“ວັນທີ 20–26 ເດືອນຕຸລາ: ‘ໂອ້ ພຣະອົງເຈົ້າ, ພຣະອົງຊົງປະທັບຢູ່ບ່ອນໃດ?’: ຄຳສອນ ແລະ ພັນທະສັນຍາ 121–123,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 121–123,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Liberty Jail [ຄຸກລີເບີຕີ], ໂດຍ ແວວເດັນ ແອນເດີເຊັນ

ວັນທີ 20–26 ເດືອນຕຸລາ: “ໂອ້ ພຣະອົງເຈົ້າ, ພຣະອົງຊົງປະທັບຢູ່ບ່ອນໃດ?”

ຄຳສອນ ແລະ ພັນທະສັນຍາ 121–123

ຊັ້ນລຸ່ມຂອງຄຸກໃນເມືອງລີເບີຕີ, ລັດມີເຊີຣີ, ຮູ້ຈັກກັນວ່າ “ຫ້ອງມືດ.” ຝາຫ້ອງກໍໜາ, ພື້ນຫ້ອງກໍເຢັນ ແລະ ສົກກະປົກ, ອາຫານກໍເລັກນ້ອຍ ແລະ ເນົ່າເໝັນ, ແລະ ປ່ອງຢ້ຽມລູກກົງເຫລັກແຄບໆສອງບານໃກ້ເພດານ ກໍເປີດຮັບແສງໜ້ອຍຫລາຍ. ນີ້ແມ່ນບ່ອນທີ່ ໂຈເຊັບ ສະມິດ ແລະ ອີກສອງສາມຄົນໄດ້ໃຊ້ເວລາສີ່ເດືອນທີ່ໜາວເຢັນໃນລະດູໜາວຂອງປີ 1838–39. ລະຫວ່າງເວລານີ້, ໂຈເຊັບໄດ້ຮັບຂ່າວເລື້ອຍໆກ່ຽວກັບການຮັບທຸກທໍລະມານຂອງໄພ່ພົນ. ຄວາມສະຫງົບສຸກ ແລະ ຄວາມຫວັງທີ່ຮູ້ສຶກໃນເມືອງຟາແວັດ ມີຢູ່ພຽງແຕ່ສອງສາມເດືອນເທົ່ານັ້ນ, ແລະ ບັດນີ້ໄພ່ພົນກໍຂາດບ້ານຢູ່ອາໄສອີກຄັ້ງ, ຖືກຂັບໄລ່ເຂົ້າໄປໃນຖິ່ນແຫ້ງແລ້ງກັນດານ ເພື່ອຊອກຫາສະຖານທີ່ອື່ນອີກເພື່ອເລີ່ມຕົ້ນໃໝ່—ເທື່ອນີ້ສາດສະດາໄດ້ຖືກຈຳຄຸກ.

ແລະ ເຖິງປານນັ້ນ, ແມ່ນແຕ່ຢູ່ໃນຄຸກທີ່ໜ້າສັງເວດ, “ຄວາມຮູ້ຈາກສະຫວັນ” ກໍ “[ຖອກເທ] ລົງມາ” (ຄຳສອນ ແລະ ພັນທະສັນຍາ 121:33). ຄຳຖາມຂອງໂຈເຊັບ “ໂອ້ ພຣະອົງເຈົ້າ, ພຣະອົງຊົງປະທັບຢູ່ບ່ອນໃດ?” ໄດ້ຮັບຄຳຕອບຢ່າງແຈ່ມແຈ້ງ ແລະ ຢ່າງມີພະລັງວ່າ: “ຢ່າຢ້ານກົວ … , ເພາະພຣະເຈົ້າຈະຢູ່ກັບເຈົ້າຕະຫລອດການ ແລະ ຕະຫລອດໄປ” (ຄຳສອນ ແລະ ພັນທະສັນຍາ 121:1; 122:9).

ເບິ່ງ Saints, 1:323–96; “Within the Walls of Liberty Jail,” ໃນ Revelations in Context, 256–63.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 121:1–10, 23–33; 122

ກັບພຣະເຈົ້າ, ຄວາມຍາກລຳບາກສາມາດ “ເກີດຂຶ້ນເພື່ອຄວາມດີ [ຂອງເຮົາ].”

ເມື່ອເຮົາ ຫລື ຄົນທີ່ເຮົາຮັກມີຄວາມທຸກທໍລະມານ, ມັນເປັນສິ່ງທຳມະດາທີ່ເຮົາຈະສົງໄສຖ້າຫາກວ່າພຣະເຈົ້າຮູ້ເຫັນກ່ຽວກັບເຮົາຢູ່ຫລືບໍ່. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 121:1–6, ໃຫ້ຄິດເຖິງເວລາທີ່ທ່ານມີຄຳຖາມ ຫລື ມີຄວາມຮູ້ສຶກຄືກັນກັບດັ່ງທີ່ໂຈເຊັບ ສະມິດ ມີ. ທ່ານພົບເຫັນຫຍັງແດ່ຢູ່ໃນຄຳຕອບຂອງພຣະຜູ້ເປັນເຈົ້າ ທີ່ອາດຊ່ວຍທ່ານໄດ້ ເມື່ອທ່ານມີຄຳຖາມ ຫລື ຄວາມຮູ້ສຶກເຫລົ່ານີ້? ຍົກຕົວຢ່າງ, ໃນ ຂໍ້ທີ 7–10, 26–33, ໃຫ້ສັງເກດເບິ່ງພອນທີ່ພຣະອົງສັນຍາ. ທ່ານຄິດວ່າຄຳວ່າ “ອົດທົນ … ໄດ້ດີ” ໝາຍຄວາມວ່າແນວໃດ? ພຣະຜູ້ຊ່ວຍໃຫ້ລອດຊ່ວຍທ່ານເຮັດສິ່ງນີ້ແນວໃດ?

ຂະນະທີ່ທ່ານອ່ານ ພາກທີ 122, ໃຫ້ພິຈາລະນາວິທີທີ່ພຣະຜູ້ເປັນເຈົ້າປະສົງໃຫ້ທ່ານເບິ່ງຄວາມຍາກລຳບາກຂອງທ່ານແນວໃດ. ທ່ານອາດໄຕ່ຕອງປະສົບການທີ່ມາຈາກການທົດລອງຂອງທ່ານ ແລະ ວ່າມັນອາດ “ຈະເກີດຂຶ້ນເພື່ອຄວາມດີ [ຂອງທ່ານ] ແນວໃດ” (ຂໍ້ທີ 7).

ເບິ່ງ Quentin L. Cook, “Personal Peace in Challenging Times,” Liahona, Nov. 2021, 89–92; “Where Can I Turn for Peace?,” Hymns, no. 129 ນຳອີກ.

ຄຳສອນ ແລະ ພັນທະສັນຍາ 121:34–46

ອຳນາດ ແລະ ອິດທິພົນທີ່ແທ້ຈິງແມ່ນອີງໃສ່ “ຫລັກທຳແຫ່ງຄວາມຊອບທຳ.”

ອຳນາດທາງໂລກໄດ້ບັງຄັບໄພ່ພົນອອກຈາກລັດມີເຊີຣີ ແລະ ໂຈເຊັບ ສະມິດ ໃຫ້ເຂົ້າຄຸກ. ແຕ່ຂະນະທີ່ໂຈເຊັບຢູ່ທີ່ນັ້ນ, ພຣະຜູ້ເປັນເຈົ້າໄດ້ສິດສອນເຂົາເຈົ້າກ່ຽວກັບອຳນາດອີກແບບໜຶ່ງ: ອຳນາດຂອງພຣະອົງ, “ອຳນາດແຫ່ງສະຫວັນ.” ການອ່ານກ່ຽວກັບອຳນາດນັ້ນໃນ ຄຳສອນ ແລະ ພັນທະສັນຍາ 121:34–46 ສາມາດຊ່ວຍທ່ານຮຽນຮູ້ວິທີທີ່ຈະຮັບເອົາອຳນາດນັ້ນ—ແລະ ວິທີທີ່ຈະໃຊ້ມັນເພື່ອເປັນພອນໃຫ້ແກ່ຄົນອື່ນ. ບາງທີທ່ານສາມາດບັນທຶກສິ່ງທີ່ທ່ານຮຽນຮູ້ໃນຕາຕະລາງທີ່ມີຖັນໃສ່ຊື່ວ່າ ອຳນາດແຫ່ງສະຫວັນ ແລະ ອຳນາດທາງໂລກ. ອຳນາດທັງສອງນີ້ແຕກຕ່າງກັນແນວໃດ? ຄຳອະທິບາຍກ່ຽວກັບອຳນາດຂອງພຣະຜູ້ເປັນເຈົ້າເຫລົ່ານີ້ສິດສອນທ່ານຫຍັງແດ່ກ່ຽວກັບພຣະອົງ?

ທ່ານກໍອາດໄຕ່ຕອງຄຳວ່າ ອິດທິພົນ ໃນ ຂໍ້ທີ 41 ນຳອີກ. ມີສະພາບການໃດແດ່ທີ່ທ່ານຕ້ອງການເປັນອິດທິພົນສຳລັບຄວາມດີ—ບາງທີໃນຄວາມສຳພັນຂອງຄອບຄົວ, ທີ່ໂຮງຮຽນ, ທີ່ບ່ອນທຳງານ, ຫລື ໃນວຽກງານມອບໝາຍຂອງສາດສະໜາຈັກ. ທ່ານຮຽນຮູ້ຫຍັງແດ່ຈາກ ຂໍ້ທີ 41–46 ກ່ຽວກັບພຣະເຈົ້າ ແລະ ລູກໆຂອງພຣະອົງ? ທ່ານສາມາດສະຫລຸບສິ່ງທີ່ທ່ານຮຽນຮູ້ ໂດຍການປະກອບປະໂຫຍກໃຫ້ສົມບູນຄືປະໂຫຍກນີ້: “ເພື່ອເປັນອິດທິພົນ ເພື່ອຄວາມດີ, ຂ້ອຍຈະ .”

ເບິ່ງ Jeffrey R. Holland, “Not as the World Giveth,” Liahona, May 2021, 35–38; David A. Bednar, “The Powers of Heaven,” Liahona, May 2012, 48–51; “The Powers of Heaven” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

"The Powers of Heaven"
(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

ເລືອກວະລີ ແລະ ສຶກສາມັນຢ່າງເລິກເຊິ່ງ. ເພື່ອຮຽນຮູ້ເພີ່ມເຕີມກ່ຽວກັບພອນທີ່ດີເລີດ ທີ່ບັນຍາຍໄວ້ໃນ ຂໍ້ທີ 45–46, ທ່ານອາດເລືອກວະລີໜຶ່ງທີ່ໂດດເດັ່ນສຳລັບທ່ານ ແລະ ສຶກສາມັນຢ່າງເລິກເຊິ່ງ. ຍົກຕົວຢ່າງ, ຄຳວ່າ ປະດັບ ໝາຍຄວາມວ່າແນວໃດ, ແລະ ຄຸນນະທຳສາມາດປະດັບຄວາມນຶກຄິດຂອງທ່ານແນວໃດ? ຫລື ບາງທີທ່ານອາດຊອກຫາຮູບພາບນ້ຳຄ້າງ ແລະ ຮຽນຮູ້ກ່ຽວກັບວິທີນ້ຳຄ້າງກໍ່ຕົວເທິງຕົ້ນໄມ້ໄດ້ແນວໃດ. ສິ່ງນີ້ຄ້າຍຄືກັບວິທີທີ່ພຣະຜູ້ເປັນເຈົ້າສິດສອນຄຳສອນຂອງພຣະອົງແນວໃດ? ແບ່ງປັນສິ່ງທີ່ທ່ານຄົ້ນພົບກັບຄອບຄົວ ຫລື ໝູ່ເພື່ອນ, ລວມທັງໝູ່ເພື່ອນທີ່ໂບດ.

ຄຳສອນ ແລະ ພັນທະສັນຍາ 122:8

ພຣະເຢຊູຄຣິດໄດ້ລົງຕ່ຳກວ່າທຸກສິ່ງ ເພື່ອວ່າພຣະອົງຈະສາມາດຍົກເຮົາຂຶ້ນ.

ທ່ານຄິດວ່າການເວົ້າວ່າ ພຣະເຢຊູຄຣິດ “ໄດ້ລົງຕ່ຳກວ່າທຸກສິ່ງ” ໝາຍຄວາມວ່າແນວໃດ? ຕໍ່ໄປນີ້ແມ່ນຂໍ້ເພີ່ມເຕີມບາງຂໍ້ທີ່ອາດຊ່ວຍໃຫ້ທ່ານເຂົ້າໃຈວະລີນີ້: ເອຊາຢາ 53:3–4; ເຮັບເຣີ 2:17–18; 1 ນີໄຟ 11:16–33; ແອວມາ 7:11–13. ອີງຕາມສິ່ງທີ່ທ່ານຮຽນຮູ້, ໃຫ້ພິຈາລະນາທີ່ຈະທົບທວນ ຄຳສອນ ແລະ ພັນທະສັນຍາ 122:8 ໃນຄຳຂອງທ່ານເອງ. ທ່ານຈະສາມາດສະແດງຄວາມກະຕັນຍູຂອງທ່ານຕໍ່ພຣະເຢຊູຄຣິດ ສຳລັບການລົງຕ່ຳກວ່າທຸກສິ່ງໄດ້ແນວໃດ?

ຄວາມຮູ້ແຈ້ງນີ້ຈາກປະທານດາລິນ ເອັຈ ໂອກສ໌ ມີຜົນກະທົບຕໍ່ຄວາມເຂົ້າໃຈຂອງທ່ານແນວໃດ? “ເຮົາກ່າວໄດ້ວ່າ ການໄດ້ສະເດັດລົງຕ່ຳກວ່າທຸກສິ່ງ, [ພຣະເຢຊູຄຣິດ] ຈຶ່ງສາມາດຍົກເຮົາຂຶ້ນ ແລະ ມອບຄວາມເຂັ້ມແຂງທີ່ເຮົາຕ້ອງການໃຫ້ເຮົາ ເພື່ອຈະໄດ້ອົດທົນກັບຄວາມທຸກທໍລະມານຂອງເຮົາ” (“Strengthened by the Atonement of Jesus Christ,” Liahona, Nov. 2015, 64).

ພຣະເຢຊູຄຣິດກຳລັງທຸກທໍລະມານຢູ່ໃນສວນເຄັດເຊມາເນ — ລາຍລະອຽດຈາກ Not My Will, But Thine [ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເທີ້ນ], ໂດຍ ວາວເຕີ ເຣນ

ຄຳສອນ ແລະ ພັນທະສັນຍາ 123

“ຈົ່ງໃຫ້ພວກເຮົາເຮັດທຸກສິ່ງທຸກຢ່າງທີ່ຢູ່ໃນອຳນາດຂອງພວກເຮົາ ຢ່າງເບີກບານມ່ວນຊື່ນ.”

ໃນ ຄຳສອນ ແລະ ພັນທະສັນຍາ 123:7–8, ໂຈເຊັບ ສະມິດ ກ່າວເຖິງຄວາມເຊື່ອຜິດໆ ທີ່ນຳໄປສູ່ຄວາມທຸກທໍລະມານ, ລວມທັງການຂົ່ມເຫັງໄພ່ພົນ. ໃນເດືອນມີນາ ປີ 1839, ມັນອາດເບິ່ງຄືວ່າ ບໍ່ມີສິ່ງໃດອີກທີ່ໄພ່ພົນສາມາດເຮັດ. ແຕ່ຢູ່ໃນຈົດໝາຍຂອງເພິ່ນ ທີ່ຂຽນຈາກຄຸກລີເບີຕີ, ໂຈເຊັບໄດ້ບອກເຖິງສິ່ງທີ່ເຂົາເຈົ້າສາມາດເຮັດ: “[ໃຫ້ຮວບຮວມ] ຄວາມຮູ້ ແລະ ຂໍ້ມູນທັງໝົດ” ແລະ “ຢືນຢູ່ຊື່ໆ, ດ້ວຍຄວາມໝັ້ນໃຈທີ່ສຸດ, ເພື່ອເຫັນຄວາມລອດຂອງພຣະເຈົ້າ” (ຄຳສອນ ແລະ ພັນທະສັນຍາ 123:1, 17). ຂະນະທີ່ທ່ານພິຈາລະນາບັນຫາໃນໂລກທຸກວັນນີ້, ໃຫ້ຄິດກ່ຽວກັບວິທີທີ່ຈະຈັດການກັບມັນ ທີ່ “ຢູ່ໃນອຳນາດ [ຂອງທ່ານ]” (ຂໍ້ທີ 12, 17). ແລະ ຢ່າເບິ່ງຂ້າມສິ່ງທີ່ເບິ່ງຄືວ່າ “ເລື່ອງເລັກໜ້ອຍ” (ຂໍ້ທີ 15). ເປັນຫຍັງມັນຈຶ່ງສຳຄັນທີ່ຈະເຮັດສິ່ງເຫລົ່ານີ້ “ຢ່າງເບີກບານ”? (ຂໍ້ທີ 17).

ຫລາຍເລື່ອງທີ່ໂຈເຊັບໄດ້ຂໍຮ້ອງຢູ່ໃນຈົດໝາຍສະບັບນີ້ ໄດ້ຖືກສົ່ງໄປຫາຝ່າຍລັດຖະບານ ແລະ ໄດ້ຖືກຈັດພິມເປັນ 11 ຕອນ ຢູ່ໃນໜັງສືພິມ, Times and Seasons (ເບິ່ງ “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 121:1–9; 122:7–9

ກັບພຣະເຈົ້າ, ການທົດລອງຂອງເຮົາສາມາດເປັນເພື່ອຄວາມດີຂອງເຮົາ.

ເພື່ອຊ່ວຍໃຫ້ລູກໆຂອງທ່ານຈິນຕະນາການວ່າ ໂຈເຊັບ ສະມິດ ແລະ ໝູ່ເພື່ອນຂອງເພິ່ນໃນຄຸກລີເບີຕີຄົງເປັນແນວໃດ, ພວກທ່ານສາມາດອ່ານ “ບົດທີ 46: ໂຈເຊັບ ສະມິດ ໃນຄຸກລີເບີຕີ” (ໃນ ເລື່ອງຄຳສອນ ແລະ ພັນທະສັນຍາ, 172–74) ນຳກັນ ຫລື “Voices of the Restoration: Liberty Jail” ຫລື ເບິ່ງພາກສ່ວນໜຶ່ງຂອງວິດີໂອ “Joseph Smith: Prophet of the Restoration” (ຫ້ອງສະໝຸດພຣະກິດຕິຄຸນ, ເລີ່ມຕົ້ນທີ່ 41:30). ແລ້ວ, ຂະນະທີ່ພວກທ່ານອ່ານ ຄຳສອນ ແລະ ພັນທະສັນຍາ 121:1–9 ນຳກັນ, ພວກທ່ານສາມາດເວົ້າລົມກັນກ່ຽວກັບວິທີທີ່ພຣະຜູ້ຊ່ວຍໃຫ້ລອດໄດ້ຊ່ວຍເຫລືອໂຈເຊັບໃຫ້ຮູ້ສຶກສະຫງົບສຸກແນວໃດ. ເຮົາຈະພົບຄວາມສະຫງົບສຸກໃນພຣະຜູ້ຊ່ວຍໃຫ້ລອດ, ແມ່ນແຕ່ໃນຊ່ວງເວລາທີ່ຍາກລຳບາກໄດ້ແນວໃດ?

1:51
Chapter 46: Joseph Smith in Liberty Jail: November 1838–April 1839

62:4
Joseph Smith: The Prophet of the Restoration
A motion picture about the life and legacy of Joseph Smith, the founding prophet of The Church of Jesus Christ of Latter-day Saints.
ເພື່ອຊ່ວຍໃຫ້ລູກໆຂອງທ່ານຮັບຮູ້ວ່າ ການທົດລອງຂອງເຮົາສາມາດ “ເປັນເພື່ອຄວາມດີ [ຂອງເຮົາ]” (ຄຳສອນ ແລະ ພັນທະສັນຍາ 122:7), ທ່ານສາມາດເວົ້າລົມກັບພວກເຂົາກ່ຽວກັບວ່າ ກ້າມເນື້ອຂອງເຮົາເຕີບໂຕແນວໃດ ເມື່ອເຮົາຍົກຂອງໜັກ. ທ່ານສາມາດເຊື້ອເຊີນພວກເຂົາໃຫ້ຍົກວັດຖຸໜັກໃດໜຶ່ງຂຶ້ນໄດ້. ແລ້ວພວກທ່ານສາມາດເວົ້າລົມກັນກ່ຽວກັບວ່າ ການຜ່ານຜ່າຊ່ວງເວລາຍາກລຳບາກສາມາດຊ່ວຍວິນຍານຂອງເຮົາໃຫ້ເຕີບໂຕໄດ້ແນວໃດ—ເມື່ອເຮົາຫັນໄປຂໍຄວາມຊ່ວຍເຫລືອຈາກພຣະຜູ້ເປັນເຈົ້າ. ແບ່ງປັນບາງຕົວຢ່າງຈາກຊີວິດຂອງທ່ານ.

ຄຳສອນ ແລະ ພັນທະສັນຍາ 121:34–46

ຄວາມຊອບທຳນຳ “ອຳນາດແຫ່ງສະຫວັນ” ມາໃຫ້.

ບາງທີການປຽບທຽບຈະຊ່ວຍລູກໆຂອງທ່ານໃຫ້ເຂົ້າໃຈ “ອຳນາດແຫ່ງສະຫວັນ” ໄດ້. ຍົກຕົວຢ່າງ, ທ່ານສາມາດປຽບທຽບອຳນາດຂອງພຣະເຈົ້າກັບພະລັງໄຟຟ້າ. ແມ່ນຫຍັງອາດກີດກັນເຄື່ອງໄຟຟ້າຈາກການໄດ້ຮັບພະລັງງານ? ແມ່ນຫຍັງທີ່ເຮັດໃຫ້ພະລັງທາງວິນຍານຂອງເຮົາລົດລົງ? ແມ່ນຫຍັງທີ່ເຮັດໃຫ້ມັນເພີ່ມຂຶ້ນ? (ຊອກຫາຄຳ ແລະ ວະລີໃນ ຄຳສອນ ແລະ ພັນທະສັນຍາ 121:34–46; ເບິ່ງ ຄູ່ມືທົ່ວໄປ, 3.5, 3.6, ຫ້ອງສະໝຸດພຣະກິດຕິຄຸນ ນຳອີກ.)

ຄຳສອນ ແລະ ພັນທະສັນຍາ 122:7–9

ພຣະເຢຊູຄຣິດຮູ້ວ່າເຮົາກຳລັງຜ່ານຜ່າຫຍັງ.

ຫລັງຈາກທີ່ອ່ານ ຄຳສອນ ແລະ ພັນທະສັນຍາ 122:7–9 ກັບລູກໆຂອງທ່ານແລ້ວ, ທ່ານອາດຈະແບ່ງປັນປະສົບການຕອນທີ່ທ່ານຮູ້ສຶກວ່າພຣະຜູ້ຊ່ວຍໃຫ້ລອດໄດ້ສະຖິດຢູ່ກັບທ່ານ ລະຫວ່າງການທົດລອງທີ່ຍາກລຳບາກ. ພວກທ່ານຍັງສາມາດຮ້ອງເພງນຳກັນ ເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27) ແລະ ເປັນພະຍານວ່າພຣະເຢຊູຄຣິດສາມາດຊ່ວຍເຮົາ ເພາະພຣະອົງຮູ້ວ່າເຮົາຮູ້ສຶກແນວໃດ.

ຄຳສອນ ແລະ ພັນທະສັນຍາ 123:15–17

ແມ່ນແຕ່ສິ່ງເລັກນ້ອຍກໍສາມາດສ້າງຄວາມແຕກຕ່າງໄດ້ໃນການຮັບໃຊ້ພຣະເຈົ້າ.

ເພື່ອຊ່ວຍລູກໆຂອງທ່ານໃຫ້ເຂົ້າໃຈ ຄຳສອນ ແລະ ພັນທະສັນຍາ 123:15–17, ທ່ານສາມາດສະແດງຮູບພາບກຳປັ່ນໃຫຍ່ ແລະ ຫາງເສືອລຳນ້ອຍໆໃຫ້ພວກເຂົາເບິ່ງ, ຫລື ແບ່ງປັນຄຳອະທິບາຍຂອງແອວເດີ ເດວິດ ເອ ແບ໊ດນາ ໃນ “The Principles of My Gospel” (Liahona, May 2021, 125–26). ແລ້ວພວກທ່ານສາມາດເວົ້າລົມກ່ຽວກັບວິທີເລັກນ້ອຍທີ່ເຮົາສາມາດຮັບໃຊ້ຄອບຄົວ ແລະ ໝູ່ເພື່ອນຂອງເຮົາຢ່າງມ່ວນຊື່ນໄດ້.

“The Principles of My Gospel”
Elder Bednar teaches that correct gospel principles help us make wise choices and stay on the covenant path.

ຮູບພາບປະກອບຂອງກຳປັ່ນຢູ່ໃນທະເລ — ເຊັ່ນດຽວກັບຫາງເສືອລຳເລັກນ້ອຍຂອງກຳປັ່ນໃຫຍ່, ຄວາມພະຍາຍາມເລັກນ້ອຍຂອງເຮົາກໍສາມາດສ້າງຄວາມແຕກຕ່າງທີ່ຍິ່ງໃຫຍ່ໄດ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໂຈເຊັບ ສະມິດ ກຳລັງບັນທຶກການເປີດເຜີຍຢູ່ໃນຄຸກລີເບີຕີ — Joseph Smith in Liberty Jail [ໂຈເຊັບ ສະມິດ ຢູ່ໃນຄຸກລີເບີຕີ], ໂດຍ ກະເຣກ ອໍເຊັນ