Jalam-uuch re Re chixjunileb’ li komon winq re li Iglees li k’ulub’ejeb’, xb’aan li xEmma Allebes

8–14 diciembre: “Laa’o naqapaab’”

Eb’ lix Raqalil li Paab’aal ut li Awa’b’ejil Yehom 1 ut 2

Chalen chaq li xb’een k’utb’esinb’il matk’ kixk’ul laj Jose Smith, li Dios toj naxb’eresi lix Iglees rik’in li k’utb’esinb’il na’leb’. Chi jo’q’ehatq, li k’utb’esinb’il na’leb’ a’an naxk’am chaq xjalb’al li k’a’ru nab’aanuman sa’ li Iglees. Li Awa’b’ejil Yehom 1 ut 2 a’aneb’ k’utb’esinb’il na’leb’ li ke’xb’aanu chi jo’kan—jun kixk’e xraqik xb’aanunkil li sumlaak rik’in numenaq jun li sum aatin, ut li jun chik kixk’e chi uxmank naq chixjunileb’, maak’a’ naxye xb’onol lix tib’eleb’, te’ruuq chixk’ulb’aleb’ li osob’tesink re li tijonelil. Li jalok jo’ a’in, a’an xcha’al xyaalalil naq wan li “yaalil ut yo’yookil iglees” (Tzol’leb’ ut Sumwank 1:30), ut jun yo’yookil ut tz’aqal profeet, li b’eresinb’il xb’aan jun yo’yookil Dios.

A’b’an li junelik yaal ink’a’ najala, us ta najala li xtawb’al ru qab’aan. Wan naq li k’utb’esinb’il na’leb’ naxk’am chaq xtz’aqob’ li saqen chirix li yaal. Eb’ lix Raqalil li Paab’aal neke’k’anjelak re xkutanob’resinkil chixjunil. Li Iglees k’ojob’anb’il sa’ xb’een li junelik yaal, a’b’an naru nak’i ut najala “jo’ chanru naraj li Qaawa’, re xtuqub’ankileb’ li ruxtaan a’an jo’ chanru li wankeb’ wi’ li ralal xk’ajoleb’ li winq” (Tzol’leb’ ut Sumwank 46:15). Sa’ jalan chik aatin, “Laaʼo naqapaabʼ chixjunil li ak xkʼutbʼesi li Dios, chixjunil li naxkʼutbʼesi anajwan, ut naqapaabʼ naq toj tixkʼutbʼesi kʼiila naʼlebʼ li xninqalebʼ ru ut ninqebʼ xwankil chirix lix Awaʼbʼejihom li Dios” (Ebʼ lix Raqalil li Paabʼaal 1:9).

Li na’leb’ re tzolok sa’ li ochoch ut sa’ li iglees

Eb’ lix Raqalil li Paab’aal

Sa’ Eb’ lix Raqalil li Paab’aal wankeb’ li yaal aajeleb’ ru sa’ li evangelio li k’ojob’anb’il wi’chik.

K’e reetal li na’leb’ a’in re xtzolb’aleb’ lix Raqalil li Paab’aal: Choq’ re li junjunq chi raqal re li paab’aal yiib’ jun ch’ina “k’utleb’ na’leb’” re xch’olob’ankil li nakapaab’. Sa’ laa k’utleb’ na’leb’ naru naq wanq junaq raqal, junaq jalam-uuch, junaq li b’ich malaj xb’icheb’ li kok’al, malaj junaq aanumsihom chirix chan ru xyu’aminkil junaq li yaal naxk’ut li xraqalil li paab’aal.

Chan ru naq eb’ li yaal a’an neke’xjal laa wanjik rik’in li qaChoxahil Yuwa’ ut li Jesukristo? Chan ru naq Eb’ lix Raqalil li Paab’aal neke’xchaab’ilob’resi li tzolok nakab’aanu chirix li evangelio malaj naq nakawotz li evangelio rik’ineb’ laa was aawiitz’in?

Chi’ilmanq ajwi’ K’utul Raqal reheb’ li Loq’laj Hu, “Eb’ lix Raqalil li Paab’aal,” Biblioteca del Evangelio, L. Tom Perry, “Las doctrinas y los principios que se encuentran en los Artículos de Fe,” Liahona, noviembre 2013, 46–48; “Capítulo 38: La Carta a Wentworth,” sa’ Enseñanzas de los Presidentes de la Iglesia: José Smith (2011), 463–476.

Eb’ lix Raqalil li Paab’aal1:9; Awa’b’ejil Yehom 1 ut 2

Lix Iglees li Jesukristo nab’eresiman rik’in li k’utb’esinb’il na’leb’.

“Naqapaab’ naq [li Dios] toj tixk’utb’esi k’iila na’leb’ li xninqaleb’ ru ut ninqeb’ xwankil chirix lix Awa’b’ejihom li Dios” (Eb’ lix Raqalil li Paab’aal 1:9). Chi wan li na’leb’ a’in sa’ aak’a’uxl, il li Awa’b’ejil Yehom 1 ut 2, ut sik’eb’ li aatin li neke’xkawob’resi laa paab’aal chirix li k’utb’esinb’il na’leb’. Chan ru naq li k’utb’esinb’il na’leb’ a’an xe’xjal laa yu’am? Chan ru naq xe’xtiikisi chi uub’ej lix k’anjel li rawa’b’ejihom li qaChoxahil Yuwa’?

K’a’ru nakawil sa’ li Iglees li naxk’utb’esi naq b’eresinb’il “chi musiq’anb’il xb’aan li Nimajwal Dios”? (Awaʼbʼejil Yehom 1). Naru nakawil jun malaj junjunq reheb’ li aatin toje’ xe’wotzman sa’ li jolomil ch’utub’aj-ib’, ut taak’e reetal chan ru naq li Qaawa’ yoo chixb’eresinkil lix Iglees—ut laa yu’am. Li raatin li Awa’b’ej re li Iglees li toje’ kixwotz naru natenq’an chixtib’ankil li tzolok.

K’a’ru naru nakab’aanu wi ch’a’aj, chawu laa’at malaj chiru anihaq li raab’il aab’aan, xtawb’al ru malaj xk’ulub’ankil li k’a’ru naxk’ut li Qaawa’ rik’ineb’ lix profeet? K’a’ut naq nakatb’antioxin chirixeb’ li profeet?

Chi’ilmanq ajwi’ Amos 3:7; 2 Nefi 28:30; Allen D. Haynie, “Jun yo’yookil profeet choq’ re roso’jikeb’ li kutan,” Jolomil ch’utub’aj-ib’ re abril 2023; Temas y preguntas, “Profetas,” Biblioteca del Evangelio; “Bʼantiox xaq aawe,” Eb’ li B’ich, 12.

Awaʼbʼejil Yehom 1

Lix k’anjel li Dios tento taaxik chi uub’ej.

Sa’ li raqal “Aatin isinb’il chaq sa’ oxib’ lix yehom li Awa’b’ej Wilford Woodruff chirix li Ch’olob’anb’il Aatin” (sa’ xraqik li Awa’b’ejil Yehom 1), k’a’ru kixye li profeet chirix k’a’ut naq li Qaawa’ kixk’e xraqik li sumlaak chi numenaq jun li sum aatin? K’a’ru naxk’ut a’in chawu chirix lix k’anjel li Dios?

Re xtawb’al xkomon li na’leb’ chirix li Awa’b’ejil Yehom 1, chi’ilmanq Santos, 2:661–675; “El mensajero y el Manifiesto,” sa’ Revelaciones en contexto, 346–355; Temas y preguntas, “El matrimonio plural y las familias en los primeros días de Utah”, Biblioteca del Evangelio.

Wilford Woodruff, xb’aan laj H. E. Peterson

Awaʼbʼejil Yehom 2

Naru ninkanab’ wib’ sa’ ruq’ li Qaawa’, us ta moko tz’aqal ta re ru xtawom ru lin na’leb’.

Ink’a’ naqanaw k’a’ut naq chiru jun k’amok li hoonal, li k’ojob’aak sa’ li tijonelil ut eb’ li k’ojob’anb’il k’anjel re li santil ochoch moko kiwan ta choq’ reheb’ li komon aj Africa sa’ li Iglees. Us ta naab’al li patz’om maak’a’ xsumenkil na’uxman reheb’ chirix li na’leb’ a’an, eb’ laj Santil Paab’anel sa’ Roso’jikeb’ li Kutan li q’eqeb’ xtib’el ke’xkanab’ rib’ sa’ ruq’ li Qaawa’ (chi’ilmanq Proverbios 3:5) ut ke’kana chi tiik chiru a’an chiruheb’ lix yu’am. Li tzolok chirixeb’ lix paab’aal ut lix numsihomeb’ naru neke’xwaklesi aach’ool. A’in junjunqeb’ lix seraq’, li neke’tawman sa’ history.ChurchofJesusChrist.org:

• “Li xJane Elizabeth Manning James”

• “En la casa de mi Padre muchas moradas hay” (seraq’ chirix laj Green Flake)

• “Por fin ha venido” (seraq’ chirix laj Anthony Obinna)

• “Break the Soil of Bitterness” (seraq’ chirix li xJulia Mavimbela)

• “Lo aceptaré con fe” (seraq’ chirix laj George Rickford)

• “Long-Promised Day” (seraq’ chirix laj Joseph W. B. Johnson)

Naq taawil li Awaʼbʼejil Yehom 2, k’a’ru nakatzol chirix chan ru naq li Qaawa’ naxb’eresi li na’leb’ sa’ lix Iglees? K’oxla chan ru naq nakatzol xkanab’ankil aawib’ sa’ ruq’ li Qaawa’ us ta moko tz’aqal ta re ru xtawom ru laa na’leb’.

Chi’ilmanq ajwi’ 2 Nefi 26:33; “Al ver la fidelidad,” Revelaciones en contexto, 356–366; Temas y preguntas, “La raza y el sacerdocio,” Biblioteca del Evangelio; Ahmad Corbitt, “A Personal Essay on Race and the Priesthood,” parts 1–4, history.ChurchofJesusChrist.org; BeOne.ChurchofJesusChrist.org.

Us ajwi’ xyeeb’al “Ink’a’ ninnaw.” Us ta tento taayal aaq’e chixsumenkil lix patz’omeb’ li komon nakatzoleb’ chirix li evangelio, li Qaawa’ ink’a’ naroyb’eni naq taanaw chixjunil. Naq ink’a’ taanaw chan ru xsumenkil k’a’ruhaq, ye naq ink’a’ nakanaw. Chirix a’an aatinan chirix li tzol’leb’ k’utb’esinb’il ut wotz xnawom aach’ool chirix li k’a’ru nakanaw.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Eb’ lix Raqalil li Paab’aal

Ninpaab’ lix evangelio li Jesukristo

• Naru nakasik’eb’ ut nakab’ichaheb’ li b’ich malaj li b’ich reheb’ li kok’al li tixtenq’aheb’ laa kok’al chixtawb’al ru jun malaj junjunq re Eb’ lix Raqalil li Paab’aal. Maare naru nakate’xtenq’a chixsik’b’al ru li b’ich malaj eb’ li b’ich reheb’ li kok’al. Tenq’aheb’ laa kok’al chirilb’al chan ru naq li b’ich wankeb’ rilom rik’in Eb’ lix Raqalil li Paab’aal.

• Laa’at ut eb’ laa kok’al naru nekexk’anjelak re xtz’iib’ankil k’a’ru naru neke’xpatz’ li kristiaan chirix lix evangelio li Jesukristo malaj lix Iglees. Chirix a’an naru nekexk’anjelak sa’ komonil re xsumenkileb’ li patz’om a’an rik’in roksinkil Eb’ lix Raqalil li Paab’aal. B’ar chik naru nokosik’ok naq neke’wan qapatz’om chirix li evangelio?

Eb’ lix Raqalil li Paab’aal 1:9; Awa’b’ejil Yehom 1 and 2

Li Qaawa’ naxb’eresi lix Iglees rik’in lix profeet.

• Re xtenq’ankileb’ laa kok’al chixtawb’al ru li xb’ele xraqalil li paab’aal, naru nakak’e jun ch’uut li loq’laj hu reheb’ ut jun xjalam-uuch li yo’yookil profeet (malaj junaq reheb’ li aatin neke’yeeman sa’ li jolomil ch’utub’aj-ib’ toje’ xnume’ li wan sa’ li Liahona). Patz’ reheb’ naq te’xchap li loq’laj hu naq laa’at taayaab’asi li aatin “chixjunil li ak xk’utb’esi li Dios” ut te’xchap li jalam-uuch malaj li hu naq taayaab’asi “chixjunil li naxk’utb’esi anajwan” (Eb’ lix Raqalil li Paab’aal 1:9). K’a’ut naq neke’qaj ru li najteril profeet jo’ ajwi’ li wankeb’ anajwan?

• Laa kok’al naru neke’xtzol chan ru nokohe’xb’eresi li raatin li profeet naq naqataaqe li k’a’ru nach’olob’aman re xb’aanunkil k’a’ruhaq, jo’ li k’uub’ank malaj junaq b’atz’uul. Naru nakajuntaq’eeta a’in rik’in li ch’olob’ahom naxk’e li Jesukristo reheb’ lix profeet. B’ar wan junjunq reheb’ li k’a’aq re ru naxk’ut chiqu li Qaawa’ rik’in lix yo’yookil profeet anajwan?

Li Dios naxb’oqeb’ li profeet re naq te’xb’eresi lix Iglees.

Awa’b’ejil Yehom 1 ut 2

Eb’ li profeet nokohe’xtenq’a chixnawb’al li rajom li qaChoxahil Yuwa’.

• Maare rilb’al chan ru naq li najteril loq’laj hu ut li k’utb’esinb’il na’leb’ re li kutankil a’in neke’xk’am rib’ naru naxtenq’aheb’ laa kok’al chixtawb’aleb’ ru li Awa’b’ejil Yehom. Naru nakapatz’ reheb’ naq te’ril Hechos 10:34–35 ut Jakob 2:27–30 ut taab’oqeb’ chixk’eeb’al reetal b’ar wan reheb’ li raqal a’an naxk’am rib’ rik’in li Awa’b’ejil Yehom 1 (li kixk’e xraqik li sumlaak rik’in numenaq jun li kristiaan) ut b’ar wan li naxk’am rib’ rik’in li Awa’b’ejil Yehom 2 (b’ar wi’ nayeeman naq taak’eemanq li tijonelil ut eb’ li k’ojob’anb’il k’anjel re li santil ochoch reheb’ li kristiaan maak’a’ naxye b’ar neke’chal). Ch’olob’ xyaalal naq li Qaawa’ kixk’utb’esi li rajom chiruheb’ li najteril profeet ut naxk’utb’esi ajwi’ anajwan.

Re xtawb’al xkomon chik li na’leb’, chi’ilmanq li hu Amigos re li po a’in.