![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F11%2Fa0%2F11a0af28e78baee6a64afdc0895d7c990ece2c57%2F11a0af28e78baee6a64afdc0895d7c990ece2c57.jpeg/full/!250,/0/default)
Xtawb’al tuqtuukilal sa’ junesal
Nintz’aama naq teetaw tuqtuukilal, naq teetenq’aheb’ naab’al chixtawb’al, ut naq eb’ a’an te’xnumsi reheb’ naab’al chik.
Ex was wiitz’in, osob’tesinb’ilo xb’aan li musiq’anb’il aatin ut li ch’ina-usil b’ichank li xe’xtoch’ li qach’ool chiru li xb’eenil ch’utam a’in re li jolomil ch’utub’aj-ib’. B’antiox eere lee tz’aqonik ut lee paab’aal.
Anajwan tin’aatinaq chirix li na’leb’ kintzol chirix li sachb’a-ch’oolej re xtawb’al tuqtuukilal sa’ junesal, maak’a’ naxye li yooko chi nume’k wi’. Li Kolonel naxnaw naq chixjunileb’ li ralal xk’ajol li qaChoxahil Yuwa’ neke’raj li tuqtuukilal, ut a’an kixye naq taaruuq tixk’e qe. Nanaq sa’ lee ch’ool li raatin li Jesukristo li tz’iib’anb’il sa’ lix hu laj Jwan: “Li tuqtuukil usilal ninkanab’ eerik’in, lin tuqtuukil usilal nink’e eere: ink’a’ nink’e eere kama’ naxk’e li ruchich’och’. Misachk eech’ool chi k’oxlak, chi moko chexxuwaq.”1
Lix yaalalil li tuqtuukilal ut chan ru naq li Jesus naru nak’ehok re k’utb’esinb’il xb’aan lix wanjikeb’ li ke’ab’ink re chixyeeb’al li aatin a’an. Ab’ihomaq li kixtz’iib’a laj Jwan chirix lix raqik lix k’anjel li Kristo. Eb’ li kawil wankilal re maa’usilal ke’raj numtaak sa’ xb’een a’an, ut sa’ junpaat chik te’xyal numtaak sa’ xb’eeneb’ lix tzolom.
A’an a’in li raatin li Kolonel:
“Wi nikineera, teepaab’ lin chaq’rab’.
“Ut tintz’aamanq tin’elajinq chiru li Yuwa’b’ej, ut a’an tixtaqla chaq jun chik aj K’ojob’anel ch’ool re naq twanq eerik’in chi junelik;
“A’ li Musiq’ej re li yaal, li ink’a’ naru taak’ule’q xb’aan li ruchich’och’ xb’aan naq ink’a’ na’ile’k chi moko nanawe’k ru xb’aan. A’ut laa’ex nekenaw ru xb’aan naq wank sa’ eeyanq ut taawanq eerik’in.
“Ink’a’ texinkanab’ eejunes jo’ maak’a’ lee na’ lee yuwa’: tinchalq wi’ chik eerik’in.
“Sa’ jun k’amok chik li ruchich’och’ ink’a’ chik taaril wu, a’ut laa’ex teeril wu xb’aan naq yo’yookin ut yo’yooqex ajwi’ laa’ex.
“Sa’ li kutan a’an teenaw naq laa’in wankin rik’in lin Yuwa’, ut laa’ex wankex wik’in ut laa’in eerik’in.
“Ani aj-ik’in wankeb’ lin chaq’rab’, wi naxpaab’ li neke’xye, a’an li narahok we. Ut li narahok we, taarahe’q xb’aan lin Yuwa’; ut laa’in ajwi’ tinra ut tink’ut wib’ chiru.
“Kiyehe’k ut re xb’aan laj Judas (maawa’ laj Judas Iskariote): Qaawa’, k’a’ru xk’ulmank naq chiqu chik laa’o taak’ut aawib’ ut ink’a’ chiru li ruchich’och’?
“Kichaq’ok li Jesus ut kixye: Ani narahok we, tixk’e xch’ool chirix li waatin; lin Yuwa’ taarahoq re, toochalq rik’in ut tqak’ojob’ qana’aj rik’in.
“Ani ink’a’ nikinxra ink’a’ naxk’e xch’ool chirixeb’ li waatin, ut li aatin nekerab’i moko we ta, re b’an li Yuwa’b’ej li kitaqlank chaq we.
“Xinye eere a’in naq toj wankin sa’ eeyanq.
“A’b’an laj K’ojob’anel ch’ool, a’ li Santil Musiq’ej li tixtaqla chaq li Yuwa’b’ej sa’ ink’ab’a’, a’an textzol chirix chixjunil ut tixjultika eere chixjunil li xinye eere.
“Li tuqtuukil usilal ninkanab’ eerik’in, lin tuqtuukil usilal nink’e eere; ink’a’ nink’e eere kama’ naxk’e li ruchich’och’. Misachk eech’ool chi k’oxlak,chi moko chexxuwaq.”2
Xintzol oob’ li na’leb’ sa’ li kixk’ut li Kolonel aran.
Xb’een, li maatan re tuqtuukilal a’an nak’eeman chirix naq ak wan qapaab’aal chi ab’ink chiruheb’ lix taqlahom. Choq’ reheb’ li komon li okenaqeb’ sa’ sumwank sa’ lix Iglees li Qaawa’, li ab’ink a’an li ak xqayeechi’i naq taqab’aanu.
Xkab’, li Santil Musiq’ej taachalq ut taakanaaq qik’in. Li Qaawa’ naxye naq wi tiiko chi paab’ank, li Santil Musiq’ej taakanaaq sa’ qaam. A’in li yeechi’inb’il sa’ li tij re li loq’laj wa’ak, naq li Musiq’ej toorochb’eeni ut naq taqeek’a xk’ojob’ankil li qach’ool ut li qak’a’uxl.
Rox, li Kolonel naxye naq wi neke’qapaab’ li qasumwank, naru naqeek’a lix rahom li Yuwa’b’ej ut li K’ajolb’ej chirib’ileb’ rib’ ut choq’ qe laa’o. Naru naqeek’a naq nach’ wankeb’ qik’in sa’ li qayu’am, jo’ chanru naq taqeek’a naq osob’tesinb’ilaqo chi wank rik’ineb’ a’an chi junelik q’e kutan.
Xkaa, re xpaab’ankileb’ lix taqlahom li Qaawa’, mas wi’chik ajb’il ru chiru yal ab’ink. Tento taqara li Dios chi anchal qach’ool, qametz’ew, qak’a’uxl, ut qaam.3
Eb’ li ink’a’ neke’rahok re, ink’a’ ajwi’ neke’ab’in chiruheb’ lix taqlahom. Chi jo’kan naq ink’a’ te’xk’ul li maatan re tuqtuukilal sa’ li yu’am a’in chi moko sa’ li yu’am chal re.
Ro’, saqen ru naq k’a’jo’ naq kooxra li Qaawa’, jo’kan naq kixtoj xtz’aq li qamaak re naq laa’o—rik’in li qapaab’aal chirix a’an ut lix jalb’al qak’a’uxl, sa’ xk’ab’a’ lix tojb’al rix li maak xb’aan—tooruuq chixk’ulb’al li maatan re tuqtuukilal li “naxq’ax ru chixjunil li na’leb’,”4 sa’ li yu’am a’in jo’ ajwi’ rik’in a’an chi junelik q’e kutan.
Wankeb’ eere, maare naab’alex, li ink’a’ nekereek’a li tuqtuukilal kixyeechi’i li Qaawa’. Maare neketz’aama sa’ tij naq taatuqlaaq ut taak’ojob’aaq eech’ool sa’ musiq’ej. A’ut toj nekereek’a naq tz’apb’il li choxa chiru lee tz’aam re xk’ulb’al tuqtuukilal.
Wan jun aj xik’ ilol re lee raam li ink’a’ naraj naq laa’ex, ut eb’ ajwi’ lee komon, teetaw tuqtuukilal. A’an ink’a’ naru naxtaw. Naxyal xq’e chixramb’al cheru li ajom re xtawb’al li tuqtuukilal neke’raj li Kolonel ut li qaChoxahil Yuwa’ naq teetaw.
Chanchan naq yoo chi nimank lix yalb’al xq’e laj Satanas chirawb’al li xik’ ilok ut li wech’ok-ib’ sa’ chixjunil na’ajej. Naqil reetalil a’an sa’eb’ li tenamit, li k’aleb’aal, li kutb’il sa’ television ut internet, ut chiru chixjunil li ruchich’och’.
A’ut toj wan qoyb’enihom: a’an naq lix Saqen li Kristo nak’eeman re li junjunq chi k’uula’al li yoo chi chalk. Rik’in li xnimal ru maatan a’an nachal jun nawom chirix li tiikilal, jun ajom re rahok ut re rahe’k. Chixjunileb’ li ralal xk’ajol li Dios neke’chal sa’ ruchich’och’ rik’in jun nawom chirix li tiik ruhil na’leb’ ut li yaal li na’alan sa’ xch’ooleb’.
Li qoyb’enihom chirix li tuqtuukilal choq’ reheb’ li kok’al naxtaw xxe’ rik’ineb’ li neke’ilok reheb’. Wi eb’ li te’k’iresinq reheb’ ut te’kanjelaq chiruheb’ ak xe’xyal xq’e chixk’ulb’al li maatan re tuqtuukilal rik’in li Kolonel, eb’ a’an, rik’in xb’aanuhomeb’ ut xk’anjeleb’, te’xwaklesi lix paab’aaleb’ li kok’al re te’xsik’ xk’ulb’al li nimajwal maatan re tuqtuukilal.
A’an li yeechi’inb’il sa’ li loq’laj hu: “K’e xna’leb’eb’ li kok’al naq toj saajeb’; ut naq toxe’tixq, ink’a’ taasachq sa’ xch’ooleb’.”5 Taa’ajmanq ru naq li ani te’k’iresinq ut te’ch’olaninq reheb’ li kok’al k’ulub’ejaqeb’ re xk’ulb’al li maatan re tuqtuukilal.
A’b’an, chiqajunilo naqeek’a xrahil qach’ool naq eb’ li kok’al li k’iresinb’ileb’ xb’aan xchaab’il na’ xyuwa’—wan naq jun ajwi’ reheb’—moqon neke’xsik’ ru, chirix jun yu’amej re paab’aal ut tuqtuukilal, naq te’xk’am li b’e re rahil ch’oolej.
Us ta nak’ulman li rahilal a’an, toj wan woyb’enihom sa’ jun chik xmaatan li Qaawa’. A’an a’in: a’an naxwaklesi naab’aleb’ li nekeʼkʼojobʼank re li tuqtuukilal sa’ xyanqeb’ lix tzolom. Neke’reek’a lix tuqtuukilal ut lix rahom li Dios. Wan li Santil Musiq’ej sa’ xch’ooleb’, ut li Qaawa’ naru naxb’eresiheb’ chixtenq’ankileb’ li karneer sachenaqeb’.
Wilom a’an sa’ lin yu’am ut chiru li ruchich’och’. Laa’ex ajwi’ eerilom. Wan naq, chanchan naq yal chi jo’kan naq xoob’eresiik sa’ li kolb’a-ib’.
Jun sut, kinpatz’ re jun kristiaan xinnaw ru sa’ lin b’eenik, “Ma taaye b’ayaq we chirix laa junkab’al?” Sa’ li aatinak kinpatz’ re ma naru twil xjalam-uuch lix rab’in li ak nim, li yoo chixnumsinkil li ch’a’ajkilal. Kitoch’e’ inch’ool xb’aan li chaab’ilal wan sa’ rilob’aal li ixq sa’ li jalam-uuch. Kinmusiq’aak chixpatz’b’al ma naru tink’ul lix correo electronico. Sa’ li hoonal a’an sachenaq li rab’inb’ej a’in ut yoo xk’a’uxl ma wan li naraj li Dios xyeeb’al re. Yaal naq xwan. A’an a’in: “Li Qaawa’ nakatxra. Junelik nakatxra. Li Qaawa’ naraj naq tatsutq’iiq. Toj wankeb’ li osob’tesink li yeechi’inb’ileb’ aawe.”
Eb’ li komon sa’ li Iglees ak xe’reek’a lix maatan li Qaawa’ re tuqtuukilal sa’ junesal. A’an naraj naq chixjunileb’ te’xtenq’aheb’ li ras riitz’in chi chalk rik’in a’an ut chixk’ulb’al li tuqtuukilal a’an. Toja’ naq eb’ a’an ajwi’ te’xsik’ ru xsik’b’al xmusiq’ankileb’ re te’xnaw chan ru te’xnumsi li maatan a’an re xkomoneb’ chik.
Li tasal tenamit li yoo chi k’iik anajwan te’wulaq choq’ aj ch’olanihom reheb’ li kristiaan te’chalq moqon. Li k’ihank a’in tixk’e chi uxk jun sachb’a-ch’oolej. Taajek’imanq ut taanimanq rik’in xnumik li hoonal, ut lix awa’b’ejihom li Qaawa’ sa’ li ruchich’och’ taakawresimanq ut yo’oon taawanq chixk’ulb’al a’an rik’ineb’ li japok-e re hosanna. Taawanq tuqtuukilal sa’ ruchich’och’.
Ninch’olob’ xyaalal naq yo’yo li Kolonel ut naq a’an naxb’eresi li Iglees a’in. Week’ahom lix rahom sa’ lin yu’am ut lix rahom choq’ reheb’ chixjunileb’ li ralal xk’ajol li qaChoxahil Yuwa’. Lix b’oqom li Kolonel re chalk rik’in a’an, a’an jun maatan re tuqtuukilal.
Li Awa’b’ej Russell M. Nelson a’an lix yo’yookil profeet li Dios choq’ re chixjunil li ruchich’och’. A’an kixye, “Ninye chi yaal eere naq maak’a’ naxye k’a’ru yoo chi k’ulmank sa’ li ruchich’och’ ut sa’ lee yu’am, naru nekek’ul li taachalq chalel rik’in yo’onink ut sahil ch’oolej.”6
Nekexinra. Lee nimla paab’aal ut rahom yoo chixtoch’b’aleb’ li kristiaan ut chixtenq’ankil li Qaawa’ chixjalb’al xch’ooleb’ re te’raj xq’axtesinkil reheb’ li ras riitz’in li maatan re tuqtuukilal li naxq’ax ru chixjunil li na’leb’.
Nintz’aama naq teetaw tuqtuukilal, naq teetenq’aheb’ naab’al chixtawb’al, ut naq eb’ a’an te’xnumsi reheb’ naab’al chik. Taawanq jun mil chihab’ re tuqtuukilal naq li Kolonel taak’ulunq wi’chik. Chi sa inch’ool ninch’olob’ xyaalal a’an sa’ xk’ab’a’ li Jesukristo, amen.