“ວັນທີ 3–9 ເດືອນພະຈິກ: ‘ສຽງແຫ່ງຄວາມຍິນດີສຳລັບຄົນເປັນ ແລະ ຄົນຕາຍ’: ຄຳສອນ ແລະ ພັນທະສັນຍາ 125–128,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 125–128,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

Us with Them and Them with Us [ພວກເຮົາກັບເຂົາເຈົ້າ ແລະ ເຂົາເຈົ້າກັບພວກເຮົາ], ໂດຍ ເຄດລິນ ຄອນໂນລີ

ວັນທີ 3–9 ເດືອນພະຈິກ: “ສຽງແຫ່ງຄວາມຍິນດີສຳລັບຄົນເປັນ ແລະ ຄົນຕາຍ”

ຄຳສອນ ແລະ ພັນທະສັນຍາ 125–128

ໃນເດືອນສິງຫາ ປີ 1840, ນາງເຈນ ເນແມນ ຜູ້ໂສກເສົ້າໄດ້ຍິນສາດສະດາ ໂຈເຊັບກ່າວຢູ່ໃນງານສົ່ງສະການຂອງເພື່ອນຄົນໜຶ່ງຂອງເພິ່ນຊື່ ຊີມໍ ບະຣັນສັນ. ລູກຊາຍໄວລຸ້ນຂອງນາງເຈນ ຊື່ ໄຊຣັສ ຫາກໍເສຍຊີວິດຄືກັນ. ນາງມີຄວາມໂສກເສົ້າຫລາຍຕື່ມອີກ ເພາະແທ້ຈິງແລ້ວ ທ້າວໄຊຣັສ ບໍ່ໄດ້ຮັບບັບຕິສະມາ, ແລະ ນາງເຈນເປັນຫ່ວງບໍ່ຮູ້ວ່າຈະມີຫຍັງເກີດຂຶ້ນກັບຈິດວິນຍານນິລັນດອນຂອງລາວ. ໂຈເຊັບກໍສົງໄສຄືກັນກ່ຽວກັບອ້າຍທີ່ຮັກຂອງເພິ່ນຊື່ ອາລ໌ວິນ, ຜູ້ໄດ້ເສຍຊີວິດໄປໂດຍທີ່ບໍ່ໄດ້ຮັບບັບຕິສະມາ. ສະນັ້ນສາດສະດາຈຶ່ງຕັດສິນໃຈແບ່ງປັນກັບທຸກຄົນຢູ່ໃນງານສົ່ງສະການ ເຖິງສິ່ງທີ່ພຣະຜູ້ເປັນເຈົ້າໄດ້ເປີດເຜີຍຕໍ່ເພິ່ນ ກ່ຽວກັບຜູ້ທີ່ໄດ້ຕາຍໄປປາດສະຈາກການໄດ້ຮັບພິທີການແຫ່ງພຣະກິດຕິຄຸນ—ແລະ ເຖິງສິ່ງທີ່ເຮົາສາມາດເຮັດໄດ້ແທນເຂົາເຈົ້າ.

ຄຳສອນຂອງການບັບຕິສະມາສຳລັບຄົນຕາຍໄດ້ເຮັດໃຫ້ໄພ່ພົນຕື່ນເຕັ້ນຫລາຍ; ຄວາມຄິດຂອງເຂົາເຈົ້າໄດ້ຫັນໄປຫາສະມາຊິກຄົນໃນຄອບຄົວທັນທີ. ບັດນີ້ ມັນມີຄວາມຫວັງສຳລັບເຂົາເຈົ້າ! ໂຈເຊັບກໍຊື່ນຊົມນຳເຂົາເຈົ້າ, ແລະ ໃນຈົດໝາຍສິດສອນຄຳສອນນີ້, ເພິ່ນໄດ້ໃຊ້ພາສາທີ່ໜ້າຊື່ນຊົມ ແລະ ກະຕືລືລົ້ນ ເພື່ອສະແດງເຖິງສິ່ງທີ່ພຣະຜູ້ເປັນເຈົ້າໄດ້ສິດສອນເພິ່ນກ່ຽວກັບຄວາມລອດຂອງຜູ້ຕາຍ ດັ່ງນີ້: “ໃຫ້ພູເຂົາຮ້ອງດ້ວຍຄວາມຊື່ນຊົມ, ເຈົ້າຮ່ອມພູທັງປວງປ່າວຮ້ອງໃຫ້ດັງ; ແລະ ເຈົ້າທ້ອງທະເລ ແລະ ແຜ່ນດິນແຫ້ງທັງປວງຈົ່ງບອກເຖິງສິ່ງມະຫັດສະຈັນຂອງກະສັດນິລັນດອນຂອງເຈົ້າ!” (ຄຳສອນ ແລະ ພັນທະສັນຍາ 128:23).

ເບິ່ງ Saints, 1:415–27; “Letters on Baptism for the Dead,” ໃນ Revelations in Context, 272–76.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 126

ພຣະຜູ້ເປັນເຈົ້າປະສົງໃຫ້ເຮົາດູແລຄອບຄົວຂອງເຮົາ.

ຫລັງຈາກໄດ້ກັບມາຈາກການເຜີຍແຜ່ທີ່ປະເທດອັງກິດ—ໜຶ່ງໃນການເຜີຍແຜ່ທີ່ເພິ່ນໄດ້ຮັບໃຊ້—ບຣິກຳ ຢັງ ໄດ້ຮັບການເອີ້ນທີ່ສຳຄັນອີກຢ່າງໜຶ່ງຈາກພຣະຜູ້ເປັນເຈົ້າ. ເພິ່ນຖືກຂໍໃຫ້ “ເອົາໃຈໃສ່ຄອບຄົວ [ຂອງເພິ່ນ] ເປັນພິເສດ” (ຂໍ້ທີ 3), ຜູ້ທີ່ໄດ້ຮັບທຸກທໍລະມານໃນຊ່ວງທີ່ເພິ່ນບໍ່ຢູ່. ຂະນະທີ່ທ່ານສຶກສາພາກນີ້, ໃຫ້ພິຈາລະນາວ່າບາງຄັ້ງເປັນຫຍັງພຣະຜູ້ເປັນເຈົ້າຈຶ່ງຮຽກຮ້ອງໃຫ້ມີການເສຍສະລະໃນການຮັບໃຊ້ຂອງເຮົາ. ທ່ານສາມາດເຮັດຫຍັງໄດ້ແດ່ເພື່ອດູແລຄອບຄົວຂອງທ່ານ?

ເບິ່ງ “Take Special Care of Your Family,” ໃນ Revelations in Context, 242–49 ນຳອີກ.

ຄຳສອນ ແລະ ພັນທະສັນຍາ 127:2–4

ເຮົາສາມາດເພິ່ງອາໄສພຣະຜູ້ເປັນເຈົ້າໃນຊ່ວງເວລາທີ່ຍາກລຳບາກ.

ຂໍ້ກ່າວຫາທີ່ຜິດ ແລະ ການຄຸກຄາມເລື່ອງທີ່ຈະຈັບກຸມ ໄດ້ບັງຄັບໃຫ້ໂຈເຊັບ ສະມິດ ຕ້ອງລີ້ຊ່ອນຕົວຢູ່ ໃນເດືອນສິງຫາ ປີ 1842. ແລະ ເຖິງປານນັ້ນ ຖ້ອຍຄຳທີ່ເພິ່ນໄດ້ຂຽນເຖິງໄພ່ພົນລະຫວ່າງເວລານີ້ (ປະຈຸບັນ ຄຳສອນ ແລະ ພັນທະສັນຍາ 127) ແມ່ນເຕັມໄປດ້ວຍຄວາມຄິດໃນແງ່ດີ ແລະ ຄວາມສຸກ. ຂໍ້ທີ 2–4 ສິດສອນທ່ານຫຍັງແດ່ກ່ຽວກັບພຣະເຈົ້າ? ກ່ຽວກັບການຖືກເຍາະເຍີ້ຍ ຫລື ການຕໍ່ຕ້ານ? ວະລີໃດແດ່ຈາກຂໍ້ເຫລົ່ານີ້ທີ່ອາດຊ່ວຍທ່ານໄດ້ ເມື່ອທ່ານຮູ້ສຶກຖືກຂົ່ມເຫັງ? ໃຫ້ຄິດທີ່ຈະບັນທຶກວິທີທີ່ພຣະຜູ້ເປັນເຈົ້າໄດ້ຄ້ຳຊູທ່ານໃນ “ນ້ຳເລິກ” ແຫ່ງຊີວິດຂອງທ່ານແນວໃດ.

ຄຳສອນ ແລະ ພັນທະສັນຍາ 127:5–8; 128:1–8

“ສິ່ງໃດກໍຕາມທີ່ພວກທ່ານບັນທຶກຢູ່ເທິງແຜ່ນດິນໂລກ ຈະຖືກບັນທຶກໄວ້ໃນສະຫວັນ.”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 127:5–8; 128:1–8, ໃຫ້ຊອກຫາເຫດຜົນທີ່ພຣະຜູ້ເປັນເຈົ້າໄດ້ມອບຄຳແນະນຳໃດໜຶ່ງສະເພາະໃຫ້ແກ່ໂຈເຊັບ ສະມິດ ກ່ຽວກັບການບັນທຶກການບັບຕິສະມາແທນຄົນຕາຍ. ສິ່ງນີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ ແລະ ວຽກງານຂອງພຣະອົງ? ທ່ານຮູ້ສຶກວ່າຄຳແນະນຳນີ້ສາມາດນຳໃຊ້ກັບບັນທຶກຄອບຄົວຂອງທ່ານເອງ, ເຊັ່ນ ບັນທຶກສ່ວນຕົວໄດ້ແນວໃດ?

ຊາຍໜຸ່ມກຳລັງເຮັດປະຫວັດຄອບຄົວ — ການຮັບໃຊ້ຢູ່ໃນພຣະວິຫານເພື່ອບັນພະບຸລຸດຂອງເຮົາ ຈະຜູກມັດໃຈເຮົາເຂົ້າກັບເຂົາເຈົ້າ.

ຄຳສອນ ແລະ ພັນທະສັນຍາ 128:5–25

ຄວາມລອດຂອງບັນພະບຸລຸດຂອງເຮົາ ແມ່ນສຳຄັນຕໍ່ຄວາມລອດຂອງເຮົາ.

ເຫັນໄດ້ຢ່າງແຈ່ມແຈ້ງຈາກສິ່ງທີ່ພຣະເຈົ້າໄດ້ເປີດເຜີຍຜ່ານທາງໂຈເຊັບ ສະມິດ ເຖິງເຫດຜົນທີ່ບັນພະບຸລຸດຂອງເຮົາຜູ້ບໍ່ໄດ້ຮັບບັບຕິສະມາໃນຊີວິດນີ້ຕ້ອງການເຮົາ: ເຮົາບັບຕິສະມາແທນເຂົາເຈົ້າ ເພື່ອວ່າເຂົາເຈົ້າຈະສາມາດເລືອກທີ່ຈະຮັບເອົາ ຫລື ປະຕິເສດພິທີການນີ້. ແຕ່ສາດສະດາກໍຍັງໄດ້ສິດສອນວ່າ ຄວາມລອດຂອງບັນພະບຸລຸດຂອງເຮົາແມ່ນ “ຈຳເປັນ ແລະ ສຳຄັນຕໍ່ຄວາມລອດ ຂອງເຮົາ.” ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 128:15–18, ໃຫ້ຄິດກ່ຽວກັບວ່າເປັນຫຍັງຈຶ່ງເປັນແນວນັ້ນ.

ຂໍ້ທີ 5 ສິດສອນວ່າ ພິທີການບັບຕິສະມາສຳລັບຄົນຕາຍ ແມ່ນຖືກ “ຕຽມໄວ້ກ່ອນການວາງຮາກຖານຂອງໂລກ.” ຄວາມຈິງນີ້ສິດສອນທ່ານຫຍັງແດ່ກ່ຽວກັບພຣະເຈົ້າ ແລະ ແຜນຂອງພຣະອົງ? ຂ່າວສານຂອງແອວເດີ ແດວ ຈີ ເຣັນລັນ “Family History and Temple Work: Sealing and Healing” ເພີ່ມຄວາມເຂົ້າໃຈແກ່ທ່ານແນວໃດ? (Liahona, May 2018, 46–49).

ໂຈເຊັບ ສະມິດ ໄດ້ໃຊ້ວະລີເຊັ່ນ “ອຳນາດການຜູກມັດ,” “ບ້ວງ … ເຊື່ອມ,” ແລະ “ການຮ່ວມກັນທີ່ດີພ້ອມ” ເມື່ອສິດສອນກ່ຽວກັບພິທີການຂອງຖານະປະໂລຫິດ ແລະ ການບັບຕິສະມາແທນຄົນຕາຍ. ໃຫ້ຊອກຫາວະລີເຫລົ່ານີ້ ແລະ ວະລີທີ່ຄ້າຍຄືກັນນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 128:5–25. ທ່ານສາມາດຄິດເຖິງສິ່ງຂອງທີ່ທ່ານຈະໃຊ້ອະທິບາຍວະລີເຫລົ່ານີ້ໄດ້ບໍ, ເຊັ່ນບ້ວງໂສ້ ຫລື ເຊືອກ? ເປັນຫຍັງນີ້ຈຶ່ງເປັນວະລີທີ່ດີ ເພື່ອອະທິບາຍຄຳສອນນີ້?

ການພິຈາລະນາຄຳຖາມຕໍ່ໄປນີ້ອາດຊ່ວຍທ່ານສຶກສາຂໍ້ເຫລົ່ານີ້ເຊັ່ນກັນ:

ໃນຄວາມຄິດເຫັນຂອງທ່ານ, ເປັນຫຍັງການບັບຕິສະມາແທນຄົນຕາຍຈຶ່ງຖືເປັນ “ເລື່ອງອັນເລີດລ້ຳທີ່ສຸດໃນບັນດາເລື່ອງທັງໝົດທີ່ເປັນຂອງພຣະກິດຕິຄຸນອັນເປັນນິດ”? (ຂໍ້ທີ 17). ປະສົບການໃດແດ່ທີ່ຊ່ວຍໃຫ້ທ່ານຮູ້ສຶກໃນທາງນີ້?
ໃນຄວາມໝາຍໃດທີ່ແຜ່ນດິນໂລກຈະຖືກສາບແຊ່ງ ຖ້າຫາກບໍ່ມີ “ບ້ວງ … ເພື່ອເຊື່ອມບັນພະບຸລຸດໃສ່ກັບລູກຫລານ”? (ຂໍ້ທີ 18).
ແມ່ນຫຍັງທີ່ປະທັບໃຈທ່ານກ່ຽວກັບຖ້ອຍຄຳຂອງໂຈເຊັບ ສະມິດ ຢູ່ໃນ ຂໍ້ທີ 19–25? ຂໍ້ເຫລົ່ານີ້ມີຜົນກະທົບຕໍ່ວິທີທີ່ທ່ານຮູ້ສຶກກ່ຽວກັບພຣະເຢຊູຄຣິດແນວໃດ? ກ່ຽວກັບການຮັບໃຊ້ໃນພຣະວິຫານເພື່ອບັນພະບຸລຸດຂອງທ່ານ? (ເບິ່ງ “Come, Rejoice,” Hymns, no. 9 ນຳອີກ).

ຫລັງຈາກໄດ້ສຶກສາບົດເຫລົ່ານີ້ແລ້ວ, ທ່ານອາດຮູ້ສຶກໄດ້ຮັບການດົນໃຈໃຫ້ເຮັດບາງສິ່ງເພື່ອບັນພະບຸລຸດຂອງທ່ານ. ແນວຄິດໃນ FamilySearch.org ສາມາດຊ່ວຍໄດ້.

ບ່ອນເກັບກຳ “Inspirational Videos” ໃນ “Temple and Family History” ທີ່ຫ້ອງສະໝຸດພຣະກິດຕິຄຸນ ສາມາດໃຫ້ຄວາມຊ່ວຍເຫລືອໃນທາງການປະຕິບັດ, ເລື່ອງລາວທີ່ດົນໃຈ, ແລະ ຂ່າວສານຈາກຜູ້ນຳກ່ຽວກັບປະຫວັດຄອບຄົວໄດ້.

ໃຊ້ແຫລ່ງຊ່ວຍເຫລືອທີ່ກ່ຽວຂ້ອງຂອງສາດສະໜາຈັກ. ລິ້ງໃນໂຄງຮ່າງ ຈົ່ງຕາມເຮົາມາ ຊ່ວຍໃຫ້ເຂົ້າເຖິງແຫລ່ງຊ່ວຍເຫລືອທີ່ສາມາດຊ່ວຍທ່ານໃຫ້ເຂົ້າໃຈໄດ້ຢ່າງງ່າຍດາຍ ແລະ ນຳໃຊ້ຄວາມຈິງພຣະກິດຕິຄຸນ ຫລື ປະຕິບັດຕາມຄວາມປະທັບໃຈທີ່ທ່ານໄດ້ຮັບ. ຍົກຕົວຢ່າງ, ລິ້ງ FamilySearch ຢູ່ຂ້າງເທິງນຳໄປສູ່ກິດຈະກຳຕ່າງໆ ເຊັ່ນການສ້າງຕົ້ນຕະກຸນຄອບຄົວຂອງທ່ານເອງ, ຊອກຫາບັນພະບຸລຸດຜູ້ຕ້ອງການພິທີການພຣະວິຫານ, ເບິ່ງວ່າບັນພະບຸລຸດຂອງທ່ານມາຈາກໃສ, ຫລື ອັບໂຫລດເລື່ອງລາວຄອບຄົວ.

ເບິ່ງ Kevin R. Duncan, “A Voice of Gladness!,” Liahona, May 2023, 95–97 ນຳອີກ.

“ການຈັດຕຽມອັນຮຸ່ງເຫລື້ອມ ແລະ ອັດສະຈັນ.”

ປະທານກໍດອນ ບີ ຮິງລີ ໄດ້ກ່າວວ່າ:

“ການຊົດໃຊ້ຂອງພຣະເຢຊູແທນທຸກຄົນສະແດງເຖິງການເສຍສະລະແທນຄັ້ງຍິ່ງໃຫຍ່. ພຣະອົງໄດ້ວາງແບບແຜນຊຶ່ງພຣະອົງໄດ້ເປັນຕົວແທນຂອງມວນມະນຸດທັງໝົດ. ແບບແຜນນີ້ຊຶ່ງຄົນໜຶ່ງສາມາດເຮັດແທນອີກຄົນໜຶ່ງໄດ້ຖືກດຳເນີນໄປໜ້າໃນພິທີການຂອງບ້ານຂອງພຣະຜູ້ເປັນເຈົ້າ. ຢູ່ທີ່ນີ້ເຮົາຮັບໃຊ້ແທນຜູ້ທີ່ເສຍຊີວິດປາດສະຈາກຄວາມຮູ້ເລື່ອງພຣະກິດຕິຄຸນ. ທາງເລືອກຂອງເຂົາເຈົ້າຄື ຍອມຮັບ ຫລື ປະຕິເສດພິທີການທີ່ໄດ້ປະຕິບັດໃຫ້. ເຂົາເຈົ້າຖືກວາງໄວ້ຢ່າງເທົ່າທຽມກັບຜູ້ທີ່ຍ່າງຢູ່ເທິງແຜ່ນດິນໂລກ. ຄົນຕາຍຈະໄດ້ຮັບໂອກາດເຊັ່ນດຽວກັບຄົນເປັນ. ອີກຄັ້ງ, ຊ່າງເປັນການຈັດກຽມທີ່ຮຸ່ງເຫລື້ອມ ແລະ ອັດສະຈັນແທ້ໆ ທີ່ພຣະຜູ້ຊົງລິດອຳນາດຍິ່ງໃຫຍ່ໄດ້ກະທຳຜ່ານທາງການເປີດເຜີຍຂອງພຣະອົງຕໍ່ສາດສະດາຂອງພຣະອົງ” (“The Great Things Which God Has Revealed,” Liahona, May 2005, 82–83).

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 126:3

ເຮົາສາມາດຊ່ວຍດູແລຄອບຄົວຂອງເຮົາ.

ເພື່ອຊ່ວຍໃຫ້ລູກໆຂອງທ່ານຮຽນຮູ້ທີ່ຈະຮັບໃຊ້ສະມາຊິກໃນຄອບຄົວຂອງພວກເຂົາ, ໃຫ້ພິຈາລະນາທີ່ຈະແບ່ງປັນຂໍ້ມູນກ່ຽວກັບບຣິກຳ ຢັງ ໃນ “ບົດທີ 50: ໄພ່ພົນໃນເມືອງນາວູ” (ໃນ ເລື່ອງຄຳສອນ ແລະ ພັນທະສັນຍາ, 184, ຫລື ວິດີໂອທີ່ກ່ຽວຂ້ອງ ໃນຫ້ອງສະໝຸດພຣະກິດຕິຄຸນ) ຫລື ສະຫລຸບ ຄຳສອນ ແລະ ພັນທະສັນຍາ 126 ດ້ວຍຄຳຂອງທ່ານເອງ. ທ່ານອາດເນັ້ນວະລີ “ເອົາໃຈໃສ່ຄອບຄົວຂອງເຈົ້າເປັນພິເສດ” (ຂໍ້ທີ 3) ແລະ ເວົ້າລົມກັບລູກໆຂອງທ່ານກ່ຽວກັບວ່າ ການເອົາໃຈໃສ່ຄອບຄົວຂອງເຮົາເປັນພິເສດ ໝາຍຄວາມວ່າແນວໃດ.

1:33
Chapter 50: The Saints in Nauvoo: January–July 1841
ມັນອາດສະໜຸກສະໜານສຳລັບທ່ານ ແລະ ລູກໆຂອງທ່ານທີ່ຈະເບິ່ງຮູບຄອບຄົວ (ຫລື ແຕ້ມຮູບ) ຂະນະທີ່ພວກທ່ານເວົ້າລົມກັນກ່ຽວກັບວິທີທີ່ເຮົາສາມາດຊ່ວຍ “ເອົາໃຈໃສ່” ສະມາຊິກໃນຄອບຄົວ. ພວກທ່ານສາມາດຮ້ອງເພງໜຶ່ງເຊັ່ນ “ຮັກທີ່ບ້ານ” (ເພງສວດ ແລະ ເພງຂອງເດັກນ້ອຍ, 48).

ຄຳສອນ ແລະ ພັນທະສັນຍາ 128:5, 12

ລູກໆຂອງພຣະເຈົ້າທຸກຄົນຕ້ອງການໂອກາດທີ່ຈະໄດ້ຮັບບັບຕິສະມາ.

ເຊື້ອເຊີນລູກໆຂອງທ່ານເພື່ອຊອກຫາຈາກ ຄຳສອນ ແລະ ພັນທະສັນຍາ 128:1 ວ່າເລື່ອງໃດທີ່ຢູ່ໃນຈິດໃຈຂອງໂຈເຊັບ ສະມິດ. ພວກເຂົາກໍສາມາດຄົ້ນຫາ ຂໍ້ທີ 17 ເພື່ອຊອກຫາເລື່ອງໃດທີ່ເພິ່ນຖືວ່າເປັນ “ເລື່ອງອັນລ້ຳເລີດທີ່ສຸດ.” ປ່ອຍໃຫ້ພວກເຂົາແບ່ງປັນສິ່ງທີ່ພວກເຂົາພົບເຫັນ ແລະ ເວົ້າລົມກັນກ່ຽວກັບວ່າ ເປັນຫຍັງເລື່ອງນີ້ຈຶ່ງໜ້າຕື່ນເຕັ້ນຫລາຍແທ້ໆ.
ນອກເໜືອຈາກການຊ່ວຍລູກໆຂອງທ່ານກະກຽມສຳລັບ (ແລະ ດຳລົງຊີວິດຕາມ) ພັນທະສັນຍາແຫ່ງການບັບຕິສະມາຂອງພວກເຂົາ, ທ່ານສາມາດຊ່ວຍພວກເຂົາໃຫ້ຮູ້ຈັກວິທີຊ່ວຍເຫລືອຜູ້ຄົນ ທີ່ບໍ່ໄດ້ເຮັດພັນທະສັນຍາເຫລົ່ານີ້ ໃນຊ່ວງຊີວິດຂອງພວກເຂົາ. ໃຫ້ພິຈາລະນາທີ່ຈະບອກລູກໆຂອງທ່ານກ່ຽວກັບຄົນໃດຄົນໜຶ່ງທີ່ທ່ານຮູ້ຈັກ ທີ່ໄດ້ຕາຍໄປປາດສະຈາກການບັບຕິສະມາ. ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 128:5 ນຳກັນ ແລະ ເບິ່ງຮູບອ່າງບັບຕິສະມາພຣະວິຫານ (ເຊັ່ນ ອັນທີ່ຢູ່ໃນທ້າຍຂອງໂຄງຮ່າງນີ້). ບອກລູກໆຂອງທ່ານວ່າທ່ານຮູ້ສຶກແນວໃດກ່ຽວກັບການຮັບບັບຕິສະມາໃນພຣະວິຫານແທນຄົນທີ່ເສຍຊີວິດ ເພື່ອທຸກຄົນຈະມີໂອກາດເຮັດພັນທະສັນຍາກັບພຣະບິດາເທິງສະຫວັນ.

ຄຳສອນ ແລະ ພັນທະສັນຍາ 128:18

ພຣະບິດາເທິງສະຫວັນປະສົງໃຫ້ເຮົາຮຽນຮູ້ກ່ຽວກັບປະຫວັດຄອບຄົວຂອງເຮົາ.

ມັນອາດຈະສະໜຸກສະໜານສຳລັບທ່ານ ແລະ ລູກໆຂອງທ່ານທີ່ຈະເຮັດບ້ວງໂສ້ເຈ້ຍ ທີ່ມີຊື່ພໍ່ແມ່, ພໍ່ຕາແມ່ຍາຍ, ທວດ, ແລະ ອື່ນໆ (ເບິ່ງ ໜ້າກິດຈະກຳ ຂອງອາທິດນີ້). ແລ້ວພວກທ່ານສາມາດແບ່ງປັນນຳກັນກ່ຽວກັບສິ່ງທີ່ພວກທ່ານຮູ້ກ່ຽວກັບບັນພະບຸລຸດເຫລົ່ານີ້. ອ່ານ ຄຳສອນ ແລະ ພັນທະສັນຍາ 128:18 ນຳກັນ ເພື່ອຊອກຫາວ່າ “ບ້ວງ … ເຊື່ອມ” ແມ່ນຫຍັງ ທີ່ເຮັດໃຫ້ປະຫວັດຄອບຄົວຂອງເຮົາ “ເປັນໜຶ່ງ ແລະ ສົມບູນ.” ພວກທ່ານກໍສາມາດເບິ່ງວິດີໂອ “Courage: I Think I Get It from Him” (ຫ້ອງສະໝຸດພຣະກິດຕິຄຸນ) ນຳອີກ.

1:38
Courage: I Think I Get It From Him
Learn about your ancestors strengths to discover your own strengths.
ກິດຈະກຳເພີ່ມເຕີມເພື່ອຊ່ວຍລູກໆຂອງທ່ານໃຫ້ມີສ່ວນຮ່ວມໃນການສືບປະຫວັດຄອບຄົວ ສາມາດພົບເຫັນຢູ່ໃນ “ພຣະວິຫານ ແລະ ແຜນແຫ່ງຄວາມສຸກ” ໃນພາກຫ້ອຍທ້າຍ ຂ ຫລື ທີ່ FamilySearch.org.

ແມ່ ແລະ ລູກສາວກຳລັງເຮັດຕ່ອງໂສ້ເຈ້ຍ — ພິທີການພຣະວິຫານຊ່ວຍເຮົາໃຫ້ເຕົ້າໂຮມຄອບຄົວຄືກັນກັບບ້ວງໃນຕ່ອງໂສ້.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ອ່າງບັບຕິສະມາໃນພຣະວິຫານ — ອ່າງບັບຕິສະມາຢູ່ໃນພຣະວິຫານອອກເດັນ ຢູທາ.