« ថ្ងៃទី ២២–២៨ ខែ ធ្នូ ៖ ‹ អំណោយដ៏មិនអាចប្រៀបផ្ទឹមបានពីព្រះរាជបុត្រាដ៏ទេវភាពរបស់ព្រះ › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ គោលលទ្ធិ និងសេចក្ដីសញ្ញា ឆ្នាំ ២០២៥ ( ឆ្នាំ ២០២៥ )

« បុណ្យគ្រីស្ទម៉ាស់ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

សេចក្តីលម្អិតមកពី Nativity in Copper and Umber [ ប្រសូតកម្មធ្វើពីស្ពាន់ និងដីពណ៌ត្នោត ] ដោយ ជេខឺក រីឆាដ

ថ្ងៃទី ២២–២៨ ខែ ធ្នូ ៖ អំណោយដ៏មិនអាចប្រៀបផ្ទឹមបានពីព្រះរាជបុត្រាដ៏ទេវភាពរបស់ព្រះ

បុណ្យគ្រីស្ទម៉ាស់

ព្យាការី យ៉ូសែប ស៊្មីធ បានប្រកាសថា « គោលការណ៍គ្រឹះនៃសាសនារបស់យើងគឺជាទីបន្ទាល់របស់ពួកសាវក និងព្យាការីទាំងឡាយដែលទាក់ទងទៅនឹងព្រះយេស៊ូវគ្រីស្ទ ថាទ្រង់បានសុគត ត្រូវបានគេបញ្ចុះព្រះសព និងបានមានព្រះជន្មរស់ឡើងវិញម្ដងទៀតនៅថ្ងៃទីបី ហើយបានយាងឡើងទៅស្ថានសួគ៌វិញ ហើយរឿងផ្សេងទៀតទាំងឡាយដែលបានជាប់ទាក់ទងទៅនឹងសាសនារបស់យើងគឺគ្រាន់តែជារឿងបន្ទាប់បន្សំចំពោះការណ៍នេះប៉ុណ្ណោះ » ( Teachings of Presidents of the Church: Joseph Smith [ ឆ្នាំ ២០១១ ] ទំព័រ ៤៩ ) ។ ជាង ១៦០ ឆ្នាំក្រោយមក សេចក្តីថ្លែងការណ៍នេះបានបំផុសគំនិតគណៈប្រធានទីមួយ និងកូរ៉ុមនៃពួកសាវកដប់ពីរនាក់ឲ្យបោះពុម្ព « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » នៅក្នុងការគោរពដល់ខួបលើកទី ២,០០០ ឆ្នាំ ការប្រសូតរបស់ព្រះអង្គសង្រ្គោះ ( សូមមើល រ័សុល អិម ណិលសុន « Drawing the Power of Jesus Christ into Our Lives » Liahona ខែ ឧសភា ឆ្នាំ ២០១៧ ទំព័រ ៤០ ) ។

ក្នុងនាមជាពួកបរិសុទ្ធថ្ងៃចុងក្រោយ យើងរីករាយជាមួយពរជ័យនៃការបន្តទទួលវិវរណៈតាមរយៈព្យាការី និងសាវកសម័យទំនើប ។ យើងមានអំណរគុណចំពោះពាក្យពេចន៍ដ៏បំផុសគំនិតនៃដំបូន្មាន ការព្រមាន និងការលើកទឹកចិត្ត ។ ប៉ុន្តែអ្វីដែលសំខាន់បំផុត គឺយើងបានទទួលពរជ័យតាមរយៈទីបន្ទាល់ដ៏មានព្រះចេស្តាអំពីព្រះយេស៊ូវគ្រីស្ទ—អំឡុងរដូវបុណ្យគ្រីស្ទម៉ាស់នេះ និងនៅពេញមួយឆ្នាំ ។ វាមានន័យច្រើនជាងពាក្យពេចន៍ធ្វើឲ្យរំភើបចិត្តនៃអ្នកនិពន្ធដ៏ជំនាញ ឬអ្នកនិយាយសាធារណៈ ឬអ្នកជំនាញខាងផ្នែកព្រះគម្ពីរទៅទៀត ។ វាគឺជាពាក្យពេចន៍របស់ « ពួកសាក្សីពិសេសអំពីព្រះនាមនៃព្រះគ្រីស្ទ នៅពេញសព្វក្នុងពិភពលោក » ដែលត្រូវបានជ្រើសរើស បានហៅ និងបានផ្ដល់សិទ្ធិអំណាចដោយព្រះ ( គោលលទ្ធិ និងសេចក្ដីសញ្ញា ១០៧:២៣ ) ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

« សូម្បីតែមួយក៏គ្មានសោះដែលមានឥទ្ធិពលដ៏ជ្រាលជៅ » ។

តើបងប្អូននឹងនិយាយអ្វីដើម្បីគាំទ្រសេចក្តីថ្លែងការណ៍ដែលថា « មនុស្សដែលបានរស់នៅ ហើយដែលនឹងរស់នៅលើផែនដីនៅអនាគតកាល គ្មាននរណាម្នាក់សោះដែលមានឥទ្ធិពលដ៏ជ្រាលជៅ [ ដូចព្រះយេស៊ូវគ្រីស្ទ ]បានមាន » ? សូមរកមើលវគ្គបទគម្ពីរនៅក្នុង « ព្រះគ្រីស្ទដ៏មានព្រះជន្មរស់ » ដែលថ្លែងទីបន្ទាល់អំពីឥទ្ធិពលដ៏ជ្រាលជ្រៅរបស់ព្រះអង្គសង្រ្គោះ ។ តើទ្រង់បានមានឥទ្ធិពលលើបងប្អូនដោយរបៀបណា ?

ឧបមាថានរណាដែលមិនស្គាល់គ្រិស្ដសាសនាបានសួរបងប្អូនថាហេតុអ្វីបានជាបងប្អូនប្រារព្ធបុណ្យគ្រីស្ទម៉ាស់ ។ តើបងប្អូននឹងឆ្លើយតបយ៉ាងដូចម្ដេច ? សូមមើល « ព្រះគ្រីស្ទដ៏មានព្រះជន្មរស់ » ដោយមានសំណួរនេះនៅក្នុងចិត្ត ហើយពិចារណាសរសេរនូវគំនិត ឬចំណាប់អារម្មណ៍ណាមួយដែលផុសឡើងក្នុងចិត្តបងប្អូន ។

សូមមើលផងដែរ « Why We Need a Savior » ( វីដេអូ ) នៅលើបណ្ណាល័យដំណឹងល្អ ។

« ទ្រង់បានរស់ឡើងវិញចេញពីផ្នូរ » ។

នៅក្នុង « ព្រះគ្រីស្ទដ៏មានព្រះជន្មរស់ » សាវកថ្លែងទីបន្ទាល់អំពីការស់ឡើងវិញរបស់ព្រះអង្គសង្គ្រោះ រៀបរាប់បីចំណុចនៃការលេចមកនៃព្រះអម្ចាស់ដែលមានព្រះជន្មរស់ឡើងវិញ ( សូមមើល កថាខណ្ឌទី ៥ ) ។ សូមពិចារណាអានដំណើររឿងនៃយាងមកជួបនេះ យ៉ូហាន ២០; នីហ្វៃទី៣ ១១ និង យ៉ូសែប ស្ម៊ីធ—ប្រវត្តិ ១:១៤–២០ ។ តើបងប្អូនរៀនអ្វីខ្លះអំពីព្រះអង្គសង្គ្រោះចេញមកពីព្រះបន្ទូល និងសកម្មភាពរបស់ទ្រង់នៅក្នុងអំឡុងពេលនៃការបង្ហាញព្រះកាយទាំងនេះ ?

ផ្ដោតទៅលើព្រះអង្គសង្គ្រោះ ។ « ការអាន ‹ ព្រះគ្រីស្ទដ៏មានព្រះជន្មរស់ › ប្រកបដោយការអធិស្ឋានគឺដូចជាការអានទីបន្ទាល់របស់ ម៉ាថាយ, ម៉ាកុស, លូកា, យ៉ូហាន និងព្យាការីនានានៅក្នុងព្រះគម្ពីរមរមនផងដែរ ។ វានឹងបង្កើនសេចក្តីជំនឿរបស់បងប្អូនលើព្រះអង្គសង្គ្រោះ ហើយជួយបងប្អូនឲ្យបន្ដផ្តោតចិត្តលើទ្រង់ » ( អិម រ័សុល បាឡឺដ « ត្រឡប់ទៅវិញ ហើយទទួល » Liahona ខែ ឧសភា ឆ្នាំ ២០១៧ ទំព័រ ៦៥ ) ។

« បព្វជិតភាព និងសាសនាចក្ររបស់ទ្រង់ត្រូវបានស្ដារឡើងវិញ » ។

អំឡុងពេលនៃការសិក្សាគោលលទ្ធិ និងសេចក្តីសញ្ញារបស់បងប្អូនឆ្នាំនេះ បងប្អូនមានឱកាសដើម្បីរៀនបន្ថែមទៀតអំពីរបៀបរបស់ព្រះអង្គសង្គ្រោះក្នុងការធ្វើឲ្យ « បព្វជិតភាព និងសាសនាចក្ររបស់ទ្រង់ត្រូវបានស្ដារឡើងវិញ » ។ តើសេចក្តីពិត ឬគោលការណ៍ដែលបានស្តារឡើងវិញណាមួយ ដែលមានអត្ថន័យជាពិសេសចំពោះបងប្អូន ? សូមពិចារណាពិនិត្យមើលបទគម្ពីរមួយចំនួនខាងក្រោមនេះឡើងវិញ ដែលបង្រៀនអំពីការស្តារឡើងវិញ ៖ គោលលទ្ធិ និងសេចក្តីសញ្ញា ១:១៧–២៣; ១៣; ២០:១–១២; ៦៥; ១១០; ១១២:៣០–៣២; ១២៤:៣៩–៤២; ១២៨:១៩–២១ ។ សូមជញ្ជឹងគិតអំពីរបៀបដែលសេចក្តីពិតនៃដំណឹងល្អដែលបានស្តារឡើងវិញជួយបងប្អូនឲ្យដឹង និងស្រឡាញ់ព្រះយេស៊ូវគ្រីស្ទ ។

« ថ្ងៃណាមួយ ទ្រង់នឹងយាងមកផែនដីម្តងទៀត » ។

បុណ្យគ្រីស្ទម៉ាស់គឺជាពេលវេលាដែលយើងគិតដល់ថ្ងៃប្រសូតរបស់ព្រះយេស៊ូវគ្រីស្ទ និងទន្ទឹងរង់ចាំដល់ថ្ងៃដែលទ្រង់នឹងយាងមកម្តងទៀត ។ តើបងប្អូនបានរៀនអ្វីខ្លះអំពីការយាងមកវិញរបស់ទ្រង់ចេញពី កថាខណ្ឌពីរដល់កថាខណ្ឌចុងក្រោយ នៃ « ព្រះគ្រីស្ទដ៏មានព្រះជន្មរស់ » ? បងប្អូនអាចនឹងពិចារណាអាន ច្រៀង ឬស្តាប់ទំនុកតម្កើងបុណ្យគ្រីស្ទម៉ាស់ ដែលបង្រៀនអំពីការយាងមកជាលើកទីពីរ ដូចជាបទ « អំណរដល់លោក » ឬ « កណ្តាលអធ្រាតរាត្រីភ្លឺថ្លា » ( ទំនុកតម្កើង ល.រ ១២៤, ១២៨ ) ។

« ព្រះអង្គគឺជាពន្លឺ ជាជីវិត ហើយជាសេចក្ដីសង្ឃឹមនៃពិភពលោក » ។

នៅក្នុង កថាខណ្ឌចុងក្រោយបង្អស់ នៃ « ព្រះគ្រីស្ទដ៏មានព្រះជន្មរស់ » សូមកត់ចំណាំអំពីគុណលក្ខណៈ និងព្រះបរមងារដែលបានផ្តល់ឲ្យព្រះអង្គសង្រ្គោះ ។ សូមពិចារណាចំណាយពេលសិក្សាអំពីកថាខណ្ឌមួយចំនួននោះ ។ ឧទាហរណ៍ ៖

ពន្លឺ ៖ តើព្រះយេស៊ូវគ្រីស្ទដូចជាពន្លឺចំពោះបងប្អូនដោយរបៀបណា ? បងប្អូនអាចនឹងពិចារណាគូររូប ឬថតរូបដែលបងប្អូនគិតថាតំណាងឲ្យពន្លឺដែលទ្រង់ប្រទានដល់បងប្អូន ។ តើបងប្អូនមានអារម្មណ៍បំផុសគំនិតឲ្យធ្វើអ្វីខ្លះ ដើម្បីចែកចាយពន្លឺរបស់ទ្រង់ ? ( សូមមើលផងដែរ យ៉ូហាន ៨:១២; នីហ្វៃទី៣ ១៨:២៤; គោលលទ្ធិ និងសេចក្តីសញ្ញា ៥០:២៤ ) ។

ជីវិត ៖ តើបងប្អូនគិតថា ហេតុអ្វី ជីវិត គឺជាពាក្យល្អដើម្បីពិពណ៌នាអំពីព្រះយេស៊ូវគ្រីស្ទ ? តើក្នុងន័យអ្វីដែលទ្រង់ប្រទានជីវិតដល់បងប្អូន ? តើជីវិតរបស់បងប្អូននឹងខុសគ្នាយ៉ាងណាបើគ្មានទ្រង់ និងដំណឹងល្អរបស់ទ្រង់នោះទេ ? ( សូមមើលផងដែរ យ៉ូហាន ១០:១០; កូរិនថូស ទី១ ១៥:១៩–២៣; គោលលទ្ធិ និងសេចក្តីសញ្ញា ៦៦:២ ) ។

សង្ឃឹម ៖ ដោយសារព្រះយេស៊ូវគ្រីស្ទ និងដំណឹងល្អរបស់ទ្រង់ តើបងប្អូនសង្ឃឹមអ្វី ? តើបងប្អូនស្គាល់នរណាម្នាក់ដែលអស់សង្ឃឹមអំពីអនាគតដែរឬទេ ? សូមជញ្ជឹងគិតអំពីរបៀបដែលបងប្អូនអាចចែកចាយជាមួយបុគ្គលនោះនូវក្តីសង្ឃឹមដែលបងប្អូនមាននៅក្នុងព្រះយេស៊ូវគ្រីស្ទ ។ ( សូមមើលផងដែរ រ៉ូម ៨:២៤–២៥; អេធើរ ១២:៤; មរ៉ូណៃ ៧:៤១ ) ។

សូមមើលផងដែរ ប្រធានបទ និង សំណួរ « Jesus Christ » នៅលើបណ្ណាល័យដំណឹងល្អ ។

« សូមអរព្រះគុណដល់ព្រះ ចំពោះអំណោយទានដ៏ប្រៀបផ្ទឹមពុំបាន [ របស់ទ្រង់ ] » ។

នៅក្នុង « ព្រះគ្រីស្ទដ៏មានព្រះជន្មរស់ » ពួកសាវកសំដៅទៅព្រះអង្គសង្គ្រោះថាជា « អំណោយ » មួយមកពីព្រះវរបិតាសួគ៌របស់យើង ។ ផ្អែកលើអ្វីដែលបងប្អូនរកឃើញនៅក្នុង « ព្រះគ្រីស្ទដ៏មានព្រះជន្មរស់ » តើបងប្អូននឹងបំពេញប្រយោគនេះដោយរបៀបណា ៖ « តាមរយៈព្រះយេស៊ូវគ្រីស្ទ ព្រះប្រទានដល់ខ្ញុំនូវអំណោយ … » សូមពិចារណាពីអ្វីដែលបងប្អូនអាចធ្វើដើម្បីទទួលអំណោយទាំងនេះបានកាន់តែពេញលេញ ។

តើការសិក្សា « ព្រះគ្រីស្ទដ៏មានព្រះជន្មរស់ » មានឥទ្ធិពលលើសេចក្តីជំនឿ និងសេចក្តីស្រឡាញ់របស់បងប្អូនចំពោះព្រះអង្គសង្រ្គោះដោយរបៀបណា ?

សូមមើលផងដែរ រ័សុល អិម ណុលសិន « Four Gifts That Jesus Christ Offers to You » ( First Presidency Christmas devotional ថ្ងៃទី ២ ខែ ធ្នូ ឆ្នាំ ២០១៨ ) នៅលើបណ្ណាល័យដំណឹងល្អ « Excerpts from ‹ The Living Christ: The Testimony of the Apostles › » ( វីដេអូ ) នៅលើគេហទំព័រ ChurchofJesusChrist.org ។

Excerpts from "The Living Christ: The Testimony of the Apostles"

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

ខ្ញុំអាច « ថ្លែងទីបន្ទាល់ [ របស់ខ្ញុំ ] » ដើម្បីប្រារព្ធអបអរនឹងការប្រសូតរបស់ព្រះយេស៊ូវ ។

សូមពិចារណាពីរបៀបដែលបងប្អូនអាចណែនាំកុមាររបស់បងប្អូនឲ្យស្គាល់ពី « ព្រះគ្រីស្ទដ៏មានព្រះជន្មរស់ » ។ ប្រហែលជាបងប្អូនអាចជួយពួកគេចង្អុលទៅឈ្មោះ ព្រះគ្រីស្ទ នៅលើចំណងជើង និងហត្ថលេខារបស់គណៈប្រធានទីមួយ និងពួកដប់ពីរនាក់ ។ បងប្អូនអាចពន្យល់ថា នេះជាទីបន្ទាល់របស់ពួកលោកអំពីព្រះយេស៊ូវគ្រីស្ទ ដែលពួកលោកចង់ចែកចាយជាមួយពិភពលោក ។
បងប្អូនអាចឲ្យកុមារម្នាក់ៗនូវឃ្លាមួយមកពី « ព្រះគ្រីស្ទដ៏មានព្រះជន្មរស់ » ហើយសូមឲ្យពួកគេគូររូបភាពមួយមកពីឃ្លា ឬប្រយោគនោះ ។ បន្ទាប់មកបងប្អូនអាចជួយពួកគេស្វែងរកឃ្លានៅក្នុង « ព្រះគ្រីស្ទដ៏មានព្រះជន្មរស់ » ។ បងប្អូនក៏អាចចងក្រងរូបភាព និងឃ្លាទាំងនោះនៅក្នុងសៀវភៅមួយផងដែរ ។
សូមចែកចាយជាមួយគ្នាទៅវិញទៅមកអំពីរបៀបដែលបងប្អូនទទួលបានទីបន្ទាល់របស់បងប្អូនអំពីព្រះយេស៊ូវគ្រីស្ទ ។ ប្រហែលជាបងប្អូនអាចហុចតគ្នានូវរូបភាពរបស់ព្រះអង្គសង្រ្គោះ ហើយប្ដូរវេនគ្នាចែកចាយអ្វីដែលបងប្អូនដឹងអំពីទ្រង់ ( រួមទាំងសេចក្ដីពិតដែលបានបង្រៀននៅក្នុង « ព្រះគ្រីស្ទដ៏មានព្រះជន្មរស់ » ) ។

« ទ្រង់បានយាងចុះឡើងធ្វើការល្អ » ។

នៅពេលបងប្អូន និងកុមាររបស់បងប្អូនអានកថាខណ្ឌទីពីរនៃ « ព្រះគ្រីស្ទដ៏មានព្រះជន្មរស់ » សូមនិយាយជាមួយនឹងពួកគេអំពីកិច្ចការមួយចំនួនដែលព្រះគ្រីស្ទបានធ្វើ ។ បងប្អូនក៏អាចមើលរូបភាពមកពីព្រះជន្មរបស់ទ្រង់ផងដែរ ( សូមមើល ទំព័រសកម្មភាព ប្រចាំសប្តាហ៍នេះ និងសៀវភៅរូបភាពដំណឹងល្អ ) ។ សូមអញ្ជើញកុមាររបស់បងប្អូនឲ្យនិយាយអំពីអ្វីដែលព្រះអង្គសង្រ្គោះកំពុងធ្វើនៅក្នុងរូបភាពនេះ ។ តើយើងអាចបម្រើអ្នកដទៃដូចទ្រង់បានធ្វើយ៉ាងដូចម្ដេច ? វីដេអូ« Light the World » នៅលើបណ្ណាល័យដំណឹងល្អអាចផ្តល់គំនិតខ្លះៗដល់បងប្អូន ។

« ព្រះអង្គគឺជាពន្លឺ ជាជីវិត ហើយជាសេចក្ដីសង្ឃឹមនៃពិភពលោក » ។

សូមជួយកុមាររបស់បងប្អូនឲ្យស្វែងរកទំនុកតម្កើងដែលប្រាប់ពីពន្លឺ ជីវិត និងក្ដីសង្ឃឹមដែលការប្រសូតរបស់ព្រះអង្គសង្រ្គោះបាននាំមកកាន់ពិភពលោក ដូចជាបទ « ឱ ! ភូមិបេថ្លេហិម ភូមិស្ងួនភ្ញា » ( ទំនុកតម្កើង ល.រ.១២៩ ) ។ សូមច្រៀងទំនុកតម្កើងនេះជាមួយគ្នា ហើយទុកឲ្យកុមាររបស់បងប្អូនចែកចាយពីរបៀបដែលព្រះយេស៊ូវបាននាំពន្លឺ ជីវិត និងសេចក្តីសង្ឃឹមមកកាន់ជីវិតរបស់ពួកគេ ។

« សូមអរព្រះគុណដល់ព្រះ ចំពោះអំណោយទានដ៏ប្រៀបផ្ទឹមពុំបាននៃព្រះរាជបុត្រាដ៏ទេវភាពរបស់ព្រះ » ។

តើអំណោយទានអ្វីខ្លះដែលយើងបានទទួលដោយសារព្រះយេស៊ូវគ្រីស្ទ ? ប្រហែលជាបងប្អូន និងកុមាររបស់បងប្អូនអាចរកមើលអំណោយទាំងនេះនៅក្នុង « ព្រះគ្រីស្ទដ៏មានព្រះជន្មរស់ » ឬបទចម្រៀងដូចជាបទ « ទ្រង់បញ្ជូនបុត្រាទ្រង់មក » ( សៀវភៅចម្រៀងកុមារ ទំព័រ ២០–២១ ) ។ បន្ទាប់មក ពួកគេអាចរុំអ្វីមួយ ដើម្បីតំណាងឲ្យអំណោយទាំងនោះ ។ បងប្អូនអាចស្នើសុំឲ្យកុមាររបស់បងប្អូនបើកអំណោយនៅថ្ងៃបុណ្យគ្រីស្ទម៉ាស់ ដើម្បីជួយពួកគេចងចាំព្រះអង្គសង្គ្រោះ និងអំណោយរបស់ទ្រង់ដល់យើង ។

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។