“ວັນທີ 6–12 ເດືອນຕຸລາ: ‘ເຮົາຈະສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ’: ຄຳສອນ ແລະ ພັນທະສັນຍາ 111–114,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 111–114,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ວັນທີ 6–12 ເດືອນຕຸລາ: “ເຮົາຈະສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ”
ຄຳສອນ ແລະ ພັນທະສັນຍາ 111–114
ທ່ານເຄີຍມີປະສົບການທາງວິນຍານບໍ ທີ່ເຮັດໃຫ້ທ່ານຮູ້ສຶກໝັ້ນໃຈ ແລະ ປອດໄພ ໃນສັດທາຂອງທ່ານໃນພຣະຄຣິດ—ແຕ່ແລ້ວຄວາມທຸກໃນຊີວິດໄດ້ທົດສອບສັດທາຂອງທ່ານ, ແລະ ທ່ານພົບເຫັນຕົວເອງດີ້ນລົນຫາຄວາມສະຫງົບທີ່ທ່ານເຄີຍມີ? ສິ່ງທີ່ຄ້າຍຄືກັນນີ້ ກໍໄດ້ເກີດກັບໄພ່ພົນຢູ່ໃນເມືອງເຄີດແລນຄືກັນ. ໜ້ອຍກວ່າໜຶ່ງປີຫລັງຈາກການຖອກເທທາງວິນຍານທີ່ກ່ຽວຂ້ອງກັບການອຸທິດພຣະວິຫານເຄີດແລນ, ບັນຫາໄດ້ເກີດຂຶ້ນ. ວິກິດທາງການເງິນ, ການຂັດແຍ້ງຢູ່ໃນກຸ່ມອັກຄະສາວົກສິບສອງ, ແລະ ການທົດລອງຢ່າງອື່ນໆ ໄດ້ເຮັດໃຫ້ໄພ່ພົນບາງຄົນຫວັ່ນໄຫວໃນສັດທາຂອງຕົນ ເຖິງແມ່ນເຄີຍມີປະສົບການມາກ່ອນກໍຕາມ.
ເຮົາບໍ່ສາມາດຫລີກເວັ້ນຈາກການທົດລອງ, ສະນັ້ນ ເຮັດແນວໃດເຮົາຈຶ່ງຈະສາມາດປ້ອງກັນມັນບໍ່ໃຫ້ຄຸກຄາມສັດທາ ແລະ ປະຈັກພະຍານຂອງເຮົາໄດ້? ບາງທີພາກສ່ວນໜຶ່ງຂອງຄຳຕອບ ອາດພົບເຫັນຢູ່ໃນຄຳແນະນຳຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 112, ຊຶ່ງໄດ້ມອບໃຫ້ຂະນະທີ່ຄວາມຍາກລຳບາກຢູ່ໃນເມືອງເຄີດແລນ ເພີ່ມທະວີຂຶ້ນ. ພຣະຜູ້ເປັນເຈົ້າໄດ້ກ່າວວ່າ, “ເຮັດໃຫ້ໃຈຂອງເຈົ້າບໍລິສຸດຢູ່ຕໍ່ໜ້າເຮົາ” (ຂໍ້ທີ 28), “ຢ່າກະບົດ” (ຂໍ້ທີ 15), “ຈົ່ງຄາດແອວຂອງເຈົ້າເພື່ອວຽກງານນັ້ນ” (ຂໍ້ທີ 7), ແລະ “ຈົ່ງຖ່ອມຕົວ” (ຂໍ້ທີ 10). ເມື່ອເຮົາເຮັດຕາມຄຳແນະນຳນີ້, ພຣະຜູ້ເປັນເຈົ້າຈະ “ຈູງມືພາ [ເຮົາ] ໄປ” ຜ່ານຜ່າຄວາມຍາກລຳບາກ ແລະ ໄປສູ່ການປິ່ນປົວ ແລະ ຄວາມສະຫງົບສຸກ (ເບິ່ງ ຂໍ້ທີ 10, 13).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ພຣະຜູ້ເປັນເຈົ້າສາມາດ “ສັ່ງທຸກສິ່ງທັງປວງເພື່ອຜົນປະໂຫຍດ [ຂອງເຮົາ].”
ເມື່ອເຖິງປີ 1836, ສາດສະໜາຈັກໄດ້ມີໜີ້ສິນຫລາຍໃນການເຮັດວຽກງານຂອງພຣະຜູ້ເປັນເຈົ້າ. ໂຈເຊັບ ສະມິດ ແລະ ຄົນອື່ນໆເປັນຫ່ວງກ່ຽວກັບໜີ້ສິນເຫລົ່ານີ້ ແລະ ໄດ້ຊອກຫາທາງຈ່າຍໜີ້ສິນ (ເບິ່ງ ຫົວຂໍ້ພາກຂອງ ຄຳສອນ ແລະ ພັນທະສັນຍາ 111).
ຂະນະທີ່ທ່ານອ່ານ ພາກທີ 111, ໃຫ້ພິຈາລະນາວິທີທີ່ພຣະຄຳຂອງພຣະຜູ້ເປັນເຈົ້າຕໍ່ໂຈເຊັບອາດກ່ຽວຂ້ອງກັບທ່ານແນວໃດ—ແລະ ສິ່ງທີ່ທ່ານເປັນຫ່ວງເປັນໃຍນຳ. ຍົກຕົວຢ່າງ, ທ່ານເຄີຍຮູ້ສຶກເຖິງຄວາມຮັກຂອງພຣະເຈົ້າຕອນໃດ “ເຖິງແມ່ນຈະເປັນຄວາມໂງ່ຈ້າຂອງພວກເຈົ້າກໍຕາມ” (ຂໍ້ທີ 1)? ພຣະຜູ້ເປັນເຈົ້າໄດ້ຊ່ວຍທ່ານໃຫ້ພົບເຫັນ “ຊັບສົມບັດ” ທີ່ບໍ່ຄາດຄິດແນວໃດ (ຂໍ້ທີ 10)? ພຣະອົງໄດ້ກະທຳຫຍັງແດ່ເພື່ອ “ສັ່ງທຸກສິ່ງທັງປວງເພື່ອຜົນປະໂຫຍດຂອງພວກເຈົ້າ” (ຂໍ້ທີ 11). ວະລີທີ່ວ່າ “ໃຫ້ໄວເທົ່າທີ່ພວກເຈົ້າຮັບມັນໄດ້” ສິດສອນທ່ານກ່ຽວກັບພຣະບິດາເທິງສະຫວັນແນວໃດ?
ເບິ່ງ ມັດທາຍ 6:19–21, 33; “More Treasures Than One,” ໃນ Revelations in Context, 229–34 ນຳອີກ.
ຄຳສອນ ແລະ ພັນທະສັນຍາ 112:3–15, 22
ພຣະຜູ້ເປັນເຈົ້າຈະນຳພາເຮົາ ເມື່ອເຮົາສະແຫວງຫາພຣະປະສົງຂອງພຣະອົງດ້ວຍຄວາມຖ່ອມຕົວ.
ທອມມັສ ບີ ມາສ໌, ປະທານກຸ່ມອັກຄະສາວົກສິບສອງ, ບໍ່ພໍໃຈທີ່ໂຈເຊັບ ສະມິດ, ໂດຍທີ່ບໍ່ໄດ້ປຶກສາກັບເພິ່ນກ່ອນ, ໄດ້ເອີ້ນສະມາຊິກສອງຄົນໃນກຸ່ມຂອງເພິ່ນ ໃຫ້ໄປສັ່ງສອນພຣະກິດຕິຄຸນໃນປະເທດອັງກິດ. ເພິ່ນໄດ້ໄປພົບກັບສາດສະດາ, ຜູ້ຊຶ່ງໄດ້ຮັບການເປີດເຜີຍທີ່ຊ່ວຍໃຫ້ທອມມັສກຳຈັດຄວາມຮູ້ສຶກເຈັບປວດຂອງເພິ່ນ. ການເປີດເຜີຍນັ້ນໄດ້ຖືກບັນທຶກໄວ້ຢູ່ໃນ ຄຳສອນ ແລະ ພັນທະສັນຍາ 112.
ໃຫ້ເກັບສະພາບການນີ້ໄວ້ໃນໃຈຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 112. ທ່ານພົບເຫັນຫຍັງແດ່ທີ່ອາດຮັກສາຄວາມຮູ້ສຶກເຈັບປວດຂອງທອມມັສ? ໃນ ຂໍ້ທີ 3–15 ແລະ 22, ທ່ານສາມາດຊອກຫາຄຳຕອບຕໍ່ຄຳຖາມເຊັ່ນ: ຄວາມຖ່ອມຕົວຄືຫຍັງ? ຄຳວ່າ ພຣະຜູ້ເປັນເຈົ້າຈະ “ຈູງມື” ພາທ່ານໄປໝາຍຄວາມວ່າແນວໃດ? ທ່ານຄິດວ່າເປັນຫຍັງຄວາມຖ່ອມຕົວຈຶ່ງຊ່ວຍໃຫ້ທ່ານໄດ້ຮັບການນຳພາຈາກພຣະຜູ້ເປັນເຈົ້າ? ທ່ານສາມາດພົບຄຳຕອບເພີ່ມເຕີມໃນ “Pattern of Humility” ໃນ ຂ່າວສານຂອງແອວເດີ ໂຈເຊັບ ດັບເບິນຢູ ສີຕາຕີ “Patterns of Discipleship” (Liahona, Nov. 2022, 87–88).
ຄິດກ່ຽວກັບຄົນໃດຄົນໜຶ່ງທີ່ທ່ານຮູ້ຈັກວ່າເປັນຄົນຖ່ອມຕົວ. ບຸກຄົນນີ້ເຮັດຫຍັງເພື່ອສະແດງໃຫ້ເຫັນຄວາມຖ່ອມຕົວ? ທ່ານຮຽນຮູ້ຫຍັງແດ່ຈາກພຣະຜູ້ຊ່ວຍໃຫ້ລອດກ່ຽວກັບການເປັນຄົນຖ່ອມຕົວ? ບາງທີທ່ານສາມາດຫາຮູບພາບເຖິງເວລາໃນຊີວິດຂອງພຣະອົງຕອນພຣະອົງໄດ້ສະແດງຄວາມຖ່ອມຕົວ.
ທ່ານເຄີຍຮູ້ສຶກໄດ້ຮັບການນຳພາຈາກພຣະຜູ້ເປັນເຈົ້າ ເມື່ອທ່ານຖ່ອມຕົວເມື່ອໃດ?
ເບິ່ງ Ulisses Soares, “Be Meek and Lowly of Heart,” Liahona, Nov. 2013, 9–11; “The Faith and Fall of Thomas Marsh,” ໃນ Revelations in Context, 54–60; Topics and Questions, “Humility,” ຫ້ອງສະໝຸດພຣະກິດຕິຄຸນ; “Be Thou Humble,” Hymns, no. 130 ນຳອີກ.
ໃຫ້ຜູ້ຮຽນມີສ່ວນຮ່ວມ. ໃຫ້ຄິດກ່ຽວກັບວິທີທີ່ທ່ານສາມາດຊ່ວຍຜູ້ຄົນທີ່ທ່ານສິດສອນໃຫ້ມີສ່ວນຮ່ວມຢ່າງແຂງຂັນໃນການຮຽນຮູ້ຄວາມຈິງໃນພຣະຄຳພີໄດ້ແນວໃດ. ຕົວຢ່າງເຊັ່ນ, ເພື່ອຊ່ວຍໃຫ້ເຂົາເຈົ້າເຂົ້າໃຈວ່າພຣະຜູ້ເປັນເຈົ້າກ່າວຫຍັງໃນ ຄຳສອນ ແລະ ພັນທະສັນຍາ 112:10, ທ່ານສາມາດເອົາຜ້າປິດຕາຄົນໃດຄົນໜຶ່ງ ແລະ ຈູງມືລາວໄປຢ່າງລະມັດລະວັງອ້ອມຮອບຕັ່ງນັ່ງ ຫລື ວັດຖຸອື່ນໆ. ເຮົາຮຽນຮູ້ຫຍັງແດ່ກ່ຽວກັບຄວາມຖ່ອມຕົວຈາກການສາທິດນີ້?
ຄຳສອນ ແລະ ພັນທະສັນຍາ 112:12–26; 28:33–34
ຜູ້ກັບໃຈຢ່າງແທ້ຈິງມາຮູ້ຈັກພຣະເຢຊູຄຣິດ.
ຂໍ້ເທັດຈິງທີ່ອັກຄະສາວົກບາງຄົນໃນປີ 1837 ໄດ້ຫັນມາຕໍ່ຕ້ານສາດສະດາ ເປັນສິ່ງເຕືອນໃຈທີ່ດີວ່າ ບໍ່ວ່າການເອີ້ນຂອງເຮົາໃນສາດສະໜາຈັກຈະແມ່ນຫຍັງ ຫລື ເຮົາຮູ້ຈັກພຣະກິດຕິຄຸນຫລາຍປານໃດກໍຕາມ, ເຮົາຕ້ອງແນ່ໃຈວ່າ ເຮົາໄດ້ບຳລຸງລ້ຽງການປ່ຽນໃຈເຫລື້ອມໃສຂອງເຮົາຕໍ່ພຣະເຢຊູຄຣິດເປັນສ່ວນບຸກຄົນ. ບາງທີທ່ານສາມາດອ່ານ ຄຳສອນ ແລະ ພັນທະສັນຍາ 112:12–26, 28, 33–34 ແລະ ຊອກຫາຄວາມຈິງທີ່ສາມາດຊ່ວຍທ່ານໃຫ້ເອົາຊະນະການທົດລອງແຫ່ງສັດທາ ຫລື ປ່ຽນໃຈເຫລື້ອມໃສເຕັມທີ່ຫລາຍຍິ່ງຂຶ້ນຕໍ່ພຣະຜູ້ເປັນເຈົ້າ. ທ່ານອາດຮູ້ສຶກໄດ້ຮັບການດົນໃຈໃຫ້ແບ່ງປັນສິ່ງທີ່ທ່ານພົບ ເພື່ອຊ່ວຍຄົນອື່ນເພີ່ມຄວາມເຂັ້ມແຂງໃຫ້ແກ່ການປ່ຽນໃຈເຫລື້ອມໃສຂອງເຂົາເຈົ້າຕໍ່ພຣະຄຣິດ.
ໂຈເຊັບ ສະມິດ ໄດ້ເປັນ “ຜູ້ຮັບໃຊ້ຄົນໜຶ່ງຢູ່ໃນພຣະຫັດຂອງພຣະຄຣິດ.”
ສາດສະດາເອຊາຢາໄດ້ກ່າວເຖິງລູກຫລານຂອງເຢຊີ ວ່າເປັນ “ກົກໄມ້” ແລະ ເປັນ “ຮາກ” (ເອຊາຢາ 11:1, 10). ໃນ ພາກທີ 113, ພຣະຜູ້ເປັນເຈົ້າໄດ້ອະທິບາຍວ່າ ລູກຫລານເຫລົ່ານີ້, ຜູ້ຮັບໃຊ້ຂອງພຣະຄຣິດ, ຈະເປັນເຄື່ອງມືໃນການເຕົ້າໂຮມຜູ້ຄົນຂອງພຣະຜູ້ເປັນເຈົ້າໃນຍຸກສຸດທ້າຍ (ເບິ່ງ ຄຳສອນ ແລະ ພັນທະສັນຍາ 113:4, 6). ຄຳທຳນາຍນີ້ບັນຍາຍກ່ຽວກັບສາດສະດາ ໂຈເຊັບ ສະມິດ ເປັນຢ່າງດີ. ຄວາມຈິງນີ້ ແລະ ຢ່າງອື່ນໆ ຢູ່ໃນ ພາກທີ 113 ໄດ້ເປັນກຳລັງໃຈໃຫ້ໄພ່ພົນລະຫວ່າງທີ່ປະເຊີນກັບຄວາມຫຍຸ້ງຍາກຢູ່ໃນເມືອງເຄີດແລນແນວໃດ? ທ່ານພົບເຫັນຫຍັງແດ່ຢູ່ໃນການເປີດເຜີຍ ທີ່ດົນໃຈທ່ານໃຫ້ຍັງຄົງເຂັ້ມແຂງ ແລະ ສືບຕໍ່ມີພາກສ່ວນໃນວຽກງານຂອງພຣະຜູ້ເປັນເຈົ້າໃນທຸກວັນນີ້?
ເບິ່ງ ຄູ່ມືພຣະຄຳພີ, “ເຢຊີ,” ຫ້ອງສະໝຸດພຣະກິດຕິຄຸນ; 2 ນີໄຟ 21:10–12; ໂຈເຊັບ ສະມິດ—ປະຫວັດ 1:40.
ເອຊາຢາໄດ້ຂຽນເຖິງ “ກົກໄມ້” ແລະ “ຮາກ” ເກີດອອກມາຈາກ “ເຊື້ອສາຍຂອງດາວິດ” (ເອຊາຢາ 11:1).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ເບິ່ງ ຄຳສອນ ແລະ ພັນທະສັນຍາ 111:2, 10–11.
ສິ່ງທີ່ເປັນຂອງພຣະເຈົ້າສາມາດເປັນຊັບສົມບັດຕໍ່ເຮົາ.
-
ທ່ານ ແລະ ລູກໆຂອງທ່ານສາມາດແຕ້ມສິ່ງທີ່ເຂົ້າມາສູ່ຈິດໃຈ ເມື່ອພວກທ່ານໄດ້ຍິນຄຳວ່າ ຊັບສົມບັດ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 111:2, 10–11 ນຳກັນ ແລະ ປຽບທຽບສິ່ງທີ່ເປັນຂອງໂລກກັບສິ່ງທີ່ເປັນຂອງພຣະຜູ້ເປັນເຈົ້າ. (ເບິ່ງ ໜ້າກິດຈະກຳ ຂອງອາທິດນີ້.) ເຮົາຈະສາມາດສະສົມສິ່ງທີ່ເປັນຂອງພຣະເຈົ້າໃຫ້ຫລາຍຂຶ້ນໄດ້ແນວໃດ?
ຄຳສອນ ແລະ ພັນທະສັນຍາ 112:10
ພຣະຜູ້ເປັນເຈົ້າຈູງມືເຮົາ ແລະ ຕອບຄຳອະທິຖານຂອງເຮົາ.
-
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 112:10 ນຳກັນ, ທ່ານ ແລະ ລູກໆຂອງທ່ານສາມາດຮ້ອງເພງ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12). ພວກທ່ານກໍສາມາດຫລິ້ນເກມທີ່ກ່ຽວກັບການນຳພາກັນແລະກັນ “ຈູງມືໄປ” (ເຊັ່ນ ການຍ່າງຂ້າມສິ່ງກີດກັນ). ພຣະຜູ້ເປັນເຈົ້ານຳພາເຮົາ “ຈູງມືໄປ,” ໃນວິທີໃດ ເຖິງແມ່ນພຣະອົງບໍ່ໄດ້ຢູ່ກັບເຮົາຕົວຕໍ່ຕົວ? ເປັນຫຍັງເຮົາຈຶ່ງຕ້ອງການພຣະຜູ້ເປັນເຈົ້າເພື່ອນຳພາເຮົາ? ເຮົາຮູ້ສຶກວ່າພຣະຜູ້ເປັນເຈົ້ານຳພາເຮົາໄປຕອນໃດ?
-
ທ່ານ ຫລື ລູກໆຂອງທ່ານສາມາດຂຽນຄຳໃນ ຄຳສອນ ແລະ ພັນທະສັນຍາ 112:10 ແລະ ຂີດກ້ອງພອນຕ່າງໆທີ່ພຣະຜູ້ເປັນເຈົ້າປະທານໃຫ້ເຮົາ ເມື່ອເຮົາຖ່ອມຕົວຕໍ່ພຣະອົງ. ຊຸກຍູ້ລູກໆຂອງທ່ານໃຫ້ບອກເຖິງຕອນທີ່ພວກເຂົາໄດ້ທູນຂໍຄວາມຊ່ວຍເຫລືອຈາກພຣະຜູ້ເປັນເຈົ້າດ້ວຍຄວາມຖ່ອມຕົວ ແລະ ໄດ້ຮັບຄຳຕອບຕໍ່ຄຳອະທິຖານຂອງພວກເຂົາ ຫລື ໄດ້ຖືກນຳພາໄປເຮັດບາງສິ່ງທີ່ດີ (ເບິ່ງ ໂມໂຣໄນ 7:13, 16).
ລາຍລະອຽດຈາກ Arise and Walk [ຈົ່ງລຸກຂຶ້ນ ແລະ ຍ່າງໄປ], ໂດຍ ຊາຍມັນ ດູວີ
ຄຳສອນ ແລະ ພັນທະສັນຍາ 112:11
ພຣະເຢຊູປະສົງໃຫ້ເຮົາຮັກທຸກຄົນ.
-
ທ່ານ ແລະ ລູກໆຂອງທ່ານສາມາດປ່ຽນຜຽນກັນອ່ານຈາກ “ບົດທີ 41: ບັນຫາໃນເມືອງເຄີດແລນ” (ໃນ ເລື່ອງຄຳສອນ ແລະ ພັນທະສັນຍາ, 158–60). ແມ່ນໃຜໃນເລື່ອງນີ້ທີ່ເຮັດໃຫ້ບັນຫາໃນເມືອງເຄີດແລນຮ້າຍແຮງຂຶ້ນກວ່າເກົ່າ? ແມ່ນໃຜທີ່ພະຍາຍາມເຮັດໃຫ້ມັນດີຂຶ້ນກວ່າເກົ່າ? ແລ້ວທ່ານສາມາດອ່ານ ຄຳສອນ ແລະ ພັນທະສັນຍາ 112:11 ແລະ ເວົ້າລົມກັນກ່ຽວກັບວ່າ ເປັນຫຍັງພຣະຜູ້ຊ່ວຍໃຫ້ລອດຈຶ່ງປະສົງໃຫ້ເຮົາຮັກຊຶ່ງກັນແລະກັນ. ພຣະອົງໄດ້ສະແດງຄວາມຮັກສຳລັບຜູ້ຄົນທີ່ປະພຶດບໍ່ດີຕໍ່ພຣະອົງເມື່ອໃດ? (ສຳລັບຕົວຢ່າງ, ເບິ່ງ ລູກາ 23:34). ພວກທ່ານກໍສາມາດຮ້ອງເພງນຳກັນກ່ຽວກັບການຮັກຄົນອື່ນ, ເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50).
Chapter 41: Trouble in Kirtland: 1837–1838
ຄຳສອນ ແລະ ພັນທະສັນຍາ 112:11–14, 24–26
ຜູ້ກັບໃຈຢ່າງແທ້ຈິງມາຮູ້ຈັກພຣະເຢຊູຄຣິດ.
-
ຫລັງຈາກທີ່ອ່ານ ຄຳສອນ ແລະ ພັນທະສັນຍາ 112:24–26, ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບຄວາມແຕກຕ່າງລະຫວ່າງການຮູ້ຈັກຊື່ຂອງບາງຄົນ ແລະ ການຮູ້ຈັກເຂົາເຈົ້າ. ຄຳສອນໃດຈາກ ຂໍ້ທີ 11–14 ຊ່ວຍໃຫ້ເຮົາເຂົ້າໃຈວ່າ ການຮູ້ຈັກພຣະຜູ້ເປັນເຈົ້າໝາຍຄວາມວ່າແນວໃດ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Be Thou Humble [ຈົ່ງຖ່ອມຕົວ], ໂດຍ ຈູລີ ຣໍເຈີສ໌