Detalye halin sa Nativity in Copper and Umber [Ang Pagkabun-ag sa Saway kag Umber], ni J. Kirk Richards

Disyembre 22–28: Ang Indi Matupungan nga Dulot sang Balaan nga Anak sang Dios

Paskwa

Gintudlo ni Propetang Joseph Smith, “Ang pundasyon nga mga prinsipyo sang aton relihiyon amo ang testimonya sang mga Apostoles kag mga Propeta, nahanungod kay Jesucristo, nga Sia napatay, ginlubong, kag nabanhaw sang ikatatlo nga adlaw, kag nagkayab pa-langit; kag ang tanan nga may kaangtanan sa aton relihiyon mga sanga lamang sini” (Teachings of Presidents of the Church: Joseph Smith [2011], 49). Masobra 160 katuig ang nagligad, ini nga pahayag nag-inspirar sa Unang Pangulohan kag Korum sang Dose ka Apostoles nga ipublikar ang “Ang Buhi nga Cristo: Ang Testimonya sang mga Apostoles” sa pagpasidungog sa ika-2,000 nga anibersaryo sang pagkatawo sang Manluluwas (tan-awa sa Russell M. Nelson, “Ang Pagkuha sang Gahum ni Jesucristo Pasulod sa Aton Mga Kabuhi,” Liahona, Mayo 2017, 40).

Bilang mga Santos sa Ulihing mga Adlaw, nagakalipay kita sa bugay sang nagapadayon nga rebelasyon paagi sa moderno nga mga propeta kag mga apostoles. Nagapasalamat kita sa ila inspirado nga mga pulong sang paglaygay, pagpaandam, kag pagpaisog. Pero labaw sa tanan, ginbugayan kita sang ila mabaskog nga mga testimonya kay Jesucristo—sa tion sang Paskwa kag sa bilog nga tuig. Masobra ini sangsa makatalandog lamang nga mga tinaga sang sagad nga mga manunulat ukon manughambal sa publiko ukon mga panghunahuna sang mga eksperto sa balaan nga mga kasulatan. Mga pulong ini sang pinili, gintawag, kag awtorisado sang Dios nga “espesyal nga mga saksi sang ngalan ni Cristo sa bilog nga kalibutan” (Doktrina kag mga Kasugtanan 107:23).

Mga Ideya sa Pagtuon sa Puluy-an kag sa Simbahan

“Wala na sing iban pa nga may subong nga indi-matungkad nga impluwensya.”

Ano ang imo mahambal bilang suporta sa pahayag nga “wala na sing iban pa nga may subong nga indi-matungkad nga impluwensya [pareho kay Jesucristo] sa tanan nga nagkabuhi kag magakabuhi pa sa ibabaw sang duta”? Pangitaa ang mga dinalan sa “Ang Buhi nga Cristo” nga nagapamatuod sang dako nga impluwensya sang Manluluwas. Paano Sia nakaimpluwensya sa imo?

Kon abi may tawo nga indi pamilyar sa Kristiyanismo nga mamangkot sa imo kon ngaa nagaselebrar ka sang Paskwa. Paano mo sia sabton? Rebyuha ang “Ang Buhi nga Cristo” nga ginatandaan ini nga pamangkot, kag pamensara nga isulat ang bisan ano nga panghunahuna ukon impresyon nga maabot sa imo.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Nabanhaw Sia gikan sa lulubngan.”

Sa “Ang Buhi nga Cristo,” nagsaksi ang mga Apostoles parte sa Pagkabanhaw sang Manluluwas, nga nagasambit sang tatlo ka pagpakita sang nabanhaw nga Ginuo (tan-awa sa paragraph 5). Pamensara nga basahon ang iban nga panaysayon sa sining mga pagbisita sa Juan 20; 3 Nefi Nefi 11; kag Joseph Smith—Kasaysayan 1:14–20. Ano ang imo matun-an parte sa Manluluwas sa Iya mga pulong kag mga aksyon sa sining mga pagpakita?

Magtutok sa Manluluwas. “Ang mainampuon nga pagtuon sang ‘Ang Buhi nga Cristo’ daw pareho sang pagbasa sang mga testimonya ni Mateo, Marcos, Lucas, Juan, kag sang mga propeta sa Libro ni Mormon. Patubuon sini ang imo pagtuo sa Manluluwas kag buligan ka nga magpadayon nga nagatutok sa Iya” (M. Russell Ballard, “Return and Receive,” Liahona, Mayo 2017, 65).

“Ang Iya pagkapari kag ang Iya Simbahan napanumbalik na.”

Sang tion sang imo pagtuon sang Doktrina kag mga Kasugtanan sini nga tuig, may oportunidad ka nga matun-an pa gid kon paano ang “pagkapari [sang Manluluwas] kag ang Iya Simbahan [ginpanumbalik].” Diin sa ginpanumbalik nga mga kamatuoran kag mga prinsipyo ang labi nga makahulugan para sa imo? Pamensara nga rebyuhon ang pila sa masunod nga balaan nga mga kasulatan nga nagatudlo parte sa Pagpanumbalik: Doktrina kag mga Kasugtanan 1:17–23; 13; 20:1–12; 65; 110; 112:30–32; 124:39–42; 128:19–21. Binagbinaga kon paano ka ginbuligan sang mga kamatuoran sang ginpanumbalik nga ebanghelyo nga makilala kag palanggaon si Jesucristo.

“Sa pila ka adlaw magabalik Sia sa duta.”

Ang Paskwa panahon para panumdumon ang adlaw nga natawo si Jesucristo kag paabuton ang adlaw nga magabalik Sia liwat. Ano ang imo matun-an parte sa Iya pagbalik sa ika-duha halin sa katapusan nga paragraph sang “Ang Buhi nga Cristo”? Pwede mo man pamensaron ang pagbasa, pagkanta, ukon pagpamati sang mga himno sang Paskwa nga nagatudlo parte sa Ikaduhang Pagkari, pareho sang “Joy to the World” ukon “It Came upon the Midnight Clear” (Hymns, num. 201, 207).

“Sia ang kasanag, ang kabuhi, kag ang paglaum sang kalibutan.”

Sa katapusan nga paragraph sang “Ang Buhi nga Cristo,” tandai ang mga kinaiya kag mga titulo nga ginhatag sa Manluluwas. Pamensara nga maghatag sang tiyempo para matun-an ang iban sini. Halimbawa:

Kasanag: Paano si Jesucristo nangin daw pareho sang suga sa imo? Pwede mo drowingon ukon litratuhan ang, para sa imo, nagasimbolo sang kasanag nga Iya ginahatag sa imo. Ano ang nangin inspirado ka nga himuon para ipakigbahin ang Iya kasanag? (Tan-awa man sa Juan 8:12; 3 Nefi 18:24; Doktrina kag mga Kasugtanan 50:24.)

Kabuhi: Ngaa nga sa banta mo ang kabuhi maayo nga tinaga para ilaragway si Jesucristo? Sa ano nga bagay Sia nagahatag sa imo sang kabuhi? Ano ang mangin kinalain sang imo kabuhi kon wala Sia ukon ang Iya ebanghelyo? (Tan-awa man sa Juan 10:10; 1 Mga Taga-Corinto 15:19–23; Doktrina kag mga Kasugtanan 66:2.)

Paglaum: Ano ang imo ginalauman tungod kay Jesucristo kag sang Iya ebanghelyo? May kilala ka bala nga daw nadulaan na sang paglaum sa palaabuton? Binagbinaga kon paano mo ipakigbahin sa sina nga tawo ang paglaum nga nabatyagan mo kay Jesucristo. (Tan-awa man sa Mga Taga-Roma 8:24–25; Eter 12:4; Moroni 7:41.)

“Pasalamatan naton ang Dios tungod sa [Iya] indi matupungan nga dulot.”

Sa “Ang Buhi nga Cristo,” ginatawag sang mga Apostoles ang Manluluwas nga “regalo” halin sa aton Amay nga Langitnon. Base sa imo nakit-an sa “Ang Buhi nga Cristo,” paano mo kumpletuhon ini nga pahayag: “Paagi kay Jesucristo, ginahatagan ako sang Dios sang mga dulot nga …” Binagbinaga kon ano ang pwede mo himuon para mas lubos nga mabaton ining mga regalo.

Paano nakaapekto ang imo pagtuon sang “Ang Buhi nga Cristo” sa imo pagtuo kag pagpalangga sa Manluluwas?

Tan-awa man sa Russell M. Nelson, “Four Gifts That Jesus Christ Offers to You” (First Presidency Christmas devotional, Dis. 2, 2018), Library sang Ebanghelyo.ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Pwede ko “ihalad ang [akon] testimonya” para iselebrar ang pagkabun-ag ni Jesus.

• Pamensara kon paano mo sugdan ang pagtuon sang imo kabataan sang “Ang Buhi nga Cristo.” Basi pwede mo sila buligan nga itudlo ang ngalan nga Cristo sa tig-ulo kag ang mga pirma sang Unang Pangulohan kag Dose. Pwede mo ipaathag nga ini ang ila testimonya parte kay Jesucristo na gusto nila ipakigbahin sa kalibutan.

• Pwede mo hatagan ang tagsa ka bata sang isa ka dinalan sa “Ang Buhi nga Cristo” kag papangitaon sang litrato ukon ipadrowing sa ila ang ina nga dinalan. Dayon buligan mo sila nga pangitaon ang dinalan sa “Ang Buhi nga Cristo.” Pwede mo man tipunon atong mga litrato kag mga dinalan sa isa ka libro.

• Iistorya sa kada isa kon paano mo nabaton ang imo testimonya kay Jesucristo. Pwede ka man magpalibot sang litrato sang Manluluwas kag magbulos-bulos sa pag-istorya sang inyo nabal-an parte sa Iya (upod ang mga kamatuoran sa “Ang Buhi nga Cristo”).

“Naglibot Sia nga nagahimo sing kaayohan.”

• Samtang ginabasa ninyo sang imo kabataan ang ikaduha nga paragraph sang “Ang Buhi nga Cristo,” hambali upod sa ila ang iban sang mga butang nga ginhimo ni Jesus. Pwede man kamo magtan-aw sang mga litrato sang Iya kabuhi (tan-awa sa pahina sang kahiwatan sining semanakag sa Libro sang mga Larawan nga Pang-Ebanghelyo). Hagara ang imo kabataan nga iistorya kon ano ang ginahimo sang Manluluwas sa mga litrato. Paano naton serbisyohan ang iban pareho sang Iya ginhimo?

“Sia ang kasanag, ang kabuhi, kag ang paglaum sang kalibutan.”

• Buligi ang imo kabataan nga magpangita sang mga himno sang Paskwa nga nagahambal parte sa kasanag, kabuhi, kag paglaum nga gindala sang pagkatawo sang Manluluwas sa kalibutan, pareho sang “O Little Town of Bethlehem” (Hymns, no. 208). Magkanta sang mga himno sing ululupod, kag tugti ang imo kabataan nga iistorya kon paano si Jesus nagdala sang kasanag, kabuhi, kag paglaum sa ila mga kabuhi.

“Pasalamatan naton ang Dios tungod sa indi matupongan nga dulot sang Iya [balaan] nga Anak.”

• Ano nga mga regalo ang aton nabaton bangud kay Jesucristo? Pwede ninyo pangitaon sang imo kabataan ining mga regalo sa “Ang Buhi nga Cristo” ukon sa kanta pareho sang “He Sent His Son” (Children’s Songbook, 34–35). Dayon pwede sila magputos sang butang nga nagasimbolo sinang mga regalo. Pwede ka magsuhestyon sa imo kabataan nga buksan nila ang mga regalo sa Adlaw sang Paskwa para buligan sila nga dumdumon ang Manluluwas kag ang Iya mga regalo sa aton.

Para sa dugang nga mga ideya, tan-awa sa isyu sang Abyan nga magasin sini nga bulan.