Xjayalinkil li tzolok rik’in li Jesukristo

Xb’aan li Hermano Milton Camargo

Xb’een aj tenq’ aj k’ehol na’leb’ sa’ li jolomil awa’b’ejil re li Dominkil Tzoleb’aal

Li Qaawa’ Jesukristo a’an li b’e re xtuqub’ankileb’l li qach’a’ajkilal, a’b’an tento taqataqsi li qilob’aal ut xsa’ li qu re rilb’al.

Lin yuwa’ junelik naxye we, “Matkana sa’ laa ch’a’ajkilal chi ink’a’ ta raj taataw xb’ehil lix tuqub’ankil.”

Ninch’olob’ xyaalal naq li Qaawa’ Jesukristo a’an li b’e re xtuqub’ankil li k’a’aq re ru jwal ch’a’aj. Chi yaal naq a’an kixnumsi kaahib’ li ch’a’ajkilal li naqanumsi ajwi’ laa’o ut li maajun qe laa’o taaruuq chi q’axok re xjunes rib’:

Li xb’een ch’a’ajkilal a’an li kamk sa’ tib’elej. Naru naqayal xb’ayb’al malaj xsachb’al sa’ qak’a’uxl, a’b’an moko nokoru ta chixq’axb’al ru qajunes. A’b’anan, li Jesukristo kixq’ax ru li kamk sa’ qak’ab’a’ ut, xb’aan a’an sa’ jun kutan toowakliiq wi’chik chi yo’yo.¹
Li xkab’ ch’a’ajkilal naxk’am chaq li raaxiik’, li ch’a’ajkilal, li rahil ch’oolej, li rahilal, ut li maa’usilal wan sa’ ruchich’och’ a’in. Li Jesukristo kixq’ax ru chixjunil a’in. Choq’ reheb’ chixjunileb’ li te’xyal xq’e chixtaaqenkil a’an, sa’ jun kutan a’an “tixchaqihob’resi chixjunil lix ya’aleb’ ru,” ut tixchaab’ilob’resi wi’chik li k’a’aq re ru.² Anajwan, a’an naru chiqakawob’resinkil re xnumsinkil li qach’a’ajkilal chi k’ojk’o qach’ool, chi sa qach’ool, ut sa’ tuqtuukilal.³
Li rox ch’a’ajkilal a’an li kamk sa’ musiq’ej li nachal xb’aan li maak. Li Jesukristo kixq’ax ru li ch’a’ajkilal a’in naq kixk’ul sa’ xb’een “[li rahilal re] qatuqtuukilal.”⁴ B’antiox re lix tojb’al rix li maak, ach’ab’anb’ilo chiru li rahilal nachal xb’aan li qamaak wi naqapaab’ li Kolonel, naqajal qak’a’uxl chi anchal qach’ool, naqasume li sumwank naxyeechi’i qe li Yuwa’b’ej rik’ineb’ li k’anjel jo’ li kub’iha’, ut naqayal qaq’e toj sa’ roso’jik.⁵
Li xkaa ch’a’ajkilal a’an li qawanjik chi ink’a’ tz’aqal qe qu. Rik’in li Jesukristo wan ajwi’ xtuqub’ankil li ch’a’ajkilal a’in. A’an moko ka’aj ta wi’ naxsach li qamaak ut nokoxkanab’ chi saq qu. A’an naru naxk’anjela “li nimla jalok qe … malaj re li qach’ool, jo’kan naq maak’a’ chik li qajom re xb’aanunkil li maa’usilal, re b’an xb’aanunkil rajlal li chaab’ilal.”⁶ Naru natz’aqlok qe qu xb’aan ruxtaan li Kristo ut sa’ jun kutan wulak jo’ a’an.⁷

Chi kok’ aj xsa’ nokokana sa’ li qach’a’ajkilal ut nasach lix b’ehil chiqu, a’ li qaKolonel Jesukristo. Chan ru naq ink’a’ taqab’aanu li na’leb’ a’in? Nink’oxla naq lix sumenkil natawman sa’ li sumwank li nokob’oqe’ chi ok wi’ rik’in a’an ut rik’in li qaYuwa’ sa’ Choxa.

Xk’ojob’ankil qib’ rik’in li Jesukristo sa’ li sumwank

Eb’ li sumwank nokoh’extenq’a chixkanab’ankil qach’ool, qak’a’uxl, ut qab’aanuhom rik’in li Kristo. Naq “noko’ilok rik’ineb’ li sumwank Ii xqab’aanu [laa’o],” naru naqak’eheb’ reetal “li k’a’aq re ru re li ruchich’och’ a’in” li tento “taqakanab’ chi ixb’ej” ut “li k’a’ru re jun [ruchich’och’] qʼaxal chaabʼil wiʼchik” li tento taqasik’.⁸

A’an li kixb’aanu lix tenamit laj Ammon sa’ lix Hu laj Mormon. Naq yookeb’ chi tzolok chirix li Jesukristo ut ke’xkanab’ xch’ooleb’ rik’in, ke’xk’e reetal naq tento te’xmuq lix k’anjeleb’aaleb’ re pleetik ut te’chaab’ilo’q re naq “naʼnookebʼ ru xbʼaan xʼanchalilebʼ xchʼool chiru li Dios.”⁹

Roxloq’inkileb’ li sumwank nokoxk’am chixsik’b’al li naraj li Musiq’ej ut chixtz’eqtaanankil chixjunil li nanajtob’resink re—“ xb’aan naq naqanaw naq wi naru nokowan chi k’ulub’ej re taawanq qik’in li Santil Musiq’ej, naru ajwi’ naq k’ulub’ejaqo re wank chiru li qaChoxahil Yuwa’ ut li Jesukristo, li Ralal.”¹⁰ A’in naraj naxye naq aajel ru xjalb’al chan ru noko’aatinak, roksinkil li q’unal aatin. Jo’kan ajwi’ xjalb’al li naqab’aanu sa’ musiq’ej li ink’a’ jwal chaab’il rik’in li naxchaab’ilob’resi li qawanjik rik’in li Qaawa’, jo’ li tijok rajlal ut lix tzolb’al li loq’laj hu wulaj wulaj, sa’ junesal ut sa’ junkab’alej.

Li Awa’b’ej Russell M. Nelson kixye naq “chixjunil ani li te’ok sa’ sumwank sa’ li kubʼsibʼaal haʼ ut sa’ li santil ochoch—ut li te’paab’anq reheb’—jwal teeb’il wi’chik lix wankil li Jesukristo chiruheb’. …

“Naq neke’qapaab’ li qasumwank rik’in li Dios nokoq’ajkamuuk rik’in choxahil wankilal—wankilal li nokoxtenq’a chixkuyb’al chi chaab’il wi’chik li yale’k, li aaleek, ut li rahilal.”¹¹

X’ak’ob’resinkil li qasumwank sa’ li loq’laj wa’ak rajlal domigo a’an jun hoonal re xtz’ilb’al qix qajunes qib’¹² ut xjayalinkil li qayu’am rik’in li Jesukristo. Naq nokotz’aqon sa’ li loq’laj wa’ak naqach’olob’ naq “junelik najultiko’ qe.”¹³ Li aatin junelik wan xyaalal. Naxk’e xwankil li Kolonel sa’ junjunq xcha’al li qayu’am. Ink’a’ najultiko’ qe ka’ajwi sa’ li iglees malaj ka’ajwi’ sa’ li qatij q’ela malaj naq wanko sa’ ch’a’ajkilal ut naqaj ru k’a’ruhaq.

Hehe’, wan naq naqajalb’ehi qib’. Nasach a’an sa’ qach’ool. Nasach chiqu li qab’e. A’b’an x’ak’ob’resinkil li qasumwank naraj naxye naq naqaj xjultikankil junelik li Kolonel, naq taqab’aanu chiru li xamaan ut naq taqayeechi’i qib’ ut taqakanab’ qib’ chiru a’an sa’ lix meexil li loq’laj wa’ak sa’ li xamaan chalk re.

Xk’ojob’ankil qib’ rik’in li Kristo sa’ li qochoch

Chi tz’aqal, xk’ojob’ankil qib’ rik’in li Kristo ink’a’ ka’ajwi’ a’anaq junaq ch’utam sa’ li iglees. Naq li Awa’b’ej Nelson kixk’ut li hu Kim, Taaqehin sa’ 2018, a’an kixye, “Na’ajman ru jun Iglees jayalinb’il sa’ li ochoch.”¹⁴ Kixye naq “taqab’aanu naq li qajunkab’al a’anq jun na’ajej re paab’aal” ut “jun na’ajej re tzolok chirix li evangelio.” Ut kixk’e kaahib’ li yeechi’ihom wi naqab’aanu.¹⁵

Lix b’een yeechi’ihom: “Lee hilob’aal kutan te’ok choq’ sahil kutan eere.” A’anaq jun hoonal re nach’ok rik’in li qaKolonel. Jo’ kixye jun tuq’ixq aj Peru, “Sa’ xkutankil li Qaawa a’an li kutan b’ar wi’ nink’ul xk’ihaleb’ insumenkil rik’in li Qaawa’.”

Li xkab’ yeechi’ihom: “Lee kok’al te’raj raj xtzolb’al ut xyu’aminkileb’ lix k’utum li Kolonel.” Xb’aan a’in “nokoʼaatinak chirix li Kristo, nasahoʼ saʼ qachʼool rikʼin li Kristo, nokojultikan chirix li Kristo, … re naq ebʼ li qalal qakʼajol teʼruuq chixnawbʼal bʼar taaruuq teʼiloq re teʼisiiq lix maakebʼ.”¹⁶

Naqab’aanu a’in re naq sa’ jun kutan, naq li qalal taa’elq chi k’anjelak malaj b’eek chiru li tzuul malaj yohob’k sa’ li k’iche’, jo’ kixb’aanu laj Enos, taajultiko’q re li kiqak’ut chiru chirix li Kristo ut li sahilal nachal xb’aan xyu’aminkil li evangelio. Ut maa’ani nanawok re. Maare taawulaq li kutan naq taawanq xtz’okajik sa’ musiq’ej li taak’amoq re rik’in li Jesukristo re naq taarab’i lix yaab’ xkux li Qaawa’ chixyeeb’al, “kuyb’il aamaak, ut laat tat-osob’tesiiq.”¹⁷

Li rox yeechi’ihom: “Taak’osq lix wankil laj tza sa’ lee yu’am ut sa’ lee rochoch.” K’a’ut? Xb’aan naq naqak’ojob’ qib’ rik’in li Jesukristo li maak na’oso’ xwankil.¹⁸ Naq li qochoch nanujak rik’in lix saqen li Kolonel, na’ok chi sachk xna’aj laj xik’ ilonel.

Li xkaa yeechi’ihom: “Nimaq xwankil li jalaak teek’ul sa’ lee junkab’al.” K’a’ut? Xb’aan naq li jalaak naxk’am chaq li Jesukristo a’an “jun li nimla jalok.”¹⁹ A’an naxjal li qawanjik ; noko’ok choq’ “akʼil yoʼobʼtesihom.”²⁰ Chi timil timil nokowulak jo’ li Kolonel, nokonujak rik’in li tz’aqal rahom choq’ reheb’ chixjunil li ralal li Dios.

Ani raj ink’a’ taa’ajoq re li osob’tesink a’an sa’ lix yu’am ut sa’ lix junkab’al? K’a’ru tento taqab’aanu re xk’ulb’aleb’? Lix sumenkil a’an, xjalb’al li qochoch jo’ jun santil na’ajej re paab’aal ut jun na’ajej re xtzolb’al li evangelio. Chan ru taqab’aanu a’an? Wi naqak’ojob’ qach’ool rik’in li qaChoxahil Yuwa’ ut li Jesukristo, xk’eeb’aleb’ a’an sa’ xyi li qajunkab’al, a’an li wankil jwal aajel ru sa’ li qochoch.

Ma naru tinpatz’ eere naq teetikib’ roksinkil li raatin li Kristo, li natawman sa’ li loq’laj hu, jo’ xcha’al lee yu’am? Moko wan ta junaq eetalil chi tz’iib’anb’il re xtzolb’al chi tz’aqal re ru li loq’laj hu. Maare oob’ malaj lajeeb’ k’asal rajlal kutan—malaj naab’al chik hoonal wi naru cheru. Maare jun ch’ol malaj wiib’ oxib’aq raqal chiru li kutan. Wan komon neke’raj tzolok eq’la naq maji’ neke’xik sa’ li tzoleb’aal malaj sa’ li trab’aaj. Wan komon neke’raj tzolok naq maji’ neke’yokla. Wan li sumsuukeb’ neke’xye we naq neke’tzolok xjuneseb’ chiru li b’e naq neke’xik sa’ xtrab’aaj ut neke’xwotz lix k’a’uxleb’ chirib’ileb’ rib’ sa’ texto re naq tz’iib’anb’il resil a’an.

Li hu Kim, Taaqehin naxk’e naab’al li na’leb’ chirix li k’anjel li naru natenq’ank re junaq li komon malaj junkab’al chixtzolb’al li na’leb’ re li evangelio sa’eb’ li loq’laj hu. Eb’ li video re li Santil Hu ut lix Hu laj Mormon a’aneb’ ajwi’ jun li chaab’il k’anjeleb’aal re naq li loq’laj hu te’oksimanq choq’ re laa junkab’al. Eb’ li saaj ut li kok’al neke’musiq’aak xb’aaneb’ li seraq’ re li loq’laj hu. Eb’ li seraq’ a’in ut lix k’utum li evangelio k’utb’ileb’ xb’aan te’kanaaq rik’ineb’ lee kok’al, jo’ chaab’il amiiw, naq te’raj li chaab’il eetalil re k’anjelak, tiikilal, paab’ank, kuyuk, yaloq q’e, k’utb’esinb’il na’leb’, tz’aqal rahok, tuulanil, ut paab’aal chirix li Jesukristo. Chiru xnumik li hoonal, li xyalb’al eeq’e chixtzekankil xsahil li raatin li Dios tixtenq’aheb’ lee kok’al chi nach’ok mas wi’chik rik’in li Kolonel. Te’wulaq xnawb’al ru jo’ maajun wa chaq ke’xb’aanu.

Li Qaawa’ Jesukristo yo’yo anajwan. A’an naru nawan wulaj wulaj sa’ li qayu’am. A’an li b’e re xtuqub’ankileb’l li qach’a’ajkilal, a’b’an tento taqataqsi li qilob’aal ut xsa’ li qu re rilb’al. A’an kixye “Chexʼiloq wankin wiʼ saʼ li junjunq eekʼoxlahom; miwiibʼan eechʼool, mexxuwak.”²¹ Naq naqak’e li qilob’aal rik’in a’an ut rik’in li qaChoxahil Yuwa’, naq naqoxloq’iheb’ ut noko’ok sa’ li sumwank, ut neke’qoksi a’an choq’ xcha’al li qochoch ut qajunkab’al, toowulaq jo’eb’ li kristiaan li ki’aatinak wi’ li Awa’b’ej Nelson: “jun tenamit li neke’ru, yo’on wankeb’, ut k’ulub’eb’ chixk’ulb’al li Qaawa’ naq taak’ulunq wi’chik, jun tenamit li ak xe’xsik’ ru li Jesukristo chiru li t’anenaqil ruchich’och’ a’in, jun tenamit li neke’saho’ xch’ool chirix lix taqleb’ xch’ool chixyu’aminkil lix taqenaqil ut santil chaq’rab’ li Jesukristo.”²² Sa’ xk’ab’a’ li Jesukristo, amen.