“ສຽງຂອງການຟື້ນຟູ: ການສະແດງໃຫ້ປະຈັກທາງວິນຍານ ແລະ ພຣະວິຫານເຄີດແລນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ການສະແດງໃຫ້ປະຈັກທາງວິນຍານ ແລະ ພຣະວິຫານເຄີດແລນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ສຽງຂອງການຟື້ນຟູ

ການສະແດງໃຫ້ປະຈັກທາງວິນຍານ ແລະ ພຣະວິຫານເຄີດແລນ

ຢູ່ຂ້າງລຸ່ມແມ່ນຖ້ອຍຄຳຂອງໄພ່ພົນຍຸກສຸດທ້າຍ ຜູ້ທີ່ໄດ້ຢູ່ໃນພຣະວິຫານເຄີດແລນ ລະຫວ່າງການອຸທິດ ແລະ ຢູ່ໃນການປະຊຸມອື່ນໆ ຕໍ່ຈາກນັ້ນ. ຫລາຍຄົນໄດ້ປຽບທຽບປະສົບການຂອງເຂົາເຈົ້າໃສ່ກັບປະສົບການຂອງໄພ່ພົນໃນສະໄໝບູຮານ ເມື່ອ “ອຳນາດຈາກເບື້ອງເທິງລົງມາເທິງ” ເຂົາເຈົ້າ ໃນວັນເພັນເຕຄໍສະເຕ (ລູກາ 24:49; ເບິ່ງ ກິດຈະການ 2:1–4; ຄຳສອນ ແລະ ພັນທະສັນຍາ 109:36–37 ນຳອີກ).

ອີລາຍຊາ ອາ ສະໂນ

“ພິທີການອຸທິດນັ້ນ ອາດມີການຝຶກຊ້ອມກັນກ່ອນ, ແຕ່ບໍ່ມີພາສາມະຕະໃດ ທີ່ຈະສາມາດບັນຍາຍ ເຖິງການສະແດງໃຫ້ປະຈັກແຫ່ງສະຫວັນ ໃນວັນທີ່ໜ້າຈົດຈຳນັ້ນ. ເຫລົ່າທູດສະຫວັນໄດ້ມາປະກົດຕໍ່ບາງຄົນ, ໃນຂະນະທີ່ທຸກຄົນທີ່ຢູ່ທີ່ນັ້ນຮັບຮູ້ເຖິງການສະຖິດຢູ່ຂອງພຣະເຈົ້າ, ແລະ ຫົວໃຈແຕ່ລະດວງໄດ້ເຕັມໄປດ້ວຍ ‘ຄວາມຊື່ນຊົມ ຢ່າງທີ່ບອກບໍ່ໄດ້ ແລະ ເຕັມໄປດ້ວຍລັດສະໝີພາບ.’”¹

ຊິວເວຍ ຄັດເລີ ແວບ

“ໜຶ່ງໃນສິ່ງທີ່ຂ້າພະເຈົ້າຈື່ຈຳໄດ້ແມ່ນການອຸທິດພຣະວິຫານ. ພໍ່ຂອງຂ້າພະເຈົ້າໄດ້ຍົກພວກເຮົາຂຶ້ນນັ່ງຕັກເພິ່ນ ແລະ ໄດ້ບອກພວກເຮົາວ່າ ເປັນຫຍັງພວກເຮົາຈຶ່ງຈະໄປ ແລະ ການອຸທິດບ້ານໃຫ້ພຣະເຈົ້ານັ້ນໝາຍຄວາມວ່າແນວໃດ. ແລະ ເຖິງແມ່ນວ່າຂ້າພະເຈົ້າຍັງນ້ອຍຢູ່ໃນຕອນນັ້ນ, ຂ້າພະເຈົ້າກໍຍັງຈື່ໂອກາດນັ້ນໄດ້ຢ່າງຊັດເຈນ. ຂ້າພະເຈົ້າສາມາດຫວນຄິດຜ່ານໄລຍະເວລາຫລາຍປີ ແລະ ໄດ້ເຫັນຕົວເອງຕອນຂ້າພະເຈົ້າໄດ້ເຫັນສາດສະດາໂຈເຊັບ, ກຳລັງຢືນຢູ່ ແລະ ຍົກມືຂຶ້ນສູ່ເທິງຟ້າສະຫວັນ, ໃບໜ້າຂອງເພິ່ນຊີດຂາວ, ນ້ຳຕາໄດ້ໄຫລລົງອາບແກ້ມເພິ່ນ ຂະນະທີ່ເພິ່ນກ່າວໃນວັນທີ່ໜ້າຈົດຈຳນັ້ນ. ເບິ່ງຄືວ່າ ເກືອບທຸກຄົນນ້ຳຕາໄຫລຄືກັນ. ພຣະວິຫານອັ່ງອໍໄປດ້ວຍຜູ້ຄົນ ຈົນວ່າເດັກນ້ອຍສ່ວນຫລາຍໄດ້ນັ່ງຕັກຜູ້ໃຫຍ່, ເອື້ອຍຂອງຂ້າພະເຈົ້າໄດ້ນັ່ງຕັກພໍ່, ຂ້າພະເຈົ້າໄດ້ນັ່ງຕັກແມ່. ຂ້າພະເຈົ້າຍັງຈື່ເສື້ອຜ້າທີ່ພວກເຮົານຸ່ງໃນມື້ນັ້ນ. ໃນເວລານັ້ນ ຄວາມຄິດຂອງຂ້າພະເຈົ້າຍັງອ່ອນເກີນໄປທີ່ຈະສາມາດເຂົ້າໃຈເຖິງຄວາມສຳຄັນທັງໝົດຂອງມັນໄດ້, ແຕ່ເມື່ອເວລາໄດ້ຜ່ານໄປ ຂ້າພະເຈົ້າໄດ້ເຂົ້າໃຈຫລາຍຂຶ້ນເລື້ອຍໆ, ແລະ ຂ້າພະເຈົ້າຮູ້ບຸນຄຸນທີ່ຂ້າພະເຈົ້າໄດ້ຮັບສິດທິພິເສດທີ່ໄດ້ຢູ່ທີ່ນັ້ນ.”²

ອໍລີເວີ ຄາວເດີຣີ

“ໃນຕອນແລງ ຂ້າພະເຈົ້າໄດ້ພົບກັບເຈົ້າໜ້າທີ່ຂອງສາດສະໜາຈັກ ຢູ່ໃນບ້ານຂອງພຣະຜູ້ເປັນເຈົ້າ. ພຣະວິນຍານໄດ້ຖອກເທລົງມາ—ຂ້າພະເຈົ້າໄດ້ເຫັນລັດສະໝີພາບຂອງພຣະເຈົ້າ, ຄືກັນກັບກ້ອນເມກໃຫຍ່, ລົງມາ ແລະ ປົກຄຸມພຣະວິຫານ, ແລະ ເຕັມຢູ່ໃນພຣະວິຫານຄືກັນກັບລົມອັນມີພະລັງແຮງ. ພ້ອມນີ້ ຂ້າພະເຈົ້າຍັງໄດ້ເຫັນລີ້ນເປັນແສກ, ຄືກັບວ່າເປັນຮູບແປວໄຟ ລົງມາຍັງຫລາຍຄົນ, … ຂະນະທີ່ເຂົາເຈົ້າເວົ້າພາສາຕ່າງໆ ແລະ ທຳນາຍ.”³

ເບັນຈາມິນ ບຣາວ

“ມີພາບນິມິດຫລາຍຢ່າງປະກົດຂຶ້ນ. ບາງຄົນໄດ້ເຫັນໝອນ ຫລື ກ້ອນເມກຢູ່ເທິງພຣະວິຫານ, ຮຸ່ງເຫລື້ອມເປັນສີຄຳເມື່ອສະທ້ອນແສງແດດ. ອີກສອງຄົນໄດ້ເຫັນບຸກຄົນສາມພຣະອົງລ່ອງລອຍຢູ່ໃນຫ້ອງພ້ອມກັບກະແຈຫລາຍອັນທີ່ຮຸ່ງເຫລື້ອມຢູ່ໃນພຣະຫັດຂອງພວກພຣະອົງ, ແລະ ກໍມີສາຍໂສ້ທີ່ຮຸ່ງເຫລື້ອມຢູ່ໃນພຣະຫັດຂອງພວກພຣະອົງເຊັ່ນກັນ.”⁴

ອໍສັນ ພະແຣັດ

“ພຣະເຈົ້າໄດ້ສະຖິດຢູ່ທີ່ນັ້ນ, ເຫລົ່າທູດສະຫວັນຂອງພຣະອົງກໍຢູ່ທີ່ນັ້ນ, ພຣະວິນຍານບໍລິສຸດກໍຢູ່ໃນທ່າມກາງຜູ້ຄົນ … ແລະ ເຂົາເຈົ້າເຕັມປ່ຽມໄປດ້ວຍອຳນາດ ແລະ ການດົນໃຈຈາກພຣະວິນຍານບໍລິສຸດ ແຕ່ຫົວເຖິງຕີນ.”⁵

ແນນຊີ ນາໂອມີ ອາເລັກແຊນເດີ ທະເຣຊີ

“[ເມື່ອ] ພຣະວິຫານໄດ້ສຳເລັດ ແລະ ໄດ້ຖືກອຸທິດແລ້ວ … ມັນແມ່ນສອງມື້ທີ່ຂ້າພະເຈົ້າມີຄວາມສຸກຫລາຍທີ່ສຸດໃນຊີວິດ. ເພງສວດທີ່ເໝາະສົມທີ່ຖືກແຕ່ງຂຶ້ນສຳລັບໂອກາດນັ້ນແມ່ນ ‘ພຣະວິນຍານພຣະເຈົ້າເໝືອນດັ່ງໄຟກຳລັງລຸກໄໝ້.’ ມັນເປັນຄວາມຈິງທີ່ວ່າ ອິດທິພົນແຫ່ງສະຫວັນໄດ້ລົງມາຢູ່ເທິງບ້ານຫລັງນັ້ນ. … ຂ້າພະເຈົ້າຮູ້ສຶກວ່າ ມັນເປັນສະຫວັນເທິງໂລກ.”⁶