Tuha’a nō Christ Preaching in the Spirit World [Te Mesia e poro ra i roto i te Ao Vārua], nā Robert T. Barrett

1–7 nō Tītema : « Te ’ōrama nō te fa’aorara’a i te feiā i pohe »

Te Ha’api’ira’a Tumu ’e te mau Fafaura’a 137–138

Te mau heheura’a tei pāpa’ihia i roto i Te Ha’api’ira’a Tumu ’e te mau Fafaura’a 137 ’e te 138 ’ua hau i te 80 matahiti ’e 1 500 maile (2 400 km) te ātea te tahi e te tahi. Nā te Peropheta Iosepha Semita i fa’ari’i i te tufa’a 137i te matahiti 1836 i roto i te hiero nō Kirtland, ’e nā Iosepha F. Semita, te ono o te Peresideni o te ’Ēkālesia i fa’ari’i i te tufa’a 138 i te matahiti 1918 i Salt Lake Ciy. I te pae rā nō te ha’api’ira’a tumu, e haere ’āpipiti ïa nā ’ōrama e piti. E pāhono rāua to’opiti i te mau uira’a a te mau ta’ata e rave rahi—tae noa atu i te mau peropheta a te Atua—nō ni’a i te orara’a i muri a’e i te pohe. ’Ua uiui o Iosepha Semita nō ni’a i te hope’ara’a o tōna taea’e o Alvin o tei pohe ma te ’ore i bāpetizohia. E mea pinepine Iosepha F Semita, tei mo’e tōna na metua ’e 13 tamari’i i te pohe-mana’o-’ore-hia, i te feruri nō ni’a i te ao vārua ’e te uiui nō ni’a i te porora’a ’evanelia i reira.

Tē hōro’a nei te tufa’a 137 i te tahi māramarama mātāmua i ni’a i te hope’a o te mau tamari’i a te Atua i roto i te orara’a a muri a’e, e nā te tufa’a 138 e tātara atu ā i te mau pāruru. Tē fa’a’ite to’opiti nei rāua i « te here rahi ’e te fa’ahiahia o te Metua ’e te Tamaiti » (Te Ha’api’ira’a Tumu ’e te mau Fafaura’a 138:3).

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 137 ; 138:30–37, 57–60

E rāve’a tō te tā’āto’ara’a o te mau tamari’i a te Metua i te Ao ra ’ia mā’iti i te ora mure ’ore.

’Ua pohe o Alvin Semita, te taea’e here o te Peropheta Iosepha, e ono matahiti hou a fa’aho’i mai ai Te Atua i te mana nō te bāpetizo. Tei mātauhia i rotopū i te mau keresetiano i te matahiti 1836 ra ’oia ho’i mai te mea e pohe te hō’ē ta’ata ma te ’ore i bāpetizohia, e’ita e ti’a i terā ta’ata ’ia haere i te ra’i. ’Ua uiui Iosepha nō ni’a i te fa’aorara’a mure ’ore o Alvin e rave rahi matahiti—e tae roa i te taime ’ua fa’ari’i ’oia i te heheura’a i roto i Te Ha’api’ira’a Tumu ’e te mau Fafaura’a 137.

E mau uira’a huru fātata tā e rave rahi ta’ata i teie mahana. Nō te aha pa’i te Atua e tītau ai i te mau ’ōro’a ’e te mau fafaura’a e rave rahi ho’i ta’ata ’aita roa atu i fāna’o i te fa’ari’i i te reira ? E aha ïa tā ’outou e parau i te ta’ata e uiui nei i te reira ? E nāhea ïa ’outou i te patu i tō rātou fa’aro’o i te Atua ’e i tāna mau tītaura’a nō te fa’aorara’a ? ’A ’imi i te mau parau mau tā ’outou e nehenehe e fa’a’ite i roto i te tufa’a 137 ’e i roto i te tufa’a 138:30–37, 57–60. E nehenehe ato’a ’outou e ’imi i teie mau parau mau i fa’ahitihia i roto i te hīmene « Tei roto i tō’u nei ’ā’au » (Te mau hīmene, N°135) ’e i roto i te a’ora’a a te peresideni Henry B. Eyring « Ha’aputuputura’a i te ’utuāfare o te Atua » (Liahona, Mē 2017, 19–22).

’A tuatāpapa ai ’e ’a feruri ai ’outou, e nehenehe ’outou e pāpa’i i tō ’outou mau mana’o nā roto i te fa’ahopera’a i te mau parau mai teie :

• Maoti teie mau heheuraa, ’ua ’ite au e te Metua i te Ao ra .

• Maoti teie mau heheura’a, ’ua ’ite au e te fa’anahora’a nō te fa’aorara’a a te Metua .

• Maoti teie mau heheura’a, tē hina’aro nei au e .

Hi’o ato’a Feiā Mo’a, 1:232–35.

Te Ha’api’ira’a Tumu ’e te mau Fafaura’a 138:1–11, 25–30

E fa’aineine te tai’ora’a ’e te ferurira’a i te mau pāpa’ira’a mo’a iā’u ’ia fa’ari’i i te heheura’a.

I te tahi taime e tae mai te heheura’a noa atu ’aita tātou i ’imi i te reira. I te rahira’a taime rā e tae mai te reira nō te mea e ’imi itoito tātou ’e e fa’aineine tātou nō te reira. ’A tai’o ai ’outou i Te Ha’api’ira’a Tumu ’e te mau Fafaura’a 138:1–11, 25–30, ’a hi’o maita’i tā te peresideni Iosepha F Semita e rave ra i te taime « ’ua ’ara’ara ihora te mata o [tōna] ’itera’a. » E nehenehe ato’a ’outou e fa’aau i tōna ’itera’a i te 1 Nephi 11:1–6 ; Iosepha Semita—’Ā’amu 1:12–19. I muri mai, ’a feruri e nāhea ’outou e nehenehe ai e pe’e i te hi’ora’a o te peresideni Semita. ’Ei hi’ora’a, e aha te mau tauira’a tei fa’auruhia ia ’outou ’ia rave i roto i tā ’outou tuatāpapara’a pāpa’ira’a mo’a nō te fa’ari’i rahi atu ā i te heheura’a nō ’outou iho ?

I roto i tāna a’ora’a « Te ’ōrama nō ni’a i te fa’aorara’a i te feiā pohe » (Liahona, Novema 2018, 71–74), ’ua hōro’a mai te peresideni M. Russell Ballard i te tahi atu ā mana’o nō te fa’aineinera’ahia te peresideni Semita nō te fa’ari’i i teie heheura’a. E aha tā ’outou e ’apo mai nā roto mai i tōna mau ’itera’a ? ’A feruri nāhea tō te Fatu fa’aineinera’a ia ’outou nō te mau ’itera’a tā ’outou e fāna’o ra—’e nāhea ’oia i te fa’aineine ia ’outou nō te mau ’ohipa e tupu nō ’outou ananahi.

Hi’o ato’a Feiā Mo’a, 3:202–5 ; « Tāvinira’a a Iosepha F Semita : Hō’ē ’ōrama nō ni’a i te fa’aorara’a i te feiā pohe » (video), Vaira’a Buka ’Evanelia.

Ministry of Joseph F. Smith: A Vision of the Redemption of the Dead

Nearing death, President Joseph F. Smith receives revelation from God regarding redemption of the dead.

Joseph F. Smith, nā Albert E. Salzbrenner

Ani i te Vārua. « E aha tā ’outou i ’ite ’o tē fa’atupu i te hō’ē vāhi pae vārua nō te ’apora’a mai i te ’evanelia ? E aha te mea e ’ōpani ra i te reira ? » (Ha’api’ira’a mai tā te Fa’aora, 18). ’A tuatāpapa ai ’outou i te ’ohipa i tupu nō te peresideni Iosepha F. Semita i roto i Te Ha’api’ira’a Tumu ’e te mau Fafaura’a 138:1–11, ’a feruri nāhea ’outou i te fa’aitoito i te feruri hōhonu ’e i te ani i te mau mana’o pae vārua nō ’outou iho ’e, mai te mea e ’orometua ’outou, nō te mau ta’ata tā ’outou e ha’api’i ra.

Te Ha’api’ira’a Tumu ’e te mau Fafaura’a 138:25–60

Tē tāmau nei te ’ohipa a te Fa’aora i te tahi pae mai o te pāruru.

’Ua ha’api’i te peresideni Russell M. Nelson : « E mea ’ōhie ’e te ’ā’au tae tā tātou parau poro’i : tē ani manihini nei tātou i te mau tamari’i ato’a a te Atua i nā pae e piti o te pāruru ’ia haere mai i tō tātou Fa’aora, ’ia fa’ari’i i te mau ha’amaita’ira’a o te hiero mo’a, ’ia fa’ari’i i te ’oa’oa vai maoro, ’e ’ia fa’ari’i i te ora mure ’ore » (« Ara mai tātou », Liahona, Mē 2018, 118–19). ’A feruri i teie parau pāpū ’a tai’o ai ’outou i Te Ha’api’ira’a Tumu ’e te mau Fafaura’a 138:25–60. E nehenehe ato’a ’outou e feruri i te mau uira’a i muri nei :

• E aha tā teie mau ’īrava e ha’api’i mai nei ia ’outou nō ni’a i te tupura’a te ’ohipa a te Fa’aora i roto i te ao vārua ? Nō te aha e mea faufa’a nō ’outou ’ia ’ite ē tē tupu ra te reira ’ohipa ?

• E aha tā ’outou e fa’ahiahia nei nō ni’a i te mau ve’a a te Fatu i roto i te ao vārua ?

• Nāhea teie heheura’a i te ha’apūai i tō ’outou fa’aro’o i roto i te fa’anahora’a nō te fa’aorara’a a te Atua ?

Mai te mea e hina’aro ’outou e ha’api’i rahi atu ā nō ni’a i te ao vārua, e nehenehe ’outou e tuatāpapa i te a’ora’a a te peresideni Dallin H. Oaks « Ti’aturi i te Fatu » (Liahona, Novema 2019, 26–29).

Hi’o ato’a « Susa Young Gates and the Vision of the Redemption of the Dead », i roto Revelations in Context, 315–22 ; « Hō’ē tere fārereira’a nā te Metua tāne » (video), Vaira’a buka ’evanelia.

A Visit from Father

President Russell M. Nelson recounts a personal family history story that bears testimony of the importance of temple and family history work for all families.

Nō te tahi atu ā mana’o, ’a hi’o i te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 137:5–10 ; 138:18–35

E fana’o te tā’āto’ara’a o te mau tamari’i a te Metua i te Ao ra ’ia fa’aro’o i te ’evanelia.

• Nō te ha’api’i mai e aha te aura’a nō Iosepha Semita i te ’itera’a e rave rahi melo o tōna ’utuāfare i roto i te bāsileia tiretiera, e nehenehe tā ’outou mau tamari’i e māta’ita’i i te video « Tāvinira’a a Iosepha Semita : Mau hiero » (Vaira’a buka evanelia), ’aore rā e nehenehe ’outou e fa’a’ite i Te mau ’ā’amu nō roto mai i te Parau Ha’api’ira’a ’e te mau Parau Fafau, 152–53 (’aore rā te video tano i roto i te Vaira’a buka evanelia). Pēnei a’e e nehenehe ato’a ’outou e paraparau nō ni’a i te hō’ē ta’ata tā ’outou i ’ite tei pohe ’aita rā i bāpetizohia. E aha tā Te Ha’api’ira’a Tumu ’e te mau Fafaura’a 137:5–10 e ha’api’i nei ia tātou nō ni’a i terā ta’ata ?

  Ministry of Joseph Smith: Temples

  Joseph Smith establishes temple work as an essential purpose for the Saints of God.

  Chapter 39: The Kirtland Temple Is Dedicated: January–March 1836

• ’A feruri i te fa’a’ohipa i te hō’ē hōho’a nō te mēnema o te Fa’aora (hi’o Buka hoho’a ’evanelia, N°58, ’aore rā te Mau hōho’a o te Bibilia, N°14) ’e te hōho’a i te hope’a o teie arata’ira’a nō te ha’api’i i tā ’outou mau tamari’i ē ’ua haere te vārua o Iesu i hea i te vaira’a tōna i roto i te mēnema. I muri iho e nehenehe ’outou e tai’o ’āmui i Te Ha’api’ira’a Tumu ’e te mau Fafaura’a 138:18–19, 23–24, 27–30 nō te ha’api’i mai nō ni’a i te ’ohipa tā Iesu i rave ’a vai ai ’Oia i reira. ’O vai Tāna i fārerei ? E aha Tāna i ani ia rātou ’ia rave ? Nō te aha ’Oia i rave ai i te reira ?

  

• E nehenehe ato’a ’outou e fa’a’ohipa i te ’api fa’a’ana’anatera’a nō teie hepetoma nō te tauturu i tā ’outou mau tamari’i ’ia fa’aau i tā te mau misiōnare e ha’api’i nei i teie pae o te pāruru (hi’o, ’ei hi’ora’a, Te mau Hīro’a Fa’aro’o 1:4) ē tā te mau misiōnare e ha’api’i nei i roto i te ao vārua (hi’o Te Ha’api’ira’a Tumu ’e te mau Fafaura’a 138:33). E aha te tueara’a i roto i teie mau ’īrava ’e e aha te ta’a-’ē-ra’a ? E aha tā teie e ha’api’i nei ia tātou nō ni’a i te Metua i te Ao ra ’e i tāna fa’anahora’a ?

E tītau te feruri-hōhonu-ra’a i te mau pāpa’ira’a mo’a i te Vārua Maita’i.

Te Ha’api’ira’a Tumu ’e te mau Fafaura’a 138:1–11

’Ia feruri au i te mau pāpa’ira’a mo’a, e nehenehe te Vārua Maita’i e tauturu mai iā’u ’ia māramarama i te reira.

• ’A tai’o ’āmui ai ’outou ’e tā ’outou mau tamari’i i Te Ha’api’ira’a Tumu ’e te mau Fafaura’a 138:1–11, e nehenehe ’outou e ani ia rātou ’ia fa’ahua ē o rātou te peresideni Iosepha F Semita ’e ’ia rave i te mau ’ohipa e tū’ati i te mau ta’o i roto i te mau ’īrava 6 ’e 11. E nehenehe ato’a ’outou e fa’a’ite ia rātou i te hō’ē hōho’a nō te peresideni Semita (tē vai ra hō’ē i roto i teie arata’i) ’e ’ia fa’ata’a ē ’o ’oia te ono o te peresideni o te ’Ēkālesia. E nehenehe ato’a ’outou e parau nō te hō’ē taime ’ua feruri hōhonu ’outou i te hō’ē mea i roto i te mau pāpa’ira’a mo’a ’e ’ua tauturu mai te Vārua Maita’i ia ’outou ’ia māramarama i te reira.

• ’A hīmene ’āmui i te hō’ē hīmene nō ni’a i te tuatāpapara’a i te pāpa’ira’a mo’a, mai te « Quand je lis l’Ecriture sainte » (Chants pour les enfants, 66). E aha tā teie hīmene e parau nei e ti’a ia tātou ’ia rave nō te hāro’aro’a i te mau pāpa’ira’a mo’a ?

Nō te tahi atu ā mana’o, ’a hi’o i te ve’a Hoa nō teie ’āva’e.

The Commissioned [Tei Tonohia], nā Harold I. Hopkinson