Falepuipui o Liperate, saunia e Welden Andersen

20–26 Oketopa: “Le Atua e, O Fea Ea Lau Afio?

Mataupu Faavae ma Feagaiga 121–123

O le fogafale pito i lalo o le falepuipui i Liperate, Misuri, sa ta’ua “o le ana.” Sa mafiafia puipui, o le fola maa sa malulu ma eleelea, sa tau leai ni meaai ma pala, ma o faamalama uamea, vaiti e lua, e latalata i le taualuga na faatagaina ai sina malamalama itiiti lava. O iina na faaaluina ai e Iosefa Samita ma isi le fa masina malulu i le taimi o le taumalulu o le 1838–39. I le taimi lea, sa maua e Iosefa i taimi uma ni tala fou e uiga i mafatiaga sa pagatia ai le Au Paia. O le filemu ma le talitonu o le a lelei mea uma i Sisifo Mamao, sa na’o ni nai masina lava na i ai, ae o lenei ua toe leai foi ni mea e nonofo ai le Au Paia, tutuli i le togavao e su’e se isi nofoaga e toe amata atoa ai—o le taimi lenei o loo i le falepuipui lo latou Perofeta.

Ae peitai, e oo lava i lena falepuipui pagatia, na “liligi ifo” le “malamalama mai le lagi” (Mataupu Faavae ma Feagaiga 121:33). O le fesili a Iosefa “Le Atua e, o fea ea lau afio?” sa manino ma mamana ona tali mai: “Aua le mata’u … , aua o le a faatasi le Atua ma oe e faavavau faavavau lava” (Mataupu Faavae ma Feagaiga 121:1; 122:9).

Tagai i le Saints, 1:323–96; “I Totonu o Puipui o le Falepuipui i Liperate,” i le Revelations in Context, 256-63.

Manatu mo le Aoaoina i le Aiga ma i le Lotu

Mataupu Faavae ma Feagaiga 121:1–10, 23–33; 122

I le faatasi ai ma le Atua, o puapuaga e mafai ona “avea mo [o’u] lelei.”

Pe a tatou oo pe oo i latou tatou te alolofa i ai i puapuaga, o se mea masani le mafaufau pe o silafia i tatou e le Atua. Ao e faitau i le Mataupu Faavae ma Feagaiga 121:1–6, mafaufau i taimi sa i ai ni au fesili po o ni faalogona e faapei o Iosefa Samita. O le a se mea e te maua i le tali mai a le Alii, e ono fesoasoani ia te oe pe a i ai ia te oe nei fesili po o faalogona? Mo se faataitaiga, i fuaiupu 7–10, 26–33, matau faamanuiaga ua Ia folafola mai. O le a sou manatu i le uiga o le “gafatia lelei”? E faapefea ona fesoasoani le Faaola ia te oe ia faia lenei mea?

A o e faitau i le vaega 122, mafaufau po o le a le auala e finagalo le Alii e te vaai ai i ou puapuaga. Atonu e te mafaufau loloto i aafiaga na oo mai i ou tofotofoga ma pe na mafai faapefea ona “avea [i latou] mo ou lelei” (fuaiupu 7).

Tagai foi ia Quentin L. Cook, “Filemu o le Tagata Lava Ia i Taimi Faigata,” Liahona, Nov. 2021, 89–92; “O Fea Lo’u Filemu?,” Viiga, nu. 68.

Mataupu Faavae ma Feagaiga 121:34–46

O le mana moni ma faatosinaga e faavae i “mataupu faavae o le amiotonu.”

O le mana faalelalolagi na faamalosia le aveesea o le Au Paia mai Misuri ma le tuuina atu o Iosefa Samita i le falepuipui. Ae a o i ai Iosefa iina, sa aoaoina o ia e le Alii e uiga i se ituaiga mana ese: o Lona mana, “o mana o le lagi.” O le faitau e uiga i lena mana i le Mataupu Faavae ma Feagaiga 121:34–46 e mafai ona fesoasoani ia te oe e aoao ai pe faapefea ona maua lena mana—ma le auala e faaaoga ai e faamanuia ai isi. Atonu e mafai ona e faamaumauina mea ua e aoaoina i se siata e i ai koluma ua faaigoaina Mana o le Lagi ma le Mana Faalelalolagi. E faapefea ona eseese nei ituaiga o mana e lua? O a ni mea o aoao atu ia te oe e nei faamatalaga o le mana o le Alii e uiga ia te Ia?

E mafai foi ona e mafaufau loloto i le upu aafiaga i le fuaiupu 41. O a nisi o tulaga e te manao e avea ai o se aafiaga mo le lelei—atonu i se mafutaga faaleaiga, i le aoga, i le galuega, po o se tofiga i le Ekalesia? O le a se mea ua e aoao mai i fuaiupu 41–46 i le auala e faaaafia ai e le Atua Lana fanau? E mafai ona e aoteleina mea ua e aoaoina e ala i le faamae’aina o se fuaiupu faapenei: “Ina ia faia ni aafiaga mo le lelei, o le a ou .”

Tagai foi ia Jeffrey R. Holland, “E Le Avatu faapei ona Avatu e le Lalolagi,” Liahona, Me 2021, 35–38; David A. Bednar, “O Mana o le Lagi,” Liahona, Me 2012, 48–51; “The Powers of Heaven” (vitiō), Gospel Library.

"The Powers of Heaven"

(D&C 121:34-46) The components and processes involved in providing electricity to a home are compared to the principles the Lord outlined in section 121 for those who would exercise His priesthood in power.

Filifili se fasifuaitau ma suesue loloto i ai. Ina ia aoao atili e uiga i faamanuiaga matagofie o loo faamatala mai i fuaiupu 45–46, e mafai ona e filifilia se fasifuaitau e tulaga ese ia te oe ma suesue loloto i ai. Mo se faataitaiga, o le a le uiga o le upu teuteuina , ma e mafai faapefea e le amiomamā ona teuteuina ou mafaufauga? Pe atonu e mafai ona e maua se ata o le sau ma aoao e uiga i le auala e maua ai le sau i luga o laau. E faapefea ona tutusa lenei mea ma le auala o loo aoao ai e le Alii Lana aoaoga faavae? Faasoa atu mea ua e maua i lou aiga po o uo, e aofia ai au uo i le lotu.

Mataupu Faavae ma Feagaiga 122:8

Na afio ifo Iesu Keriso i lalo o mea uma ina ia mafai ona Ia sii a’e a’u i luga.

O le a sou manatu o le a le uiga o le faapea atu o Iesu Keriso “na afio ifo i lalo … o [mea] uma”? O nisi nei o fuaiupu faaopoopo e mafai ona fesoasoani e te malamalama ai i le fasifuaitau lenei: Isaia 53:3–4; Eperu 2:17–18; 1 Nifae 11:16–33; Alema 7:11–13. E faavae i mea ua e aoaoina, mafaufau e toe fai le Mataupu Faavae ma Feagaiga 122:8 i au lava upu. E mafai faapefea ona e faaalia lou lotofaafetai ia Iesu Keriso mo le afio ifo i lalo o mea uma?

E faapefea e lenei malamalamaaga mai ia Peresitene Dallin H. Oaks ona aafia ai lou malamalama? “E mafai ona tatou faapea o le afio ifo i lalo o mea uma, ua tu ai o Ia ma le atoatoa e siitia i tatou ma tuu mai ia i tatou le malosi tatou te manaomia e onosaia ai o tatou mafatiaga” (“Faamalosia e Ala i le Togiola a Iesu Keriso,” Liahona, Nov. 2015, 64).

Faamatalaga mai le Aua Le Faia Lo’u Loto, a o Lou Finagalo, saunia e Walter Rane

Mataupu Faavae ma Feagaiga 123

“Se’i tatou faia ma le fiafia mea uma o loo i ai lo tatou mana.”

I le Mataupu Faavae ma Feagaiga 123:7–8, sa faasino atu ai Iosefa Samita i talitonuga sese lea na taitai atu ai i mafatiaga, e aofia ai sauaga o le Au Paia. Ia Mati 1839, atonu sa foliga mai na tau leai se mea tele na mafai e le Au Paia ona fai e uiga i ai. Peitai i ana tusi sa tusia mai le Falepuipui i Liperate, sa ta’u atu ai e Iosefa ia i latou le mea e mafai ona latou faia: “[faaputuputu] se malamalama e uiga i mea moni uma” ma “tutulai e faatali, ma le mautinoa atoatoa, e vaai i le faaolataga a le Atua” (Mataupu Faavae ma Feagaiga 123:1, 17). A o e mafaufau i faafitauli i le lalolagi i aso nei, mafaufau i ni auala e talanoaina ai i latou [faafitauli] ua “[i ai i lou] mana” (fuaiupu 12, 17). Ma aua nei faatalalē i mea e foliga mai o ni “mea faatauvaa” (fuaiupu 15). Aisea e tāua ai le faia o nei mea ma le “fiafia”? (fuaiupu 17).

O le tele o tala na talosagaina e Iosefa i totonu o le tusi lenei sa auina atu i le malō ma lolomiina o se faasologa e 11-vaega i se nusipepa a Navu, o le Times and Seasons (tagai i le “A History, of the Persecution, of the Church of Jesus Christ, of Latter Day Saints in Missouri, December 1839–October 1840,” [josephsmithpapers.org]).

Mo nisi manatu, tagai i lomiga o lenei masina o le mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• Iosefa Samita le Itiiti

• Falepuipui o Liperate

Kiliki e vaai i isi mea

Fautuaga mo le Aoaoina o Tamaiti

Mataupu Faavae ma Feagaiga 121:1–9; 122:7–9

Faatasi ai ma le Atua, e mafai ai ona avea o’u tofotofoga ma o’u lelei.

• Ina ia fesoasoani i lau fanau e vaai faalemafaufau pe na faape’i mo Iosefa Samita ma ana uo le i ai i le Falepuipui o Liperate, e mafai ona outou faitau faatasi le “Mataupu 46: Iosefa Samita i le Falepuipui o Liperate” (i le Tala o le Mataupu Faavae ma Feagaiga, 172–74) po o le “Leo o le Toefuataiga: Falepuipui o Liperate” pe matamata i se vaega o le vitiō “Iosefa Samita: Perofeta o le Toefuataiga” (Gospel Library, amata i le 41:30). Ma, a o outou faitau faatasi i le Mataupu Faavae ma Feagaiga 121:1–9, e mafai ona outou talanoa e uiga i le ala na fesoasoani ai le Faaola ia Iosefa ia lagona le filemu. E faapefea ona tatou maua le filemu i le Faaola, e oo lava i taimi faigata?

  Chapter 46: Joseph Smith in Liberty Jail: November 1838–April 1839

  Joseph Smith: The Prophet of the Restoration

  A motion picture about the life and legacy of Joseph Smith, the founding prophet of The Church of Jesus Christ of Latter-day Saints.

• Ina ia fesoasoani i lau fanau ina ia latou iloa o o tatou tofotofoga “o le a avea mo [tatou] lelei” (Mataupu Faavae ma Feagaiga 122:7), talanoa atu ia i latou i le auala e tupu ai o tatou maso pe a tatou tauaveina se mea mamafa. E mafai foi ona e valaaulia i latou e sii i luga se mea mamafa. Ona outou talanoa lea pe faapefea i le feagai ma taimi faigata ona fesoasoani i o tatou agaga ia tuputupu a’e—a o tatou liliu atu i le Alii mo se fesoasoani. Faasoa atu ni faataitaiga mai lou olaga.

Mataupu Faavae ma Feagaiga 121:34–46

O le amiotonu e aumaia ai “mana o le lagi.”

• Atonu o le a fesoasoani se tala faatusa i lau fanau e malamalama ai “i mana o le lagi.” Mo se faataitaiga, e mafai ona e faatusatusaina le mana o le Atua i le malosiaga o le eletise. O le a se mea e ono taofia ai se masini eletise mai le mauaina o le malosiaga? O le a le mea e faaitiitia ai lo tatou mana faaleagaga? O le a le mea e faateleina ai? (Vaavaai mo upu ma fasifuaitau i le Mataupu Faavae ma Feagaiga 121:34–46; tagai foi i le Tusitaulima Aoao, 3.5, 3.6, Gospel Library.)

Mataupu Faavae ma Feagaiga 122:7–9

O loo silafia e Iesu Keriso mea o loo feagai ma a’u.

• A uma ona faitau le Mataupu Faavae ma Feagaiga 122:7–9 ma lau fanau, e mafai ona e faasoa atu se aafiaga i le taimi na e lagonaina ai le faatasi ai o le Faaola ma oe i se taimi o se tofotofoga faigata. E mafai foi ona outou usuina faatasi se pese e pei o le “Sa Tamaitiiti o Iesu” (Tusipese a Tamaiti, 34), ma molimau atu e mafai e Iesu Keriso ona fesoasoani ia i tatou auā Na te silafia o tatou lagona.

Mataupu Faavae ma Feagaiga 123:15–17

E oo lava i mea laiti e mafai ona faia se eseesega tele i le galuega a le Atua.

• Ina ia fesoasoani i lau fanau ia malamalama i le Mataupu Faavae ma Feagaiga 123:15–17, e mafai ona e faasoa atu ia i latou se ata o se vaa tele ma se foeuli laitiiti, pe faasoa atu ia i latou le faamalamalamaga a Elder David A. Bednar i le “O Mataupu Faavae o La’u Talalelei” (Liahona, Me 2021, 125–26). Ona mafai lea ona outou talanoa e uiga i auala laiti e mafai ona tatou auauna atu ai ma le fiafia i o tatou aiga ma uo.

“O Mataupu Faavae o La’u Talalelei”

Ua aoao mai Elder Bednar faapea o aoaoga faavae sa’o o le talalelei e fesoasoani ia i tatou i le faia o filifiliga poto ma tumau ai i le ala o feagaiga.

E pei o le foeuli laitiiti o se vaa tele, o a tatou taumafaiga laiti e mafai ona faia ai se eseesega tele.

Mo nisi manatu, tagai i le lomiga o lenei masina o le mekasini o le Uo .

O Iosefa Samita i le Falepuipui o Liperate, saunia e Greg Olsen