Sisifo Mamao, Misuri, saunia e Al Rounds

“O Le a Sili Atu Le Paia o Lana Taulaga Ia te Aʼu Nai Lo Ana Oloa e Tele”

Mataupu Faavae ma Feagaiga 115–120

Sa i ai se mafuaaga mo le Au Paia e mauaina ai se lagona mautinoa e uiga i lo latou nofoaga fou e faapotopoto i ai, o Sisifo Mamao, Misuri. Sa televave le faatupula’ia o le aai, sa foliga mai ua fua tele le laueleele, ma sa latalata ane Atamu-onai-Amani, o se nofoaga e tāua tele faaleagaga i le taimi ua tuanai ma i le lumanai (tagai i le Mataupu Faavae ma Feagaiga 107:53–56; 116). Ae, atonu lava sa faigata mo le Au Paia ona lē mafaufau i a latou mea na lafoaia. E ese mai le tutuliesea mai Initipene, o le nofoaga tutotonu o Siona, sa tatau foi i le Au Paia ona sosola ese mai Katelani, ma tuua ai lo latou malumalu pele ina ua mavae le na o le lua tausaga. Ma o le taimi lenei, sa le na’o fili i fafo o le Ekalesia na faamatua’ia le vevesi—e toatele tagata iloga o le ekalesia na fulitua faasaga ia Iosefa Samita, e aofia ai le toafa o sui o le Korama a Aposetolo e Toasefululua.

Nai lo o le taulai atu i a latou mea ua leiloloa, sa faaauau pea e le au faamaoni ona fausia Siona, ae o le taimi la lea i Sisifo Mamao. Sa latou faia ni fuafuaga mo se malumalu fou. E toafa Aposetolo fou na valaauina. Sa latou malamalama o le faia o le galuega a le Atua e le faapea o le a e lē toilalo lava; o lona uiga e te “toe tulai a’e.” Ma e ui o le a e faia ni osigataulaga, o na osigataulaga e paia i le Atua, e faapea ona “o le a sili atu le paia … nai lo [au] oloa e tele,” (Mataupu Faavae ma Feagaiga 117:13).

Tagai i le Au Paia, 1:296–99.

Manatu mo le Aoaoina i le Aiga ma i le Lotu

Mataupu Faavae ma Feagaiga 115:3–6

O le igoa o le Ekalesia e tāua i le Alii.

Na saunoa Peresitene Russell M. Nelson o le igoa o le Ekalesia o “se mataupu e matua taua tele” (“O Le Igoa Sa’o o le Ekalesia,” Liahona, Nov. 2018, 87). Mafaufau pe aisea e moni ai lenei mea a o e faitau i le Mataupu Faavae ma Feagaiga 115:4–6. O le a le mea a le igoa o le Ekalesia e fai i lana galuega ma le misiona?

Tagai foi i le 3 Nifae 27:1–11.

Mataupu Faavae ma Feagaiga 115:5-6

O Siona ma ona siteki e ofoina atu “se sulufaiga mai le afā.”

A o e suesue i le ata mamana i le Mataupu Faavae ma Feagaiga 115:5–6, mafaufau i le matafaioi e finagalo le Alii ia te oe, o se tagata o Lana Ekalesia, e faataunuu. Mo se faataitaiga, o le a se mea e mafai ona e faia e “tutulai ma susulu atu” ai po o le “avea o se tagavai mo atunuu”? (fuaiupu 5). O a ni afā faaleagaga o e matauina o siomia ai oe? E faapefea ona e maua le “sulufaiga” e ala i le faapotopotoina? (fuaiupu 6).

Tagai foi i le “Brightly Beams Our Father’s Mercy,” Hymns, no. 335.

E mafai ona avea le Ekalesia a le Faaola ma se malamalama ma se sulufaiga i le afā.

Mataupu Faavae ma Feagaiga 117

O aʻu taulaga e paia i le Alii.

Manatu faapea o oe o Newel K. Whitney po o lona faletua, o Elisapeta, o e sa faamanuiaina olaga i Katelani ona talosagaina lea e o ese. O le a se mea e te maua i le Mataupu Faavae ma Feagaiga 117:1–11 atonu sa fesoasoani ia te oe e fai ai lenei osigataulaga? O a osigataulaga e te faia mo le Atua? O a ni mea o aoao mai e nei fuaiupu ia te oe e uiga po o ai le Atua ma mea na Te faia?

O le osigataulaga sa talosagaina ia Oliva Granger e faia, sa ese mai le au Whitney: sa tofia o ia e le Alii e nofo i Katelani e faamamā mea tautupe a le Ekalesia. A o avea o ia ma sui o le Ekalesia i le amiosao, sa i’u lava ina le faamanuiaina tele o ia. Mafaufau pe faapefea ona faatatau afioga a le Alii i le Mataupu Faavae ma Feagaiga 117:12–15 i mea ua Ia poloaiina ai oe.

Tagai foi i le “Far West and Adam-onandi-Ahman,” i le Revelations in Context, 239–40.

Mataupu Faavae ma Feagaiga 119–20

O la’u sefuluai e fesoasoani e fausia le malo o le Atua.

O faatonuga o loo i le vaega 119 ma le 120 o loo faamanino mai ai le sefuluai: tatou te foaʼi atu le “tasi-vaesefulu” o a tatou faasiliga (po o tupe maua) i tausaga taitasi (tagai i le Mataupu Faavae ma Feagaiga 119:4). Ae o nei faaaliga e tele atu mea e faia nai lo le tuuina mai o se faauigaga. Na taʼu atu e le Alii i le Au Paia o le sefuluai o le a “faapaiaina ai le laueleele o Siona.” Ma a aunoa ma lenei tulafono, na Ia fetalai, “o le a le avea ma … Siona ia te outou” (fuaiupu 6). Pe na i ai se taimi na e mafaufau ai e uiga i le sefuluai i lenei auala? E mafai faapefea e le totogiina o le sefuluai ona fesoasoani e faapaiaina atili ai oe, saunia atili ai mo Siona?

O le a se mea ua e aoao mai i nei faaaliga e uiga i le ala e faaaoga ai e auauna a le Alii tupe o le sefuluai? O le a le mea e tāua ia te oe e uiga i le fuaitau “i loʼu lava leo ia te i latou,” i le Mataupu Faavae ma Feagaiga 120?

Ua tuuina mai e Elder David A. Bednar se faamatalaga aoga o le auala e faaaoga ai le sefuluai ma faamanuiaga e maua mai le usitaia o lenei tulafono i le “O Pupuni o le Lagi” (Liahona, Nov. 2013, 19–20). E mafai ona fesoasoani fesili nei a o e suesue i lana sāvali:

The Windows of Heaven

Spiritual and temporal blessings come into our lives as we live the law of tithing.

• O ai e fuafuaina pe faapefea ona faaaoga le sefuluai pe a uma ona totogi i le Ekalesia?

• O le a le mea e faaaoga i ai le sefuluai?

• O a ni faamanuiaga ua oo mai o se taunuuga o le totogiina o le sefuluai? Mo se faataitaiga, o a ni auala e faamalosia ai e le totogiina o le sefuluai lau sootaga ma le Tama Faalelagi ma Iesu Keriso?

• O le a se mea e mafai ona e aoaoina mai le valaaulia a Elder Bednar?

• E mafai faapefea ona e fesoasoani atu i isi e faateleina lo latou faatuatua i le tulafono a le Alii o le sefuluai?

Tagai foi i le Malaki 3:8–12; “O Le Sefuluai a Lo’u Nuu,” i le Revelations in Context, 250–55.

Fesoasoani i isi e faaaoga mea o loo latou aoaoina. E tusa lava pe manao se tagata e totogi le sefuluai, o nisi taimi latou te le iloa pe faapefea. Afai o loo e aoaoina lou aiga po o se vasega, mafaufau e faaalu sina taimi e faamatala ai pe faapefea ona totogi le sefuluai, a le o le initoneti po o se pepa o le Sefuluai ma Isi Taulaga. (Tagai i le Aoao Atu i le Ala a le Faaola, 27.)

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Atamu-onai-Amani

• Sefuluai

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 115:4–5

Ou te auai i le Ekalesia a Iesu Keriso o le Au Paia o Aso e Gata Ai.

• Ina ia fesoasoani i lau fanau e aoao le igoa o le Ekalesia ma malamalama pe aisea e tāua ai, mafaufau e fesili atu pe mafai e se tasi o i latou ona ta’u mai le igoa atoa o le Ekalesia. Ona mafai lea ona e faaali atu ia i latou le igoa mai le Mataupu Faavae ma Feagaiga 115:4 ma fai atu ia i latou e toe fai faatasi ma oe. A o e faia, mafaufau e faasino atu upu tāua ma pe aisea e tāua ai. E mafai foi ona e iloiloina le “Mataupu 43: Ua Faaigoa e Iesu Keriso Lana Ekalesia” (i le Tala o le Mataupu Faavae ma Feagaiga, 164, po o le vitiō talafeagai i le Gospel Library) pe usu le “O Le Ekalesia a Iesu Keriso” (Tusipese a Tamaiti, 48).

Chapter 43: Jesus Christ Names His Church: April 1838

Mataupu Faavae ma Feagaiga 115:4–6

O a’u faataitaiga e mafai ona fesoasoani i isi e o mai ia Keriso ma maua le saogalemu.

• Atonu e iloa e lau fanau tagata o loo tauivi ma manaomia le “sulufaiga” mai “afā o le olaga” (fuaiupu 6). E mafai faapefea ona latou fesoasoani i nei tagata? Mafaufau e valaaulia lau fanau e tutu pe a e faitauina le upu tutulai i le Mataupu Faavae ma Feagaiga 115:5. E mafai ona faaloloa o latou tamatamailima e pei o ave o le la pe a e faitau le susulu atu. Faamanatu atu i lau fanau o lo tatou malamalama e mai ia Iesu Keriso, ma fesoasoani ia i latou e mafaufau i ni auala e mafai ona latou “susulu atu” ai e pei ona Ia faia.

• E mafai e lau fanau ona tusi se ata e faaalia ai le Mataupu Faavae ma Feagaiga 115:6. Mo se faataitaiga, e mafai ona latou tusia se afā faatasi ai ma tagata o loo sulufaʻi i se fale o le Ekalesia. O le a le mea e mafai ona suitulaga i le afā? E faapefea ona tuuina atu e le Ekalesia a le Faaola le fesoasoani? Fesoasoani i lau fanau e mafaufau i se uo, tagata o le aiga, po o se tuaoi o manaomia le fesoasoani. E mafai faapefea ona tatou valaaulia i latou e saili le fesoasoani i le Ekalesia a Iesu Keriso?

Mataupu Faavae ma Feagaiga 117

O aʻu taulaga e paia i le Alii.

• Valaaulia lau fanau e faafoliga o i latou o Newel K. Whitney. O a ni o latou lagona pe afai e talosagaina i latou e le Alii e tuua a latou galuega faamanuiaina ma siitia atu i se nofoaga fou? (Atonu e fesoasoani le toe faamanatu o le “Mataupu 41: Faafitauli i Katelani,” i le Tala o le Mataupu Faavae ma Feagaiga, 158–60, po o le vitiō talafeagai i le Gospel Library.) A o outou faitauina faatasi le Mataupu Faavae ma Feagaiga 117:1-11, fai atu i lau fanau e taofi oe pe a latou faalogo i se mea o le a fesoasoani ia i latou e maua ai le faatuatua e usiusitai ai i le Alii. O a osigataulaga tatou te faia e usitai ai i le Alii? E faapefea ona ia faamanuiaina i tatou?

Chapter 41: Trouble in Kirtland: 1837–1838

Mataupu Faavae ma Feagaiga 119–20

E faaaoga e le Tama Faalelagi le sefuluai e faamanuia ai Ana fanau.

• O le toatele o tamaiti o loo e aoaoina atonu e laiti tele e mauaina se tupe ma totogi ai le sefuluai, ae e lelei mo i latou le malamalama pe faapefea ona saofagā le sefuluai i le galuega a le Alii i le lalolagi atoa. Mafaufau e faaaoga ata ma le itulau o gaoioiga i le faaiuga o lenei otootoga e fesoasoani ia i latou e malamalama ai po o le a le sefuluai. (Tagai foi i le “Mataupu 44: Sefuluai,” i le Tala o le Mataupu Faavae ma Feagaiga, 165–66, po o le vitiō talafeagai i le Gospel Library.) E faapefea ona faaaoga e le Tama Faalelagi le sefuluai e faamanuia ai Ana fanau? Faasoa atu ou lagona e uiga i le tulafono o le sefuluai ma le auala ua faamanuiaina ai oe.

Chapter 44: Tithing: July 1838

A totogi a tatou sefuluai, ua tatou faaali atu lo tatou faatuatua ia Iesu Keriso.

Mo nisi manatu, tagai i le lomiga o lenei masina o le mekasini o le Uo .