Detalye halin sa To All Worthy Male Members [Sa Tanan nga Nagakaangay nga Lalaki nga Miyembro], ni Emma Allebes

Disyembre 8–14: “Nagapati Kami”

Mga Artikulo sang Pagtuo kag Opisyal nga mga Pahayag 1 kag 2

Sugod sang Unang Palanan-awon ni Joseph Smith, padayon nga ginagiyahan sang Dios ang Iya Simbahan paagi sa rebelasyon. Sa pila ka okasyon, ina nga rebelasyon may mga pagbag-o sa mga polisiya kag mga ginahimo sa Simbahan. Ang Opisyal nga Pahayag 1 kag 2 nag-anunsyo sining klase sang rebelasyon—ang isa nagresulta sa pag-pauntat sang pagpangasawa sing madamo, kag ang isa nagbukas sang mga bugay sang priesthood sa mga tawo sa tanan nga rasa. Ining mga pagbag-o kabahin sa buot silingon sang “matuod kag buhi nga simbahan” (Doktrina kag mga Kasugtanan 1:30), nga may matuod kag buhi nga propeta, nga ginapangunahan sang matuod kag buhi nga Dios.

Pero ang wala katapusan nga kamatuoran wala nagaliwat, bisan nagaliwat ang aton pag-intiendi sini. Kag kon kaisa ang rebelasyon nagahatag sang dugang nga kasanagan parte sa kamatuoran. Ang Mga Artikulo sang Pagtuo nagaserbe sining nagapaathag nga katuyuan. Ang Simbahan mapag-on nga nagatindog sa wala katapusan nga kamatuoran pero pwede nga magtubo kag magliwat “suno sa pagbuot sang Ginuo nga nagapabagay sang iya mga kaluoy suno sa mga sitwasyon sang mga anak sang katawhan” (Doktrina kag mga Kasugtanan 46:15). Buot silingon, “Nagapati kami sa tanan nga ginpahayag sang Dios, sa tanan nga Iya ginapahayag subong, kag nagapati kami nga magapahayag pa Sia sang madamo nga dalagko kag importante nga mga butang parte sa Ginharian sang Dios” (Mga Artikulo sang Pagtuo 1:9).

Mga Ideya sa Pagtuon sa Puluy-an kag sa Simbahan

Mga Artikulo sang Pagtuo

Ang Mga Artikulo sang Pagtuo nagaunod sang pundasyon nga mga kamatuoran sang ginpanumbalik nga ebanghelyo.

Pamensara ini nga pamaagi sa pagtuon sang Mga Artikulo sang Pagtuo: Sa tagsa ka artikulo sang pagtuo, maghimo sang “lip-ot nga leksyon” para ipaathag ang imo ginapatihan. Ang imo lip-ot nga leksyon pwede may upod nga konektado nga balaan nga kasulatan, litrato, himno ukon pangbata nga kanta, ukon personal nga eksperiyensya parte sa pagpangabuhi sang kamatuoran nga ginatudlo sang artikulo sang pagtuo.

Ano nga kinalain ang ginadala sining mga kamatuoran sa imo relasyon sa Amay nga Langitnon kag kay Jesucristo? Paano ginpanami sang Mga Artikulo sang Pagtuo ang imo pagtuon sang ebanghelyo ukon nakabulig sa imo sa pagpakigbahin sang ebanghelyo sa iban?

Tan-awa man sa Giya sa Balaan nga mga Kasulatan, “Mga Artikulo sang Pagtuo,” Librarya sang Ebanghelyo; L. Tom Perry, “Ang mga Doktrina kag mga Prinsipyo nga Nalakip sa Mga Artikulo sang Pagtuo,” Liahona, Nob. 2013, 46–48.

Mga Artikulo sang Pagtuo 1:9; Opisyal nga mga Pahayag 1 kag 2

Ang Simbahan ni Jesucristo ginagiyahan paagi sa rebelasyon.

“Nagapati kami nga ang [Dios] magapahayag pa sang madamo nga dalagko kag importante nga mga butang parte sa Ginharian sang Dios” (Mga Artikulo sang Pagtuo 1:9). Nga ginapanumdom ining prinsipyo, rebyuha ang Opisyal nga mga Pahayag 1 kag 2, kag pangitaa ang mga tinaga kag mga dinalan nga nagapabakod sang imo pagtuo sa nagapadayon nga rebelasyon. Paano nagaapekto ining mga rebelasyon sa imo kabuhi? Paano sini ginabuligan ang buluhaton sa ginharian sang Amay nga Langitnon nga magprogreso?

Ano ang nakita mo nga ebidensya nga ang Simbahan ginadumalahan “paagi sa inspirasyon sang Dios nga Makagagahum” sa karon nga panahon? (Opisyal nga Pahayag 1). Pwede mo rebyuhon ang isa ukon madamo pa nga pinakabag-o nga mga mensahe sa pangkabilogan nga komperensya, nga ginapangita kon paano ginagiyahan sang Ginuo ang Iya Simbahan—kag ang imo kabuhi. Maayo nga sugdan mo sa pinakabag-o nga mensahe halin sa Pangulo sang Simbahan.

Ano ang pwede mo himuon kon ikaw ukon ang imo pinalangga ginabudlayan nga maintiendihan ukon batunon ang ginatudlo sang Ginuo paagi sa Iya mga propeta? Ngaa nagapasalamat ka tungod sa propeta?

Tan-awa man sa Amos 3:7; 2 Nefi 28:30; Allen D. Haynie, “Buhi nga Propeta para sa Ulihing mga Adlaw,” Liahona, Mayo 2023, 25–28; “We Thank Thee, O God, for a Prophet [Salamat, O Dios, sa Manalagna],” Hymns, no. 19.

Opisyal nga Pahayag 1

Ang buluhaton sang Dios kinahanglan nga mag-abante.

Sa “Mga Bahin sang Mensahe halin sa Tatlo ka Pamulong-pulong ni Pangulong Wilford Woodruff parte sa Manifesto” (sa katapusan sang Opisyal nga Pahayag 1), ano nga mga rason ang ginhatag sang propeta nga ginpauntat sang Ginuo ang pagpangasawa sing madamo? Ano ang ginatudlo sini sa imo parte sa buluhaton sang Ginuo?

Wilford Woodruff, ni H.E. Peterson

Opisyal nga Pahayag 2

Makasalig ako sa Ginuo, bisan indi perpekto ang akon pag-intiendi.

Wala kita makahibalo kon ngaa ang ordinasyon sa priesthood kag mga ordinansa sang templo sa isa ka panahon indi pwede sa mga miyembro sang Simbahan nga Aprikano ang ginhalinan. Bisan pa nga nagaatubang sang mabudlay nga indi masabat nga mga pamangkot parte sinang polisiya, madamo nga Itom nga mga Santos sa Ulihing mga Adlaw ang nagsalig sa Ginuo (tan-awa sa Mga Hulubaton 3:5) kag nagpabilin nga tampad sa Iya sa bilog nila nga kabuhi. Ang pagtuon parte sa ila pagtuo kag mga eksperiyensya mahimo nga makainspirar sa imo. Ari ang iban sa ila mga panaysayon, nga makita sa history.ChurchofJesusChrist.org:

• “Jane Elizabeth Manning James”

• “In My Father’s House Are Many Mansions” (istorya ni Green Flake)

• “You Have Come at Last” (istorya ni Anthony Obinna)

• “Break the Soil of Bitterness” (istorya ni Julia Mavimbela)

• “I Will Take It in Faith” (istorya ni George Rickford)

• “Long-Promised Day” (istorya ni Joseph W. B. Johnson)

Samtang ginabasa mo ang Opisyal nga Pahayag 2, ano ang imo natun-an parte sa proseso sang Ginuo sa paggiya sang mga polisiya sa Iya Simbahan? Binagbinaga kon paano mo natun-an nga magsalig sa Ginuo bisan nga indi perpekto ang imo pag-intiendi.

Tan-awa man sa 2 Nefi 26:33.history.ChurchofJesusChrist.org; BeOne.ChurchofJesusChrist.org.

OK lang nga maghambal “Wala ko kabalo.” Bisan dapat mo tinguhaan nga buligan ang mga tawo nga imo ginatudloan nga masabat ang ila mga pamangkot parte sa ebanghelyo, wala nagapaabot ang Ginuo nga mahibal-an mo ang tanan. Kon indi ka kahibalo kon paano sabton ang isa ka bagay, akoa. Dayon itudlo ang mga nagatuon sa ginpahayag nga doktrina, kag magpahayag sang sinsero nga testimonya parte sa kon ano nga imo nahibal-an.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Mga Artikulo sang Pagtuo

Nagapati ako sa ebanghelyo ni Jesucristo.

• Pamensara nga magpangita kag magkanta sang mga himno kag pangbata nga kanta nga makabulig sang imo kabataan nga maintiendihan ang isa ukon masobra pa nga Mga Artikulo sang Pagtuo. Basi makabulig sila sa imo sa pagpili sang mga himno kag kanta. Buligi ang imo kabataan nga makita kon paano nagakonektar ang mga kanta sa Mga Artikulo sang Pagtuo.

• Pwede kamo sang imo kabataan nga magbuligay sa pagsulat sang posible nga mga ipamangkot sang mga tawo parte sa ebanghelyo ni Jesucristo ukon sa Iya Simbahan. Dayon bululigan ninyo nga sabton ina nga mga pamangkot gamit ang Mga Artikulo sang Pagtuo. Diin pa kita pwede magkadto kon may mga pamangkot kita parte sa ebanghelyo?

Mga Artikulo sang Pagtuo 1:9; Opisyal nga mga Pahayag 1 kag 2

Ginagiyahan sang Ginuo ang Iya Simbahan paagi sa Iya propeta.

• Para buligan ang imo kabataan nga maintiendihan ang ika-siyam nga artikulo sang pagtuo, pwede mo sila hatagan sang set sang balaan nga mga kasulatan kag litrato sang buhi nga propeta (ukon pinakabag-o nga isyu sang komperensya sang Liahona). Ipaalsa sa ila ang balaan nga mga kasulatan samtang ginabasa mo ang mga tinaga nga “tanan nga ginpahayag sang Dios” kag ang litrato ukon ang magasin kon mabasa mo ang “tanan nga Iya ginapahayag karon” (Mga Artikulo sang Pagtuo 1:9). Ngaa kinahanglan naton sang dumaan kag moderno nga mga propeta?

• Pwede nga tun-an sang imo kabataan kon paano kita ginagiyahan sang mga pulong sang mga propeta paagi sa pagsunod sa mga instruksyon nga maghimo sang isa ka butang, pareho sang pagkaon ukon hampanganan. Pwede mo ini ikumparar sa mga instruksyon nga ginahatag ni Jesucristo sa aton paagi sa propeta. Ano pa ang gintudlo sa aton sang Ginuo paagi sa Iya buhi nga propeta sa karon?.

Ang Dios nagatawag sang mga propeta para pamunoan ang Iya Simbahan.

Opisyal nga mga Pahayag 1 kag 2

Ang mga propeta nagabulig sa aton nga mahibal-an ang pagbuot sang Amay nga Langitnon.

• Siguro ang makita kon paano nagaangot ang dumaan nga balaan nga mga kasulatan sa moderno nga rebelasyon makabulig sa imo kabataan nga maintiendihan ang Opisyal nga mga Pahayag. Pwede mo sila pangabayon nga basahon ang Mga Binuhatan 10:34–35 kag Jacob 2:27–30 kag hagaron sila nga hibal-on kon diin nga balaan nga kasulatan ang maangot sa Opisyal nga Pahayag 1 (nga nagresulta sa pagpauntat sang pagpangasawa sang madamo) kag kon diin ang maangot sa Opisyal nga Pahayag 2 (nga nag-anunsyo nga ang ordinasyon sa priesthood kag ang mga ordinansa sang templo pwede na sa mga tawo sang tanan nga rasa). Magpamatuod nga ang Ginuo nagapahayag sang Iya pagbuot sa dumaan kag moderno nga mga propeta.

Para sa dugang nga mga ideya, tan-awa sa isyu sang Abyan nga magasin sini nga bulan.