Pagbaludan iti Liberty, ni Welden Andersen

Doktrina ken Katulagan 20–26: “O Dios, Sadino ti Yanmo?”

Doktrina ken Katulagan 121–123

Ti tukot a baba ti pagbaludan iti Liberty, Missouri, ket maam-ammo a “ti pagbaludan.” Napuskol dagiti pader, nalamiis ken narugit ti bato a suelo, bassit ti taraon ken nalungsot, ken bassit ti lawag a naggapu iti dua nga akikid, narehasan ti landok a tawa nga asideg iti bobeda. Ditoy a binubos ni Joseph Smith ken dagiti dadduma pay ti uppat a nalam-ek a bulan iti panawen ti lamiis ti 1838–39. Kabayatan daytoy a kanito, kanayon nga umaw-awat ni Joseph iti damag maipapan ti panagsagsagaba dagiti Santo. Ti talna ken panangnamnama iti nasayaat iti Far West ket nagpaut laeng iti sumagmamano a bulan, ket ita awan manen ti pagtaengan dagiti Santo, napapanawda a napan iti langalang tapno agsukisok iti sabali a lugar a pangrugian—iti daytoy a panawen adda ti Propetada iti pagbaludan.

Ngem, uray iti dayta nakaay-ay-ay a pagbaludan, dimteng ti “pannakaammo manipud langit” a “maibukbukbok” (Doktrina ken Katulagan 121:33). Nasungbatan ti saludsod ni Joseph “O Dios, sadino ti yanmo?” a silalawag ken sibibileg: “Dika agbuteng … , ta addanto kenka ti Dios iti agnanayon nga awan inggana” (Doktrina ken Katulagan 121:1; 122:9).

Kitaen iti Saints, 1:323–96; “Within the Walls of Liberty Jail,” iti Revelations in Context, 256–63.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 121:1–10, 23–33; 122

Kaduak ti Dios, ti rigat “agbalinto a pagsayaat[ak].”

No agsagsagabatayo wenno dagiti tao nga ay-ayatentayo, gagangay a masdaawtayo no maseknan ti Dios kadatayo. Bayat ti panangbasayo iti Doktrina ken Katulagan 121:1–6, panunotenyo maipapan kadagiti panawen idi naaddaankayo kadagiti saludsod wenno rikna a kapada ni Joseph Smith. Ania ti masarakanyo iti sungbat ti Apo a mabalin a makatulong kadakayo no addaankayo kadagitoy a saludsod wenno rikna? Kas pagarigan, kadagiti bersikulo 7–10, 26–33, makitayo dagiti bendision nga ikarina. Ania iti panagkunayo ti kaipapanan ti “agibtur … a nasayaat”? Kasano a tulongannakayo ti Mangisalakan a mangaramid iti daytoy?

Bayat ti panangbasayo iti benneg 122, ibilang no kasano ti kayat ti Apo a panangkitayo kadagiti rigatyo. Mabalinyo nga utoben dagiti padas a nagtaud kadagiti pannubokyo ken no kasano a mabalin nga “agpaayda [iti pagimbaganyo]” (bersikulo 7).

Kitaen met iti Quentin L. Cook, “Personal Peace in Challenging Times,” Liahona, Nob. 2021, 89–92; “Where Can I Turn for Peace?,” Hymns, no. 129.

Doktrina ken Katulagan 121:34–46

Ti pudno a bileg ken panangaring ket maibatay “kadagiti pagbatayan ti kinalinteg.”

Ti nailubongan a bileg ti nagpilit a nangpatalaw kadagiti Santo iti Missouri ken nagpaipupok ken ni Joseph Smith iti pagbaludan. Ngem bayat ti kaadda ni Joseph sadiay, insuro kenkuana ti Apo ti maipapan iti sabali a kita ti bileg: ti bilegna, “dagiti bileg ti langit.” Ti panangbasa iti dayta a bileg iti Doktrina ken Katulagan 121:34–46 ket makatulong kadakayo a mangadal no kasano nga awatenyo dayta a bileg—ken no kasano nga usarenyo dayta a mangbendision kadagiti dadduma. Nalabit a mabalinyo nga isurat no ania ti masursuroyo iti maysa a table nga addaan kadagiti kolum a na-labelan iti Dagiti Bileg ti Langit ken Nailubongan a Bileg. Kasano nga aggiddiat dagitoy dua a kita ti bileg? Ania ti isuro kadakayo maipapan Kenkuana dagitoy a panangiladawan iti bileg ti Apo?

Mabalinyo pay nga utoben ti balikas a pangaring iti bersikulo 41. Ania dagiti sumagmamano a kasasaad a kayatyo ti agbalin nga impluensia para iti naimbag—nalabit iti relasion ti pamilia, iti pagadalan, iti pagtrabahuan, wenno iti naidutok nga aramiden iti Simbaan? Ania ti masursuroyo manipud kadagiti bersikulo 41–46 maipapan iti no kasano nga impluensiaan ti Dios dagiti annakna? Mabalinyo a gupgopen ti masursuroyo babaen ti panangileppasyo iti binatog a kas iti daytoy: “Tapno maimpluensiaan para iti naimbag, siakto ket .”

Kitaen met iti Jeffrey R. Holland, “Not as the World Giveth,” Liahona, Mayo 2021, 35–38; David A. Bednar, “The Powers of Heaven,” Liahona, Mayo 2012, 48–51; “The Powers of Heaven” (video), Gospel Library.

"The Powers of Heaven"

(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

Mangpilikayo iti maysa a ragup ti balikas ket adalenyo daytoy iti nauneg. Tapno masursuro ti ad-adu pay maipapan kadagiti nakaskasdaaw a bendision a nailadawan kadagiti bersikulo 45–46, mabalinyo ti agpili iti ragup ti balikas a napateg kadakayo ket adalenyo daytoy iti nauneg. Kas pagarigan, ania ti kayat a sawen ti balikas a taraonan , ken kasano a taraonan ti saguday ti pampanunotyo? Wenno mabalinyo a sapulen ti ladawan ti linnaaw ken sursuruen no kasano a maporma ti linnaaw kadagiti mula. Kasano a maipada daytoy iti wagas a panangisuro ti Apo iti doktrinana? Ibinglayyo no ania ti matakuatanyo iti pamilia wenno gagayyemyo, agraman dagiti gagayyemyo iti simbaan.

Doktrina ken Katulagan 122:8

Bimmaba ni Jesucristo iti babaen ti amin a banag tapno maitag-aynak.

Ania iti panagkunayo ti kaipapanan ti mangisao a ni Jesucristo “bimmaba iti babaen … ti amin a [banag]”? Adtoy ti sumagmamano a nayon a bersikulo a mabalin a makatulong kadakayo a makaawat iti daytoy a ragup ti balikas: Isaias 53:3–4; Hebreo 2:17–18; 1 Nephi 11:16–33; Alma 7:11–13. Maibatay iti no ania ti masursuroyo, ibilangyo ti panangisao manen iti Doktrina ken Katulagan 122:8 iti bukodyo a balikas. Kasano a maipakitayo ti panangyamanyo ken ni Jesucristo iti panagpababana iti babaen ti amin a banag?

Kasano nga apektuan daytoy a pannakaawat manipud ken ni Presidente Dallin H. Oaks ti pannakaawatyo? “Mabalin uray pay no isaotayo a ti panagpababana iti babaen ti amin, [ni Jesucristo] ket naan-anay a nakapuesto a mangitag-ay kadatayo ken mangted kadatayo iti pigsa a kasapulantayo nga agibtur iti rigrigattayo” (“Strengthened by the Atonement of Jesus Christ,” Liahona, Nob. 2015, 64).

Detalye manipud iti Saan a ti Pagayatak No Di Ket ti Pagayatam, ni Walter Rane

Doktrina ken Katulagan 123

“Agragsaktayo koma nga aramiden amin dagiti naipakumit iti bilegtayo.”

Iti Doktrina ken Katulagan 123:7–8, imbasar ni Joseph Smith dagiti palso a pammati a nangiturong iti panagsagaba, agraman ti pannakaidadanes dagiti Santo. Iti Marso 1839, mabalin a kasla awan unay ti kabaelan nga aramiden dagiti Santo maipapan iti dayta. Ngem iti suratna manipud iti Pagbaludan ti Liberty, imbaga ni Joseph kadakuada no ania ti kabaelanda nga aramiden: “[mangurnong] kadagiti amin a napagteng” ken “agtakdertayo, a sililinteg, a sinanama, a makaimatang iti panangisalakan ti Dios” (Doktrina ken Katulagan 123:1, 17 Bayat ti panangibilangyo kadagiti parikut iti lubong ita, panunotenyo maipapan kadagiti wagas a mangtaming kadagitoy a “naipakumit iti bileg[yo]” (dagiti bersikulo 12, 17). Ket diyo liplipatan dagiti kasla “babassit a banag” (bersikulo 15). Apay a napateg nga aramiden dagitoy a banag a “siraragsak”? (bersikulo 17).

Adu kadagiti pakaammuan a kiniddaw ni Joseph iti daytoy a surat a naipatulod iti gobierno ken naipablaak iti 11-paset a serye ti maysa a pagiwarnak ti Nauvoo, ti Times and Seasons (kitaen iti “A History, of the Persecution, of the Church of Jesus Christ, of Latter Day Saints in Missouri, Disiembre 1839–Oktubre 1840,” [josephsmithpapers.org]).

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 121:1–9; 122:7–9

Kaduak ti Dios, mabalin a pagsayaatak dagiti pannubokko.

• Tapno matulongan dagiti annakyo a mangpanunot no ania ti kasasaad ni Joseph Smith ken dagiti gagayyemna iti Pagbaludan iti Liberty, mabalinyo ti aggigiddan a mangbasa iti “Kapitulo 46: Ni Joseph Smith iti Pagbaludan iti Liberty” (iti Dagiti Estoria iti Doktrina ken Katulagan,172–74) wenno “Voices of the Restoration: Liberty Jail” wenno buyaen ti paset ti video “Joseph Smith: Prophet of the Restoration” (Gospel Library, mangrugi iti 41:30). Kalpasanna, bayat ti aggigiddan a panangbasayo iti Doktrina ken Katulagan 121:1 9, mabalinyo a pagsasaritaan maipapan no kasano a tinulongan ti Mangisalakan ni Joseph a makarikna iti talna. Kasano a masarakantayo ti talna iti Mangisalakan, uray kabayatan dagiti narigat a panawen?

  Chapter 46: Joseph Smith in Liberty Jail: November 1838–April 1839

  Joseph Smith: The Prophet of the Restoration

  A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

• Tapno matulonganyo dagiti annakyo a mangbigbig a dagiti pannuboktayo “agbalindanto a pagsayaatan[tayo]” (Doktrina ken Katulagan 122:7), mabalinyo a kasao ida maipapan iti no kasano a dumakkel dagiti piskeltayo no agbagkattayo iti maysa a nadagsen a banag. Mabalinyo pay a kiddawen kadakuada a mangbagkat iti maysa a nadagsen a banag. Kalpasanna mabalinyo a pagsasaritaan no kasano a ti panagsagaba kadagiti narigat a panawen ket makatulong a mangpabileg iti espiritutayo—no umasidegtayo iti Apo para iti tulong. Ibinglayyo dagiti sumagmamano a pagarigan manipud iti biagyo.

Doktrina ken Katulagan 121:34–46

Ti kinalinteg mangyeg kadagiti “bileg ti langit.”

• Nalabit a makatulong ti maysa nga analohia tapno maawatan dagiti annakyo “dagiti bileg ti langit.” Kas pagarigan, mabalinyo nga idilig ti bileg ti Dios iti koriente. Ania ti mabalin a makalapped iti maysa nga alikamen a de koriente a maaddaan iti power? Ania ti mangkissay iti naespirituan a bilegtayo? Ania ti mangpadakkel iti daytoy? (Sapueln dagiti balikas ken ragup ti balikas iti Doktrina ken Katulagan 121 121:34–46; kitaen met iti Sapasap a Handbook, 3.5, 3.6, Gospel Library.)

Doktrina ken Katulagan 122:7–9

Ammo ni Jesucristo no ania ti pagpaspasarak.

• Kalpasan ti panangbasayo iti Doktrina ken Katulagan 122:7–9 kadagiti annakyo, mabalinyo nga ibinglay ti maysa a padas idi nariknayo nga adda kadakayo ti Mangisalakan bayat ti narigat a pannubok. Mabalinyo pay ti aggigiddan a mangkansion iti “Jesus Once Was a Little Child” (Children’s Songbook, 55) ken paneknekanyo a matulongannatayo ni Jesucristo gapu ta ammona no kasano ti riknatayo.

Doktrina ken Katulagan 123:15–17

Makaaramid uray dagiti babassit a banag iti dakkel a pagdumaan iti panagserbi iti Dios.

• Tapno matulongan dagiti annakyo a makaawat iti Doktrina ken Katulagan 123:15–17, mabalinyo nga ibinglay kadakuada ti ladawan ti dakkel a barko ken bassit a timon, wenno ibinglay kadakuada ti palawag ni Elder David A. Bednar iti “The Principles of My Gospel” (Liahona, Mayo 2021, 125–26). Kalpasanna mabalinyo ti agsarita maipapan kadagiti babassit a wagas a pakapagserbiantayo a siraragsak iti pamilia ken gagayyemtayo.

“The Principles of My Gospel”

Elder Bednar teaches that correct gospel principles help us make wise choices and stay on the covenant path.

Kas iti bassit a timon ti maysa a dakkel a barko, dakkel ti pakaidumaan dagiti babassit a panagkagumaantayo.

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Ni Joseph Smith iti Pagbaludan iti Liberty, ni Greg K. Olsen