“ສຽງຂອງການຟື້ນຟູ: ສະມາຄົມສະຕີສົງເຄາະ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ສະມາຄົມສະຕີສົງເຄາະ,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
ສຽງຂອງການຟື້ນຟູ
ສະມາຄົມສະຕີສົງເຄາະ
ໃນປີ 1842, ຫລັງຈາກສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນຢູ່ໃນເມືອງນາວູ, ລັດອິລິນອຍ, ສາດສະດາ ໂຈເຊັບ ສະມິດ ໄດ້ກ່າວວ່າ, “ສາດສະໜາຈັກຈະບໍ່ສົມບູນແບບຈົນກວ່າໄດ້ຈັດຕັ້ງກຸ່ມແມ່ຍິງຂຶ້ນ.” ຄ້າຍຄືກັນນີ້, ການສຶກສາເລື່ອງການຟື້ນຟູຂອງສາດສະໜາຈັກຂອງພຣະຜູ້ເປັນເຈົ້າ ແລະ ຖານະປະໂລຫິດຂອງພຣະອົງ ຈະບໍ່ສົມບູນແບບ ຈົນກວ່າຈະຮ່ວມດ້ວຍການສຶກສາເລື່ອງສະມາຄົມສະຕີສົງເຄາະ, ຊຶ່ງຕົວມັນເອງເປັນ “ການຟື້ນຟູຕາມແບບແຜນຂອງສະໄໝບູຮານ” ຂອງກຸ່ມແມ່ຍິງທີ່ເປັນສານຸສິດຂອງພຣະເຢຊູຄຣິດ.
ອີລາຍຊາ ອາ ສະໂນ ມີບົດບາດທີ່ສຳຄັນໃນການຟື້ນຟູນັ້ນ. ນາງໄດ້ຢູ່ນຳຕອນສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນເປັນເທື່ອທຳອິດ ແລະ, ໃນຖານະເລຂາຂອງສະມາຄົມ, ໄດ້ຈົດບັນທຶກລະຫວ່າງການປະຊຸມ. ນາງໄດ້ເປັນພະຍານດ້ວຍຕົວເອງວ່າ ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນ “ຕາມແບບແຜນຂອງຖານະປະໂລຫິດ.” ຂ້າງລຸ່ມນີ້ແມ່ນຖ້ອຍຄຳຂອງນາງ, ທີ່ໄດ້ມີຂຽນໄວ້ຂະນະທີ່ນາງຮັບໃຊ້ເປັນປະທານຄົນທີສອງຂອງສະມາຄົມສະຕີສົງເຄາະສາມັນ, ເພື່ອຊ່ວຍເອື້ອຍນ້ອງຂອງນາງໃຫ້ເຂົ້າໃຈວຽກງານແຫ່ງສະຫວັນ ທີ່ໄດ້ຖືກມອບໃຫ້ແກ່ທິດາແຫ່ງພັນທະສັນຍາຂອງພຣະເຈົ້າ.
ເພື່ອຮຽນຮູ້ຕື່ມອີກກ່ຽວກັບວິທີທີ່ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນ, ໃຫ້ເບິ່ງ Daughters in My Kingdom: The History and Work of Relief Society (2017), 1–25; The First Fifty Years of Relief Society (2016), 3–175.
ຮູບແຕ້ມກ່ຽວກັບການຈັດຕັ້ງສະມາຄົມສະຕີສົງເຄາະ ໂດຍ ພອລ໌ ແມນ
ອີລາຍຊາ ອາ ສະໂນ
“ເຖິງແມ່ນວ່າຊື່ [ສະມາຄົມສະຕີສົງເຄາະ] ອາດເປັນຊື່ຕາມສະໄໝໃໝ່, ແຕ່ທີ່ມາຂອງສະຖາບັນແມ່ນເລີ່ມຕົ້ນແຕ່ສະໄໝບູຮານພຸ້ນ. ພວກເຮົາໄດ້ຖືກບອກໂດຍ [ໂຈເຊັບ ສະມິດ], ວ່າອົງການດຽວກັນນີ້ ມີຢູ່ໃນສາດສະໜາຈັກໃນສະໄໝບູຮານ, ໂດຍມີກ່າວເຖິງຢູ່ໃນສານຫລາຍສະບັບ ຊຶ່ງບັນທຶກຢູ່ໃນພຣະຄຳພີໃໝ່, ໂດຍໃຊ້ຄຳວ່າ, ‘ສຸພາບສະຕີທີ່ຊົງເລືອກໄວ້’ [ເບິ່ງ 2 ໂຢຮັນ 1:1; ຄຳສອນ ແລະ ພັນທະສັນຍາ 25:3].
“ນີ້ແມ່ນອົງການທີ່ບໍ່ສາມາດຕັ້ງຢູ່ປາດສະຈາກຖານະປະໂລຫິດ, ຈາກຄວາມຈິງທີ່ວ່າ ມັນສືບທອດສິດອຳນາດ ແລະ ອິດທິພົນທັງໝົດຈາກແຫລ່ງນັ້ນ. ເມື່ອຖານະປະໂລຫິດໄດ້ຖືກເອົາໄປຈາກແຜ່ນດິນໂລກ, ສະຖາບັນນີ້ ຕະຫລອດທັງລະບຽບທີ່ແທ້ຈິງເພີ່ມເຕີມທັງໝົດຂອງສາດສະໜາຈັກຂອງພຣະເຢຊູຄຣິດຢູ່ເທິງໂລກ, ໄດ້ສູນຫາຍໄປ. …
“ໂດຍທີ່ໄດ້ຢູ່ກັບອົງການຂອງ ‘ສະມາຄົມສົງເຄາະຂອງແມ່ຍິງແຫ່ງນາວູ,’ … ໂດຍທີ່ມີປະສົບການຢ່າງຫລວງຫລາຍຢູ່ໃນສະມາຄົມນັ້ນອີກດ້ວຍ, ບາງທີຂ້າພະເຈົ້າອາດສາມາດສື່ສານແນວຄິດສອງສາມຢ່າງ ທີ່ຈະຊ່ວຍທິດາຂອງຊີໂອນໄດ້ ໃນການກ້າວອອກໄປໃນຕຳແໜ່ງອັນສຳຄັນຫລາຍນີ້, ຊຶ່ງເຕັມໄປດ້ວຍໜ້າທີ່ຮັບຜິດຊອບໃໝ່ ແລະ ທະວີຄູນ. ຖ້າລູກສາວ ແລະ ແມ່ຄົນໃດໃນອິດສະຣາເອນຮູ້ສຶກວ່າຂອບເຂດຂອງຕົນຈຳກັດຫລາຍໃນໂລກປັດຈຸບັນ, ບັດນີ້ເຂົາເຈົ້າຈະພົບໂອກາດທີ່ກວ້າງຂວາງສຳລັບທຸກໆພະລັງ ແລະ ຄວາມສາມາດທຸກຢ່າງ ທີ່ຈະເຮັດຄວາມດີ ຊຶ່ງເຂົາເຈົ້າໄດ້ຮັບໂດຍກົງ. …
ສະມາຄົມສະຕີສົງເຄາະໄດ້ຖືກຈັດຕັ້ງຂຶ້ນຢູ່ໃນຫ້ອງຊັ້ນເທິງຂອງຮ້ານຄ້າດິນຈີ່ສີແດງ.
“ຖ້າຫາກເກີດມີຄຳຖາມຢູ່ໃນໃຈວ່າ ແມ່ນຫຍັງຄືເປົ້າໝາຍຂອງສະມາຄົມສົງເຄາະຂອງແມ່ຍິງ? ຂ້າພະເຈົ້າຈະຕອບວ່າ—ເພື່ອເຮັດຄວາມດີ—ເພື່ອໃຊ້ຄວາມສາມາດທັງໝົດທີ່ພວກເຮົາມີ ໃນການເຮັດຄວາມດີ, ບໍ່ພຽງແຕ່ເພື່ອໃຫ້ການສົງເຄາະແກ່ຄົນຍາກຈົນເທົ່ານັ້ນ ແຕ່ເພື່ອຊ່ວຍຈິດວິນຍານໃຫ້ລອດນຳອີກ. ຄວາມພະຍາຍາມທີ່ສາມັກຄີຈະສຳເລັດຢ່າງນັບບໍ່ຖ້ວນ ຫລາຍກວ່າຄວາມສຳເລັດໂດຍພະລັງງານທີ່ມີປະສິດທິພາບທີ່ສຸດເປັນສ່ວນບຸກຄົນ. …
“ໃນການບໍລິຫານແກ່ຄົນຍາກຈົນ, ສະມາຄົມສົງເຄາະຂອງແມ່ຍິງມີໜ້າທີ່ຢ່າງອື່ນອີກທີ່ຈະປະຕິບັດ ຫລາຍກວ່າພຽງແຕ່ການສົງເຄາະຄວາມຕ້ອງການຝ່າຍຮ່າງກາຍເທົ່ານັ້ນ. ຄວາມຍາກຈົນຂອງຈິດໃຈ ແລະ ຄວາມປ່ວຍໂຊຂອງຫົວໃຈ, ກໍຕ້ອງການ ການເອົາໃຈໃສ່ເຊັ່ນກັນ; ແລະ ຫລາຍເທື່ອຄຳເວົ້າທີ່ອ່ອນໂຍນ—ຄຳແນະນຳສອງສາມຄຳ, ຫລື ແມ່ນແຕ່ການຈັບມືດ້ວຍຄວາມອົບອຸ່ນ ແລະ ດ້ວຍຄວາມຮັກໃຄ່ ຈະເຮັດການດີກວ່າ ແລະ ຮັບຄວາມຊາບຊຶ້ງໃຈຫລາຍກວ່າຖົງຄຳ. …
“ເມື່ອໄພ່ພົນມາເຕົ້າໂຮມກັນຈາກແດນໄກ, ແປກໜ້າຕໍ່ທຸກຄົນ, ແລະ ອ່ອນໄຫວຕໍ່ຄຳຕົວະຂອງຄົນຫລອກລວງທີ່ຈະພາໄປທາງທີ່ບໍ່ດີ, ສະມາຄົມສະຕີ [ສົງເຄາະ] ຈະຖືກກະຕຸ້ນໃຫ້ເບິ່ງແຍງ [ເຂົາເຈົ້າ], ແລະ ແນະນຳເຂົາເຈົ້າໃຫ້ເຂົ້າຮ່ວມສະມາຄົມ ທີ່ຈະຫລໍ່ຫລອມ ແລະ ສົ່ງເສີມເຂົາເຈົ້າ, ແລະ ເໜືອສິ່ງອື່ນໃດ ເພື່ອເພີ່ມຄວາມເຂັ້ມແຂງແກ່ເຂົາເຈົ້າໃຫ້ມີສັດທາໃນພຣະກິດຕິຄຸນ, ແລະ ໃນການເຮັດເຊັ່ນນັ້ນ, ສະມາຄົມອາດເປັນເຄື່ອງມືໃນການຊ່ວຍກູ້ຫລາຍຄົນໄດ້.
“ມັນອາດຕ້ອງໃຊ້ຫລາຍເຫລັ້ມເພື່ອບັນຍາຍໜ້າທີ່, ສິດທິພິເສດ ແລະ ໜ້າທີ່ຮັບຜິດຊອບ ທີ່ມາກັບຂອບເຂດຮັບຜິດຊອບຂອງສະມາຄົມ. … ໃຫ້ລົງມືປະຕິບັດ (ພາຍໃຕ້ການຊີ້ນຳຂອງອະທິການຂອງທ່ານ) ແບບໃຈເຢັນໆ, ຢ່າງຈິງໃຈ, ຢ່າງມີພະລັງ, ດ້ວຍຄວາມສາມັກຄີ ແລະ ດ້ວຍການອະທິຖານ, ແລ້ວພຣະເຈົ້າຈະຕອບແທນຄວາມພະຍາຍາມຂອງທ່ານດ້ວຍຄວາມສຳເລັດຜົນ.”