“Dagiti Timek ti Pannakaisubli: Pagbaludan iti Liberty,” Umaykayo, Sumurot Kaniak—Para iti Pagtaengan ken Simbaan: Doktrina ken Katulagan 2025 (2025)
“Pagbaludan iti Liberty,” Umaykayo, Sumurot Kaniak—Para iti Pagtaengan ken Simbaan: 2025
Dagiti Timek ti Pannakaisubli
Pagbaludan iti Liberty
Bayat a naibalud iti Liberty, Missouri, nakaawat ni Joseph Smith kadagiti surat a mangipakpakaammo kenkuana maipapan iti napeggad a kasasaad dagiti Santo iti Ud-udina nga Aldaw a napapanaw manipud iti estado babaen ti bilin ti gobernador. Maysa a makasagid iti rikna a surat ti naggapu iti asawana a ni Emma. Dagiti balikasna, ken kas sungbat kadagiti surat ni Joseph, ti mangyebkas nga agpada dagiti panagsagsagabada ken ti pammatida bayat ti naririgat a panawen iti pakasaritaan ti Simbaan.
Naipupok ni Joseph Smith ken dagiti dadduma pay iti daytoy a pagbaludan iti panawen ti lamiis ti 1838–39.
Surat ni Emma Smith ken ni Joseph Smith, Marso 7, 1839
Patpatgek nga Asawa
Ti kaadda iti gundaway a mangipatulod iti daytoy a surat kenka babaen iti maysa a gayyem, panggepko nga isurat, ngem diak panggepen nga isurat ti amin a marikriknak, gapu iti kasasaad a nakaipasanguam, dagiti pader (ti pagbaludan), rehas (dagiti tawa), dagiti kandado (dagiti ridaw ti pagbaludan), kasta met dagiti agay-ayus a karayan, nangato a turturod, tantanap, ken kataltalonan a namagsina kadata, ken ti naranggas a kinaawan iti hustisia nga immuna a nakaibaludam ken addaka pay la dita agingga ita, nga addaan iti adu a dadduma pay a konsiderasion, nangiparikna kaniak iti adayo nga amang a saan a mailadawan.
No saan a gapu iti sipupuot a kinainosente, ken no di bimmaet ti nadiosan nga asi, namnamaek a diak kaano man kabaelan ti agibtur kadagiti panagsagsagaba a nagpasarak … ; ngem sibibiagak pay laeng ken nakasaganaak nga ad-adda nga agsagaba no daytoy ti pagayatan ti naasi a Langit a rumbeng nga aramidek para kenka.
Nasalun-atkami amin iti agdama, malaksid ni Fredrick a masaksakit.
Ni bassit nga Alexander nga adda ita kadagiti takiagko ti maysa kadagiti makaay-ayo unay nga ubing a nakitamon iti biagmo. Nakapigpigsa isuna ta babaen ti panangtengngelna iti maysa a tugaw agtaraytaray a manglawlaw iti siled. …
Awan ti asino man malaksid ti Dios ti makaammo iti kapanunotak ken dagiti rikna ti pusok idi pinanawak ti balay ken pagtaengantayo, ken dandani amin nga adda kadatayo malaksid kadagiti babassit nga Annakta, ket nagdaliasatak a mapan iti Estado ti Missouri, nga imbatika a nakapupok iti dayta naliday a pagbaludan. Ngem ti kasta a pampanunot ket narigrigat ngem iti kasasaad ti asino man a tao a makapadas iti dayta. …
“… Namnamaek nga adda dagiti nasaysayaat nga aldaw nga umay pay kadatayo. … [Siak] ti mangipatpateg kenka iti agnanayon.
Emma Smith
Surat ni Joseph Smith ken ni Emma Smith, Abril 4, 1839
Patpatgek—ken managayat—nga Asawa.
Nakatugawak iti rabii ti Huebes bayat ti ilelennek ti init, kabayatan ti isisiripmi iti baet dagiti rehas iti daytoy naliday a pagbaludan, tapno agsurat kenka, nga ipakaammok ti kasasaadko kenka. Mamatiak itan iti daytoy agarup lima a bulan ket innem nga aldaw manipud pay ti kaaddak a bambantayan ti maysa a naunget a guardia iti rabii ken aldaw, iti uneg dagiti pader, rehas, ken dagiti rumanranitrit a ridaw ti naliday, nasipnget, narugit a pagbaludan. Agsursuratak iti daytoy a surat nga addaan iti emosion a ti Dios laeng ti makaammo. Dagiti panangpampanunotko kadagitoy a pasamak ket imposible nga isuratko, wenno isaok, wenno dagiti Anghel, tapno mangiladawan, wenno ipinta, iti tao a di pay pulos nakapadas no ania ti mapadpadasanmi. … Agpannuraykami iti pigsa ni Jehova, ket awan ti sabalin, para iti pannakawayawayami, ngem no dina aramiden, saan a mapasamak daytoy, maipasigurado kadakayo, nga adu dagiti tao nga aggandat a mangpapatay kadakami, saan a gapu ta nakabasolkami iti ania man a banag. … Ay-ayatek nga Emma, kanayon a pampanunotenka ken dagiti ubbing. … Kayatko a makita ni bassit a Frederick, da Joseph, Julia, Alexander, Joana, ken ni lakay a major [ti aso ti pamilia]. … Naragsakak a magna a sakasaka manipud ditoy, awan tapar ti ulo, ken nakauyos, tapno makitaka a saan a pakarigatak, ngem agbalin a nakasaysayaat. … Maibturak a sikikired iti amin a pannakaidadanesko, kasta met dagiti adda iti sibayko, awan pay kadakami ti simmuko. Kayatka a [dimo] ipalubos a malipatandak [dagiti annakta]. Ibagam kadakuada nga ay-ayaten ida ti Amada iti naan-anay nga ayat, ket ar-aramidenna amin a kabaelanna nga umadayo manipud iti bunggoy a manangriribuk nga umay kadakuada. … Ibagam kadakuada a kuna ti Amada nga agsingsingpetda, ken dumngegda iti inada. …
“Agpaay kenka,
Joseph Smith Jr.