![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F86%2Fa2%2F86a20842d1c4e769d477a8ce93b5e01e2e47a827%2F86a20842d1c4e769d477a8ce93b5e01e2e47a827.jpeg/full/!250,/0/default)
Jo’q’e xk’ulb’al li rosob’tesihom li yuwa’b’ejil aj k’anjel
Naq teek’ul lee rosob’tesinkil, teek’e reetal ut teereek’a lix rahom li qaChoxahil Yuwa’ ut li Jesukristo choq’ eere ut chan ru nekexril chi junjunqal.
Ewer lin raarookil amiiw, li Elder Randall K. Bennett, x’aatinak chirix li osob’tesiik xb’aan li yuwa’b’ejil aj k’anjel. A’an jun na’leb’ li xmusiq’an qe chiqajunilo. Ex was wiitz’in, ma tineekanab’ cheraatinankil ajwi’ chirix li osob’tesiik xb’aan li yuwa’b’ejil aj k’anjel? Ex yuwa’b’ejil aj k’anjel, naq neke’naab’alo’ li tz’aam chirixeb’ li osob’tesink nekek’e, nintz’aama naq li Qaawa’ texrosob’tesi naq nekeyal eeq’e sa’ lee b’oqb’al.
Rajlal naq nintz’aqon sa’ li ch’utub’aj-ib’ re oqech, rajlal nawula’ani li yuwa’b’ejil aj k’anjel rochb’een li rixaqil. Eb li yuwa’b’ejil aj k’anjel jwal q’uneb’, neke’ab’in, ut chaab’ileb’ aj k’anjel b’oqb’ileb’ xb’aan li Dios. A’aneb’ neke’xwotz xninqal ru k’utb’esinb’il na’leb’ sa’ musiq’ej. Rajlal ninpatz’ reheb’ jarub’ chihab’ wan re li jwal saaj ut jarub’ wan re li jwal tiix li xe’rosob’tesi. Toj anajwan li jwal saaj wan 11 ut li jwal tiix wan 93 re.
Kink’ul li wosob’tesinkil naq laa’inin chaq jun ak’ komon sa’ li Iglees, wan chaq 19 chihab’ we, wiib’ chihab’ chirix naq kikub’e inha’. Lin yuwa’b’ejil aj k’anjel ak cheek tz’aqal. A’an ki’ok sa’ li Iglees sa’ 1916 ut a’an jun reheb’ li xb’eenileb’ komon sa’ li Iglees aran Japon. Jwal kisaho’ inch’ool naq kink’ul li wosob’tesinkil rik’in li yuwa’b’ejil aj k’anjel a’an, jun xchaab’il moos li Dios. Jwal kich’a’ajko’ chiwu xtawb’al ru xb’aan naq jalan b’ayaq na’aatinak sa’ Japones, a’b’an jwal nim tz’aqal xwankil.
Eb’ li yuwa’b’ejil aj k’anjel li ninnaweb’ ru neke’xye we naq naab’aleb’ li komon neke’xk’ul li rosob’tesinkil rub’elaj naq xikeb’ re sa’ mision. Ex raarookil saaj winq ut ixq, yuwa’b’ej, ut obiisp, li osob’tesiik xb’aan li yuwa’b’ejil aj k’anjel ink’a’ ka’ajwi’ re xkawresinkil qib’ re xik sa’ mision. Eb’ li komon kub’enaqeb’ xha’ li tiikeb’ xwanjikeb’ naru te’xk’ul li rosob’tesinkileb’ naq wanqeb’ xchihab’ choq’ re a’an.1
Ex inraarookil komon li ak ninqex, wank eere maji’ naxk’ul li rosob’tesinkil. Chinaq sa’ eech’ool naq maak’a’ xchihab’il a’an.
Lix na’ li wixaqil a’an chaq jun komon jwal kixk’e xch’ool sa’ li Iglees; kiwan jo’ aj k’utunel sa’ li Komonil re Tenq’ank toj reetal naq kikam naq wan 91 chihab’ re. Jwal kiraho’ sa’ inch’ool naq kinnaw naq a’an ink’a’ kixk’ul li rosob’tesinkil rik’in jun li yuwab’ejil aj k’anjel. A’an kixnunsi naab’al li ch’a’ajkilal sa’ lix yu’am, ut xb’aan naq maak’a’ jun li wan ta raj li tijonelil rik’in sa’ rochoch, a’an ink’a’ jwal kixk’ul li rosob’tesinkil rik’in li tijonelil. Jun rosob’tesihom li yuwa’b’ejil aj k’anjel kiru raj chixk’ojob’ankil xch’ool naq kiraj k’ojob’aak xch’ool.
Li ak ninqex, wi maji’ nekek’ul lee rosob’tesinkil, mexk’oxlak! Lix hoonal li junjunq jalan. Wi wan 35 malaj 85 chihab’ aawe ut wan aawajom, aatinan rik’in laa obiisp re naq taak’ul laa wosob’tesinkil.
Ut laa’ex li toj ak’ komonex sa’ li Iglees, ma eerab’ihom chirix li osob’tesink xb’aan jun li yuwa’b’ejil aj k’anjel? Laa’in ink’a’ kinnaw naq tinruuq chixk’ulb’al li wosob’tesinkil naq kin’ok sa’ li Iglees, a’b’an lin raarookil obiisp kinraatina chirix a’an ut kinixb’oq chixkawresinkil wib’ re naq tink’ul chirix naq taakub’eeq inha’. Ex inraarookil komon ak’, laa’ex ajwi’ nekexru chixk’ulb’al jun lee rosob’tesinkil. Li Qaawa’ taatenq’anq eere chixkawresinkil eerib’ choq’ re li loq’laj hoonal a’an.
Anajwan qak’ehaq reetal li wiib’ chi rajom li osob’tesiik xb’aan jun li yuwa’b’ejil aj k’anjel:
-
Li osob’tesiik xb’aan jun li yuwa’b’ejil aj k’anjel naxye li rajom li Qaawa’ choq’ aawe.2
-
Li osob’tesiik xb’aan jun li yuwa’b’ejil aj k’anjel naxye lee xe’toonil sa’ lix junkab’al laj Israel.
Li osob’tesiik xb’aan jun li yuwa’b’ejil aj k’anjel a’an jun esil li nachal rik’in li qaChoxahil Yuwa’ b’ar wi’ wan naab’al li yeechi’ihom ut musiq’anb’il na’leb’ re eeb’eresinkil chiru lee yu’am. Li osob’tesiik xb’aan jun li yuwa’b’ejil aj k’anjel ink’a’ tixye chixjunil li taak’ulmanq sa’ lee yu’am chi moko tixsume chixjunil lee paatz’om. Wi ink’a’ nayeeman junaq li na’leb’ aajel ru sa’ lee yu’am, ink’a’ naraj naxye naq ink’a’ ta raj taak’ulmanq. Jo’kan ajwi’, maak’a’ junaq li chaq’rab’ li nayehok re naq taak’ulmanq chixjunil li wan sa’ lee rosob’tesinkil. Li osob’tesiik xb’aan jun li yuwa’b’ejil aj k’anjel maak’a’ roso’jik, ut wi nekeyu’ami lee yu’am chi tiik ru, eb’ li yeechi’ihom li ink’a’ te’tz’aqloq ru sa’ li yu’am a’in, te’tz’aqloq’ ru chiru li yu’am chalel.3
Naq teenaw lee xe’toonil, texwulaq xnawb’al naq laa’ex xcha’al lix junkab’al laj Israel ut li riyajil laj Abraham.4 Re xtawb’al ru a’in, k’ehomaq reetal lix yeechi’ihom li Qaawa’ li kixb’aanu choq’ re lix junkab’al laj Israel rik’in laj Abraham.
Sa’ xyanqeb’ li yeechi’ihom wankeb’:
-
“Eb’ li ralal jwal numtajenaqaqeb’ (chi’ilmanq Genesis 17:5–6; Abraham 2:9; 3:14).
-
“Eb’ li ralal xk’ajol te’xk’ul li evangelio ut taawanq li tijonelil rik’ineb’ (chi’ilmanq Abraham 2:9).
-
“Rik’in xk’anjeleb’ li ralal xk’ajoleb’, “teʼosobʼtesimanq chixjunil li junkabʼal re li ruchichʼochʼ, rikʼin ajwiʼ li osobʼtesink re li Evangelio, aʼan li osobʼtesink re li kolbʼa-ibʼ, re ajwiʼ li junelik yuʼam” (Abraham 2:11).”5
Jo’ komon sa’ li Iglees, laa’o alal k’ajolb’ej re li sumwank.6 Naqak’uleb’ li osob’tesink re li sumwank re laj Abraham naq naqapaab’eb’ li chaq’rab’ ut li taqlahom re li evangelio.
Lix kawresinkil eerib’ re xk’ulb’al lee rosob’tesinkil rik’in jun li yuwa’b’ejil aj k’anjel texxtenq’a chixnimob’resinkil lee paab’aal chirix li qaChoxahil Yuwa’ ut li Jesukristo. Ut naq teek’ul lee rosob’tesinkil rik’in jun li yuwa’b’ejil aj k’anjel, teeril, ut teetz’il rix, naru nekek’e eerilom chirixeb’ a’an rajlal.
Li Awa’b’ej Thomas S. Monson kixye, “Li Qaawa’ li kik’ehok re li Liahona re laj Lehi, a’an ajwi’ li nak’ehok we ut aawe anajwan jun li maatan li jwal ch’ina-us li nab’eresink re li qayu’am, li naxk’ut li xiwxiw chiqu re xkolb’al qix, ut li naxk’ut li qab’e, jun li b’e chaab’il—ink’a’ re toowulaq sa’ li yeechi’inb’il ch’och’, re b’an tooxik sa’ li qachoxahil ochochnal.”7
Ex inraarookil obiisp, yuwa’b’ej, awa’b’ej reheb’ lix moolameb’ li xb’eenil ut li Komonil re Tenq’ank, aj jolominel re li misioneer sa’ teep, ixq ut winq aj ilol komon, tenq’ahomaqeb’ li saaj ixq ut winq, eb’ li komon li ak ninqeb’, ut eb’ li ak’ komon li maji’ neke’xk’ul li rosob’tesinkil rik’in jun li yuwa’b’ejil aj k’anjel chixsik’b’al lix b’eresihom ut lix tenq’ li Qaawa’ re te’xkawresi rib’ re te’xk’ul.
Rik’in tijok rajlal nawil ru li wosob’tesinkil; rajlal naxk’e xkawil inch’ool. Nintaw ru li naraj li Dios wik’in ut a’an natenq’ank we chixjalb’al ink’a’uxl ut chi tuulano’k. Naq nawil ru ut nink’oxla, nawaj wank chi tiik re xk’ulb’aleb’ li osob’tesink yeechi’inb’ileb’ aran.
Jo’ sa’eb’ li loq’laj hu li qilomeb’ ru naab’al sut wan chik k’a’ru naqataw ru, li qosob’tesinkil k’eeb’il xb’aan li yuwa’b’ejil aj k’anjel taqataw ru chi chaab’il chiru xnumik li hoonal. Li we wan xjalanil anajwan chiru naq wan chaq we 30 malaj 50 chihab’. Ink’a’ ke’jala li aatin, a’b’an naqil ru chi jalan chik.
Li Awa’b’ej Dallin H. Oaks kixye naq li osob’tesink k’eeb’il xb’aan li yuwa’b’ejil aj k’anjel “a’an k’eeb’il rik’in li Musiq’ej ut tento taa’ilmaq ru ut taatawmanq ru rik’in xtenq’ li Musiq’ej. Lix yaalal ut lix b’ehil li osob’tesiik taak’utmanq chi kok’ raqal rik’in xnumik li hoonal rik’in xwankil li Santil Musiq’ej li k’eeb’il wi’.”8
Ex was wiitz’in, ninch’olob’ xyaalal naq li qaChoxahil Yuwa’ ut lix Raarookil Alal li jun chirib’il, li Qaawa’ Jesukristo, yo’yookeb’ Nokohe’xra. Li osob’tesiik xb’aan li yuwa’b’ejil aj k’anjel a’an jun li loq’laj maatan neke’xk’e qe. Naq teek’ul lee rosob’tesinkil, teek’e reetal ut teereek’a lix rahom choq’ eere ut chan ru nekexril chi junjunqal.
Lix Hu laj Mormon a’an jun chik ch’olob’anb’il esil chirix li Jesukristo. Ut jwal ninb’antioxi naq b’eresinb’ilin xb’aan jun li yo’yookil profeet, li Awa’b’ej Russell M. Nelson.
Jwal ninb’antioxin chirix li Kolonel Jesukristo. Chiru li domingo a’in re Paswa, tink’e li wilom rik’in a’an ut lix waklijik chi yo’yo, ut xloq’oninkil ru ut xb’antioxinkil lix mayej. Ninnaw naq a’an kixk’ul rahilal chi numtajenaq xb’aan naq a’an nokoxra chi numtajenaq. Ninnaw naq a’an kiwakli chi yo’yo xb’aan lix rahom choq’ qe. A’an tz’aqal yaal. Ninch’olob’ xyaalal a’an sa’ xk’ab’a’ li Jesukristo, amen.