O Leo o le Toefuataiga

Falepuipui o Liperate

A o faafalepuipuiina i Liperate, Misuri, na maua ai e Iosefa Samita ni tusi na logoina ai o ia e uiga i tulaga faigata o le Au Paia o Aso e Gata Ai o e na tutuli ese mai le malo e ala i le poloaiga a le kovana. Sa oo mai se tusi faamomoiloto mai i lona faletua o Ema. O ana upu, faapea ma tusi a Iosefa na tali atu ai, na faaalia uma ai o la mafatiaga ma o laua faatuatua i le aluga o lenei taimi faigata i le talafaasolopito o le Ekalesia.

O Iosefa Samita ma isi sa taofia i lenei falepuipui i le tau malulu o le 1838–39.

Tusi mai ia Ema Samita ia Iosefa Samita, 7 Mati, 1839

Le Tane Pele

O le maua ai o se avanoa e auina atu ai e ala i se uo, ua ou faia ai se taumafaiga e tusi atu, ae o le a ou le taumafai e tusi uma atu o’u lagona ona o le tulaga o loo e i ai, o puipui, uamea, ma fao, o vaitafe tatafe, o auvai tatafe, o mauga maualuluga o vanu maualalalo, ma folasi o laufanua, ua faapea ona ta va a’i, ma faiga piopio sauā lea na uluai tuuina ai oe i le falepuipui ma ua taofia ai pea oe iina faapea ma le tele o isi faafitauli, ua matuai le mafai ai ona faamatala o’u lagona.

Pe ana leai le malamalama mamā, ma se felafolafoaiga tuusao o le alofa mutimutivale mai le lagi, ou te matuai mautinoa lava e le mafai ona ou onosaia vaaiga o puapuaga na ou ui mai ai … ; ae o loo o’u ola pea ma o le a ou malie e mafatia atili pe afai o le finagalo lea o le Lagi agaalofa, e tatau ona ou puapuagatia mo oe.

O loo matou manuia uma i le taimi nei, vagana ai Feterika o loo fai si ma’i tele.

O Alesana laitiiti o loo o’u siia i le taimi nei o se tasi o tama sili ona lelei e te ono vaai i ai i lou olaga. E ese le aumalosi, faatasi ai ma le fesoasoani a se nofoa [e pipii i ai], o le a tamoe solo ai o ia faataamilo i le potu. …

E leai se tasi ae ua na’o le Atua, e silafia ia ‘ata’ata o lo’u mafaufau ma lagona o lo’u loto ina ua ou tuua lo tatou fale ma le aiga, faatasi ai ma le toetoe lava o mea uma sa tatou anaina, sei vagana ai si a ta’ua Fanau laiti, ma faia ai la’u malaga e o ese ai mai le Setete o Misuri, ae tuua ai oe e loka i totonu o lena falepuipui tuufua. Peitai o le mafaufau i [le tuua o oe ma lo tatou aiga] ua sili atu le faigata nai lo o le mea e tatau ona oo i ai se tagata. …

… Ou te faamoemoe o loo i ai ni aso lelei atu o le a oo mai ia i ta’ua. … Ou te alofa faapelepele ia te oe.

Ema Samita

Tusi mai ia Iosefa Samita ia Ema Samita, 4 Aperila, 1839

Le Avā—pele—ma le alofa.

O le afiafi o le Aso Tofi na ou saofai ai i lalo a’o faasolo goto ifo le la, a’o matou tau autilo atu e ala i pa o lenei falepuipui mamao, e tusi atu ia te oe, ina ia mafai ona ou faailoa atu ia te oe le tulaga o o’u i ai. Ou te talitonu ua tusa nei ma le lima masina ma aso e ono talu ona ou i ai i lalo o le leoleoga i le po ma le ao a se leoleo matamata ita, ma i totonu o puipui, pa, ma faitotoa uamea o’ī o se falepuipui mamao, pogisa ma palapala. Faatasi ai ma lagona lea e na’o le Atua e silafia, ou te tusia ai lenei tusi. O manatunatuga loloto o le mafaufau i lalo o nei tulaga ua feteenai ma le peni, po o le laulaufaiva, po o Agelu, e faamatala, pe valivali, i le tagata ola e le’i oo lava i mea ua ta oo i ai. … Ta te faalagolago i le aao o Ieova, ae le o se isi lava, mo lo tatou laveaiga, ma afai na te le faia, o le a le faia lava, ia e mautinoa aua ua toatele tagata o lenei setete ua fiainu i o matou toto; e le faapea ona ua matou sala i se mea. … La’u Pele Ema, e faaauau pea ona ou mafaufau atu ia te oe ma tamaiti. … Ou te fia vaai ia Feterika laitiiti, Iosefa, Iulia, Alesana, Ioana, ma le [sifi]–toeaina [le taifau a le aiga]. … O le a ou savali fiafia atu mai iinei ia te oe ma le leai o ni seevae, ma le leai o se mea e ufiufi ai [lo’u] ulu, ma afa faasausau, e vaai oe ma o le a le foliga faigata, o le a foliga mai o se mea matagofie. … Ou te tauave ma le lototele o’u sauaga uma, e faapena foi ia i latou o loo matou faatasi; e leai se tasi o i matou ua fati. Ou te manao e aua ne’i e faatagaina le [ta fanau] ia galo a’u. Ta’u atu ia i latou e alofa Tama ia i latou ma se alofa atoatoa, ma o loo ia faia mea uma na te mafaia e aluese ai mai tagata leaga ina ia alu atu ia i latou. … Ta’u atu ia i latou ua fai atu Tama e ao ina avea i latou ma tamaiti lelei, ma vaai le latou tina. …

O lau,

Iosefa Samita le Itiiti

O Faamatalaga

1. “Letter from Emma Smith, 7 March 1839,” Letterbook 2, 37, josephsmithpapers.org; ua faaonaponei le sipelaga, faasa’oga, ma le kalama.

2. “Letter to Emma Smith, 4 April 1839,” 1–3, josephsmithpapers.org; ua faaonaponei le sipelaga, faasa’oga, ma le kalama.

3. Sa pueina Iosefa ma ana soa i le aso 31 o Oketopa, 1839, ma taofia ai i lalo o le leoleoga malosi i le ao ma le po. Ina ua uma se faamasinoga faataitai i Richmond, Misuri, sa aveina atu i latou i le Falepuipui i Liperate i le aso 1 o Tesema.