Eb’ lix k’utum li Jesukristo
K’eeb’ileb’ li loq’laj hu re xb’eresinkileb’ li qayu’am. Li waatin anajwan a’an junjunq reheb’ li raatin li Kolonel—li k’a’ru kixye.
Laa’o naqapaab’ li Kristo. Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, laa’o naqaloq’oni a’an ut naqataaqe lix k’utum sa’eb’ li loq’laj hu.
Rub’elaj li t’ane’k, li qaChoxahil Yuwa’ ki’aatinak rik’in laj Adan ut li xEva. Chirix a’an, li Yuwa’b’ej kixye resil li Jesukristo, li Ralal Junaj Chiribʼil, jo’ laj Kolol qe ut aj Tojol qix ut kooxtaqla naq “taqab’i a’an.”1 Rik’in li b’eresihom a’in naru naqaye naq lix k’ihaleb’ li aatin li yeeb’ileb’ xb’aan li “Dios” malaj li “Qaawa’” sa’eb’ li loq’laj hu, a’aneb’ li raatin li Jehova, li Qaawa’ waklijenaq, li Jesukristo.2
K’eeb’ileb’ li loq’laj hu re xb’eresinkileb’ li qayu’am. Jo’ kixk’ut li profeet aj Nefi chiqu, tento “taqatzeka xsahil li raatin li Kristo; xb’aan naq k’ehomaq reetal, li raatin li Kristo tixye eere chixjunil li k’a’aq re ru tento teebaanu.”3 Lix k’ihaleb’ li raqal reheb’ li loq’laj hu li neke’xye resil lix k’anjel li Jesukristo sa’ ruchich’och’ neke’xye k’a’ru kixb’aanu. Li waatin anajwan a’an junjunq reheb’ li raatin li Kolonel—li k’a’ru kixye. Eb’ li aatin a’in tz’iib’anb’ileb’ sa’ li Ak’ Chaq’rab’ (jo’ajwi’ sa’eb’ li musiq’anb’il aatin tiqb’ileb’ xb’aan laj Jose Smith) ut sa’ lix Hu laj Mormon. Lix k’ihaleb’ li aatin a’in tusb’ileb’ a’ yaal jo’q’e ke’yehe’ xb’aan li Kolonel.
“Relik chi yaal ninye aawe: Ani ink’a’ taayo’laq rik’in ha’ ut Musiq’ej moko truuq ta taa’ok sa’ lix nimajwal awab’ejihom li Dios.”4
“Osobʼtesinbʼilebʼ … li nekeʼtzʼokaak ut nekeʼchaqik re chirix tiikilal, xbʼaan naq ebʼ aʼan teʼnujobʼresiiq rikʼin li Santil Musiqʼej.”5
“Us xaq reheb’ li neke’k’anjelak chirix li tuqtuukilal, xb’aan naq na’nooqeb’ ru jo’ ralal xk’ajol li Dios.”6
“Eerabʼihom resil naq kiyeemank: Matmuxuk sumlaak.
“Aʼut laaʼin ninye eere naq chixjunil li tixkaʼya junaq ixq ut tixrahi ru, ak xmux aʼan saʼ xchʼool.”7
“Eerab’ihom resil naq kiyeemank: Taara laa was aawiitz’in ut xik’ taawil li xik’ na’ilok aawe.
“A’ut laa’in ninye eere: chera li xik’ neke’ilok eere, cherosob’tesi li neke’majewank eere, cheb’aanu li us reheb’ li xik’ neke’ilok eere, ut chextijoq choq’ reheb’ li neke’b’aanunk maa’usilal eere ut neke’rahob’tesink eere;
“Re naq laaʼaqex ralal xkʼajol lee choxahil Yuwa’ li naxk’e chaq li saq’e sa’ xb’eeneb’ li ink’a’ useb’ jo’wi’ li useb’ xch’ool, ut naxk’e chaq li hab’ sa’ xb’eeneb’ li tiikeb’ jo’wi’ li ink’a’ tiikeb’ xch’ool.”8
“Wi laa’ex nekekuyeb’ xmaak lee ras eeriitz’in, lee choxahil Yuwa’ tixkuy tixsach ajwi’ eemaak.
“Wi bʼan inkʼaʼ nekekuyebʼ xmaak li winq, joʼkan ajwiʼ lee Yuwaʼ moko tixkuy ta eemaak laaʼex.”9
“Wi ta rehex li ruchich’och’, texxra raj li ruchich’och’ jo’ naq naxra li re. A’b’anan moko rehex ta li ruchich’och’, laa’in b’an xinsik’ok eeru ut xexwisi chisa’: jo’kan naq xik’ nekexril li ruchich’och’.”10
“Joʼkan ut, meesikʼ li kʼaʼaq re ru re li ruchichʼochʼ aʼin; chesikʼ bʼan xbʼeen wa xwaklesinkil li rawaʼbʼejihom li Dios, ut xxaqabʼankil xwankil lix tiikilal, ut chixjunil li kʼaʼaq re ru aʼin taakʼeheʼq choqʼ xtzʼaqobʼ eere.”11
“Joʼkan ut, chixjunil li kʼaʼaq re ru li bʼarwan teeraj naq teʼxbʼaanu li winq eere, joʼkan ajwiʼ chebʼaanu laaʼex rehebʼ aʼan, xbʼaan naq aʼin li chaqʼrabʼ ut ebʼ li profeet.”12
“Cheril eeribʼ chiruhebʼ li bʼalaqʼil profeet, li nekeʼchal eerikʼin saʼ raqʼ li karneer, aʼbʼan saʼ xchʼoolebʼ, aʼanebʼ xojbʼ aj tiʼonel.
“Rik’in li te’ruuchin teenaweb’ ru. Ma nasik’mank tab’i’ li uub’ sa’ li k’ix malaj eb’ li iig sa’ li pajl?
“Jo’kan naq chixjunil li chaab’il che’ chaab’il li ru naxk’e, a’b’an li che’ ink’a’ us ink’a’ ajwi’ us li ru naxk’e.”13
“Moko chixjunil ta li nayehok we: Qaawa’, Qaawa’, taa’ok sa’ lix nimajwal wankilal li choxa, taa’ok b’an li taab’aanunq re li rajom lin choxahil Yuwa’.”14
“Chalqex wik’in chejunilex li lub’luukex ut tawajenaqex xb’aan lee riiq, ut laa’in texinhiltasi.
“K’ulumaq lin iiqleb’ sa’ eeb’een ut tzolomaq eerib’ wik’in, xb’aan naq tuulanin ut q’un lin ch’ool, ut teetaw xhilob’aal eeraam.
“Xb’aan naq moko ra ta lin iiqleb’, ut li nink’e cheriiqani moko aal ta.”15
“Wi ani naraj intaaqenkil, mixra rib’, chixchapaq lix krus ut chinxtaaqehaq.
“Anajwan ut naq jun winq tixpaqo lix krus, aʼan naq tixtzʼeqtaana chirix chixjunil li maaʼusilal, ut li junjunq chi ruchichʼochʼil atawom, ut tixpaabʼ lin taqlahom.”16
“Joʼkan ut, kanabʼomaq li ruchichʼochʼ, ut kolomaq lee raam; xbʼaan naq kʼaʼru tixra wiʼ jun li winq, wi taareechani chixjunil li ruchichʼochʼ, aʼut tixsach li raam? Malaj kʼaʼru tixkʼe jun li winq joʼ reeqaj lix yuʼam?”17
“Wi junaq traj xbʼaanunkil li rajom li Dios, tixnaw ma re li Dios li nintzolebʼ wiʼ malaj yal injunes wibʼ ninʼaatinak.”18
“Jo’kan naq ninye eere: chextz’aamanq ut k’eek’ooq eere; chexsik’oq ut teetaw; chexb’oqoq chire kab’l ut tehe’q cheru.
“Xb’aan naq chixjunil li natz’aamank nak’uluk; li nasik’ok natawok, ut li nab’oqok chire kab’l natehe’k chiru.”19
“Wankeb’ ajwi’ jalan chik inkarneer li moko wankeb’ ta sa’ li korral a’in; a’aneb’ ajwi’ tento tinb’eresiheb’ chaq, ut te’rab’i xyaab’ lin kux, ut jun ch’uutaqeb’ aj chik naq te’wanq, ut junaq ajwi’ laj k’aak’alehom reheb’.”20
“Kixye li Jesus re: Laa’in li wakliik wi’ chik chi yo’yo ut li yu’am. Ani napaab’ank we, us ta taakamq, taawanq xyu’am,
“Ut chixjunil li yo’yo ut nikinxpaab’ maajaruj taakamq.”21
“[Li xnimal ru taqlahom saʼ li chaqʼrabʼ aʼan naq] taara li Qaawaʼ laa Dios chi anchal laa chʼool, chi anchal laa waam, ut chi anchal laa kʼaʼuxl.
“Aʼan li xbʼeen ut xnimal ru chaqʼrabʼ.
“Li xkabʼ chanchan ajwiʼ aʼan: Taara laa was aawiitzʼin joʼ naq nakara aawibʼ laaʼat.
“Saʼ xbʼeenebʼ li wiibʼ chi chaqʼrabʼ aʼin kʼojobʼanbʼil chixjunil li chaqʼrabʼ ut ebʼ li profeet.”22
“Ani aj-ik’in wankeb’ lin chaq’rab’, wi naxpaab’ li neke’xye, a’an li narahok we. Ut li narahok we, taarahe’q xb’aan lin Yuwa’; ut laa’in ajwi’ tinra ut tink’ut wib’ chiru.”23
“Li tuqtuukil usilal ninkanab’ eerik’in, lin tuqtuukil usilal nink’e eere; ink’a’ nink’e eere kama’ naxk’e li ruchich’och’. Misachk eech’ool chi k’oxlak, chi moko chexxuwaq.”24
“Aʼan aʼin lin chaqʼrabʼ, naq chera eeribʼ cheribʼil eeribʼ joʼ naq xexinra laaʼin.”25
“Ilomaqeb’ li wuq’ ut eb’ li woq: laa’inin ajwi’! Ch’e’omaqin ut k’ehomaq reetal naq junaq musiq’ej maak’a’ xtib’el ut xb’aqel jo’ nekeril we laa’in.”26
“Ayuqex b’i’, ut tzoleb’ chixjunil li tenamit. Teekub’siheb’ xha’ sa’ xk’ab’a’ li Yuwa’b’ej, li K’ajolb’ej, ut li Santil Musiq’ej,
“K’utumaq chiruheb’ xpaab’ankil chixjunil li xexintaqla wi’. Chenawaq naq laa’in wanqin eerik’in chixjunil li kutan toj sa’ roso’jik li ruchich’och’.”27
Chirix lix k’anjel sa’ li santil ch’och’, li Jesukristo kixk’ut rib’ chiruheb’ li tiikeb’ xch’ool sa’ li ch’och’ America. A’an a’in junjunq reheb’ li aatin kixye aran:
“Kʼe reetal, laaʼin li Jesukristo, li Ralal li Dios. Laaʼin kinyoʼobʼtesi li choxa ut li chʼochʼ, ut chixjunil li kʼaʼaq re ru wan chi saʼ. Laaʼin kinwan rikʼin li Yuwaʼbʼej chalen chaq saʼ xtiklajik. Laaʼin wankin rikʼin li Yuwaʼbʼej, ut li Yuwaʼbʼej wikʼin laaʼin, ut wikʼin laaʼin li Yuwaʼbʼej kixnima xloqʼal lix kʼabʼaʼ.”28
“Laaʼin lix saqen ut lix yuʼam li ruchichʼochʼ. Laaʼin li Alfa ut li Omega, lix tiklajik ut li rosoʼjik.
“Ut moko teeqʼaxtesi ta chik chiwu li hoybʼil kikʼ; relik chi yaal, taakʼeheʼq xraqik lee mayej ut lee kʼatbʼil mayej, xbʼaan naq maajun rehebʼ lee mayej ut lee kʼatbʼil mayej tinkʼulubʼa.
“Ut teeqʼaxtesi choqʼ mayej we jun yotʼbʼil chʼoolej ut jun tuulanil musiqʼej. Ut ani nachal wik’in chi yot’b’il xch’ool ut tuulan xmusiq’, a’an tinkub’si xha’ rik’in xam ut rik’in li Santil Musiq’ej. …
“Kʼehomaq reetal, kinchal saʼ li ruchichʼochʼ re xkʼambʼal chaq li tojbʼal-ix saʼ li ruchichʼochʼ, re xkolbʼal li ruchichʼochʼ chiru li maak.”29
“Ut ninye wiʼchik eere, tento teejal eekʼaʼuxl, ut taakubʼeeq eehaʼ saʼ lin kʼabʼaʼ, ut texʼok chanchan jun chʼina al, malaj ut maamin texruuq chireechaninkil li rawaʼbʼejihom li Dios.”30
“Joʼkan ut, nawaj raj naq tzʼaqalaq eere eeru, joʼ chanru ajwiʼ naq laaʼin, malaj joʼ lee Yuwaʼ li wan saʼ choxa tzʼaqal re ru.”31
“Chi yaal, chi yaal, ninye eere, junelik tento texyoʼleq ut textijoq, re naq inkʼaʼ texʼaaleeq xbʼaan laj tza, ut texkʼameʼq chi preexil xbʼaan aʼan.”32
“Joʼkan naq junelik tento textijoq chiru li Yuwaʼbʼej saʼ lin kʼabʼaʼ.”33
“Joʼkan ut, yalaq kʼaʼru nekebʼaanu, teebʼaanu saʼ lin kʼabʼaʼ; joʼkan naq teekʼe chi kʼabʼaʼiik li iglees saʼ lin kʼabʼaʼ.”34
“Kʼehomaq reetal, kinkʼe eere lin evangelio, ut aʼin li evangelio kinkʼe eere—naq kinchal saʼ li ruchichʼochʼ re xbʼaanunkil li rajom lin Yuwaʼ, xbʼaan naq lin Yuwaʼ kinixtaqla chaq.
“Ut lin Yuwaʼ kinixtaqla chaq re tintaqsiiq chiru li krus, ut chirix naq kintaqsiik chiru li krus, re tinjilosihebʼ chaq chixjunil li winq wikʼin … re taaraqeʼq aatin chirixebʼ xbʼaan lix kʼanjelebʼ, ma usebʼ malaj inkʼaʼ usebʼ.”35
“Anajwan aʼin li taqlahom: Chejal eekʼaʼuxl, chejunilex xmaril li ruchichʼochʼ, ut chalqex wikʼin ut chikubʼeeq eehaʼ saʼ lin kʼabʼaʼ, re naq texruuq chi santobʼresiik rikʼin xkʼulbʼal li Santil Musiqʼej, re naq texxaqliiq chi maakʼaʼ eetzʼajnil chiwu saʼ rosoʼjik li kutan.”36
Laa’o naqapaab’ li Kristo. Tinchoy li waatin rik’in li kixye a’an chirix xnawb’al ut xtaaqenkil lix k’utum:
“A’b’an laj K’ojob’anel ch’ool, a’ li Santil Musiq’ej li tixtaqla chaq li Yuwa’b’ej sa’ ink’ab’a’, a’an texxtzol chirix chixjunil ut tixjultika eere chixjunil li xinye eere.”37
Ninch’olob’ naq yaaleb’ li k’utum a’in, sa’ xk’ab’a’ li Jesukristo, amen.