“ວັນທີ 17–23 ເດືອນພະຈິກ: ‘ຈົ່ງຕຽມພ້ອມສຳລັບການສະເດັດມາຂອງເຈົ້າບ່າວ’: ຄຳສອນ ແລະ ພັນທະສັນຍາ 133–134,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)
“ຄຳສອນ ແລະ ພັນທະສັນຍາ 133–134,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025
Ten Virgins [ຍິງສາວບໍລິສຸດສິບຄົນ], ໂດຍ ໂຮເຮ ໂກໂກ
ວັນທີ 17–23 ເດືອນພະຈິກ: “ຈົ່ງຕຽມພ້ອມສຳລັບການສະເດັດມາຂອງເຈົ້າບ່າວ
ຄຳສອນ ແລະ ພັນທະສັນຍາ 133–134
ໃນປີ 1833, ກຸ່ມອັນຕະພານໄດ້ໂຈມຕີ ແລະ ທຳລາຍແທ່ນພິມຂອງສາດສະໜາຈັກ. ໃນບັນດາວຽກງານການພິມທີ່ກຳລັງດຳເນີນການໃນຂະນະນັ້ນ ຄືປຶ້ມພະບັນຍັດ—ຄວາມພະຍາຍາມຄັ້ງທຳອິດຂອງສາດສະໜາຈັກທີ່ຈະຮວບຮວມການເປີດເຜີຍຍຸກສຸດທ້າຍຂອງພຣະເຈົ້າເປັນເຫລັ້ມດຽວ. ກຸ່ມອັນຕະພານໄດ້ໂຍນໃບທີ່ພິມແລ້ວກະຈາຍໄປທົ່ວທີບ, ແລະ ເຖິງແມ່ນວ່າໄພ່ພົນທີ່ກ້າຫານໄດ້ຮັກສາບາງຈຳນວນໄວ້, ພຽງແຕ່ມີສ່ວນເລັກນ້ອຍເທົ່ານັ້ນຂອງປຶ້ມພຣະບັນຍັດທີ່ຮູ້ວ່າເຫລືອຢູ່.
ສິ່ງທີ່ພວກເຮົາຮູ້ໃນເວລານີ້ວ່າເປັນ ພາກທີ 133 ຂອງຄຳສອນ ແລະ ພັນທະສັນຍາ ແມ່ນພາກທີ່ຖືກຈັດໄວ້ເພື່ອໃຫ້ເປັນພາກຫ້ອຍທ້າຍຂອງປຶ້ມພຣະບັນຍັດ, ຄືກັນກັບເຄື່ອງໝາຍສຽງອຸທານຢູ່ໃນທ້າຍການເປີດເຜີຍທີ່ຖືກຈັດພິມຂອງພຣະຜູ້ເປັນເຈົ້າ. ມັນເຕືອນເຖິງວັນພິພາກສາທີ່ຈະມາເຖິງ ແລະ ຍ້ຳສຽງການເອີ້ນ ທີ່ພົບເຫັນຕະຫລອດທົ່ວການເປີດເຜີຍສະໄໝໃໝ່: ຈົ່ງໜີຈາກຄວາມເປັນໂລກ, ຕາມສັນຍາລັກຂອງບາບີໂລນ. ສ້າງສາຊີໂອນ. ກະກຽມສຳລັບການສະເດັດມາຄັ້ງທີສອງ. ແລະ ເຜີຍແຜ່ຂ່າວສານນີ້ “ແກ່ທຸກປະຊາຊາດ, ແລະ ທຸກຕະກຸນ, ແລະ ທຸກພາສາ, ແລະ ທຸກຜູ້ຄົນທັງປວງ” (ຂໍ້ທີ 37). ເມື່ອແຜນການເທື່ອທຳອິດສຳລັບປຶ້ມພຣະບັນຍັດບໍ່ປະສົບຄວາມສຳເລັດ, ແຕ່ການເປີດເຜີຍນີ້ຍັງເປັນຄຳເຕືອນ ແລະ ເປັນພະຍານວ່າ ວຽກງານຂອງພຣະຜູ້ເປັນເຈົ້າຈະດຳເນີນໄປໜ້າ, “ເພາະພຣະອົງຈະກາງແຂນອັນສັກສິດຂອງພຣະອົງ … , ແລະ ທົ່ວທີ່ສຸດຂອງແຜ່ນດິນໂລກຈະເຫັນການຊ່ວຍໃຫ້ລອດຂອງພຣະເຈົ້າຂອງພວກເຂົາ” (ຂໍ້ທີ 3).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຄຳສອນ ແລະ ພັນທະສັນຍາ 133:4–14
ພຣະເຢຊູຄຣິດເອີ້ນເຮົາໃຫ້ປະຕິເສດບາບີໂລນ ແລະ ມາສູ່ຊີໂອນ.
ສິ່ງທີ່ກົງກັນຂ້າມທາງວິນຍານກັບຊີໂອນຄືບາບີໂລນ—ເມືອງບູຮານທີ່ຕະຫລອດທົ່ວພຣະຄຳພີໄດ້ເປັນສັນຍາລັກຂອງຄວາມຊົ່ວຮ້າຍ ແລະ ການເປັນທາດທາງວິນຍານ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 133:4–14, ໃຫ້ໄຕ່ຕອງວິທີທີ່ພຣະຜູ້ຊ່ວຍໃຫ້ລອດກຳລັງເອີ້ນທ່ານ “ໄປຈາກບາບີໂລນ” (ຂໍ້ທີ 5) ແລະ “ໄປຍັງ … ຊີໂອນ” (ຂໍ້ທີ 9). ທ່ານຈະຕອບຮັບການເອີ້ນຂອງພຣະອົງແນວໃດ? ທ່ານຮຽນຮູ້ຫຍັງອີກແດ່ກ່ຽວກັບຊີໂອນຈາກຂ່າວສານຂອງແອວເດີ ດີ ທອດ ຄຣິສໂຕເຟີສັນ “Come to Zion”? (Liahona, Nov. 2008, 37–40).
ຄຳສອນ ແລະ ພັນທະສັນຍາ 133:1–19, 37–39
ເຮົາສາມາດກຽມພ້ອມດຽວນີ້ສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ.
ທັງ ພາກທີ 1, ຄຳນຳຂອງພຣະຜູ້ເປັນເຈົ້າຕໍ່ຄຳສອນ ແລະ ພັນທະສັນຍາ, ແລະ ພາກທີ 133, ຕົ້ນສະບັບຂອງພາກຫ້ອຍທ້າຍຂອງປຶ້ມພຣະບັນຍັດ, ເລີ່ມຕົ້ນດ້ວຍຄຳຂໍຮ້ອງດຽວກັນຈາກພຣະຜູ້ເປັນເຈົ້າ ທີ່ວ່າ: “ຈົ່ງເຊື່ອຟັງ, ໂອ້ ເຈົ້າຜູ້ຄົນແຫ່ງສາດສະໜາຈັກຂອງເຮົາ” (ຄຳສອນ ແລະ ພັນທະສັນຍາ 1:1; 133:1). ບາງທີທ່ານສາມາດສຶກສາ ຄຳສອນ ແລະ ພັນທະສັນຍາ 133:1–19, 37–39 ແລະ ຂຽນລາຍການຂ່າວສານທີ່ພຣະຜູ້ຊ່ວຍໃຫ້ລອດເຊື້ອເຊີນທ່ານວ່າ “ຈົ່ງເຊື່ອຟັງ” ເພື່ອ (ຟັງ ແລະ ເຊື່ອຟັງ) ຂະນະທີ່ກຽມພ້ອມສຳລັບການສະເດັດມາຄັ້ງທີສອງຂອງພຣະອົງ. ໂດຍສະເພາະຢ່າງຍິ່ງ, ທ່ານອາດຂຽນລາຍການທີ່ພຣະອົງຕ້ອງການໃຫ້ທ່ານເຮັດເພື່ອ (1) ກະກຽມຕົວເອງ ແລະ (2) ຊ່ວຍກະກຽມໂລກສຳລັບການສະເດັດກັບມາຂອງພຣະອົງ. ທ່ານຮຽນຮູ້ຫຍັງແດ່ຈາກລາຍການເຫລົ່ານັ້ນ?
ປະທານຣະໂຊ ເອັມ ແນວສັນ ໄດ້ແບ່ງປັນຄວາມຈິງທີ່ສຳຄັນກ່ຽວກັບສິ່ງທີ່ໂລກຈະເປັນແນວໃດ ເມື່ອພຣະຜູ້ຊ່ວຍໃຫ້ລອດສະເດັດກັບມາ—ແລະ ວິທີກະກຽມ. ຊອກຫາຄວາມຈິງເຫລົ່ານັ້ນໃນຂ່າວສານຂອງເພິ່ນ “The Future of the Church: Preparing the World for the Savior’s Second Coming” (Liahona, Apr. 2020, 6–11). ທ່ານຮູ້ສຶກໄດ້ຮັບການດົນໃຈໃຫ້ເຮັດຫຍັງ—ຫລື ເຮັດຫຍັງຕໍ່ໄປ—ເພື່ອ “ກຽມໂລກສຳລັບການສະເດັດມາຂອງພຣະຜູ້ຊ່ວຍໃຫ້ລອດ”? (“Aaronic Priesthood Quorum Theme,” ຫ້ອງສະໝຸດພຣະກິດຕິຄຸນ).
ເບິ່ງ ມັດທາຍ 25:1–13; Russell M. Nelson, “Embrace the Future with Faith,” Liahona, Nov. 2020, 73–76; “Come, Ye Children of the Lord,” Hymns, no. 58; Topics and Questions, “Second Coming of the Lord,” ຫ້ອງສະໝຸດພຣະກິດຕິຄຸນ.
ຄຳສອນ ແລະ ພັນທະສັນຍາ 133:19–56
ການສະເດັດມາຄັ້ງທີສອງຂອງພຣະເຢຊູຄຣິດຈະເປັນສິ່ງທີ່ໜ້າຊື່ນຊົມສຳລັບຄົນຊອບທຳ.
ຂະນະທີ່ທ່ານອ່ານການບັນຍາຍເຖິງການສະເດັດມາຂອງພຣະຜູ້ຊ່ວຍໃຫ້ລອດຢູ່ໃນ ຂໍ້ທີ 19–56, ທ່ານພົບເຫັນຫຍັງແດ່ທີ່ທ່ານຕັ້ງຕາລໍຄອຍ? ຖ້ອຍຄຳ ຫລື ວະລີໃດ ທີ່ບັນຍາຍເຖິງຄວາມຮັກຂອງພຣະຜູ້ເປັນເຈົ້າ ສຳລັບລູກໆຂອງພຣະອົງ? ໃຫ້ຄິດທີ່ຈະບັນທຶກປະສົບການສ່ວນຕົວຂອງທ່ານໄວ້ ດ້ວຍ “ຄວາມກະລຸນາຮັກຫອມຂອງພຣະຜູ້ເປັນເຈົ້າ [ຂອງທ່ານ], ແລະ ທຸກສິ່ງທີ່ພຣະອົງໄດ້ມອບໃຫ້ [ທ່ານ] ຕາມພຣະກະລຸນາທິຄຸນຂອງພຣະອົງ” (ຂໍ້ທີ 52).
ລາຍລະອຽດຈາກ Healer [ຜູ້ປິ່ນປົວ], ໂດຍ ແຄວຊີ ແລະ ແຈຊີ ໄລ້ຫວີບ
“ການປົກຄອງໄດ້ຖືກຈັດຕັ້ງໂດຍພຣະເຈົ້າເພື່ອຜົນປະໂຫຍດຂອງມະນຸດ.”
ຄວາມສຳພັນຂອງໄພ່ພົນລຸ້ນທຳອິດກັບການປົກຄອງແມ່ນຊັບຊ້ອນ. ເມື່ອໄພ່ພົນໄດ້ຖືກບັງຄັບໃຫ້ໜີຈາກເຂດແຈ໊ກສັນ, ລັດມີເຊີຣີ, ໃນປີ 1833, ພວກເຂົາໄດ້ຂໍຄວາມຊ່ວຍເຫລືອຈາກລັດຖະບານທ້ອງຖິ່ນ ແລະ ລະດັບຊາດ ແຕ່ບໍ່ໄດ້ຮັບຄວາມຊ່ວຍເຫລືອ. ໃນເວລາດຽວກັນ, ບາງຄົນທີ່ຢູ່ນອກສາດສະໜາຈັກ ໄດ້ແປຄວາມໝາຍຂອງຄຳສອນກ່ຽວກັບຊີໂອນວ່າ ໄພ່ພົນໄດ້ປະຕິເສດສິດອຳນາດຂອງລັດຖະບານຢູ່ໃນໂລກ. ຄຳສອນ ແລະ ພັນທະສັນຍາ 134 ໄດ້ຖືກຂຽນ, ເພື່ອໃຫ້ຄວາມແຈ່ມແຈ້ງເຖິງຖານະຂອງສາດສະໜາຈັກຕໍ່ຝ່າຍລັດຖະບານ. ພາກນີ້ແນະນຳຫຍັງແດ່ກ່ຽວກັບວິທີທີ່ໄພ່ພົນຂອງພຣະຜູ້ເປັນເຈົ້າຄວນຮູ້ສຶກກ່ຽວກັບລັດຖະບານ?
ຂະນະທີ່ທ່ານສຶກສາ ພາກທີ 134, ໃຫ້ພິຈາລະນາທີ່ຈະຊອກຫາຫລັກທຳຂອງລັດຖະບານ ແລະ ໜ້າທີ່ຮັບຜິດຊອບຂອງພົນລະເມືອງ. ແນວຄິດເຫລົ່ານີ້ອາດເປັນປະໂຫຍດຕໍ່ໄພ່ພົນລຸ້ນທຳອິດແນວໃດ? ແນວຄິດເຫລົ່ານີ້ສາມາດນຳໃຊ້ຢູ່ໃນບ່ອນທີ່ທ່ານອາໄສຢູ່ແນວໃດ?
ເບິ່ງ ຫລັກແຫ່ງຄວາມເຊື່ອ 1:11–12; Topics and Questions, “Religious Freedom,” ຫ້ອງສະໝຸດພຣະກິດຕິຄຸນ ນຳອີກ.
ແນວຄິດສຳລັບການສິດສອນເດັກນ້ອຍ
ຄຳສອນ ແລະ ພັນທະສັນຍາ 133:4–5, 14
ພຣະຜູ້ເປັນເຈົ້າປະສົງໃຫ້ເຮົາຢູ່ຫ່າງຈາກຄວາມຊົ່ວຮ້າຍໃນໂລກ.
-
ທ່ານ ແລະ ລູກໆຂອງທ່ານສາມາດລະບຸສະຖານທີ່ ແລະ ສະຖານະການບາງຢ່າງ ທີ່ພຣະຜູ້ເປັນເຈົ້າປະສົງໃຫ້ເຮົາຢູ່ຫ່າງໆ. ແລ້ວທ່ານສາມາດປຽບທຽບສະຖານທີ່ ແລະ ສະຖານະການເຫລົ່ານັ້ນກັບຄຳນິຍາມ “ບາເບນ, ບາບີໂລນ” ໃນຄູ່ມືພຣະຄຳພີ (ຫ້ອງສະໝຸດພຣະກິດຕິຄຸນ). ແລ້ວພວກເຂົາສາມາດອ່ານ ຄຳສອນ ແລະ ພັນທະສັນຍາ 133:4–5, 14. ຄຳວ່າ “ອອກໄປຈາກບາບີໂລນ” ໝາຍຄວາມວ່າແນວໃດ? (ຂໍ້ທີ 5). ທ່ານສາມາດລະບຸສະຖານທີ່ ແລະ ສະຖານະການທີ່ຄ້າຍຄືກັນ ທີ່ພຣະຜູ້ເປັນເຈົ້າເຊື້ອເຊີນເຮົາໃຫ້ເຮັດ ແລະ ປຽບທຽບລາຍການນັ້ນກັບຄຳນິຍາມ “ຊີໂອນ” ໃນຄູ່ມືພຣະຄຳພີ.
ຄຳສອນ ແລະ ພັນທະສັນຍາ 133:19–21, 25
ພຣະເຢຊູຄຣິດຈະສະເດັດມາອີກຄັ້ງ.
-
ລູກໆຂອງທ່ານອາດສະໜຸກສະໜານກັບການສະແດງຕາມວ່າ ການກະກຽມສຳລັບບາງສິ່ງເປັນແບບໃດ, ເຊັ່ນການແຂ່ງຂັນກິລາ, ແຂກຜູ້ມີກຽດ, ຫລື ວັນຢຸດທີ່ໂປດປານ. ເປັນຫຍັງການກະກຽມຈຶ່ງສຳຄັນ? ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 133:17–19, 21 ແລະ ເຊື້ອເຊີນລູກໆຂອງທ່ານໃຫ້ຊອກຫາສິ່ງທີ່ພຣະຜູ້ເປັນເຈົ້າເຊື້ອເຊີນເຮົາໃຫ້ກຽມຮັບ. ທ່ານສາມາດເອົາຮູບໃຫ້ພວກເຂົາເບິ່ງ ຈາກ ໂຄງຮ່າງຂອງອາທິດນີ້ ແລະ ຖາມລູກໆຂອງທ່ານວ່າ ພວກເຂົາຮູ້ຫຍັງແດ່ກ່ຽວກັບການສະເດັດມາຄັ້ງທີສອງຂອງພຣະເຢຊູຄຣິດ. ເຮົາຮຽນຮູ້ຫຍັງອີກແດ່ຈາກ ຂໍ້ທີ 19–25, 46–52? ເຮົາສາມາດເຮັດຫຍັງເພື່ອກະກຽມສຳລັບເຫດການທີ່ຊື່ນຊົມນີ້?
-
ທ່ານສາມາດເຊື່ອງຮູບພາບ ຫລື ສິ່ງຂອງຕ່າງໆ ທີ່ບັນຍາຍເຖິງສິ່ງທີ່ເຮົາສາມາດເຮັດໄດ້ເພື່ອກະກຽມສຳລັບການສະເດັດມາຄັ້ງທີສອງຂອງພຣະເຢຊູຄຣິດ (ເຊັ່ນການອ່ານພຣະຄຳພີ, ແບ່ງປັນພຣະກິດຕິຄຸນ, ຫລື ຮັບໃຊ້ຄອບຄົວຂອງເຮົາ). ໃຫ້ລູກໆຂອງທ່ານຊອກຫາຮູບພາບ ຫລື ສິ່ງຂອງ ແລະ ເວົ້າລົມກັນວ່າ ການເຮັດສິ່ງເຫລົ່ານີ້ຊ່ວຍເຮົາກຽມພ້ອມທີ່ຈະພົບກັບພຣະຜູ້ຊ່ວຍໃຫ້ລອດ ເມື່ອພຣະອົງສະເດັດກັບມາໄດ້ແນວໃດ.
-
ພວກທ່ານກໍສາມາດຮ້ອງເພງນຳກັນກ່ຽວກັບການສະເດັດມາຄັ້ງທີສອງ, ເຊັ່ນ “ເຮົາຮ້ອງສັນເສີນນາມເຢຊູເຈົ້າ” (ເພງສວດ ແລະ ເພງຂອງເດັກນ້ອຍ, 27). ແບ່ງກັນນຳກັນເຖິງຄວາມຮັກຂອງພວກທ່ານທີ່ມີຕໍ່ພຣະຜູ້ຊ່ວຍໃຫ້ລອດ ແລະ ຄວາມຮູ້ສຶກຂອງພວກທ່ານກ່ຽວກັບການສະເດັດມາຂອງພຣະອົງ.
ຄຳສອນ ແລະ ພັນທະສັນຍາ 133:52–53
ພຣະເຢຊູຄຣິດເຕັມໄປດ້ວຍຄວາມຮັກ ແລະ ຄວາມເມດຕາ.
-
ທ່ານ ແລະ ລູກໆຂອງທ່ານສາມາດເບິ່ງຮູບພາບທີ່ສະແດງວ່າ ພຣະເຢຊູເຕັມໄປດ້ວຍຄວາມຮັກ ແລະ ຄວາມເມດຕາ. (ຍົກຕົວຢ່າງ, ເບິ່ງ ປຶ້ມຮູບພຣະກິດຕິຄຸນ, ເລກທີ 42, 47.) ພຣະເຢຊູໄດ້ເຮັດຫຍັງອີກແດ່ເພື່ອສະແດງຄວາມຮັກ ແລະ ຄວາມເມດຕາຂອງພຣະອົງ? ອ່ານ ຄຳສອນ ແລະ ພັນທະສັນຍາ 133:52 ນຳກັນ, ແລະ ຊ່ວຍໃຫ້ລູກໆຂອງທ່ານຄິດຫາວິທີທີ່ພວກເຂົາສາມາດ “ກ່າວເຖິງຄວາມກະລຸນາຮັກຫອມຂອງພຣະຜູ້ເປັນເຈົ້າຂອງພວກເຂົາ” ກັບຄົນອື່ນ.
ລາຍລະອຽດຈາກ In His Light [ໃນແສງສະຫວ່າງຂອງພຣະອົງ], ໂດຍ ກະເຣກ ໂອເຊິນ
ສິດສອນຄຳສອນທີ່ແຈ່ມແຈ້ງ ແລະ ລຽບງ່າຍ. ພຣະຜູ້ເປັນເຈົ້າສິດສອນພຣະກິດຕິຄຸນຂອງພຣະອົງໃນ “ຄວາມແຈ່ມແຈ້ງ ແລະ ລຽບງ່າຍ” (ຄຳສອນ ແລະ ພັນທະສັນຍາ 133:57). ພຣະຄຳເຫລົ່ານີ້ແນະນຳທ່ານຫຍັງແດ່ກ່ຽວກັບການສິດສອນພຣະກິດຕິຄຸນໃຫ້ແກ່ຄອບຄົວ ຫລື ຫ້ອງຮຽນຂອງທ່ານ?
ຄຳສອນ ແລະ ພັນທະສັນຍາ 134: 1–2
ພຣະຜູ້ເປັນເຈົ້າປະສົງໃຫ້ເຮົາເຊື່ອຟັງກົດໝາຍ.
-
ລູກໆຂອງທ່ານສາມາດລະບຸກົດ ຫລື ກົດໝາຍທີ່ພວກເຂົາເຊື່ອຟັງ. ຊີວິດຈະເປັນແນວໃດຖ້າບໍ່ມີໃຜເຊື່ອຟັງກົດໝາຍເຫລົ່ານີ້? ແລ້ວທ່ານສາມາດອ່ານ ຄຳສອນ ແລະ ພັນທະສັນຍາ 134:1–2 ກັບພວກເຂົາ, ຊ່ວຍໃຫ້ພວກເຂົາເຂົ້າໃຈຄຳໃດ ຫລື ວະລີໃດທີ່ພວກເຂົາອາດບໍ່ເຂົ້າໃຈ. ເປັນຫຍັງພຣະຜູ້ເປັນເຈົ້າຈຶ່ງປະສົງໃຫ້ເຮົາເຊື່ອຟັງກົດໝາຍ? (ເບິ່ງ ຫລັກແຫ່ງຄວາມເຊື່ອ 1:12 ນຳອີກ).
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
Christ in His Red Robe [ພຣະເຢຊູໃສ່ເສື້ອຄຸມສີແດງ], ໂດຍ ມີເນີວາ ໄທເກີດ