Jalam-uuch re Lix yo’lajik li Jesus, xb’aan laj J. Kirk Richards

22–28 diciembre: “Li maatan li maak’a’ xjuntaq’eetankil li kixk’e chaq li Dios sa’ lix choxahil Alal”

Li Ralankil

Li profeet aj Jose Smith kixye, “Li xb’eenileb’ na’leb’ re li qapaab’aal a’an lix ch’olob’ahomeb’ li apostol ut eb’ li profeet chirix li Jesukristo, naq kikam, kimuqe’, kiwakli sa’ rox li kutan, ut kitaqe’ sa’ choxa; ut chixjunil chik li k’a’aq re ru li wan sa’ li qapaab’aal yal wan choq’ xcha’al” (Enseñanzas de los Presidentes de la Iglesia: José Smith [2011], 51–52). Numenaq 160 chihab’ chirix a’an, li na’leb’ a’in kixwaklesi xch’ool li Xb’eenil Awa’b’ejil ut lix Molameb’ li Kab’laju chi Apostol chixpuktesinkil “Li Yo’yookil Kristo: Lix Ch’olob’ahomeb’ li Apostol” re xjultikankil 2000 chihab’ xyo’lajik li Kolonel (chi’ilmanq Russell M. Nelson, “Roksinkil lix wankil li Jesukristo sa’ li qayu’am,” Jolomil ch’utub’aj-ib’ re abril 2017).

Jo’ aj Santil Paab’anel sa’ Roso’jikeb’ li Kutan, nasaho’ qach’ool naq osob’tesinb’ilo chixk’ulb’al k’utb’esinb’il na’leb’ rik’ineb’ li profeet ut li apostol re li kutan a’in. Naqab’antioxi naq neke’xk’e qana’leb’, nokohe’xtij, ut neke’xwaklesi qach’ool. A’b’an sa’ xb’een chixjunil, osob’tesinb’ilo xb’aan lix ch’olob’ahomeb’ chirix li Jesukristo—sa’ li Ralankil ut chiru chixjunil li chihab’. Maawa’eb’ ajwi’ xchaq’al ru aatin li tz’iib’anb’il xb’aaneb’ li tzolb’ileb’ chi us sa’eb’ li loq’laj hu. A’aneb’ b’an li raatineb’ li sik’b’ileb’ ru, b’oqb’ileb’, ut li k’eeb’ileb’ xwankil xb’aan li Dios jo’ “sik’b’il ru aj yehol nawom chirix lix k’ab’a’ li Kristo sa’ chixjunil li ruchich’och’” (Tzol’leb’ ut Sumwank 107:23).

Li na’leb’ re tzolok sa’ li ochoch ut sa’ li iglees

“Maajun chik junaq wanjenaq xwankil chixtoch’b’al li qayu’am.”

K’a’ raj ru taaye re xch’olob’ankil xyaalal li na’leb’ naq “maajun chik junaq wanjenaq xwankil chixtoch’b’al xch’ooleb’ chixjunil li ani xe’wan ut li toj te’wanq sa’ li ruchich’och’”? Sik’eb’ na’leb’ sa’ “Li Yo’yookil Kristo” li neke’xch’olob’ xyaalal chan ru naq li Kolonel naxtoch’ li ch’oolej. Chan ru naq naxtoch’ aach’ool laa’at?

Qayehaq naq jun kristiaan li maak’a’ naxnaw chirixeb’ laj Kristiano tixpatz’ raj aawe k’a’ut naq nakaninq’ehi li Ralankil. K’a’ raj ru taaye? Il “Li Yo’yookil Kristo” rik’in li patz’om a’in sa’ laa k’a’uxl ut naru nakatz’iib’a li na’leb’ malaj musiq’ahom nachal sa’ laa k’a’uxl.

Chi’ilmanq ajwi’ “Por qué necesitamos un Salvador” (video), Biblioteca del Evangelio.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

“Kiwakli chaq sa’ li muqleb’aal.”

Sa’ “Li Yo’yookil Kristo,” eb’ li apostol neke’xch’olob’ xyaalal lix waklijik li Kolonel chi yo’yo, ut neke’xye resil oxib’ sut naq kixk’ut rib’ li Kolonel chirix naq kiwakli wi’chik (chi’ilmanq li raqal 5). Naru nakawil resileb’ lix k’utunik a’an sa’ Jwan 20; 3 Nefi 11; ut Jose Smith—Resilal 1:14–20. K’a’ru nakatzol chirix li Kolonel rik’in li raatin ut lix b’aanuhom naq kixk’ut rib’?

Jayali aawib’ rik’in li Kolonel. “Rilb’al “Li Yo’yookil Kristo” rik’in tijok, a’an chanchan rilb’al ru lix ch’olob’ahomeb’ laj Mateo, laj Markos, laj Lukas, laj Jwan, ut eb’ li profeet sa’ lix Hu laj Mormon . Tixnimob’resi laa paab’aal chirix li Kolonel ut tatxtenq’a chixjayalinkil aawib’ rik’in a’an” (M. Russell Ballard, “Li sutq’iik ut li k’uluk,” Jolomil ch’utub’aj-ib’ re abril 2017).

“Lix tijonelil a’an ut lix Iglees a’an, ak xe’k’ojob’aak wi’chik.”

Sa’ xtzolb’al li Tzol’leb’ ut Sumwank chiru li chihab’ a’in, xatru chixtzolb’al xkomon chik chirix li Kolonel ut chan ru naq “lix tijonelil a’an ut lix Iglees a’an, ak xe’k’ojob’aak wi’chik.” K’a’ruheb’ li na’leb’ malaj tzol’leb’ li k’ojob’anb’ileb’ wi’chik li jwal neke’xtoch’ aach’ool? Naru taawil junjunq reheb’ li raqal a’in li neke’aatinak chirix lix k’ojob’ankil wi’chik li evangelio: Tzol’leb’ ut Sumwank 1:17–23; 13; 20:1–12; 65; 110; 112:30–32; 124:39–42; 128:19–21. K’oxla chan ru naq li yaal sa’ li evangelio k’ojob’anb’il wi’chik nakate’xtenq’a chixnawb’al ru ut chixraab’al li Jesukristo.

“Sa’ junaq kutan a’an taasutq’iiq sa’ li ruchich’och’.”

Li Ralankil a’an xq’ehil xjultikankil xkutankil xyo’lajik li Jesukristo, ut royb’eninkil chi sa qach’ool li kutan naq taasutq’iiq wi’chik. K’a’ru nakatzol chirix lix sutq’ijik a’an sa’ xraqik “Li Yo’yookil Kristo”? Naru ajwi’ nakawil, nakab’icha, malaj nakawab’i junjunq li b’ich re li Ralankil li neke’aatinak chirix li xkab’ xk’ulunik li Qaawa’, jo’ “Sahaq eechʼool, li Qaawaʼ xchal” malaj “Chiru qʼojyin kiʼabʼiman” (Eb’ li B’ich, 123, 129).

“A’an lix saqen, lix yu’am, ut lix yo’onihom li ruchich’och’.”

Sa’ roso’jik li raqal sa’ “Li Yo’yookil Kristo,” k’e reetaleb’ li na’leb’ chirix ut eb’ li k’ab’a’ej k’eeb’il re li Kolonel. Naru nakak’e aahoonal re tzolok chirix junjunq reheb’ a’an. Jo’ jun eetalil:

Saqen: Chan ru naq li Jesukristo a’an jun saqen choq’ aawe? Naru nakayiib’ junaq jalam-uuch malaj risinkil junaq, li taareetali li saqen naxk’e aawe a’an. K’a’ru musiq’anb’ilat chixb’aanunkil re xwotzb’al lix saqen? Chi’ilmanq ajwi’ Jwan 8:12; 3 Nefi 18:24; Tzol’leb’ ut Sumwank 50:24.)

Yu’am: K’a’ut nakak’oxla naq yu’am a’an jun chaab’il aatin choq’ xk’ab’a’ li Jesukristo? Chan ru naq a’an naxk’e aayu’am? Chan ru naq jalan raj laa yu’am wi ta maak’a’ a’an ut lix evangelio? (Chi’ilmanq ajwi’ Jwan 10:10; 1 Korintios 15:19–23; Tzol’leb’ ut Sumwank 66:2.)

Oyb’enihom: K’a’ru nakawoyb’eni sa’ xk’ab’a’ li Jesukristo ut lix evangelio? Ma nakanaw ru anihaq li naxik xk’a’uxl chirix li chalel kutan? K’oxla chan ru naru nakawotz rik’in li kristiaan a’an li oyb’enihom nakaweek’a sa’ xk’ab’a’ li Jesukristo. (Chi’ilmanq Romanos 8:24–25; Eter 12:4; Moroni 7:41.)

Chi’ilmanq ajwi’ Temas y preguntas, “Jesucristo,” Biblioteca del Evangelio.

“B’antioxinb’ilaq taxaq re li Dios lix maatan li maak’a’ xjuntaq’eetankil li kixk’e chaq.”

Sa’ “Li Yo’yookil Kristo,” eb’ li apostol neke’aatinak chirix li Kolonel jo’ jun “maatan” kixk’e chaq li qaChoxahil Yuwa’. Rik’in li k’a’ru nakataw sa’ “Li Yo’yookil Kristo,” chan raj ru taatz’aqob’resi ru li ch’ol aatin a’in: “Sa’ xk’ab’a’ li Jesukristo, li Dios naxk’eheb’ we li maatan …” K’oxla k’a’ru naru nakab’aanu re xk’ulb’aleb’ li maatan a’in chi tz’aqaleb’ re ru.

Chan ru naq xtzolb’al “Li Yo’yookil Kristo xnimob’resi laa paab’aal chirix li Kolonel ut laa rahom choq’ re?

Chi’ilmanq ajwi’ Russell M. Nelson, “Kaahib’ li maatan q’axtesinb’ileb’ aawe xb’aan li Jesukristo” (Xch’utam li Xb’eenil Awa’b’ejil re li Ralankil, 2 re diciembre, 2018), Biblioteca del Evangelio; “Extractos de ‘El Cristo Viviente: El Testimonio de los Apóstoles’” (video), ChurchofJesusChrist.org.

Excerpts from "The Living Christ: The Testimony of the Apostles"

As special witnesses of Jesus Christ, the First Presidency and the Quorum of the Twelve shared their testimony of Christ by recording excerpts from the original document, "The Living Christ: The Testimony of the Apostles."

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Naru “nink’e lin ch’olob’ahom” re xninq’ehinkil lix yo’lajik li Jesus.

• K’oxla chan ru naru nakat-aatinak chirix “Li Yo’yookil Kristo” rik’ineb’ laa kok’al. Maare naru nakat-aatinak chirix li kab’a’ej Kristo sa’ lix jolomil ut eb’ lix juch’ li Xb’eenil Awa’b’ejil ut eb’ li Kab’laju. Naru nakach’olob’ naq a’an a’in lix nawom xch’ooleb’ chirix li Jesukristo li ke’raj xwotzb’al rik’in li ruchich’och’.

• Naru nakak’e reheb’ li junjunq chi kok’al jun ch’ol re “Li Yo’yookil Kristo” ut taapatz’ reheb’ naq te’xsik’ malaj te’xyiib’ xjalam-uuch li ch’ol aatin a’an. Chirix a’an naru nakatenq’aheb’ chixtawb’al li ch’ol sa’ “Li Yo’yookil Kristo.” Naru ajwi’ nekech’utub’eb’ li jalam-uuch a’an jo’ jun tasal hu.

• Wotzomaq cherib’il eerib’ chan ru naq ketaw xnawom eech’ool chirix li Jesukristo. Maare naru nekenumsi sa’ eeyanq jun xjalam-uuch li Kolonel ut teek’e eehoonal re xwotzb’al junaq na’leb’ nekenaw chirix a’an (jo’ ajwi’ li yaal neke’k’utman sa’ “Li Yo’yookil Kristo”).

“A’an kinume’k yalaq b’ar chixb’aanunkil li chaab’ilal.”

• Naq laa’at ut eb’ laa kok’al teeril li xkab’ raqal sa’ “Li Yo’yookil Kristo,” aatinaheb’ chirix li k’a’aq re ru kixb’aanu li Jesus. Naru ajwi’ nakawil xjalam-uuch lix yu’am (il sa’ li perel re kok’ k’anjel re li xamaan a’in ut sa’ li Hu reheb’ li Jalam-uuch re li Evangelio). Patz’ reheb’ laa kok’al naq te’xye k’a’ru naxb’aanu li Kolonel sa’ li jalam-uuch. Chan ru naru nokok’anjelak chiruheb’ li qas qiitz’in jo’ chanru kixb’aanu a’an? Eb’ li video re “Ilumina el Mundo” sa’ li Biblioteca del Evangelio naru neke’xk’e aana’leb’.

“A’an lix saqen, lix yu’am, ut lix yo’onihom li ruchich’och’.”

• Tenq’aheb’ laa kok’al chixtawb’aleb’ li b’ich re Ralankil li neke’aatinak chirix li saqen, li yu’am, ut li yo’onihom li kixk’am chaq lix yo’lajik li Kolonel sa’ li ruchich’och’, jo’ “At chʼina tenamit Belen” (Eb’ li B’ich, 130). B’ichahomaq li b’ich, ut kanab’eb’ laa kok’al chi aatinak chirix chan ru naq li Jesus naxk’am chaq li saqen, li yu’am, ut li yo’onihom sa’ lix yu’ameb’ a’an.

“B’antioxinb’ilaq taxaq re li Dios li maatan li maak’a’ xjuntaq’eetankil li kixk’e chaq; a’ lix choxahil Alal.”

• K’a’ruheb’ li maatan ak xqak’ul xb’aan li Jesukristo? Laa’at ut eb’ laa kok’al naru nekesik’eb’ li maatan a’in sa’ “Li Yo’yookil Kristo” malaj sa’ junaq li b’ich jo’ “Kixtaqla li Ralal” (B’ichleb’aal choq’ reheb’ li Kok’al, 20–21). Chirix a’an naru nekelan rix junaq maatan li taareetaliheb’ li maatan a’an. Naru nakaye reheb’ laa kok’al naq te’xte li maatan sa’ lix kutankil li Ralankil re xtenq’ankileb’ chixjultikankil li Kolonel ut li maatan kixk’e qe.

Re xtawb’al xkomon chik li na’leb’, chi’ilmanq li hu Amigos re li po a’in.