមានសេចក្ដីជំនឿលើព្រះអម្ចាស់បានរង្គោះរង្គើដោយបទពិសោធន៍របស់គាត់ ឬនាង ។ តើបងប្អូនអាចនិយាយអ្វីខ្លះដើម្បីលើកទឹកចិត្តដល់បុគ្គលនេះ ? តើសេចក្តីពិតអ្វីខ្លះដែលបងប្អូនរកឃើញនៅក្នុង គោលលទ្ធិ និងសេចក្តីសញ្ញា ១០៣:៥–៧, ១២–១៣, ៣៦; ១០៥:១–៦, ៩–១៩ ដែលអាចជួយបាន ?

បន្ទាប់មក បងប្អូនអាចគិតអំពីគំរូនៃសម័យកាន់តែទំនើបពីការសាកល្បងដូចជានៅជំរំស៊ីយ៉ូន—ដូចជាអ្នកផ្សព្វផ្សាយសាសនាម្នាក់ដែលធ្វើការយ៉ាងលំបាក ប៉ុន្តែគ្មាននរណាម្នាក់ចូលរួមក្នុងសាសនាចក្រដោយសារការខិតខំរបស់គាត់ ឬនាងឡើយ ។ ដោយផ្អែកលើអ្វីដែលបងប្អូនបានសិក្សា តើបងប្អូននឹងជួយអ្នកផ្សព្វផ្សាយសាសនារូបនោះ ឲ្យមើលឃើញថាបេសកកម្មរបស់គាត់ ឬនាងនៅតែជោគជ័យដោយរបៀបណា ?

តើព្រះអម្ចាស់បានប្រទានពរអ្វីខ្លះដល់បងប្អូន « បន្ទាប់ពីការវេទនាដ៏ច្រើន » ? ( គោលលទ្ធិ និងសេចក្ដីសញ្ញា ១០៣:១២ ) ។

សូមមើលផងដែរ នីហ្វៃទី១ ១១:១៦–១៧; អាលម៉ា ៧:១១–១២; គោលលទ្ធិ និងសេចក្តីសញ្ញា ៦:៣៣–៣៦; ៨៤:៨៨; ១០១:៣៥–៣៦; ដាវីឌ អេ បែដណា « On the Lord’s Side: Lessons from Zion’s Camp » Ensign ខែ កក្កដា ឆ្នាំ ២០១៧ ទំព័រ ២៦–៣៥ ឬ Liahona ខែ កក្កដា ឆ្នាំ ២០១៧ ទំព័រ ១៤–២៣; Topics and Questions « Endure to the End » នៅលើបណ្ណាល័យដំណឹងល្អ « គ្រឹះដ៏មាំមួន » ទំនុកតម្កើង ល.រ. ៣៧ ។

រៀបចំខ្លួនដោយការសិក្សាអត្ថបទប្រវត្តិសាស្រ្តនៃវិវរណៈនេះ ។ ការយល់ដឹងអំពីបរិយាកាសនៃវិវរណៈនៅក្នុងគោលលទ្ធិ និងសេចក្តីសញ្ញា អាចជួយបងប្អូនឲ្យយល់ និងអនុវត្តតាមគោលការណ៍ដែលវិវរណៈទាំងនោះបង្រៀន ។ ចូរមកតាមខ្ញុំ ផ្ដល់នូវតំណជាច្រើនទៅកាន់ធនធានទាំងនេះ ។ សម្រាប់ គោលលទ្ធិ និងសេចក្តីសញ្ញា ១០២–៥ សូមមើលផងដែរ Saints ១:១៩៤–២០៦; « The Acceptable Offering of Zion’s Camp » នៅក្នុង Revelations in Context ទំព័រ ២១៣–២១៨ និង « Voices of the Restoration: Zion’s Camp » ។

ទន្លេនៅរដ្ឋមិសសួរី ស.រ.អា. — ជំរំអ៊ីស្រាអែលបានបោះជំរំនៅតាមច្រាំងទន្លេ លីថល ហ្វីសឆីង ។

តើអ្វីជាគោលបំណងនៃឧបសគ្គទាំងនេះ ?

ដំបូន្មានរបស់អែលឌើរ អួសុន អែហ្វ វិតនី អំពីគោលបំណងនៃឧបសគ្គទាំងនោះ ៖ « គ្មានការឈឺចាប់ដែលយើងរងទុក្ខ គ្មានការសាកល្បងដែលយើងទទួលបទពិសោធន៍ក្លាយជាឥតប្រយោជន៍នោះទេ ។ វាបម្រើដល់ការអប់រំ ដល់ការអភិវឌ្ឍនៃគុណសម្បត្តិរបស់យើងដូចជា ការអត់ធ្មត់ សេចក្ដីជំនឿ ការរឹងមាំ និងការបន្ទាបខ្លួន ។ អ្វីទាំងអស់ដែលយើងរងទុក្ខ និងអ្វីទាំងអស់ដែលយើងស៊ូទ្រាំ ជាពិសេសនៅពេលយើងស៊ូទ្រាំវាដោយអត់ធ្មត់នោះ វានឹងពង្រឹងដល់អត្តចរិតរបស់យើង បន្សុទ្ធដួងចិត្តយើង ពង្រីកព្រលឹងយើង និងធ្វើឲ្យយើងចេះស្រឡាញ់ និងសប្បុរសកាន់តែខ្លាំង កាន់តែសក្តិសមនឹងត្រូវបានហៅថាជាបុត្រាបុត្រីនៃព្រះ … ហើយវាគឺតាមរយៈសេចក្ដីសោកសៅ និងការរងទុក្ខ ការលំបាក និង ទុក្ខព្រួយ ដែលយើងទទួលបានការអប់រំដែលយើងមកទីនេះដើម្បីទទួលបាន ហើយដែលនឹងធ្វើឲ្យយើងកាន់តែប្រែក្លាយដូចជាព្រះវរបិតា និង ព្រះមាតាដែលគង់នៅលើស្ថានសួគ៌ » ( នៅក្នុង ស្ពែនស៊ើរ ដបុលយូ ឃឹមបឹល Faith Precedes the Miracle [ ឆ្នាំ ១៩៧២ ] ទំព័រ ៩៨ ) ។

គោលលទ្ធិ និងសេចក្ដីសញ្ញា ១០៤:១១–១៨, ៧៨–៨៣

ព្រះអម្ចាស់បានឲ្យខ្ញុំធ្វើជា « នាយតម្រួតការលើព្រះពរទាំងឡាយខាងផែនដី » ។

បន្ថែមពីលើការសាកល្បងទាំងឡាយនៅរដ្ឋមីសសួរីនៅក្នុងឆ្នាំ ១៨៣៤ សាសនាចក្របានប្រឈមមុខនឹងបញ្ហាហិរញ្ញវត្ថុ រួមទាំងបំណុល និងការចំណាយផ្សេងៗ ។ នៅក្នុង កណ្ឌទី ១០៤ ព្រះអម្ចាស់បានប្រទានការប្រឹក្សាអំពីស្ថានភាពហិរញ្ញវត្ថុរបស់សាសនាចក្រ ។ តើបងប្អូនអាចអនុវត្តគោលការណ៍នៅក្នុង ខទី ១១–១៨ និង ៧៨–៨៣ ចំពោះការសម្រេចចិត្តលើហិរញ្ញវត្ថុរបស់អ្នកផ្ទាល់ដោយរបៀបណា ?

សូមមើលផងដែរ « Treasure in Heaven: The John Tanner Story » និង « The Labor of His Hands » ( វីដេអូ ) នៅលើបណ្ណាល័យដំណឹងល្អ ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ១០៣:៩

ខ្ញុំអាចធ្វើជា « ពន្លឺដល់លោកិយ » តាមរយៈការធ្វើតាមព្រះយេស៊ូវ ។

បងប្អូនអាចអញ្ជើញកូនៗរបស់បងប្អូនឲ្យកាន់រូបភាពអំពូលភ្លើង ទៀន ឬប្រភពពន្លឺផ្សេងទៀត ពេលបងប្អូនអាន គោលលទ្ធិ និងសេចក្តីសញ្ញា ១០៣:៩ ។ តើយើងអាចដូចជាពន្លឺដល់អ្នកដទៃយ៉ាងដូចម្ដេច ពេលយើងធ្វើតាមព្រះយេស៊ូវគ្រីស្ទ ? សូមមើលផងដែរ « ព្រះយេស៊ូវចង់ឲ្យខ្ញុំធ្វើជាពន្លឺ » ( សៀវភៅចម្រៀងកុមារ ទំព័រ ៣៨–៣៩ ) ។

ពន្លឺភ្លើងទៀន — ខ្ញុំអាចដូចជាពន្លឺមួយបំភ្លឺដល់មនុស្សដទៃ នៅពេលខ្ញុំធ្វើតាមព្រះគ្រីស្ទ ។

គោលលទ្ធិ និងសេចក្ដីសញ្ញា ១០៤:១៣–១៨

ព្រះអម្ចាស់សព្វព្រះទ័យឲ្យខ្ញុំចែកចាយអ្វីដែលខ្ញុំមានជាមួយអ្នកខ្វះខាត ។

បងប្អូនប្រហែលជាចង់ផ្តល់ពេលឲ្យកូនៗរបស់បងប្អូនពីរបីនាទី ដើម្បីធ្វើបញ្ជីពរជ័យដែលព្រះបានប្រទានដល់ពួកគេ ( ដូចជាអាហារ សំលៀកបំពាក់ ទេពកោសល្យ សេចក្តីជំនឿ និងផ្ទះជាដើម ) ។ សូមលើកទឹកចិត្តពួកគេឲ្យសរសេរឲ្យបានច្រើនតាមដែលពួកគេអាចធ្វើបាន ។ បន្ទាប់មកបងប្អូនអាចអានជាមួយគ្នា គោលលទ្ធិ និង សេចក្ដីសញ្ញា ១០៤:១៣–១៨ ដោយរកមើលចម្លើយចំពោះសំណួរទាំងនេះ ៖ តើនរណាជាម្ចាស់ពិតប្រាកដលើគ្រប់ទាំងអស់ ? តើទ្រង់ចង់ឲ្យយើងធ្វើអ្វីខ្លះជាមួយគ្រប់របស់ទាំងអស់នេះ ? បងប្អូន និងកូនៗរបស់បងប្អូនអាចចែកចាយបទពិសោធន៍ ដែលមាននរណាម្នាក់បានផ្តល់ឲ្យបងប្អូននូវអ្វីមួយដែលបងប្អូនត្រូវការ ( សូមមើលផងដែរ « The Coat » [ វីដេអូ ] នៅលើបណ្ណាល័យដំណឹងល្អ ) ។

2:7
The Coat

គោលលទ្ធិ និងសេចក្ដីសញ្ញា ១០៤:៤២

ព្រះអម្ចាស់នឹងប្រទានពរដល់ខ្ញុំ នៅពេលខ្ញុំគោរពតាមព្រះបញ្ញត្តិរបស់ទ្រង់ ។

ជាច្រើនដងនៅក្នុង កណ្ឌទី ១០៤ ព្រះអម្ចាស់បានសន្យាថានឹង « ចម្រើនពរដ៏ច្រើនអនេក » ដល់អ្នកដែលគោរពព្រះបញ្ញត្តិរបស់ទ្រង់ដោយស្មោះត្រង់ ។ ដើម្បីជួយកុមារយល់អំពីអត្ថន័យនៃពាក្យ « ច្រើនអនេក » បងប្អូនអាចគូសរង្វង់មួយ ហើយសុំឲ្យកូនៗរបស់បងប្អូនជួយបងប្អូនគុណចំនួនរង្វង់—គូរពីរ បន្ទាប់មកបួន បន្ទាប់មកប្រាំបី បន្ទាប់មកដប់ប្រាំមួយ ។ល។ រាល់ពេលបងប្អូនបន្ថែមរូបរង្វង់មូល សូមជួយកូនៗរបស់បងប្អូនឲ្យគិតអំពីពរជ័យទាំងឡាយដែលព្រះវរបិតាសួគ៌បានប្រទានដល់ពួកគេ ។

គោលលទ្ធិ និងសេចក្តីសញ្ញា ១០៥:៣៨–៤០

ខ្ញុំអាចក្លាយជាអ្នកផ្សះផ្សាគេបាន ។

ដើម្បីជួយកូនៗរបស់បងប្អូនរៀនដំណើររឿងពីក្រុមជំរំស៊ីយ៉ូន បងប្អូនអាចចែកចាយ « ជំពូកទី ៣៦ ៖ ក្រុមជំរំស៊ីយ៉ូន » ( នៅក្នុង ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ១៣៥–១៣៩ ឬវីដេអូដែលទាក់ទងនៅលើបណ្ណាល័យដំណឹងល្អ ) ។ សូមឈប់បន្តិចដើម្បីនិយាយអំពីមេរៀនដែលយើងអាចរៀនចេញពីក្រុមជំរំស៊ីយ៉ូន—ឧទាហរណ៍ ថាព្រះអម្ចាស់ចង់ឲ្យយើងមានសេចក្តីសុខសាន្ត ហើយធ្វើការជាមួយគ្នា ជំនួសឲ្យការឈ្លោះប្រកែក និងវៃគ្នា ( សូមមើលផងដែរ រ័សុល អិម ណិលសុន « ត្រូវការអ្នកដែលផ្សះផ្សាគេ » លីអាហូណា ខែ ឧសភា ឆ្នាំ ២០២៣ ទំព័រ ៩៨–១០១ ) ។

3:30
Chapter 36: Zion’s Camp: February–June 1834
បងប្អូនក៏អាចអាន គោលលទ្ធិ និងសេចក្ដីសញ្ញា ១០៥:៣៨–៤០ ហើយសូមឲ្យកុមារក្រោកឈរ នៅពេលពួកគេឮពាក្យ « សេចក្តីសុខសាន្ត » ។ សូមពន្យល់ថា ព្រះអម្ចាស់មានព្រះទ័យចង់ឲ្យពួកបរិសុទ្ធមានសេចក្តីសុខសាន្តជាមួយមនុស្សដែលមិនមានចិត្តល្អ ។ សូមជួយកូនៗរបស់បងប្អូនឲ្យគិតអំពីអ្វីដែលពួកគេអាចធ្វើដើម្បីធ្វើជាអ្នកផ្សះផ្សាគេ ហើយអញ្ជើញពួកគេឲ្យសម្តែងពីស្ថានភាពមួយចំនួន ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

រូបគំនូរនៃក្រុមជំរំស៊ីយ៉ូន — ក្រុមជំរំស៊ីយ៉ូន ( Zion’s Camp at Fishing River ) ដោយ ជូឌីត អេ មែរ