Jun yo’yookil profeet choq’ re roso’jikeb’ li kutan

Xb’aan li Elder Allen D. Haynie

Re li Setenta

Li qaYuwa’ sa’ Choxa kixsik’ ru naq tixk’utb’esi li yaal chiruheb’ li ralal xk’ajol rik’in jun li profeet.

Naq saajin chaq, jwal kiwulak chiwu li kutan sabado xb’aan naq chixjunil li ninb’aanu chaq chiru li kutan a’an chanchan jun aventura. A’b’an maak’a’ naxye k’a’ru kinb’aanu, xb’een wa kinb’aanu li q’axal aajel ru—kiwileb’ li kaxlan mu choq’ reheb’ li kok’al sa’ li television. Sa’ jun sabado eq’la, naq yookin chirilb’al li television ut chixjalb’aleb’ li canal, kink’e reetal naq sa’ xna’aj li kaxlan mu kiwaj rilb’al, yoo chi puktesimank li jolomil ch’utub’aj-ib’ re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Naq yookin chixka’yankil li television chi ra inch’ool xb’aan naq maak’a’ lin kaxlan mu, kink’e reetal jun winq li saq li rismal, li wan lix traje ut lix korbaat, ut li chunchu sa’ jun ch’ina-usil chunleb’aal.

Kiweek’a naq wan xjalanil li winq a’an, jo’kan naq kinpatz’ re li was, “Ani a’an?”

A’an kixye, “A’an li Awa’b’ej David O. McKay; profeet a’an.”

Nanaq sa’ inch’ool naq kiweek’a naq yaal naq a’an jun profeet. Toja’ ut naq, xb’aan naq toj jwal saajin chaq, xinjal li canal. A’b’an ink’a’ nasach sa’ inch’ool li k’a’ru kiweek’a sa’ li ch’ina k’amok a’an naq kik’utb’esiman li na’leb’ a’an chiwu chi ink’a’ oyb’eninb’il. Rik’in jun li profeet, wan naq ka’ajwi’ jun ch’ina k’amok na’ajman ru re xnawb’al.¹

Li xtzolb’al chi k’utb’esinb’il naq wan jun li yo’yookil profeet sa’ xb’een li ruchich’och’ naxjal chixjunil.² Ink’a’ chik naqasik’ xtz’ilb’al rix ma yoo li profeet chi aatinak jo’ profeet sa’ jun hoonal malaj ink’a’, chi moko naqasik’ xtiikob’resinkil qib’ sa’ xsik’b’al k’a’ru re li naxye li profeet taqak’ul ut k’a’ru taqatz’eq.³ Li k’utb’esinb’il nawom a’in nokoxb’oq chixpaab’ankil lix na’leb’ li yo’yookil profeet, us ta ink’a’ naqataw ru chi tz’aqal.⁴ Li Yuwa’b’ej sa’ Choxa li tz’aqal re ru ut li nokoxra kixsik’ ru naq tixk’utb’esi li yaal chiruheb’ li ralal xk’ajol rik’in xtz’uumal re jun profeet, jun winq li maajun wa kixsik’ ru xk’ulb’al li loq’laj b’oqok a’an, ut li ak naxnaw tz’aqal k’a’ru xmajelal chi ink’a’ taqaye re.⁵ Jun profeet kawresinb’il, b’oqb’il, tijb’il, musiq’anb’il, q’usb’il, santob’resinb’il, ut xaqab’anb’il xb’aan li Dios.⁶ Xb’aan a’in naq maajo’q’e took’ehe’q sa’ li musiq’ejil xiwxiw xb’aan xtaaqenkil li profeetil na’leb’.

Maak’a’ naxye ma sa qach’ool ma ra qach’ool chirix a’in, kisik’e’ b’an qu chiqajunilo rub’elaj li yu’am a’in re tooyo’laaq sa’ roso’jikeb’ li kutan a’in. Wankeb’ wiib’ li na’leb’ li te’uxq sa’ roso’jikeb’ li kutan. Li xb’een a’an naq lix Iglees li Kristo taak’ojob’aaq wi’chik sa’ ruchich’och’. Li xkab’ a’an naq toj te’nimanq li ch’a’ajkilal. Eb’ li loq’laj hu neke’xk’ut naq sa’ roso’jikeb’ li kutan taawanq “jun nimla saqbʼach, taqlanbʼil chaq re xsachbʼalebʼ li awimq saʼ ruchichʼochʼ,”⁷ te’pukanq li yajel,⁸ taaʼabʼimanq resil li pleet ut li esil chirix li pleet, ut chixjunil li ruchichʼochʼ taawanq chi choqinbʼil … ut taanumtaaq li maaʼusilal.”⁹

Naq saajin chaq, kinxuwak xb’aaneb’ li profeetil aatin chirix roso’jikeb’ li kutan, ut kintz’aama naq li xkab’ xk’ulunik li Qaawa’ ink’a’ taak’ulmanq chiru xkutankil lin yu’am—ut naru ninye naq maji’ nak’ulman. A’ut, anajwan nintz’aama lix ka’pak’alil a’an, us ta te’wanq li ch’a’ajkilal li yeeb’ileb’ rik’in profeetil aatin,¹⁰ xb’aan naq sa’ li kutan naq nasutq’i li Kolonel re awa’b’ejink, chixjunileb’ lix yo’ob’tesihom “[te’yoklaaq chi kolb’ileb’ rix].”¹¹

Li k’a’ru yoo chi k’ulmank sa’ ruchich’och’ anajwan naxk’eheb’ junjunq chi xuwak. Jo’ ralal xk’ajol li Dios re li sumwank, ink’a’ na’ajman naq toosaalanq chi kaʼpakʼal chik re xnawb’al chan ru xnumsinkileb’ li ch’a’ajkil kutankil a’in. Ink’a’ na’ajman naq tooxuwaq.¹² Li tzol’leb’ ut li na’leb’ li tento taqataaqe re kole’k sa’ musiq’ej ut kuyuk sa’ tib’elej neke’tawman sa’ li raatin li yo’yookil profeet.¹³ Jo’kan ut naq li Awa’b’ej M. Russell Ballard kixye naq “k’a’jo’ nim xwankil … naq wan jun xprofeet li Dios sa’ qayanq.”¹⁴

Li Awa’b’ej Russell M. Nelson kixch’olob’ xyaalal naq “li eetalil kixxaqab’ li Dios junxil re xtzolb’aleb’ li ralal xk’ajol rik’ineb’ li profeet naxk’ut xyaalal chiqu naq a’an taarosob’tesi li junjunq chi profeet ut naq taarosob’tesiheb’ li te’ab’inq re li profeetil na’leb’.”¹⁵ Li aajel ru a’an xtaaqenkil li yo’yookil profeet.¹⁶ Ex was wiitz’in, eb’ li libro comico q’eel ut eb’ li b’eleb’aal ch’iich’ clasico neke’niman xtz’aq rik’in xnumikeb’ li chihab’, a’b’an li profeetil na’leb’ ink’a’. Chi jo’kan naq ink’a’ us naq taqayal roksinkil li raatineb’ li profeet ak ke’wan re xtz’eqtaanankil lix k’utumeb’ li yo’yookil profeet.¹⁷

Neke’wulak chiwu li jaljookil ru aatin kiroksi li Jesukristo re xk’utb’aleb’ li na’leb’ re li evangelio. Sa’ li eq’la a’in, nawaj xwotzb’al eerik’in jun innumsihom li chanchan jaljookil ru aatin.

Sa’ jun li kutan kin’ok sa’ li wa’leb’aal sa’ xjolomil li Iglees re tinwa’aq b’een wa’leb’. Chirix naq kinxok li tzakemq, kin’ok sa’ li wa’leb’aal ut kink’e reetal jun li meex chunchukeb’ wi’ li oxib’ chi komon re li Xb’eenil Awa’b’ejil, ut kiwan jun chik li chunleb’aal yamyo. Kinxutaanak b’ayaq ut xkohin sa’ jalan chik li meex, toja’ naq kiwab’i lix yaab’ xkux li qaprofeet, li Awa’b’ej Russell M. Nelson, ut a’an kixye: “Allen, wan jun li chunleb’aal yamyo arin. Kim ut chunlan qochb’een.” Jo’kan ut naq kinchunla.

Naq yooko chi raqe’k chi wa’ak, kisach inch’ool naq kiwab’i jun nimla yoq’ok, ut naq kintaqsi li wilob’aal, kink’e reetal naq li Awa’b’ej Nelson kixxaqab’ lix boteey re lix ha’, kixyoq’ ut kixtz’ap wi’chik li re.

Li Awa’b’ej Dallin H. Oaks kixpatz’ re li kiwaj raj laa’in xpatz’b’al, “Awa’b’ej Nelson, k’a’ut naq xayoq’ laa boteey?”

A’an kixye, “Chi jo’ka’in moko ch’a’ajaq ta choq’ reheb’ li neke’xokok re li mul xb’aan naq anajwan ch’ina b’ab’ay ajwi’ xna’aj tixchap sa’ li k’uleb’aal mul.”

Naq yookin chixk’oxlankil li kixye, kiwab’i jun chik li yoq’ok. Kink’e reetal naq li Awa’b’ej Oaks kixyoq’ ajwi’ lix boteey jo’ kixb’aanu li Awa’b’ej Nelson. Kiwab’i jun chik li yoq’ok, a’an li Awa’b’ej Henry B. Eyring li yoo chixyoq’b’al lix boteey, a’ut jalan chik b’ayaq xna’leb’ a’an xb’aan naq yokyo lix boteey, li mas ch’a’aj wi’chik xyoq’b’al chiru jun li boteey li xaxqo. Li Awa’b’ej Nelson kixk’e reetal a’in, ut rik’in chaab’ilal kixk’ut chiru chan ru xyoq’b’al li boteey chi xaxqo, re taaruuq tixb’aanu sa’ junpaat.

Sa’ li hoonal a’an, kinpatz’ re li Awa’b’ej Oaks chi q’un xyaab’ inkux, “Ma a’an jun ak’ chaq’rab’ re li wa’leb’aal naq tento te’yoq’manq li boteey rub’elaj naq te’kute’q sa’ li k’uleb’aal mul?”

Li Awa’b’ej Oaks kisumen, chi se’se ru, “Ab’i, Allen, tento taataaqe li profeet.”

Ninnaw naq li Awa’b’ej Nelson ink’a’ yoo chaq chixjultikankil jun ak’ tzol’leb’ chirix li mul sa’ li wa’leb’aal sa’ li kutan a’an. A’ut naru naqataw qana’leb’ rik’in xjunpaatil lix sumehom¹⁸ li Awa’b’ej Oaks ut li Awa’b’ej Eyring rik’in li eetalil kixk’ut li Awa’b’ej Nelson, ut rik’in ajwi’ lix chaab’ilal chi tenq’ank li Awa’b’ej Nelson re xk’utb’al chiruheb’ lix komon chan ru te’chaab’ilo’q.¹⁹

Junjunq chihab’ chaq, li Elder Neal A. Maxwell kixwotz wiib’ oxib’ li na’leb’ li tz’aqal profeetil aatineb’ chirixeb’ li kutan wanko wi’ anajwan:

“Sa’eb’ li po ut chihab’ chalel, te’uxq li k’a’aq re ru taateneb’anq re li junjunq chi komon chixsik’b’al ru ma tixtaaqe li Xb’eenil Awa’b’ejil malaj ink’a’. Eb’ li komon te’xk’e reetal naq jwal ch’a’ajaq wi’chik kanaak sa’ xyiheb’ wiib’ chi na’leb’. …

“… Chiqakanab’ jun eetalil re naq saqenaqeb’ ru li b’e, re naq eb’ li kristiaan naru te’xb’aanu li te’raj naq te’xk’ul li profeetil na’leb’. …

“Li Jesus kixye naq jo’q’e haye’ chaq re xyo’lajik lix xaq lix toonal li higo, “xnach’ok chaq li saq’ehil.” … Wi ak yeeb’il qe naq xwulak xq’ehil li saq’ehil, moowech’ok xb’aan xtiqwal li kutan!”²⁰

Eb’ li kok’al ut li saaj yookeb’ chi k’iik sa’ jun kutan naq k’iheb’ wi’chik xxaq lix toonal li higo ut k’a’jo’ tiq wi’chik li kutan. A’in naxk’e jun teneb’ank jwal nim sa’ xb’eeneb’ li ak ninqeb’, ut mas wi’chik rik’in xtaaqenkil li profeetil na’leb’. Wi eb’ li na’b’ej yuwa’b’ej neke’xtz’eqtaana lix na’leb’ li yo’yookil profeet, moko k’a’aj ta wi’ neke’sach chiruheb’ li yeechi’inb’il osob’tesink, neke’xk’ut ajwi’ chiruheb’ lix kok’al naq maak’a’ aj-e li naxye li profeet malaj naq naru taqasik’ ru b’arwan reheb’ li profeetil na’leb’ naqaj xtaaqenkil, ut chi jo’kan nokokana sa’ musiq’ejil we’ej.

Li Elder Richard L. Evans kixye: “Wankeb’ li na’b’ej yuwa’b’ej li neke’xk’oxla naq naru neke’xkanab’ b’ayaq xb’aanunkil li k’a’ru nab’aanuman sa’ li junkab’al … naq naru neke’xkanab’ b’ayaq xb’aanunkil li aajel ruhil na’leb’ chi ink’a’ ta raj te’xtoch’ lix junkab’al ut li k’a’ru taachalq moqon. A’b’an wi junaq yuwa’b’ej naxjalb’ehi rib’ chiru li b’e, eb’ li kok’al maare te’xq’ax ru lix b’aanuhom li yuwa’b’ej.”²¹

Jo’ jun tasal tenamit rik’in jun santil taqlahom re xkawresinkileb’ li qakok’al ut li qasaaj choq’ reheb’ lix k’anjel sa’ roso’jikeb’ li kutan li kiyehe’ resil xb’aaneb’ li profeet,²² jun k’anjel li tento taatz’aqob’resimanq ru sa’ xq’ehil xnimal xwankilal laj tza,²³ laa’o ink’a’ naru naqasach xk’a’uxleb’ chirix lix aajelil ru xtaaqenkil li profeetil na’leb’. A’an ajwi’ li na’leb’ li taatenq’anq re li tasal tenamit a’an chirilb’al “laj xikʼ ilonel naq toj najt wan; tojaʼ ut naq te’ruuq chixkawresinkil ribʼ” re xkolb’aleb’ rib’ chiru lix toch’om laj xik’ ilonel.²⁴ Wi nokojalb’ehink, nokotz’eqtaanank, malaj nokowech’ok, us ta b’ayaq ajwi’, chirix li profeetil na’leb’, maare anchal toob’eeq sa’ xmaril lix b’ehileb’ li sumwank; a’b’an naq nimob’resinb’ilaq a’an xb’aan laj tza sa’ xyu’ameb’ li tasal tenamit yookeb’ chi k’iik, maare anchal te’elq chaq chi tz’aqal sa’ li b’e. Jwal terto wi’chik xtz’aq li na’leb’ a’an.²⁵

Maare wankeb’ eere li nekereek’a naq ak xexpaalto’ sa’ xtaaqenkil lix na’leb’ li Awa’b’ej Russell M. Nelson. Wi yaal a’an, jalomaq b’i’ eek’a’uxl; okanqex wi’chik chixtaaqenkil lix na’leb’ li profeet li sik’b’il ru xb’aan li Dios. Kanab’omaq rilb’al li kaxlan mu reheb’ li kok’al li yal neke’jalb’ehink ut paab’omaq li ani yulb’il xb’aan li Qaawa’. Chisaho’q sa’ eech’ool xb’aan naq “wan [wi’chik] jun profeet arin Israel.”²⁶

Us ta nawiib’an eech’ool, ninch’olob’ xyaalal naq naru taqakuy xtiqwal li roso’jikeb’ li kutan ut naru ajwi’ too’usaaq. Laa’o aj santil paab’anel sa’ roso’jikeb’ li kutan, ut jwal ninqeb’ li kutan a’in. Q’axal kiqaj chalk sa’ li ruchich’och’ sa’ li kutankil a’in, kiqanaw naq ink’a’ tookanab’aaq chi tichk’ok naq tooxsuti lix q’ojyinal choql laj tza,²⁷ a’b’an naq taqak’ul xna’leb’ ut xb’eresihom li junaj chi kristiaan li k’eeb’il xwankil chixyeeb’al qe ut re chixjunil li ruchich’och’, “Joʼkaʼin naxye li Qaawaʼ Dios.”²⁸ Sa’ lix loq’laj k’ab’a’ li profeet li kiwaklesiik xb’aan li Dios, lix Santil Dios laj Israel,²⁹ a’an ajwi’ li Jesukristo, amen.