A Glorious Light—Kirtland Temple [Isa ka Mahimayaon nga Kasanag—Templo sang Kirtland], ni Glen S. Hopkinson

Septyembre 29–Oktubre 5: “Balay Mo Ini, Lugar sang Imo Pagkabalaan”

Doktrina kag mga Kasugtanan 109–110

Ang mga pwertahan sang Templo sang Kirtland indi pa kuntani dapat magbukas hasta alas otso sang aga sang Marso 27, 1836. Pero ang mga Santos nga nagalaum nga makaentra sa programa sang pagdedikar nagsugod na nga maglinya sang alas siyete. Kinahanglan sang lugar para sa sobra nga mga tawo kag dayon sang ikaduha nga sesyon para maakumodar ang tanan. Kag indi lang ang mga buhi ang nalangkag nga mag-entra. Madamo nga saksi ang nakakita sang mga anghel sa sulod sang templo kag bisan sa atop, samtang kag pagkatapos sang dedikasyon. Daw matuod gid nga “ang kasoldaduhan sang langit” nag-abot para “magkanta kag [mag]singgit” upod sa mga Santos sa Ulihing mga Adlaw (“The Spirit of God,” Hymns, no. 2).

Ngaa kadako gid sang kalangkag—sa duta kag sa langit? Pagligad sang mga siglo, may balay na liwat sang Ginuo sa duta. Ginatuman sang Ginuo ang Iya promisa nga hatagan ang Iya mga Santos sang “gahum halin sa kahitaasan” (Doktrina kag mga Kasugtanan 38:32). Kag ini, siling Niya, “ini ang pagsugod [pa lang] sang bugay” (Doktrina kag mga Kasugtanan 110:10). Ang panahon nga aton ginapuy-an sa karon—upod ang ginpadasig nga mga buluhaton kag mga ordinansa sa templo para sa minilyon nga buhi kag minatay—nagsugod sa Kirtland, sang “ang tabon sang duta [nag]-amat idog” (“The Spirit of God”).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 109

Ang Ginuo nagatanyag sa akon sang madamo nga mga bugay paagi sa mga kasugtanan sa templo.

Lain ang Templo sang Kirtland sa mga templo nga nahibal-an naton sa karon. Halimbawa, wala didto sang mga altar kag tulugmawan. Pero ang mga bugay nga ginlaragway sa seksyon 109, ang pangamuyo sa pagdedikar sang Templo sang Kirtland, ara man sa balay sang Ginuo sa karon. Rebyuha ang masunod nga mga bersikulo para pangitaon ang iban nga mga bugay, kag binagbinaga kon paano ini nakapabakod sa imo relasyon sa Amay nga Langitnon kag kay Jesucristo.

Mga bersikulo 5, 12–13 (tan-awa man sa Doktrina kag mga Kasugtanan 110:6–8): Sa balay sang Ginuo, mapahayag Niya ang Iya Kaugalingon sa akon, kag mabatyagan ko ang Iya gahum.

Mga bersikulo 9, 15–19, 26, 78–79:

Mga bersikulo 21–23:

Mga bersikulo 24–33, 42–46:

Mga bersikulo 35–39:

Iban pa nga mga bugay:

Kon nakakadto ka na sa balay sang Ginuo, panumduma kon paano nagkalatuman ining mga promisa sa imo kabuhi.

Ang himno nga “The Spirit of God]” (Hymns, no. 2) ginsulat para sa dedikasyon sang Templo sang Kirtland—kag ginakanta na ini sa kada dedikasyon sang templo sugod sadto. Pamensara nga kantahon ukon pamatian ini bilang parte sa imo pagtuon kag pagsimba. Ano nga mga bugay sang templo ang nakita mo nga ginlarawan sa sining himno?

Doktrina kag mga Kasugtanan 109

Ang pangamuyo komunikasyon sa Amay nga Langitnon.

Ang seksyon 109 amo ang pangamuyo sa dedikasyon nga ginhatag kay Joseph Smith paagi sa rebelasyon (tan-awa sa tig-ulo sang seksyon). Ano ang imo natun-an parte sa pangamuyo sa sining seksyon? Halimbawa, pwede mo tandaan kon ano ang ginpasalamatan kag ginpangayo nga mga bugay sang Propeta. Ano pa gid ang iya ginhambal sa sining pangamuyo? Samtang nagatuon ka, pwede mo binagbinagon ang imo komunikasyon sa Amay nga Langitnon. Ano ang imo natun-an parte sa Iya kag sa Iya Anak sa sining pangamuyo?

Kon gusto mo basahon ang mga pangamuyo sa dedikasyon sang iban nga mga templo, dala ang templo nga malapit sa inyo, bisitahi ang page sina nga templo sa temples.ChurchofJesusChrist.org.

Doktrina kag mga Kasugtanan 110:1–10

Mapahayag sang Ginuo ang Iya Kaugalingon sa akon sa Iya templo.

Samtang ginabasa mo ang mga deskripsyon sang Manluluwas sa Doktrina kag mga Kasugtanan 110:1–10, upod ang tig-ulo sang seksyon, binagbinaga kon ano ang ginahambal sining mga bersikulo parte sa Iya.

Paano ginapakita ni Jesucristo ang Iya Kaugalingon—ukon ginapakilala sa imo ang Iya Kaugalingon—sa Iya balay? Paano ka Niya ginabuligan nga mahibal-an nga ginabaton Niya ang imo mga sakripisyo?

Sa sulod sang Templo sang Kirtland.

Doktrina kag mga Kasugtanan 110:10–16

Ginapangunahan sang Manluluwas ang Iya buluhaton paagi sa mga yabi sang priesthood.

Antes lang gid magpakita si Moises, Elias, kag Elias sa templo para ipanumbalik ang mga yabi sang priesthood, si Jesucristo nagsiling, “Ini ang pagsugod sang bugay nga igabubo sa mga ulo sang akon katawhan” (Doktrina kag mga Kasugtanan 110:10). Samtang ginabasa mo ang mga bersikulo 11–16, hunahunaa ang mga bugay nga ginabubo sang Manluluwas sa imo paagi sa buluhaton nga ginadumalahan sining mga yabi. Halimbawa:

• Bersikulo 11: si Moises kag ang mga yabi sa pagtipon sang Israel (ukon pangmisyonaryo nga buluhaton). Paano ka ginbugayan sang Ginuo kag ang imo pamilya paagi sa pangmisyonaryo nga pagpaninguha sang Iya Simbahan?

• Bersikulo 12: Si Elias kag ang mga yabi sang ebanghelyo ni Abraham, upod ang kasugtanan kay Abraham. Paano ka mabugayan sang Ginuo kag ang “tanan nga henerasyon nga magasunod pa sa [imo]” tungod sang imo mga kasugtanan? (Tan-awa sa Russell M. Nelson, “Ang Wala Katubtuban nga Kasugtanan,” Liahona, Okt. 2022, 4–11; Giya sa Balaan nga mga Kasulatan, “Elias,” Librarya sang Ebanghelyo.)

• Mga bersikulo 13–16: Si Elias kag ang gahum sa pagselyo, nga ginapakita paagi sa buluhaton sa templo kag family history. Ngaa sa banta mo nga gusto sang Amay nga Langitnon nga mangin konektado ka sa imo mga katigulangan paagi sa mga ordinansa sa templo?

Ano nga mga koneksyon ang imo makita sa sining mga yabi kag sa aton mga responsibilidad sa buluhaton sang Dios sa kaluwasan kag pangkahitaasan (pagpangabuhi sang ebanghelyo, pag-atipan sang mga nagakinahanglan, pag-imbitar sang tanan nga magbaton sang ebanghelyo, kag pag-isa sang mga pamilya sa wala katapusan)?

Ano ang imo nangin eksperiyensya sa buluhaton sang Dios sa kaluwasan kag pangkahitaasan? Ano ang ginatudlo sa imo sining mga eksperiyensya parte sa Manluluwas, sa Iya Simbahan, kag sa Iya buluhaton?

Magpangita sang mga paagi para paentrahon ang iban. Kon nagatudlo ka sang Doktrina kag mga Kasugtanan 110:11–16, hatagi ang tagsa ka estudyante sang tulun-an parte kay Moises, Elias, ukon Elijah kag sang mga yabi nga iya ginpanumbalik. Dayon pwede nga iistorya sang mga estudyante ang ila mga nadiskubrehan. Ang paghimo sini nagahatag sang tsansa sa tanan sa pagtuon kag pagtudlo. (Tan-awa sa Pagtudlo sa Paagi sang Manluluwas, 24–27).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 109:12–13; 110:1–7

Ang templo amo ang balay sang Ginuo.

• Pwede ninyo hambalan sang imo kabataan ang butang nga nanamian ninyo sa inyo balay. Dayon pwede kamo magtan-aw sang litrato sang Kirtland Temple kag gamita ang Doktrina kag mga Kasugtanan 109:12–13; 110:1–7 para hambalan kon paano gindedikar ang templo kag nangin balay sang Ginuo. Iistorya sa isa kag isa kon ano ang nanamian mo sa balay sang Ginuo.

  Chapter 39: The Kirtland Temple Is Dedicated: January–March 1836

• Pwede ninyo hunahunaon sang imo kabataan nga may abyan nga nagapangita sang inyo balay. Paano naton buligan ang aton abyan nga mahibal-an kon diin ang aton balay? Paano naton mahibal-an nga ang templo balay sang Ginuo? (tan-awa sa Doktrina kag mga Kasugtanan 109:12–13).

Doktrina kag mga Kasugtanan 110

Ang Manluluwas nagabendisyon sang Iya katawhan paagi sa mga yabi sang priesthood.

• Pwede mo gamiton ang pahina sang kahiwatan sini nga semana para iistorya sa mga kabataan ang parte sa langitnon nga mga persona nga nagbisita sa templo. Pwede mo man gamiton ang litrato sa katapusan sining outline.

  The Kirtland Temple

• Para tun-an ang importansya sang natabo sa Templo sang Kirtland, pwede ninyo hambalan sang imo kabataan kon ano ang ginahimo sang mga yabi. Pwede nga magbulos-bulos ang imo kabataan sa pag-uyat sang mga yabi kag kuno abi nagabukas sang gintrangkahan nga puwertahan. Buligi sila nga pangitaon ang tinaga nga mga yabi sa Doktrina kag mga Kasugtanan 110:11–16, kag hambalan ang mga bugay nga ginabuksan sining mga yabi. Pwede mo ipaathag nga ang mga yabi sang priesthood amo ang pahanugot sang Dios para pangunahan ang Iya Simbahan. Ipakigbahin ang imo pagpasalamat nga ginhatagan kita sang Ginuo sang mga yabi sang priesthood.

Doktrina kag mga Kasugtanan 110:15

Gusto sang Manluluwas nga lisuon ko ang akon tagipusuon sa akon mga katigulangan.

• Pagkatapos basahon ang Doktrina kag mga Kasugtanan 110:15 sing ululupod, sugiri ang imo kabataan sang eksperiyensya nga nakabulig liso sang imo tagipusuon sa imo mga katigulangan.

• Ano ayhan ang makabulig nga “lisuon ang mga tagipusuon” sang imo mga anak sa ila mga katigulangan? FamilySearch.org/discovery Pwede ninyo bululigan nga hibaluon [kon sin-o] ang mga katigulangan nga nagakinahanglan sang mga ordinansa sa templo. Ngaa gusto ni Jesucristo nga obrahon naton ini nga buluhaton?

Para sa dugang nga mga ideya, tan-awa sa isyu sang Abyan nga magasin sini nga bulan.

Vision in the Kirtland Temple [Panan-awon sa Templo sang Kirtland], ni Gary E. Smith