15–21 Tesema: “O Le Aiga O Le Totonugalemu Lea i le Fuafuaga a le Foafoa”

O Le Aiga: O Se Folafolaga i le Lalolagi

Ae tatou te lei fananau mai, sa avea i tatou ma vaega o se aiga—o le aiga a o tatou matua faalelagi. O loo faaauau pea lena mamanu i le lalolagi. O aiga iinei, i le mea sili latou te mafaia, ua fuafuaina e toe faaauauina le mamanu atoatoa i le lagi.

Ioe, e leai ni faamautinoaga o le a avea aiga faalelalolagi ma ni aiga atoatoa pe faagaoioia foi. Ae e pei ona aoao mai Peresitene Henry B. Eyring, o aiga e “avatu i fanau a le Atua le avanoa silisili e talileleia ai i latou i le lalolagi i le alofa e tasi i le lalolagi lea e latalata atu i le mea na tatou lagonaina i le lagi—le alofa faamatua” (“Faapotopotoina o le Aiga o le Atua,” Liahona, Me 2017, 20). O le iloaina o aiga e le atoatoa ma o le a oo i ai osofaiga mai le fili, na auina mai ai e le Atua Lona Alo Pele e togiola i tatou ma faamalolo o tatou aiga. Ma na Ia auina mai perofeta o aso e gata ai faatasi ma se folafolaga e puipuia ma faamalolosia ai aiga. Afai tatou te mulimuli i perofeta ma tuu atu le faatuatua i le Faaola, e ui ina le atoatoa aiga i le olaga nei i le avea ma ni aiga atoatoa faalelagi, ae o loo i ai le faamoemoe mo aiga—i luga o le fogaeleele ma i le lagi.

Manatu mo le Aoaoina i le Aiga ma i le Ekalesia

“O le aiga o le totonugalemu lea i le fuafuaga a le Foafoa.”

“O Le Aiga: O Se Folafolaga i le Lalolagi” ua manino lava e faatatau i aiga. Ae ua faapena foi ona faatatau i le fuafuaga o le faaolataga a le Atua. O se tasi o auala e suesue ai le folafolaga o le tusi lea o fasifuaitau muai olaga, olaga faitino, ma le olaga pe a mavae le olaga nei i luga o se fasipepa ma lisi mea o loo aoao mai e le folafolaga e uiga i nei autu taitasi. O a ni mea e te aoaoina pe a e suesue i le folafolaga i le ala lenei? E fesoasoani faapefea lenei mea ia te oe ia e malamalama i le pogai e taua ai le faaipoipoga ma le aiga i le fuafuaga a le Atua? E faapefea e upumoni i le folafolaga ona tosina ai au filifiliga?

E toatele tagata o e, mo ni mafuaaga eseese, atonu e fefefe e uiga i le faaipoipoga po o le tausia o fanau. Afai e fai atu se uo ia te oe, “Ou te le manao lava e faaipoipo pe fai so’u aiga,” o le a sau tala e fai atu? Atonu e mafai ona e sailia le folafolaga ma vaavaai mo se mea o le a fesoasoani i lau uo e maua ai le faamoemoe i le fuafuaga a le Atua.

O le isi fesili e ono fesiligia ai oe—pe atonu foi e te fesili ifo ia te oe lava—o se fesili faapenei: “Ae faapefea pe afai e le tutusa le tulaga o lou aiga ma mea o loo faamatala mai i le folafolaga i le aiga?” O nofoaga nei e lua e mafai ona e vaavaai i ai mo le fautuaga faaperofeta: o le vaega “O Se Suiga Tele” i le savali a Elder Dieter F. Uchtdorf “O Iesu Keriso o le Malosiaga o Matua” (Liahona, Me 2023, 55–59) ma parakalafa mulimuli e fa o le savali a Elder D. Todd Christofferson “Aisea e Faaipoipo Ai, Aisea e Fai ai se Aiga” (Liahona, Me 2015, 52).

O le a se mea ua musuia ai oe e fai ona o mea ua e suesueina?

Tagai foi i le Dallin H. Oaks, “O Le Fuafuaga ma le Folafolaga,” Liahona, Nov. 2017, 28–31; Autu ma Fesili, “Aiga,” .Gospel Library.

“O [tagata] taitoatasi o se atalii po o se afafine agaga faapelepele a ni matua faalelagi.”

E masani ona tatou mafaufau i le folafolaga i le aiga o se taiala mo le olaga faaleaiga. Ae o loo aoao mai ai foi upumoni tāua e uiga i lo tatou aiga faalelagi ma le faasinomaga e faavavau. Aisea e tāua ai mo oe le iloa o i tatou uma o se vaega o lenei aiga? E faapefea ona aafia filifiliga e te faia ona o lenei upumoni?

Tagai foi i le “O le Atua lo’u Tama,” Viiga, nu. 184.

“E maua le fiafia i le olaga faaleaiga pe a faavae i aoaoga a le Alii o Iesu Keriso.”

Mafaufau i parakalafa 6 ma le 7 o le folafolaga i le aiga o se mamanu mo le “fiafia i le olaga faaleaiga.” A o e faitau i nei parakalafa, faailoa mai mataupu faavae o le “o faaipoipoga ma aiga manuia.” Atonu e te mafaufau e uiga i faataitaiga o nei mataupu faavae ua e vaaia i lou lava aiga po o isi aiga. E faapefea ona fesoasoani nei mataupu faavae e avea ai Iesu Keriso ma faavae o le olaga faaleaiga?

Ona e mafaufau lea i se sootaga faaleaiga e te manao e faamalosia. Fai se fuafuaga, faatasi ai ma le fesoasoani a le Faaola, e faatino uunaiga e te maua.

Tagai foi i le L. Whitney Clayton, “O Aiga e Sili Ona Matagofie,” Liahona, Me 2020, 107–9.

E tatau i mātua ona tausia a latou fanau i le alofa ma le amiotonu.

“Matou te valaau atu i tagatanuu faatuatuaina … ia faatumauina ma faamalosia le aiga.”

O le parakalafa mulimuli o le folafolaga i le aiga e aofia ai se valaau e faatino. A o e mafaufau pe o le a faapefea ona e tali atu i lena valaau, e mafai ona fesoasoani le suesue i le ulutala o le folafolaga. Mo se faataitaiga, o le a le folafolaga? O le a se mea o ta’u atu e lena upu ia te oe e uiga i le savali a lenei pepa o faamatalaga? O le a le mea ua agavaa ai le Au Peresitene Sili ma le Korama a Aposetolo e Toasefululua e tuuina atu se folafolaga i le lalolagi e faatatau i aiga? E mafai foi ona e faia se lisi o mea e te manatu o savali autu o le folafolaga. E mafai faapefea ona e faalauiloaina nei savali i lou olaga, i lou aiga, ma i lou nuu?

Tagai foi i le, Bonnie L. Oscarson, “O Tagata e Puipuia le Folafolaga o le Aiga,” Liahona, Me 2015, 14–17; “Tagata e Puipuia le Faatuatua” (vitiō), Gospel Library.

Defenders of the Faith

Marie Madeline Cardon and her family were holding a Church service in their home in Italy when an angry mob of men gathered and began shouting for the missionaries to be brought outside. It was Marie who marched out of the house to confront the mob.

Mo nisi manatu, tagai i lomiga o lenei masina o mekasini o le Liahona ma le Mo le Malosi o le Autalavou .

Tagata, Nofoaga, Mea e Tutupu

• O Autu o le Talafaasolopito o le Ekalesia

Kiliki e vaai i isi mea

Fautuaga mo le Aoaoina o Tamaiti

E tāua aiga i le fuafuaga a le Tama Faalelagi.

• Fesoasoani i lau fanau e mafaufau i mea e sili ona tāua lea latou te mananao e taʻu atu i tagata uma e uiga ia i latou. Faaali atu i tamaiti se kopi o le - “O Le Aiga: O se Folafolaga i le Lalolagi,” ma faamatala atu na tusia e perofeta ma aposetolo e ta’u mai ai ia i tatou uma le tāua o aiga i le Tama Faalelagi. Aisea e tāua tele ai aiga ia te Ia? (tagai foi i le vitiō “What Is the Purpose of Family?” [ChurchofJesusChrist.org]).

  What Is the Purpose of Family?

  The family is the divine building block of society.

• Faasoa atu i lau fanau se mea mai le folafolaga e te lagona e tatau ona tatou iloa uma. Valaaulia tamaiti e faasoa mai o latou lagona e uiga i na upumoni. Mata e ese faapefea o tatou olaga pe ana faapea tatou te le iloa nei mea? E mafai ona outou usuina faatasi se pese e faatatau i upumoni o loo maua i le folafolaga, e pei o le “O Le a Ou Mulimuli i le Fuafuaga a le Atua” (Tusipese a Tamaiti, 86).

• I le vaega IV o lana savali “O Le Fuafuaga ma le Folafolaga” (Liahona, Nov. 2017, 30), na faamatalaina ai e Peresitene Dallin H. Oaks le ala na tusia ai le folafolaga i le aiga . Atonu e mafai e oe ma lau fanau ona iloilo faatasi lana faamatalaga ma talanoa e uiga i le mafuaaga e te faafetai ai na musuia e le Alii Ana auauna e aoao i tatou i nei upumoni e uiga i aiga.

• E mafai foi ona e faaali atu i lau fanau ata (pe valaaulia i latou e tusi ni ata) e faaalia ai mea moni o loo maua i totonu o le folafolaga o le aiga. E mafai ona avea ma ata o se malumalu, o se aiga o tatalo pe taaalo faatasi, po o se ulugalii o loo faaipoipo. Ona mafai lea e lau fanau ona saili fuaiupu i le folafolaga i le aiga e fesootai i ata. O le a se mea ua aoao mai e le Alii ia i tatou e uiga i nei mea i le folafolaga?

E finagalo le Tama Faalelagi i aiga ina ia fiafia.

Ia nofouta. Ao e aoao atu upu moni o loo aoaoina i totonu o le folafolaga o le aiga, faamolemole ia nofouta o le toatele o tamaiti o loo nonofo i aiga e le fetaui ma manatu o loo faamatalaina i le folafolaga. Mafaufau pe mafai faapefea ona e uunaia ma musuia i latou.

O a’u o se “atalii po o se afafine agaga faapelepele o ni matua faalelagi.”

• A o outou usuina faatasi le “O Au O Se Atalii o le Atua” (Tusipese a Tamaiti, 2), e mafai ona e togiina se polo i se tamaitiiti a o e fai atu, “Ou te iloa se atalii o le Atua e igoa ia [igoa o le tamaitiiti].” Ona togi lea e le tamaitiiti lena o le mea faitino i se isi tamaitiiti, ma fai atu upu lava ia e tasi ae tuu i ai le igoa o lena tamaitiiti. Fesoasoani i lau fanau e sue le fasifuaitau “atalii po o se afafine agaga faapelepele a ni matua faalelagi” i le folafolaga o le aiga, ma faasoa atu lau molimau i lenei upumoni.

E sili ona fiafia aiga pe a latou mulimuli ia Iesu Keriso.

• Ina ia amata se talanoaga e uiga i le faamalosia o lou aiga, e mafai e oe ma lau fanau ona talanoa e uiga i mea tatou te faia e faamalosia ai isi mea—e pei o o tatou nifo, o tatou tino, po o se fale. Ona mafai lea ona e faatusatusaina lena mea i le fausiaina o se aiga malosi. Fesoasoani i lau fanau e saili ia mataupu faavae faa-Keriso e taitai atu ai i le fiafia i le olaga faaleaiga, o loo maua i le parakalafa 7 o le folafolaga o le aiga (tagai foi i le itulau o gaioigao lenei vaiaso).

Mo nisi manatu, tagai i le lomiga o lenei masina o le mekasini o le Uo .