“Oktubre 6–12: “Ibilinkonto Amin a Banag para iti Pagimbaganyo”

Doktrina ken Katulagan 111–114

Naaddaankayo kadin iti naespirituan a padas a nakariknaanyo iti panagtalek ken kinatalged iti pammatiyo ken ni Cristo—ngem kalpasanna ti rigat ti panagbiag ti nangsubok iti pammatiyo, ket natakuatanyo ti bagiyo nga agkarkarigatan a mangpasubli iti talna a nariknayo idi? Adda maysa a banag a kapada a napasamak kadagiti Santo iti Kirtland. Nakurkurang ngem makatawen kalpasan dagiti naespirituan a panangibukbok a mainaig iti pannakaidaton ti Templo iti Kirtland, rimsua dagiti riribuk. Maysa a krisis iti pakaseknan ti kuarta, kinaawan ti panagkaykaysa ti Korum dagiti Sangapulo-ket-dua, ken dadduma pay a pannubok ti nakaigapu iti sumagmamano a Santo tapno maisin iti pammatida iti baet dagiti immun-una a napasaranda.

Saantayo a maliklikan dagiti pannubok, isu a kasano a mapagtalinaedtayo ida manipud iti panangbutbutengda iti pammati ken pammaneknektayo? Nalabit a paset ti sungbat ti masarakan iti balakad ti Apo iti Doktrina ken Katulagan 112, a naited kabayatan ti panagpalalo iti panagrigrigat iti Kirtland. Kinuna ti Apo, “Patarnawenyo ti puspusoyo iti imatangko” (bersikulo 28), “Saankayo nga agsukir” (bersikulo 15), “Patibkerem dagiti lomom para iti aramid” (bersikulo 7), ket “Agpakumbabaka ”(bersikulo 10). Bayat ti panangsurottayo iti daytoy a balakad, “kibinenna[tayonto] nga iturong” ti Apo a mangsaranget iti rigat ken iti pannakapaimbag ken talna (kitaen iti bersikulo 10, 13).

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 111

Kabalinan ti Apo nga “ibilin amin a banag para iti pagimbag[ak].”

Idi 1836, nakaurnong ti Simbaan iti nadagsen nga utang iti panangaramid iti aramid ti Apo. Naburiboran da Joseph Smith ken dagiti dadduma pay maipanggep kadagitoy nga utang ket imbilangda dagiti wagas a panangbayad kadagitoy (kitaen iti paulo ti benneg iti Doktrina ken Katulagan 111).

Bayat ti panangbasayo iti benneg 111, ibilang no kasano a mayaplikar kadakayo dagiti balikas ti Apo ken ni Joseph Smith—ken dagiti banag a pagdandanaganyo. Kas pagarigan, kaano a nariknayo ti ayat ti Dios “iti laksid ti kinamaagyo” (bersikulo 1)? Kasano a natulongannakayo ti Apo a mangsarak kadagiti saan a ninamnama a “kinabaknang”? (bersikulo10)? Ania ti inaramidna tapno “mangibilin iti amin a banag a para iti pagimbaganyo” (bersikulo 11)? Ania ti isuro kadakayo ti ragup iti balikas a “kas iti kapardas ti kabaelanyo a mangawat kadakuada” maipapan iti Nailangitan nga Ama?

Kitaen met iti Mateo 6:19–21, 33More Treasures Than One,” iti Revelations in Context, 229–34.

Doktrina ken Katulagan 12:3–15, 22

Idalannakto ti Apo bayat ti sipapakumbaba a panangsapsapulko iti pagayatanna.

Ni Thomas B. Marsh, Presidente ti Korum dagiti Sangapulo-ket-dua nga Apostol, ket nasakit ti nakemna gapu ta ni Joseph Smith, a saan a nagkonsulta kenkuana, inawaganna ti dua a miembro ti korumna a mangikasaba iti ebanghelio idiay Inglatera. Nakipagkita iti Propeta, a nakaawat iti paltiing a nakatulong ken ni Thomas a mangiwalin kadagiti nasakit a riknana. Naisurat dayta a paltiing iti Doktrina ken Katulagan 112.

Panunotenyo daytoy a konteksto bayat ti panagadalyo iti Doktrina ken Katulagan 112. Ania ti masarakanyo a mabalin a nangpaimbag iti nasakit a rikna ni Thomas? Kadagiti bersikulo 3–15 ken 22, mabalinyo nga agsapul kadagiti sungbat kadagiti saludsod a kas kadagitoy: Ania ti kinapakumbaba? Ania ti kayat a sawen ti “panangkibin” kenka ti Apo? Apay iti panagkunayo, ti panagbalin a napakumbaba ket makatulong kadakayo nga umawat iti pannarabay ti Apo? Masarakanyo dagiti nayon a sungbat iti “Pattern of Humility” iti mensahe ni Elder Joseph W. Sitati “Patterns of Discipleship” (Liahona, Nob. 2022, 87–88).

Mangpanunot iti maysa a tao nga am-ammoyo a napakumbaba. Ania ti ar-aramiden daytoy a tao a mangipakita iti kinapakumbaba? Ania ti masursuroyo iti Mangisalakan maipapan iti panagbalin a napakumbaba? Nalabit makasarakkayo kadagiti ladawan dagiti panawen iti biagna idi impakitana ti kinapakumbaba.

Kaano a nariknayo ti panangiwanwan ti Apo bayat ti panangipakumbabayo iti bagiyo?

Kitaen met iti Ulisses Soares, “Be Meek and Lowly of Heart,” Liahona, Nob. 2013, 9–11; “The Faith and Fall of Thomas Marsh,” iti Revelations in Context, 54–60; Topics and Questions, “Humility,” Gospel Library; “Be Thou Humble,” Hymns, no. 130.

Makipaset kadagiti agad-adal. Panunotenyo no kasano a matulonganyo dagiti tao a sursuruanyo a sireregta a makiraman iti panagsursuro kadagiti kinapudno iti nasantuan a kasuratan. Kas pagarigan, tapno matulongan ida a makaawat no ania ti kinuna ti Apo iti Doktrina ken Katulagan 112:10, mabalinyo a piringan ti mata ti maysa a tao ket siaannad nga iturong isuna babaen ti ima iti lawlaw ti bassit nga obstacle course dagiti tugaw wenno dadduma pay a banag. Ania ti masursurotayo maipapan iti kinapakumbaba manipud iti daytoy a panangipakita?

Doktrina ken Katulagan 112:12–26, 28, 33–34

Naam-ammo dagiti pudno a napasurot ni Jesucristo.

Ti kinapudno a timmalllikud ti sumagmamano nga Apostol idi 1837 a maibusor iti Propeta ket nasayaat a palagip nga iti laksid ti pannakaawagtayo iti Simbaan wenno no kasano ti kadakkel ti ammotayo maipanggep iti ebanghelio, nasken a siguraduentayo kas indibidual a taraonantayo ti kumbersiontayo ken ni Jesucristo. Nalabit a mabalinyo a basaen ti Doktrina ken Katulagan 112:12–26, 28, 33–34 112:12–26, 28, 33–34 ket sapulenyo dagiti kinapudno a makatulong kadakayo a mangparmek iti pannubok ti pammati wenno agbalin nga ad-adda a naan-anay a napasurot iti Apo. Mabalin a mariknayo a naparegtakayo a mangibinglay no ania ti masarakanyo a makatulong iti maysa a tao a mangpapigsa iti kombersionna ken ni Cristo.

Doktrina ken Katulagan 113

Ni Joseph Smith ket “maysa a katulongan kadagiti ima ni Cristo.”

Intudo ni propeta Isaias ti maysa kadagiti an-annabo ni Jesse kas maysa a “saringit” ken maysa a “ramut” (Isaias 11:1, 10). Iti benneg 113, inlawlawag ti Apo a daytoy nga an-annabo, maysa a katulongan ni Cristo, agbalinto a ramit iti pannakaummong dagiti tao ti Apo iti ud-udina nga aldaw (kitaen iti Doktrina ken Katulagan 113:4, 6). Nasayaat unay ti panangiladawan daytoy a padto ken ni Propeta Joseph Smith. Kasano a mabalin a nangparegta daytoy ken dagiti dadduma pay a kinapudno iti benneg 113 kadagiti Santo bayat ti rigat a napasaranda iti Kirtland? Ania ti masarakanyo iti daytoy a paltiing a mangparegta kadakayo nga agtalinaed a natibker ken agtultuloy a makiraman iti aramid ti Apo iti agdama?

Kitaen met iti Pangiwanwan iti Nasantuan a Kasuratan, “Jesse,” Gospel Library; 2 Nephi 21:10–12; Joseph Smith—Pakasaritaan 1:40.

Insurat ni Isaias maipapan iti “saringit” ken “ramut” a tumaud iti “puon ni Jesse” (Isaias 11:1).

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 111:2, 10–11

Mabalin a kinabaknang kaniak dagiti banag ti Dios.

• Awisen dagiti ubbing a mangidrowing no ania ti mapanunotda no mangngeganda ti balikas a kinabaknang. Kalpasanna mabalinyo nga aggigiddan a basaen ti Doktrina ken Katulagan 111:2, 10–11 ken pagdumaen dagiti naindagaan a kinabaknang kadagiti banag nga ipatpateg ti Apo. (Kitaen ti panid ti aktibidaditi daytoy a lawas.) Kasano a maipategtayo nga ad-adda dagiti banag ti Dios?

Doktrina ken Katulagan 112:10

Kibinennakto ti Apo ket sungbatanna dagiti kararagko.

• Bayat ti aggigiddan a panangbasayo iti Doktrina ken Katulagan 112:10 , mabalinyo ken dagiti annakyo nga aggigiddan a mangkanta iti “Be Thou Humble” (Hymns, no. 130). Mabalinyo pay ti agay-ayam iti ay-ayam a pakairamanan ti panangidaulo iti tunggal maysa “nga agkinnibin” (kas iti maysa nga obstacle course). Kasano a “kibinennatayo” ti Apo, uray no awan Isuna a personal kadatayo? Apay a kasapulantayo ti Apo a mangiturong kadatayo? Kaano a nariknatayo nga iturturongnatayo ti Apo?

• Mabalinyo wenno dagiti annakyo nga isurat dagiti balikas ti Doktrina ken Katulagan 112:10 ken ugedan dagiti bendision nga ited kadatayo ti Apo no sipapakumbaba nga agsublitayo Kenkuana. Paregtaenyo dagiti annakyo a mangibinglay kadagiti panawen a sipapakumbaba a nagkiddawda iti tulong ti Apo ken nakaawatda kadagiti sungbat kadagiti kararagda wenno naiturongda nga agaramid iti maysa a banag a nasayaat (kitaen iti Moroni 7:13, 16).

Detalye manipud iti Bumangon ket Magnaka, ni Simon Dewey

Doktrina ken Katulagan 112:11

Kayat ni Jesus nga ayatek ti tunggal maysa.

• Mabalinyo ken dagiti annakyo nga agsisinnublat nga agbasa manipud iti “Kapitulo 41: Riribuk iti Kirtland” (iti Dagiti Estoria iti Doktrina ken Katulaga, 158–60). Asino iti estoria ti nangpakaro iti problema sadiay Kirtland? Asino ti nangpadpadas a mangpasayaat kadagitoy? Kalpasanna mabalinyo a basaen ti Doktrina ken Katulagan 112:11 ken pagsasaritaan no apay a kayat ti Apo nga ayatentayo ti tunggal maysa. Kaano nga impakitana ti ayat kadagiti tao a natangsit Kenkuana? (kas pagarigan, kitaen iti Lucas 23:34). Mabalinyo met ti agkansion iti maysa a kanta maipapan iti panagayat iti dadduma, kas iti “I’ll Walk with You” (Children’s Songbook, 140–41).

Chapter 41: Trouble in Kirtland: 1837–1838

Doktrina ken Katulagan 112:11–14, 24–26

Naam-ammo dagiti pudno a napasurot ni Jesucristo.

• Kalpasan ti panangbasa iti Doktrina ken Katulagan 112:24–26, mabalinyo ken dagiti annakyo ti agsarita maipapan iti nagdumaan ti panangammo iti nagan ti maysa a tao ken ti panangam-ammo kadakuada. Ania dagiti pannursuro manipud kadagiti bersikulo 11–14 a mangtulong kadatayo no ania ti kayat a sawen ti mangam-ammo iti Apo?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Agpakumbabaka, ni Julie Rogers