“8–14 Tesema: ‘Matou te Talitonu’: Mataupu Faavae o le Faatuatua ma Folafolaga Aloaia 1 ma le 2,” Sau, Mulimuli Mai ia te A’u—Mo le Aiga ma le Ekalesia: Mataupu Faavae ma Feagaiga 2025 (2025)
“Mataupu Faavae o le Faatuatua ma Folafolaga Aloaia 1 ma le 2,” Sau, Mulimuli Mai ia te A’u—Mo le Aiga ma le Ekalesia: 2025
Faamatalaga mai le I Alii Agavaa Uma o le Ekalesia, saunia e Emma Allebes
8–14 Tesema: “Matou Te Talitonu”
OMataupu Faavae o le Faatuatua ma le Folafolaga Aloaia 1 ma le 2
Talu mai le Uluai Faaaliga a Iosefa Samita, o loo faaauau pea ona taitaia e le Atua Lana Ekalesia e ala i faaaliga. I nisi o tulaga, o lena faaaliga ua aofia ai suiga i aiaiga faavae ma faiga a le Ekalesia. OFolafolaga Aloaia 1 ma le 2 ua faaalia ai lenei ituaiga o faaaliga—o le tasi na taitai atu ai i le faamutaina o le faiga o faaipoipoga autaunonofo, ma le isi na maua ai e tagata o ituaiga uma faamanuiaga o le perisitua. O suiga faapenei o vaega ia o le uiga o le i ai o se “ekalesia moni ma ola” (Mataupu Faavae ma Feagaiga 1:30), faatasi ai ma se perofeta moni ma soifua, e taitaia e se Atua moni ma soifua.
Ae e le suia le upumoni e faavavau, e ui o lo tatou malamalama i ai e suia. Ma o nisi taimi o faaaliga e aumaia se malamalama faaopoopo i le upumoni. Ua faia eMataupu Faavae o le Faatuatua lenei faamoemoega manino. Ua faavaeina ma le mausali le Ekalesia i luga o upumoni e faavavau ae e mafai ona tuputupu a’e ma suia “e tusa ai ma le finagalo o le Alii, i le faatatau o ona alofa mutimutivale e tusa ma tulaga o le fanauga a tagata” (Mataupu Faavae ma Feagaiga 46:15). I se isi faaupuga, “Matou te talitonu i mea uma na faaali mai e le Atua, mea uma ua Ia faaali mai nei, ma matou te talitonu foi o le a Ia faaali mai le tele o mea silisili ma le tāua tau i le Malo o le Atua i le lumanai” (Mataupu Faavae o le Faatuatua 1:9).
Manatu mo le Aoaoina i le Aiga ma i le Ekalesia
O Mataupu Faavae o le Faatuatua o loo i ai upumoni faavae o le talalelei toefuataiina.
Mafaufau i lenei faiga e suesue ai Mataupu Faavae o le Faatuatua: Mo mataupu faavae taitasi o le faatuatua, fai se “lesona-laitiiti” e faamalamalama ai mea e te talitonu i ai. O lau lesona-laitiiti e mafai ona aofia ai se mau, ata, viiga po o se pese a tamaiti, po o se aafiaga patino e uiga i le ola ai i se upumoni o loo aoao mai e le mataupu faavae o le faatuatua.
O le a se eseesega e faia e nei upumoni i lau sootaga ma le Tama Faalelagi ma Iesu Keriso? Na faapefea ona faaleleia e Mataupu Faavae o le Faatuatua au suesuega o le talalelei pe fesoasoani ia te oe e faasoa atu le talalelei i isi?
Tagai foi i le Taiala i Tusitusiga Paia, “Mataupu Faavae o le Faatuatua,” Gospel Library; L. Tom Perry, “O Aoaoga Faavae ma Mataupu Faavae o Loo i Ai i Mataupu Faavae o le Faatuatua,” Liahona, Nov. 2013, 46–48; “Mataupu 38: O le Tusi a Wentworth,” i le Aoaoga a Peresitene o le Ekalesia: Iosefa Samita (2011), 435–47.
Mataupu Faavae o le Faatuatua 1:9; Folafolaga Aloaia 1 ma le 2
O le Ekalesia a Iesu Keriso ua taialaina i faaaliga.
“Matou te talitonu “o le a faaali mai [e le Atua] le tele o mea silisili ma le taua tau i le Malo o le Atua i le lumanai” (Mataupu Faavae o le Faatuatua 1:9). Faatasi ai ma lenei mataupu faavae i le mafaufau, iloilo le Folafolaga Aloaia 1 ma le 2, ma vaavaai mo upu ma fuaitau e faamalosia ai lou faatuatua i faaaliga faifaipea. O faapefea ona aafia ai lou olaga i nei faaaliga? O faapefea ona latou fesoasoani e faaalualu ai i luma le galuega o le malo o le Tama Faalelagi?
O le a se faamaoniga ua e vaaia o loo taitaia le Ekalesia “e ala i musumusuga a le Atua Malosi Aoao” i aso nei? (Folafolaga Aloaia 1). Atonu e mafai ona e iloiloina se savali se tasi pe sili atu o le konafesi aoao lata mai, vaavaai pe o faapefea ona taiala e le Alii Lana Ekalesia—ma lou olaga. O le savali aupito lata mai mai le Peresitene o le Ekalesia atonu o se savali lelei lea e amata ai.
O le a se mea e mafai ona e faia pe afai e tauivi oe po o se tasi e te alofa i ai ia malamalama pe talia mea o loo aoao mai e le Alii e ala mai i Ana perofeta? Aisea e te faafetai ai mo se perofeta?
Tagai foi i le Amosa 3:7; 2 Nifae 28:30; Allen D. Haynie, “O Se Perofeta Soifua mo Aso e Gata Ai,” Liahona, Me 2023, 25–28; Autu ma Fesili, “Perofeta,” Potutusi o le Talalelei; “Ia Viia Oe le Atua, mo se Perofeta,” Viiga, nu. 10.
E ao lava ona agai i luma le galuega a le Atua.
I le “O ni Upusii mai ni Saunoaga e Tolu a Peresitene Uilitofi Uitilafi e Uiga i le Manifeso” (i le faaiuga o le Folafolaga Aloaia 1), o a mafuaaga na tuuina mai e le perofeta mo le faamutaina e le Alii o faaipoipoga autaunonofo? O le a se mea ua aoao ai oe e lenei mea e uiga i le galuega a le Atua?
Mo nisi faamatalaga e uiga i tulaga faaletalafaasolopito o le Folafolaga Aloaia 1, tagai i le Au Paia, 2:602–15; “The Messenger and the Manifesto,” i le Revelations in Context, 323–31; Autu ma Fesili, “Plural Marriage and Families in Early Utah,” Gospel Library.
Uilifoti Uitilafi, saunia e H. E. Peterson
E mafai ona ou faalagolago i le Alii, e tusa lava pe le o i ai so’u malamalamaaga atoatoa.
Tatou te le iloa pe aisea na le avanoa ai le faauuga i le perisitua ma sauniga o le malumalu i tagata o le Ekalesia e tupuga mai i Aferika mo se taimi. E tusa lava pe feagai ma fesili faigata e lei taliina e uiga i lena aiaiga faavae, e toatele tagata uli o le Au Paia o Aso e Gata Ai na faatuatuaina le Alii (tagai i le Faataoto 3:5) ma tumau faamaoni ia te Ia i o latou olaga atoa. O le aoao e uiga i lo latou faatuatua ma aafiaga e mafai ona musuia ai oe. O nisi nei o a latou tala, o loo maua i le history.ChurchofJesusChrist.org:
-
“In My Father’s House Are Many Mansions” (tala ia Green Flake)
-
“You Have Come at Last” (tala ia Anthony Obinna)
-
“Break the Soil of Bitterness” (tala ia Julia Mavimbela)
-
“I Will Take It in Faith” (tala ia George Rickford)
-
“Long-Promised Day” (tala ia Joseph W. B. Johnson)
A o e faitau i le Folafolaga Aloaia 2, o le a se mea ua e aoaoina e uiga i le faagasologa a le Alii mo le taialaina o aiaiga faavae o Lana Ekalesia? Mafaufau loloto pe na faapefea ona e aoao e faalagolago i le Alii tusa lava pe leai sou malamalama atoatoa.
Tagai foi i le 2 Nifae 26:33; “Witnessing the Faithfulness,” i le Revelations in Context, 332–41; Autu ma Fesili, “Race and the Priesthood,” Gospel Library; Ahmad Corbitt, “A Personal Essay on Race and the Priesthood,” vaega 1–4, history.ChurchofJesusChrist.org; BeOne.ChurchofJesusChrist.org.
E le afaina le faapea atu “Ou te le iloa.” Ao tatau ai ona e faia le mea sili e fesoasoani ai i tagata o loo e aoaoina e tali a latou fesili e uiga i le talalelei, e le o faamoemoe le Alii e te iloa mea uma. Afai e te le iloa tali se mea, ta’u atu e te le iloaina. Ona faasino lea o tagata aoao i le aoaoga faavae ua faailoa mai, ma tuu atu se molimau faamaoni o mea ua e iloa.
Mo nisi manatu, tagai i le lomiga o lenei masina o mekasini o le Liahona ma le Mo le Malosi o le Autalavou .
Tagata, Nofoaga, Mea e Tutupu
Fautuaga mo le Aoaoina o Tamaiti
Ou te talitonu i le talalelei a Iesu Keriso.
-
Mafaufau e saili ma usuina viiga po o pese a tamaiti e mafai ona fesoasoani i lau fanau ia malamalama i se tasi pe sili atu foi o Mataupu Faavae o le Faatuatua. Atonu e mafai ona latou fesoasoani ia te oe e filifili ia viiga ma pese. Fesoasoani i lau fanau ia iloa pe faapefea ona fesootai ia pese i Mataupu Faavae o le Faatuatua.
-
E mafai e oe ma lau fanau ona galulue faatasi e tusi ni fesili e ono i ai i tagata e uiga i le talalelei a Iesu Keriso po o Lana Ekalesia. Ona mafai lea ona outou galulue faatasi e tali na fesili e faaaoga ai Mataupu Faavae o le Faatuatua. O fea se isi mea e mafai ona tatou o i ai pe a i ai ni a tatou fesili e uiga i le talalelei?
Mataupu Faavae o le Faatuatua 1:9; Folafolaga Aloaia 1 ma le 2
E taitai e le Alii Lana Ekalesia e ala mai i Lana perofeta.
-
Ina ia fesoasoani i lau fanau ia malamalama i le mataupu faavae o le faatuatua lona iva, atonu e mafai ona e tuuina atu ia i latou se seti o tusitusiga paia ma se ata o le perofeta soifua (po o se lomiga talu ai nei o le Liahonao le konafesi). Fai atu ia i latou e uu i luga tusitusiga paia a o e faitauina upu “mea uma ua faaali mai e le Atua” ma le ata po o le mekasini pe a e faitauina “mea uma ua ia faaali mai nei” (Mataupu Faavae o le Faatuatua 1:9). Aisea tatou te manaomia uma ai perofeta anamua ma aso nei?
-
E mafai e lau fanau ona aoao pe faapefea e upu a perofeta ona taiala i tatou e ala i le mulimuli i faatonuga e faia se mea, e pei o se meaai po o se meataalo. E mafai ona e faatusatusaina lenei mea i faatonuga ua tuuina mai e Iesu Keriso ia i tatou e ala mai i le perofeta. O a nisi o mea na aoao mai e le Alii ia i tatou e ala mai i Lana perofeta soifua i aso nei?
E valaauina e le Atua perofeta e taitai Lana Ekalesia.
Folafolaga Aloaia 1 ma le 2
E fesoasoani perofeta ia i tatou ia iloa le finagalo o le Tama Faalelagi.
-
Atonu o le vaaia o le ala e fesootai ai tusitusiga paia anamua i faaaliga i onaponei, e mafai ona fesoasoani i lau fanau ia malamalama i Folafolaga Aloaia. E mafai ona e fai atu ia i latou e faitau le Galuega 10:34–35 ma le Iakopo 2:27–30 ma valaaulia i latou e faailoa po o le fea o mau e faatatau i le Folafolaga Aloaia 1 (lea e taitai atu ai i le faamutaina o faaipoipoga autaunonofo) ma po o le fea e faatatau i le Folafolaga Aloaia 2 (lea na faasilasila mai ai e faapea o le faauuga i le perisitua ma sauniga o le malumalu ua avanoa mo tagata o ituaiga uma). Tuu atu lau molimau e faaali mai e le Alii Lona finagalo i perofeta anamua ma aso nei.
Mo nisi manatu, tagai i le lomiga o lenei masina o le mekasini o le Uo .