Detalye halin sa Christ Preaching in the Spirit World [Si Cristo Nagawali sa Kalibutan sang Espiritu], by Robert T. Barrett

Disyembre 1–7: “Ang Panan-awon sang Pagtubos sang mga Patay”

Doktrina kag mga Kasugtanan 137–138

Ang mga rebelasyon nga nasulat sa Doktrina kag mga Kasugtanan 137 kag 138 may lang-at nga masobra 80 ka tuig kag 1,500 ka milya (2,400 km). Ang seksyon 137 nabaton ni Propetang Joseph Smith sang 1836 sa Templo sang Kirtland, kag ang seksyon 138 nabaton ni Joseph F. Smith, ika-anum nga Pangulo sang Simbahan, sang 1918 sa Salt Lake City. Pero base sa doktrina, ining duha ka panan-awon dapat mag-updanay. Pareho ini nga nagasabat sang mga pamangkot sang madamo nga tawo—pati sang mga propeta sang Dios—parte sa kabuhi pagkatapos sang kamatayon. Si Joseph Smith nagapanghunahuna parte sa kapalaran sang iya utod nga si Alvin, nga napatay nga wala mabunyagan. Si Joseph F. Smith, nga ang ginikanan kag 13 ka kabataan temprano nga nagkalamatay, masami nagapamensar parte sa kalibutan sang mga espiritu kag nagapanghunahuna parte sa pagwali sang ebanghelyo didto.

Ang seksyon 137 nagahatag sang pauna nga ihibalo parte sa kapalaran sang mga anak sang Dios sa pihak nga kinabuhi, kag ang seksyon 138 mas nagbukas pa gid sang ihibalo nga ini. Ululupod, ang duha ka rebelasyon nagasaksi “sang tunay kag dalayawon nga gugma nga ginpahayag sang Amay kag sang Anak” (Doktrina kag mga Kasugtanan 138:3).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 137; 138:30–37, 57–60

Ang tanan nga anak sang Amay nga Langitnon makaangkon sang oportunidad nga magpili sang kabuhi nga wala katapusan.

Si Alvin Smith, ang pinalangga nga utod ni Propetang Joseph, napatay anum ka tuig antes ginpanumbalik sang Dios ang awtoridad sa pagbunyag. Ang komon nga paghangop sang mga Kristiyano sang 1836 amo nga kon ang tawo mapatay nga wala mabunyagi, ina nga tawo indi makasaka sa langit. Malawig nga tinuig nga ginpamensar ni Joseph ang wala katapusan nga kaluwasan ni Alvin—hasta nga nabaton niya ang rebelasyon sa Doktrina kag mga Kasugtanan 137.

Madamo nga mga tawo sa karon ang may pareho man nga mga pamangkot. Ngaa mangayo ang Dios sang mga ordinansa kag kasugtanan kon kadamo sang mga tawo nga wala sang oportunidad nga mabaton ini? Ano ang imo ihambal sa tawo nga nagapamangkot sang amo sini? Paano mo patubuon ang ila pagtuo sa Dios kag sa Iya mga ginapangayo para sa kaluwasan? Pangitaa ang mga kamatuoran nga pwede mo ipakigbahin sa seksyon 137 kag sa seksyon 138:30–37, 57–60.

Samtang nagatuon ka kag nagabinag-binag, pwede mo irekord ang imo mga panghunahuna paagi sa pagkompleto sang mga pahayag pareho sini:

• Tungod sining mga rebelasyon, nahibal-an ko nga ang Amay nga Langitnon .

• Tungod sining mga rebelasyon, nahibal-an ko nga ang plano sang kaluwasan sang Amay .

• Tungod sining mga rebelasyon, gusto ko .

Doktrina kag mga Kasugtanan 138:1–11, 25–30

Ang pagbasa kag pagbinagbinag sang balaan nga mga kasulatan nagahanda sa akon nga magbaton sang rebelasyon.

Kon kaisa ang rebelasyon nagaabot bisan pa nga wala naton ini ginapangita. Pero mas masami nagaabot ini tungod matutom naton ini nga ginapangita kag ginahandaan. Samtang ginabasa mo ang Doktrina kag mga Kasugtanan 138:1–11, 25–30, tandai kon ano ang ginabinagbinag ni Pangulong Joseph F. Smith sang “nabuksan ang mga mata sang [iya] paghangop.” Pwede mo man ikumparar ang iya eksperiyensya sa 1 Nefi 11:1–6; Joseph Smith—Kasaysayan 1:12–19. Dayon pamensara kon paano mo sundon ang ehemplo ni Pangulong Smith. Halimbawa, ano nga mga pagbag-o ang ginainspirar sa imo nga himuon sa imo pagtuon sang balaan nga kasulatan para mas makabaton sang personal nga rebelasyon?

Ministry of Joseph F. Smith: A Vision of the Redemption of the Dead

Nearing death, President Joseph F. Smith receives revelation from God regarding redemption of the dead.

Joseph F. Smith, ni Albert Salzbrenner

Agdaha ang Espiritu. “Ano ang naobserbahan mo nga nagabulig sa pagpahamtang sang espirituhanon nga kapalibotan para sa pagtuon sang ebanghelyo? Ano ang nagapugong sini?” (Pagtudlo sa Paagi sang Manluluwas, 18). Samtang ginatun-an mo ang eksperiyensya ni Pangulong Joseph F. Smith sa Doktrina kag mga Kasugtanan 138:1–11, pamensara kon paano mo paisugon ang pagbinagbinag kag pag-imbitar sang espiritwal nga mga panghunahuna sa imo kaugalingon, kag kon ikaw titser, sa mga tawo nga imo ginatudloan.

Doktrina kag mga Kasugtanan 138:25–60

Ang buluhaton sang Manluluwas nagapadayon sa pihak nga kinabuhi.

Si Pangulong Russell M. Nelson nagtudlo, “Ang aton mensahe sa kalibutan simple kag sinsero: ginaagda naton ang tanan nga mga anak sang Dios sa diri kag sa pihak nga kinabuhi nga magpalapit sa ila Manluluwas, magbaton sang mga bugay sang balaan nga templo, mag-angkon sang nagadugay nga kalipay, kag mangin angayan para sa kabuhi nga wala katapusan” (“Let Us All Press On,” Liahona, Mayo 2018, 118–19). Binagbinaga ining pahayag samtang ginabasa mo ang Doktrina kag mga Kasugtanan 138:25–60. Pwede mo man pamensaron ining mga pamangkot:

• Ano ang imo natun-an sa sining mga bersikulo parte sa kon paano ginahimo ang buluhaton sang Manluluwas sa kalibutan sang mga espiritu? Ngaa importante nga imo mahibal-an nga ining buluhaton nagakatabo?

• Ano ang nanamian mo parte sa mga mensahero sang Ginuo sa kalibutan sang mga espiritu?

• Paano ginapabakod sining rebelasyon ang imo pagtuo sa plano sang pagtubos sang Dios?

Kon gusto mo pa gid magtuon parte sa kalibutan sang mga espiritu, pwede mo tun-an ang mensahe ni Pangulong Dallin H. Oaks nga “Magsalig sa Ginuo” (Liahona, Nob. 2019, 26–29).

A Visit from Father

President Russell M. Nelson recounts a personal family history story that bears testimony of the importance of temple and family history work for all families.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 137:5–10; 138:18–35

Ang tanan nga anak sang Amay nga Langitnon makaangkon sang tsansa nga mabatian ang ebanghelyo.

• Basi pwede man ninyo hambalan ang parte sa kilala ninyo nga napatay nga wala nakaangkon sang kahigayunan nga mabunyagan. Ano ang ginatudlo sa aton sang Doktrina kag mga Kasugtanan 137:5–10 parte sa sina nga tawo?

  Ministry of Joseph Smith: Temples

  Joseph Smith establishes temple work as an essential purpose for the Saints of God.

  Chapter 39: The Kirtland Temple Is Dedicated: January–March 1836

• Pamensara nga maggamit sang litrato sang lulubngan sang Manluluwas (tan-awa sa Libro sang mga Larawan nga Pang-Ebanghelyo, num. 58, ukon Bible Photographs, num. 14) kag sa litrato sa katapusan sining outline para itudlo sa imo kabataan kon diin nagkadto ang espiritu ni Jesus sang ang Iya lawas ara sa lulubngan. Dayon pwede ninyo basahon sing ululupod ang Doktrina kag mga Kasugtanan 138:18–19, 23–24, 27–30 para tun-an kon ano ang ginhimo ni Jesus sang ato Sia didto. Sin-o ang Iya ginbisitahan? Ano ang ginpangabay Niya nga ila himuon? Ngaa ginhimo Niya ini?

  

• Pwede mo man gamiton ang pahina sang kahiwatan sini nga semana para buligan ang mga kabataan nga ikumparar kon ano ang ginatudlo sang mga misyonero sa sining parte sang belo (tan-awa halimbawa, sa Mga Artikulo sang Pagtuo 1:4) sa ginatudlo sang mga misyonero sa kalibutan sang mga espiritu (tan-awa sa Doktrina kag mga Kasugtanan 138:33). Ano ang palareho sa sining mga bersikulo, kag ano ang lainay? Ano ang ginatudlo sini sa aton parte sa Amay nga Langitnon kag sa Iya plano?

Ang pagbinagbinag sang balaan nga kasulatan nagaagda sang Balaan nga Espiritu.

Doktrina kag mga Kasugtanan 138:1–11

Kon binagbinagon ko ang balaan nga mga kasulatan, buligan ako sang Balaan nga Espiritu nga maintiendihan ini.

• Samtang ginabasa ninyo sang imo kabataan ang Doktrina kag mga Kasugtanan 138:1–11 sing ululupod, pwede mo sila hagaron nga kuno abi sila si Pangulong Joseph F. Smith kag mag-aksyon nga bagay sa mga tinaga sa mga bersikulo 6 kag 11. Pwede mo man ipakita sa ila ang litrato ni Pangulong Smith (may ari diri sa outline) kag ipaathag nga sia ang ika-anum nga Pangulo sang Simbahan. Pwede man ninyo hambalan ang tiyempo nga ginbinagbinag mo ang isa ka butang sa balaan nga kasulatan kag ginbuligan ka sang Balaan nga Espiritu nga maintiendihan ini.

• Pamensara nga magkanta sang isa ka kalantahon parte sa pagtuon sang balaan nga kasulatan. Ano ang ginahambal sining kanta nga dapat naton himuon para maintiendihan ang balaan nga mga kasulatan.

Para sa dugang nga mga ideya, tan-awa sa isyu sang Abyan nga magasin sini nga bulan.

The Commissioned [Ang Pinili], ni Harold I. Hopkinson