“ວັນທີ 13–19 ເດືອນຕຸລາ: ‘ການເສຍສະລະຂອງລາວຈະສັກສິດຕໍ່ເຮົາຫລາຍກວ່າລາຍໄດ້ຂອງລາວ’: ຄຳສອນ ແລະ ພັນທະສັນຍາ 115–120,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 115–120,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Far West [ຟາແວັດ], ໂດຍ ອາລ໌ ຣາວສ໌

ວັນທີ 13–19 ເດືອນຕຸລາ: “ການເສຍສະລະຂອງລາວຈະສັກສິດຕໍ່ເຮົາຫລາຍກວ່າລາຍໄດ້ຂອງລາວ”

ຄຳສອນ ແລະ ພັນທະສັນຍາ 115–120

ມັນມີເຫດຜົນສຳລັບໄພ່ພົນທີ່ຈະມີຄວາມຫວັງກັບສະຖານທີ່ເຕົ້າໂຮມແຫ່ງໃໝ່ຂອງເຂົາເຈົ້າ, ເມືອງຟາແວັດ, ລັດມີເຊີຣີ. ເມືອງນີ້ໄດ້ເຕີບໂຕຢ່າງໄວ, ເບິ່ງຄືວ່າມີພື້ນທີ່ຢ່າງຫລວງຫລາຍ, ແລະ ຢູ່ໃກ້ ອາດາມ-ອອນໄດ-ອາມັນ, ສະຖານທີ່ທີ່ມີຄວາມສຳຄັນທາງວິນຍານທີ່ຍິ່ງໃຫຍ່ ທັງໃນອະດີດ ແລະ ອະນາຄົດ (ເບິ່ງ ຄຳສອນ ແລະ ພັນທະສັນຍາ 107:53–56; 116). ເຖິງຢ່າງໃດກໍຕາມ, ມັນຄົງເປັນເລື່ອງຍາກສຳລັບໄພ່ພົນທີ່ຈະບໍ່ຄິດກ່ຽວກັບສິ່ງທີ່ເຂົາເຈົ້າໄດ້ສູນເສຍ. ນອກເໜືອຈາກໄດ້ຖືກຂັບໄລ່ອອກຈາກເມືອງອິນດີເພັນເດັນສ໌ແລ້ວ, ສູນກາງໃຫຍ່ຂອງຊີໂອນ, ໄພ່ພົນຍັງໄດ້ຫລົບໜີຈາກເມືອງເຄີດແລນນຳອີກ, ປະຖິ້ມພຣະວິຫານທີ່ເຂົາເຈົ້າຮັກ ຫລັງຈາກພຽງແຕ່ສອງປີ. ແລະ ເທື່ອນີ້ບໍ່ໄດ້ເປັນພຽງແຕ່ສັດຕູນອກສາດສະໜາຈັກເທົ່ານັ້ນທີ່ສ້າງບັນຫາ—ສະມາຊິກຜູ້ສຳຄັນຫລາຍຄົນໄດ້ຫັນມາຕໍ່ຕ້ານໂຈເຊັບ ສະມິດ, ລວມທັງສະມາຊິກສີ່ຄົນໃນກຸ່ມອັກຄະສາວົກສິບສອງ.

ແທນທີ່ຈະສຸມໃຈໃສ່ສິ່ງທີ່ເຂົາເຈົ້າໄດ້ສູນເສຍ, ຄົນຊື່ສັດພຽງແຕ່ສືບຕໍ່ສ້າງສາຊີໂອນຕໍ່ໄປ, ຄັ້ງນີ້ຢູ່ໃນເມືອງຟາແວັດ. ເຂົາເຈົ້າໄດ້ວາງແຜນທີ່ຈະສ້າງພຣະວິຫານແຫ່ງໃໝ່. ອັກຄະສາວົກສີ່ທ່ານຖືກເອີ້ນ. ເຂົາເຈົ້າໄດ້ເຂົ້າໃຈວ່າ ການເຮັດວຽກງານຂອງພຣະເຈົ້າບໍ່ໄດ້ໝາຍຄວາມວ່າ ຈະບໍ່ມີວັນລົ້ມເຫລວ, ມັນໝາຍຄວາມວ່າ ທ່ານຈະ “ລຸກຂຶ້ນໃໝ່.” ແລະ ເຖິງແມ່ນວ່າທ່ານຕ້ອງໄດ້ເສຍສະລະ, ແຕ່ການເສຍສະລະເຫລົ່ານັ້ນແມ່ນສັກສິດຕໍ່ພຣະເຈົ້າ, ແມ່ນແຕ່ “ສັກສິດຫລາຍກວ່າ … ລາຍໄດ້ [ຂອງທ່ານ]” (ຄຳສອນ ແລະ ພັນທະສັນຍາ 117:13).

ເບິ່ງ Saints, 1:296–99.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 115:3–6

ຊື່ຂອງສາດສະໜາຈັກແມ່ນສຳຄັນຕໍ່ພຣະຜູ້ເປັນເຈົ້າ.

ປະທານຣະໂຊ ເອັມ ແນວສັນ ໄດ້ກ່າວວ່າ ຊື່ຂອງສາດສະໜາຈັກເປັນ “ເລື່ອງທີ່ສຳຄັນແທ້ໆ” (“The Correct Name of the Church,” Liahona, Nov. 2018, 87). ໃຫ້ຄິດເບິ່ງວ່າເປັນຫຍັງສິ່ງນີ້ຈຶ່ງເປັນຄວາມຈິງ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 115:4–6. ຊື່ຂອງສາດສະໜາຈັກກ່ຽວຂ້ອງກັບວຽກງານ ແລະ ພາລະກິດຂອງມັນແນວໃດ?

ເບິ່ງ 3 ນີໄຟ 27:1–11 ນຳອີກ.

ຄຳສອນ ແລະ ພັນທະສັນຍາ 115:5–6

ຊີໂອນ ແລະ ສະເຕກຂອງນາງໃຫ້ “ບ່ອນຫລົບໄພຈາກພະຍຸ.”

ຂະນະທີ່ທ່ານສຶກສາການຈິນຕະນາພາບທີ່ມີພະລັງໃນ ຄຳສອນ ແລະ ພັນທະສັນຍາ 115:5–6, ໃຫ້ພິຈາລະນາບົດບາດທີ່ພຣະຜູ້ເປັນເຈົ້າຕ້ອງການໃຫ້ທ່ານ, ໃນຖານະສະມາຊິກຂອງສາດສະໜາຈັກຂອງພຣະອົງ, ບັນລຸ. ຍົກຕົວຢ່າງ, ທ່ານສາມາດເຮັດຫຍັງເພື່ອທີ່ຈະ “ລຸກຂຶ້ນ ແລະ ສ່ອງແສງອອກໄປ” ຫລື “ເປັນທຸງສັນຍານໃຫ້ປະຊາຊາດ”? (ຂໍ້ທີ 5). ພະຍຸທາງວິນຍານໃດແດ່ທີ່ທ່ານສັງເກດເຫັນຢູ່ອ້ອມຂ້າງທ່ານ? ທ່ານພົບເຫັນ “ບ່ອນຫລົບໄພ” ຜ່ານທາງການເຕົ້າໂຮມແນວໃດ? (ຂໍ້ທີ 6).

ເບິ່ງ “Brightly Beams Our Father’s Mercy,” Hymns, no. 335 ນຳອີກ.

ຫໍໄຟ — ສາດສະໜາຈັກຂອງພຣະຜູ້ຊ່ວຍໃຫ້ລອດສາມາດເປັນແສງສະຫວ່າງໃນບ່ອນຫລົບໄພໃນພະຍຸໄດ້.

ຄຳສອນ ແລະ ພັນທະສັນຍາ 117

ການເສຍສະລະຂອງເຮົາແມ່ນສັກສິດຕໍ່ພຣະຜູ້ເປັນເຈົ້າ.

ໃຫ້ຈິນຕະນາການວ່າທ່ານເປັນນິວເອັນ ເຄ ວິດນີ ຫລື ພັນລະຍາຂອງລາວ, ເອລີຊາເບັດ, ຜູ້ກຳລັງປະສົບຄວາມຈະເລີນຮຸ່ງເຮືອງໃນຊີວິດໃນເມືອງເຄີດແລນ ແລະ ແລ້ວຖືກຂໍໃຫ້ໜີໄປ. ທ່ານພົບເຫັນຫຍັງແດ່ຢູ່ໃນ ຄຳສອນ ແລະ ພັນທະສັນຍາ 117:1–11 ທີ່ອາດຊ່ວຍເຂົາເຈົ້າຕັດສິນໃຈເສຍສະລະແບບນີ້? ການເສຍສະລະໃດແດ່ທີ່ທ່ານໄດ້ເຮັດເພື່ອພຣະເຈົ້າ? ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບວ່າພຣະເຈົ້າເປັນໃຜ ແລະ ສິ່ງທີ່ພຣະອົງກະທຳ?

ການຮຽກຮ້ອງອໍລີເວີ ກະແຣນເຈີ ໃຫ້ເສຍສະລະ ແມ່ນແຕກຕ່າງຈາກຄູ່ວິດນີ: ພຣະຜູ້ເປັນເຈົ້າໄດ້ມອບໝາຍໃຫ້ເພິ່ນຢູ່ເມືອງເຄີດແລນ ແລະ ຈັດການເລື່ອງການເງິນຂອງສາດສະໜາຈັກ. ເຖິງແມ່ນວ່າເພິ່ນໄດ້ເປັນຕົວແທນຂອງສາດສະໜາຈັກດ້ວຍຄວາມຊື່ສັດ, ແຕ່ໃນທີ່ສຸດເພິ່ນກໍບໍ່ປະສົບຄວາມສຳເລັດຫລາຍເລີຍ. ໃຫ້ພິຈາລະນາວ່າພຣະຄຳຂອງພຣະຜູ້ເປັນເຈົ້າຢູ່ໃນ ຄຳສອນ ແລະ ພັນທະສັນຍາ 117:12–15 ກ່ຽວຂ້ອງກັບສິ່ງທີ່ພຣະອົງໄດ້ຮຽກຮ້ອງຈາກທ່ານແນວໃດ.

ເບິ່ງ “Far West and Adam-ondi-Ahman,” ໃນ Revelations in Context, 239–40 ນຳອີກ.

ຄຳສອນ ແລະ ພັນທະສັນຍາ 119–20

ສ່ວນສິບຂອງເຮົາຊ່ວຍສ້າງອານາຈັກຂອງພຣະເຈົ້າ.

ຄຳແນະນຳໃນ ພາກທີ 119 ແລະ 120 ຊີ້ແຈງວ່າສ່ວນສິບຄືຫຍັງ: ເຮົາມອບ “ໜຶ່ງສ່ວນສິບ” ຂອງລາຍໄດ້ (ຫລື ລາຍຮັບ) ແຕ່ລະປີຂອງເຮົາ (ເບິ່ງ ຄຳສອນ ແລະ ພັນທະສັນຍາ 119:4). ແຕ່ການເປີດເຜີຍເຫລົ່ານີ້ແມ່ນຫລາຍກວ່າການໃຫ້ຄຳນິຍາມ. ພຣະຜູ້ເປັນເຈົ້າໄດ້ບອກໄພ່ພົນວ່າສ່ວນສິບຈະ “ຊຳລະແຜ່ນດິນຊີໂອນໃຫ້ບໍລິສຸດ.” ຖ້າປາດສະຈາກກົດນີ້, ພຣະອົງໄດ້ກ່າວວ່າ, “ມັນຈະບໍ່ເປັນ … ຊີໂອນສຳລັບພວກເຈົ້າ” (ຂໍ້ທີ 6). ທ່ານເຄີຍຄິດກ່ຽວກັບສ່ວນສິບໃນທາງນີ້ບໍ? ການຈ່າຍສ່ວນສິບສາມາດຊ່ວຍທ່ານໃຫ້ບໍລິສຸດຫລາຍຂຶ້ນ, ແລະ ພ້ອມສຳລັບຊີໂອນໄດ້ແນວໃດ?

ທ່ານຮຽນຮູ້ຫຍັງແດ່ຈາກການເປີດເຜີຍເຫລົ່ານີ້ກ່ຽວກັບວິທີທີ່ຜູ້ຮັບໃຊ້ຂອງພຣະຜູ້ເປັນເຈົ້າໃຊ້ເງິນທຶນສ່ວນສິບ? ສຳນວນທີ່ວ່າ “ໂດຍສຽງຂອງເຮົາເອງເຖິງພວກເຂົາ” ຢູ່ໃນ ຄຳສອນ ແລະ ພັນທະສັນຍາ 120 ມີຄວາມສຳຄັນຕໍ່ທ່ານແນວໃດ?

ແອວເດີ ເດວິດ ເອ ແບ໊ດນາ ໄດ້ໃຫ້ຄຳອະທິບາຍທີ່ເປັນປະໂຫຍດກ່ຽວກັບການໃຊ້ສ່ວນສິບ ແລະ ພອນທີ່ມາຈາກການເຊື່ອຟັງກົດນີ້ “The Windows of Heaven” (Liahona, Nov. 2013, 19–20). ຄຳຖາມຕໍ່ໄປນີ້ອາດຊ່ວຍໄດ້ເມື່ອທ່ານສຶກສາຂ່າວສານຂອງເພິ່ນ:

The Windows of Heaven
Spiritual and temporal blessings come into our lives as we live the law of tithing.

ໃຜເປັນຜູ້ກຳນົດວ່າຈະໃຊ້ສ່ວນສິບແນວໃດ ຫລັງຈາກຈ່າຍໃຫ້ສາດສະໜາຈັກ?
ເງິນສ່ວນສິບຖຶກນຳໃຊ້ແບບໃດ?
ພອນຫຍັງແດ່ທີ່ມີມາຈາກຜົນຂອງການຈ່າຍສ່ວນສິບ? ຍົກຕົວຢ່າງ, ການຈ່າຍສ່ວນສິບເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງທ່ານກັບພຣະບິດາເທິງສະຫວັນ ແລະ ພຣະເຢຊູຄຣິດແນວໃດ?
ທ່ານຮຽນຮູ້ຫຍັງແດ່ຈາກຄຳເຊື້ອເຊີນຂອງແອວເດີ ແບ໊ດນາ?
ທ່ານຈະສາມາດຊ່ວຍຄົນອື່ນເພີ່ມສັດທາຂອງພວກເຂົາໃນກົດສ່ວນສິບຂອງພຣະຜູ້ເປັນເຈົ້າໄດ້ແນວໃດ?

ເບິ່ງ ມາລາກີ 3:8–12; “The Tithing of My People,” ໃນ Revelations in Context, 250–55 ນຳອີກ.

ຊ່ວຍຄົນອື່ນນຳໃຊ້ສິ່ງທີ່ພວກເຂົາກຳລັງຮຽນຮູ້. ເຖິງແມ່ນບຸກຄົນໃດໜຶ່ງຢາກຈ່າຍສ່ວນສິບ, ແຕ່ບາງຄັ້ງພວກເຂົາບໍ່ຮູ້ວ່າຕ້ອງເຮັດແນວໃດ. ຖ້າຫາກທ່ານກຳລັງສິດສອນຄອບຄົວຂອງທ່ານ ຫລື ຫ້ອງຮຽນ, ໃຫ້ພິຈາລະນາທີ່ຈະໃຊ້ບາງເວລາເພື່ອອະທິບາຍວິທີຈ່າຍສ່ວນສິບ, ບໍ່ວ່າຈະເປັນທາງອອນລາຍ ຫລື ໃບຈ່າຍສ່ວນສິບ ຫລື ການບໍລິຈາກອື່ນໆ. (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 27.)

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 115:4–5

ເຮົາເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.

ເພື່ອຊ່ວຍໃຫ້ລູກໆຂອງທ່ານຮຽນຮູ້ຊື່ຂອງສາດສະໜາຈັກ ແລະ ເຂົ້າໃຈວ່າເປັນຫຍັງມັນຈຶ່ງສຳຄັນ, ໃຫ້ພິຈາລະນາທີ່ຈະຖາມວ່າມີໃຜສາມາດເວົ້າຊື່ເຕັມຂອງສາດສະໜາຈັກໄດ້ຫລືບໍ່. ແລ້ວທ່ານສາມາດສະແດງຊື່ໃຫ້ພວກເຂົາເຫັນຈາກ ຄຳສອນ ແລະ ພັນທະສັນຍາ 115:4 ແລະ ໃຫ້ພວກເຂົາເວົ້າລຶ້ມຄືນມັນກັບທ່ານ. ຂະນະທີ່ທ່ານເຮັດ, ໃຫ້ພິຈາລະນາຊີ້ບອກຄຳສຳຄັນ ແລະ ເປັນຫຍັງມັນຈຶ່ງສຳຄັນ. ທ່ານກໍສາມາດທົບທວນ “ບົດທີ 43: ຊື່ຂອງສາດສະໜາຈັກຂອງພຣະເຢຊູຄຣິດ” (ໃນ ເລື່ອງຄຳສອນ ແລະ ພັນທະສັນຍາ, 164, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ) ຫລື ຮ້ອງເພງ “The Church of Jesus Christ” (Children’s Songbook, 77) ນຳອີກ.

Chapter 43: Jesus Christ Names His Church: April 1838

ຄຳສອນ ແລະ ພັນທະສັນຍາ 115:4–6

ຕົວຢ່າງຂອງເຮົາສາມາດຊ່ວຍຄົນອື່ນໃຫ້ມາຫາພຣະຄຣິດ ແລະ ພົບຄວາມປອດໄພ.

ລູກໆຂອງທ່ານອາດຮູ້ຈັກຄົນທີ່ກຳລັງດີ້ນລົນ ແລະ ຕ້ອງການ “ບ່ອນຫລົບໄພ” ຈາກ “ມໍລະສຸມຊີວິດ” (ຂໍ້ທີ 6). ພວກເຂົາຈະສາມາດຊ່ວຍຜູ້ຄົນເຫລົ່ານີ້ໄດ້ແນວໃດ? ໃຫ້ພິຈາລະນາທີ່ຈະເຊື້ອເຊີນລູກໆຂອງທ່ານໃຫ້ຢືນຂຶ້ນເມື່ອທ່ານອ່ານຄຳວ່າ ລຸກຂຶ້ນ ໃນ ຄຳສອນ ແລະ ພັນທະສັນຍາ 115:5. ພວກເຂົາສາມາດຍືດນິ້ວມືອອກໄປເໝືອນແສງອາທິດເມື່ອທ່ານອ່ານຄຳວ່າ ສ່ອງແສງອອກໄປ. ເຕືອນລູກໆຂອງທ່ານວ່າ ແສງສະຫວ່າງຂອງເຮົາມາຈາກພຣະເຢຊູຄຣິດ, ແລະ ຊ່ວຍພວກເຂົາໃຫ້ຄິດເຖິງວິທີທີ່ພວກເຂົາຈະສາມາດ “ສ່ອງແສງອອກໄປ” ດັ່ງທີ່ພຣະອົງກະທຳ.
ລູກໆຂອງທ່ານສາມາດແຕ້ມຮູບສະແດງເຖິງ ຄຳສອນ ແລະ ພັນທະສັນຍາ 115:6. ຍົກຕົວຢ່າງ, ພວກເຂົາສາມາດແຕ້ມຮູບພະຍຸພ້ອມກັບຜູ້ຄົນທີ່ຫລົບໄພຢູ່ໃນອາຄານຂອງສາດສະໜາຈັກ. ພະຍຸອາດເປັນຕົວແທນໃຫ້ສິ່ງໃດ? ສາດສະໜາຈັກຂອງພຣະຜູ້ຊ່ວຍໃຫ້ລອດໃຫ້ຄວາມຊ່ວຍເຫລືອແນວໃດ? ຊ່ວຍໃຫ້ລູກໆຂອງທ່ານຄິດກ່ຽວກັບໝູ່ເພື່ອນ, ສະມາຊິກໃນຄອບຄົວ, ຫລື ເພື່ອນບ້ານທີ່ຂັດສົນ. ເຮົາຈະສາມາດເຊື້ອເຊີນພວກເຂົາໃຫ້ຊອກຫາຄວາມຊ່ວຍເຫລືອໃນສາດສະໜາຈັກຂອງພຣະເຢຊູຄຣິດແນວໃດ?

ຄຳສອນ ແລະ ພັນທະສັນຍາ 117

ການເສຍສະລະຂອງເຮົາແມ່ນສັກສິດຕໍ່ພຣະຜູ້ເປັນເຈົ້າ.

ເຊື້ອເຊີນລູກໆຂອງທ່ານໃຫ້ທຳທ່າວ່າພວກເຂົາເປັນນິວເອັນ ເຄ ວິດນີ. ພວກເຂົາຈະຮູ້ສຶກແນວໃດຖ້າຫາກພຣະຜູ້ເປັນເຈົ້າໄດ້ຂໍໃຫ້ພວກເຂົາໜີຈາກວຽກງານທີ່ຈະເລີນກ້າວໜ້າຂອງພວກເຂົາ ແລະ ໃຫ້ຍ້າຍໄປຢູ່ບ່ອນອື່ນ? (ມັນອາດເປັນປະໂຫຍດທີ່ຈະທົບທວນ “ບົດທີ 41: ບັນຫາໃນເມືອງເຄີດແລນ,” ໃນ ເລື່ອງຄຳສອນ ແລະ ພັນທະສັນຍາ, 158–60, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ.) ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 117:1–11 ນຳກັນ, ໃຫ້ຂໍໃຫ້ລູກໆຂອງທ່ານຢຸດທ່ານເມື່ອພວກເຂົາໄດ້ຍິນບາງສິ່ງທີ່ຈະຊ່ວຍພວກເຂົາໃຫ້ມີສັດທາທີ່ຈະເຊື່ອຟັງພຣະຜູ້ເປັນເຈົ້າ. ການເສຍສະລະຢ່າງໃດແດ່ທີ່ເຮົາເຮັດເພື່ອຈະເຊື່ອຟັງພຣະຜູ້ເປັນເຈົ້າ? ພຣະອົງອວຍພອນເຮົາແນວໃດ?

Chapter 41: Trouble in Kirtland: 1837–1838

ຄຳສອນ ແລະ ພັນທະສັນຍາ 119–20

ພຣະບິດາເທິງສະຫວັນໃຊ້ສ່ວນສິບເພື່ອເປັນພອນໃຫ້ລູກໆຂອງພຣະອົງ.

ເດັກນ້ອຍຫລາຍຄົນທີ່ທ່ານສິດສອນອາດນ້ອຍເກີນໄປທີ່ຈະຫາເງິນ ແລະ ຈ່າຍສ່ວນສິບ, ແຕ່ມັນເປັນສິ່ງດີສຳລັບພວກເຂົາທີ່ຈະເຂົ້າໃຈວິທີທີ່ສ່ວນສິບມີສ່ວນປະກອບໃນວຽກງານຂອງພຣະຜູ້ເປັນເຈົ້າຕະຫລອດທົ່ວໂລກແນວໃດ. ໃຫ້ພິຈາລະນາທີ່ຈະໃຊ້ຮູບພາບ ແລະ ໜ້າກິດຈະກຳ ຢູ່ທ້າຍຂອງໂຄງຮ່າງນີ້ ເພື່ອຊ່ວຍພວກເຂົາໃຫ້ເຂົ້າໃຈວ່າ ສ່ວນສິບຄືຫຍັງ. (ເບິ່ງ “ບົດທີ 44: ສ່ວນສິບ,” ໃນ ເລື່ອງຄຳສອນ ແລະ ພັນທະສັນຍາ, 165–66, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ ນຳອີກ.) ພຣະບິດາເທິງສະຫວັນໃຊ້ສ່ວນສິບເພື່ອເປັນພອນໃຫ້ແກ່ລູກໆຂອງພຣະອົງແນວໃດ? ແບ່ງປັນຄວາມຮູ້ສຶກຂອງທ່ານກ່ຽວກັບກົດສ່ວນສິບ ແລະ ວ່າມັນເປັນພອນໃຫ້ແກ່ທ່ານແນວໃດ.

ເດັກກຳລັງຈ່າຍສ່ວນສິບ — ເມື່ອເຮົາຈ່າຍສ່ວນສິບ, ເຮົາສະແດງສັດທາຂອງເຮົາໃນພຣະເຢຊູຄຣິດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.