Disyembre 15–21: “Ang Panimalay Labing Importante sa Plano sang Tagtuga”

Ang Panimalay: Isa ka Proklamasyon sa Kalibutan

Antes pa kita mabun-ag, parte kita sang isa ka pamilya—ang pamilya sang aton ginikanan nga langitnon. Ang sulundan nagapadayon sa duta. Ang mga pamilya diri, sa ila pinakamaayo, gintuyo nga magsalamin sang perpekto nga sulundan sang langit.

Siyempre, wala sang garantiya nga ang dutan-on nga mga pamilya mangin perpekto ukon wala sing problema. Pero sa hambal ni Pangulong Henry B. Eyring, ang mga pamilya “nagahatag sa mga anak sang Dios sang pinakamaayo nga oportunidad nga abiabihon sa kalibutan sa gugma nga daw amo-amo sa aton nabatyagan sa langit—gugma sang ginikanan” (“Gathering the Family of God,” Liahona, Mayo 2017, 20). Bangud nakahibalo nga ang mga pamilya indi perpekto kag magaeksperiyensya sang mga pag-atake sang kaaway, ginpadala sang Dios ang Iya Hinigugma nga Anak para tubuson kita kag paayuhon ang aton mga pamilya. Kag nagpadala Sia sang mga propeta sa ulihing mga adlaw upod sang proklamasyon agud pangapinan kag pabakuron ang mga pamilya. Kon aton sundon ang mga propeta kag magtuo sa Manluluwas, bisan nga kulabos ang mga pamilya sa diosnon nga talaksan, may paglaum para sa mga pamilya—sa duta kag sa langit.

Mga Ideya sa Pagtuon sa Puluy-an kag sa Simbahan

“Ang panimalay labing importante sa plano sang Tagtuga.”

“Ang Panimalay: Isa ka Proklamasyon sa Kalibutan” klaro nga parte sa mga pamilya. Pero parte man ini sa plano sang kaluwasan sang Dios. Isa ka paagi para tun-an ang proklamasyon amo nga isulat ang mga dinalan nga kabuhi antes sa duta, kabuhi sa duta, kag kabuhi pagkatapos sang kabuhi sa papel kag ilista kon ano ang ginatudlo sang proklamasyon parte sa sining mga topiko. Ano ang imo matun-an kon tun-an mo ang proklamasyon sa sini nga paagi? Paano ka ginabuligan sini nga maintiendihan kon ngaa ang pag-asawahay kag pamilya importante sa plano sang Dios? Paano nagaimpluwensya sa imo mga pagpili ang mga kamatuoran sa proklamasyon?

Kadamo sang mga tawo, nga sa lainlain nga mga rason, nahadlukan nga magpakasal ukon magpamata. Kon may abyan ka nga magsiling, “Indi ko ya gusto mamana/mangasawa ukon magpamilya,” ano ang imo ihambal? Pwede mo basahon ang proklamasyon nga nagapangita sang makabulig sa imo abyan nga maglaum sa plano sang Dios.

Isa pa ka pamangkot nga pwede ipamangkot sa imo—ukon imo ipamangkot sa imo kaugalingon—daw pareho sini: “Paano kon ang sitwasyon sang akon pamilya indi pareho sa ginahambal sa proklamasyon sang panimalay?” Ari ang duha ka lugar nga pwede ka magpangita sang laygay sang propeta: sa seksyon nga “Isa ka Dako nga Pagbag-o” sa mensahe ni Elder Dieter F. Uchtdorf “Si Jesucristo Amo ang Kusog sang mga Ginikanan” (Liahona, Mayo 2023, 55–59) kag sa katapusan nga apat ka paragraph sang mensahe ni Elder D. Todd Christofferson nga “Ngaa Bala Pag-asawahay, Ngaa Bala Panimalay” (Liahona, Mayo 2015, 52).

Ano ang ginainspirar sa imo nga imo himuon bangud sang imo gintun-an?

“Ang kada [tawo] pinalangga nga anak nga lalaki ukon babayi sang langitnon nga mga ginikanan.”

Kasami ginapanumdom naton nga ang proklamasyon sa pamilya giya para sa pangabuhi sa panimalay. Pero nagatudlo man ini sang importante nga mga kamatuoran parte sa aton langitnon nga pamilya kag wala katapusan nga pagkatawo. Ngaa importante nga imo mahibal-an nga tanan kita parte sining panimalay? Paano nagaimpluwensya ining kamatuoran sa imo mga pagpili?

Tan-awa man sa “Ako Anak sang Dios,” Hymns, num. 301.

“Ang kalipayan sa kabuhi sang panimalay laban-laban nga malab-ot kon napasad sa mga pinanudlo sang Ginuong Jesucristo.”

Kabiga ang paragraph 6 kag 7 sang proklamasyon sa panimalay bilang sulundan sang “kalipayan sa kabuhi sang panimalay.” Samtang ginabasa mo ining mga paragraph, hibaloa ang mga prinsipyo sang “madinalag-on nga mga pag-asawahay kag mga panimalay.” Pwede mo hunahunaon ang mga halimbawa sining mga prinsipyo nga nakita mo sa imo kaugalingon nga pamilya ukon iban nga mga pamilya. Paano nakabulig ining mga prinsipyo nga himuon si Jesucristo nga pundasyon sang kabuhi sa panimalay?

Dayon pwede mo hunahunaon ang relasyon sang pamilya nga gusto mo pabakuron. Magplano, upod ang bulig sang Manluluwas, nga aktohan ang mga impresyon nga imo mabaton.

Dapat padakuon sang mga ginikanan ang ila mga kabataan sa pagpalangga kag pagkamatarong.

“Ginapanawagan namon ang responsable nga mga banwahanon … sa pagtipig kag pagpabakod sang panimalay.”

Ang katapusan nga paragraph sang proklamasyon sang panimalay may upod nga panawagan nga mag-akto. Samtang ginapamensar mo kon paano mo sabton ina nga panawagan, basi makabulig nga tun-an mo ang tig-ulo sang proklamasyon. Halimbawa, ano ang proklamasyon? Ano ang ginapaintiendi sa imo sinang tinaga parte sa mensahe sining dokumento? Ano ang nagtulod sa Unang Pangulohan kag Konseho sang Dose ka Apostoles nga mag-isyu sang proklamasyon sa kalibutan parte sa mga panimalay? Pwede mo man ilista ang ginakabig mo nga mayor nga mga mensahe sang proklamasyon. Paano mo isulong ining mga mensahe sa imo kabuhi, sa imo puluy-an, kag sa imo komunidad?

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Ang pamilya importante sa plano sang Amay nga Langitnon.

• Buligi ang imo mga kabataan nga magpanumdom sang mga butang nga importante kaayo nga gusto nila ini ipanugid-sugid sa tanan. Ipakita sa kabataan ang kopya sang “Ang Panimalay: Isa ka Proklamasyon sa Kalibutan,” kag ipaathag nga ginsulat ini sang mga propeta kag mga apostoles para ihambal sa aton kon daw ano kaimportante ang mga pamilya sa Amay nga Langitnon. Ngaa importante kaayo ang mga pamilya sa Iya? [ChurchofJesusChrist.org]).

  What Is the Purpose of Family?

  The family is the divine building block of society.

• Mag-istorya sa imo kabataan sang butang halin sa proklamasyon nga pamatyag mo kinahanglan naton tanan nga mabal-an. Hagara ang mga kabataan nga ihambal ang ila mga nabatyagan parte sa sinang mga kamatuoran. Paano mangin lain ang aton mga kabuhi kon wala naton mahibal-i ining mga butang? Pwede kamo magkanta sing ululupod sang kanta parte sa mga kamatuoran nga makita sa proklamasyon.

• Sa seksyon IV sang iya mensahe nga “The Plan and the Proclamation” (Liahona, Nob. 2017, 30), ginlarawan ni Pangulong Dallin H. Oaks kon paano ginsulat ang proklamasyon sang panimalay. Pwede ninyo rebyuhon sang imo kabataan ang iya paglaragway kag hambalan kon ngaa nagapasalamat ka nga gin-inspirar sang Ginuo ang Iya mga alagad para tudloan kita sining mga kamatuoran parte sa pamilya.

• Pwede ka man magpakita sa imo kabataan sang mga litrato (ukon ipadrowing sa ila) nga nagapakita sang mga kamatuoran nga makita sa proklamasyon sang panimalay. Pwede ini nga mga litrato sang templo, sang pamilya nga ululupod nga nagapangamuyo ukon nagahampang, ukon sang mag-asawa nga ginakasal. Dayon pangitaon sang imo kabataan ang mga pahayag sa proklamasyon sang panimalay nga konektado sa mga litrato. Ano ang ginatudlo sang Ginuo sa aton parte sining mga butang sa proklamasyon?

Gusto sang Amay nga Langitnon nga mangin malipayon ang mga pamilya.

Mangin sensitibo. Samtang nagatudlo ka sang mga kamatuoran nga ginatudlo sa proklamasyon sang panimalay, tandai nga madamo nga kabataan ang nagapangabuhi sa mga pamilya nga layo sa sulundan nga ginalaragway sa proklamasyon. Pamensara kon paano mo sila paisugon kag papagsikon.

Ako “anak nga lalaki ukon babayi sang langitnon nga mga ginikanan.”

• Samtang upod ninyo nga ginakanta ang “I Am a Child of God [Ako Anak sang Dios]” (Children’s Songbook, 2–3), pwede ka mag-itsa sang bola sa isa ka bata mientras nga ginahambal mo nga, “May kilala ako nga anak sang Dios nga ang ngalan [ngalan sang bata].” Dayon iitsa sinang bata ang bagay sa iban, nga ginahambal ang amo man nga mga tinaga nga ginadugang ang ngalan sinang tawo. Buligi ang imo kabataan nga makita ang dinalan nga “pinalangga nga espiritu nga anak nga lalaki ukon anak nga babayi sang langitnon nga mga ginikanan” sa proklamasyon sang panimalay, kag magpamatuod sining kamatuoran.

Pinakamalipayon ang mga pamilya kon ginasunod nila si Jesucristo.

• Para sugdan ang paghambalanay parte sa pagpabakod sang inyo pamilya, pwede ninyo hambalan sang imo kabataan kon ano ang aton ginahimo para magbakod ang iban nga bagay—pareho sang aton mga ngipon, sang aton mga lawas, ukon isa ka bilding. Pwede mo dayon ina ikumparar sa pagpatindog sang mabakod nga pamilya. Buligi ang imo kabataan nga pangitaon ang Cristohanon nga mga prinsipyo nga nagaresulta sa kalipayan sa kabuhi sang pamilya, nga makita sa paragraph 7 sang proklamasyon sang panimalay (tan-awa man sa pahina sang kahiwatan sini nga semana).

Para sa dugang nga mga ideya, tan-awa sa isyu sang Abyan nga magasin sini nga bulan.